Jisho faŋ bəne gbifumanyaaŋ ə nchɔ bəfwe
10
Ə chu bwɔɔ nnu dɨŋ, Baba bwa bəne bədi gbifumanyaaŋ ə nchɔ bəfweª (72). Faŋ bə́ fwi, bəfwe bəfwe lə bə́ gəŋ ə bibalaki bitənə mə, gəŋ ə bidɔhɔ binhliŋ mə bbɨŋ bi duŋ lə mə lə jaa ə bi mə. 2 Ə chulə i yu fāŋ bə́ i yɔɔ lə, “Biləə ŋaŋna gbaaŋ, kwaalə bəne bəbuhunə bie chɛɛ. Nəni, yee bə chêe Chu lə Baba Che wɛɛh kɨhŋ faŋ bəne bəbuhunə biləə bie ə wɛɛh kiih mə. 3 Bə gəŋ. Ye bə bie bə gə̄ŋ lə, yee bə kə̂lə lə nfaŋna bəŋ lə bə gəŋ ye bwɔni bə shɔ́ŋ lə ə bəŋgumi mə. 4 Bwɔɔ nnu bə gəŋ, mbɛɛ kə jəə fibwa fi kpo, ləkə kibwa, ləkə bikpa bidi kə. Bwɔɔ nnu bə fu ə je, bə kə lemi cheemə bə bəne kə. 5 Bwɔɔ nnu bə gəŋ lɛɛ ə chəŋ nni bə lə lɛɛ ye mu, bə hlaa chee bəne bə chəŋ bie lə, ‘Kindunshiiŋ duŋ yuŋ chəŋ.’ 6 Ə mbɛɛ nnu i lèki kindunshiiŋ lə duŋ mu, ə kindunshiiŋ kie fiimə chu ə wu go. Ə mə nakə duŋ nə, ə kindunshiiŋ kie fiimə chu bə bəŋ. 7 Bwɔɔ nnu bə lɛɛ chəŋ, yee bə nɔ̂ŋ kwaa ə duŋ mu. Bə kə yee bə gâanə chə́ŋ kə. Fieŋ fidinə finhliŋ ffɨŋ bə́ nə̀ bəŋ, yee bə dî, bə ŋwì, yulahalə mbɛɛ nimi, kənə bəŋkənə bikoonə biih. 8 Ə bə lɛɛ ə kitɨŋ kwuŋ, ə bə́ tɨŋ jə bəŋ, nə bəŋ maa ə duŋ laha lə bə di, yee bə dî bu dinə. 9 Bwɔɔ nnu bə ləə bə dūŋ həmə, yee bə ŋwûhuŋ bəne bə jə́ŋ, bə dòntə bə bəne bənhliŋ lə muŋkɨŋ mu Chu baha kaa ə bə́ go. 10 Kwaalə, ə bə lɛɛ ə kitɨŋ kwuŋ, ə bə́ nɨhŋ kə tɨŋ nə jə bəŋ, bə fu gəŋ ye jé təhlə bə diimə lə, 11 ‘Luu li kitɨŋ kieeŋ llɨŋ kkə jə le ə wuh ŋiaa go, lɨhŋ li fəŋ llɨŋ kkə bie kkə kwīli, bieŋ binhliŋ choo ə bikuu bieeŋ bəŋ. Kwaalə, bə kələ lə muŋkɨŋ mu Chu baha kaa.’ 12 N'yɔ̄ɔ bə bəŋ lə, ə yáa ə dūŋ butuu bu nhlaah nu həŋgbɔŋ, bieŋ yá bɛŋki ə kibalaki ki Shɔdɔŋ mə kah kibalaki kie.”Ŋgə bitɨŋ bbɨŋ bi mà nɨhŋ bənfii tɔ́ŋ ŋəbi
13 Jisho ja yɔɔ lə, “Ŋgə ŋkuntaŋ dùŋ weŋ, bəŋ bəne bə Kolashiŋ, ŋgə ŋkuntaŋ duŋ dəŋ weŋ bəŋ bəne bə Beshayida. Bə kələ lə, ə màa duŋ lə bieŋ bi ŋɨŋ gəə bbɨŋ mmà nfə bie bə bəŋ lə mmàa nfə bi ə duŋ ə Taya bə Shidɔŋ, fo bə́ mà leela bindu biyi bi kpe, kəŋ bu go bənyii lə bə́ fiila tɔ́ŋ ŋəbə. 14 Bə kələ lə ə yáa ə dūŋ butuu bu nhlaah nu həŋgbɔŋ, bieŋ yá bɛŋki bə bəne bə Taya maa bə Shɔdɔŋ kah bəŋ. 15 Maa bəŋ bəne bə Kapanahuŋ, bə hlē lə duŋ ə bə́ bihiŋ bəŋ ə bə biŋ buh lə? Ye. Bə́ yá kaka bwɔ bə bəŋ ə kitɨŋ ki bəŋkpi kwuŋ.” 16 Jisho hlə yɔɔ bə bəne bbəŋ i mà faŋ bie lə, “Ə mbɛɛ lə wo bəŋ, kəə i wò ə duŋ mi. Ə mbɛɛ lə nɨhŋ bəŋ, kəə i nɨ̀hŋ ə duŋ mi. Mbɛɛ lə nɨhŋ mi, kəə i nɨ̀hŋ ə duŋ mbɛɛ nnu i faŋ yo mi.”
Fieŋ ffɨŋ mbɛɛ kintu ki Jisho kənə bəŋ'wo njənjə bə fi
17 Bəne bə gbifumanyaaŋ ə nchɔ bəfwe bie bwo kwələ chu dɨŋ bə́ wō njənjə, hlə yɔɔ bə Jisho lə, “Baba, kkə maa kkə chēe yii lo, maa muŋkwini dəŋ wò kwaa ə duŋ bə be.”
18 Jisho chuu bə bə́ lə, “Ŋŋəŋna ye Hlaata gbe bwo buh ye jaŋ lala gbe lɛɛ kwe. 19 Nnəə kaa bəŋ muŋgeni mmuŋ duŋ ə bə diɛŋ yɔ́ bə bəkunama mu. Mbaa nnə muŋga mmuŋ mu kàh muŋga mu Hlaata bə mbɛɛ mənhliŋ nnu i duŋ yo kə diee njənə bə bəŋ kiɛkiɛ. Fieŋ lə nɛhiŋ bəŋ kə. 20 Kwaalə, bə kə woo njənjə lə muŋkwini woo bəŋ kə. Bə wo ə duŋ njənjə lə Chu bieŋna yíi ŋieeŋ ə kiŋwaati ki buh mə.”
Jisho wò njənjə
21 Ə bwɔɔ yo bəŋ, Fiana Wɛɛŋ fə Jisho yee i wō njənjə. I hlə yɔɔ lə, “N'yu nnə̄ kimbaafɛɛ bə wə Tah Ŋkɨŋ buuli bə shishɔ ye wə nəla lə bieŋ bɨhŋ bə bəbufe maa bəne bəŋkələ bieŋ, nyii ə duŋ bə bwɔni bə wɛ. Ə li nnu fi duŋ Tah, yulahalə fi duŋna ye wə mà hle lə lə fi duŋ.”
22 Jisho baa yɔɔ lə, “Tah mà nəə bieŋ binhliŋ bə mi. Mbɛɛ hləŋ həmə nnu i kə̀lə Ŋiaŋ, kahiŋ kwaa Tili nnu i kə̀lə. Mbɛɛ hləŋ həmə nnu i kə̀lə Tah, ə kwaa mi Ŋiaani bə bəne bbəŋ Ŋiaani shaala bənyii bə́ bə Tili.”
23 I hlə ja fiimə yɔɔ ə duŋ bə bəne biih bə kintu bə́ bə́ lə, “Kintɨŋ kiŋkuntaŋ dùŋ bə bəŋ bbəŋ díi ŋieeŋ ŋəŋna ə bieŋ bɨhŋ go. 24 Bə kələ lə bəne bə hlɨŋ Chu bə bəŋkɨŋ màa bə́ dē bəŋəŋ ə bieŋ bbɨŋ bə ŋə̀ŋ bɨhŋ go, bə́ nakə ŋəŋ nə kə. Yee bə́ dē dəŋ bəŋ'wo bieŋ bbɨŋ bə wò bɨhŋ, bə́ nakə woo kə.”
Ŋgaŋga ki ŋwuŋ nnu Shamalia nwaa
25 Fi bwo ja gbe lə, mbɛɛ ju nnu i mà kələ ba bəŋkɨnə bə Chu, mà bwoo mɔŋ Jisho, i hlə bii bə wu ləə, “Mbɛɛ Keehnə, fieŋ ffɨŋ nduŋ nfə ə nhlə kənə kinduŋh ki kə kaa duŋ laha lə?”
26 Jisho bii bə wu ləə, “Bə́ bieŋna ə Kiŋwaati ki Chu mə lə mbɛɛ fə ləhəŋ lə? Wə chèe wə wò lə ləhəŋ lə?”
27 I chuu lə, “Bə́ bieŋna lə,
‘Leki Baba Chu wa bə tɔŋ lo linhliŋ,
nə gbo wo bə wu winhliŋ,
nɨŋ bə wu bə muŋga mwo munhliŋ,
yii bufe bwo ə wu mə bunhliŋ,
yee wə lêki mbɛɛ nnu i dùhŋ ə wə tɨŋ ye wə lèki lə gbo wo.’”
28 Jisho yɔɔ lə, “Wə chuula yəəŋ. Yee wə fə̂ nəni ə wə yá hlə kənə kinduŋh ki kə kaa.”
29 Mbɛɛ yo hlə ja kiɛɛ lə i nyii lə mə lə mbɛɛ, i bii bə Jisho ləə, “Ŋgwoŋ lə nyəhə lə?” 30 Jisho chuu ə duŋ ə ŋgaŋga mə lə, “Mbɛɛ ju mà noo ə Jelushalɛŋ yee i bwɔ̄ gəŋ ə Jeliku, ə chulə yee i bwɔ̄, i gəŋ lɛɛ ə bəbuyi kwáŋ. Bə́ kwuŋ wu, i chu chəələ bəŋkpe, bə́ fwoo jə bindu biih maa bieŋ biih kiɛkiɛ, hlə lɛɛ chi wu həmə lɔ no. 31 Fi bwo ja duŋ lə mbɛɛ ju màa i bwō bwɔ ə je ye mə ə duŋ che ntofi, lə i ŋəŋ ə mbɛɛ yo go, i kəə kah wɛɛ mwe. 32 Mbɛɛ ju mà noo dəŋ yee i bwɔ̄ gəŋ mə, ə duŋ mbɛɛ ə kichəŋ ki Lebi mə, lə i bwo bwii həmə, lə i ŋəŋ ə wu go, i kəə kah dəŋ wɛɛ mwe. 33 Kwaalə, mbɛɛ ju ja dəŋ nnu i màa i jāa i bwō, ə duŋ ŋwuŋ nnu Shamalia. Lə i bwo bwii həmə, i ŋəŋ ə wu go hlɨŋ kwo wu. 34 I gəŋ ə wu bəŋ, shoo mbihŋ bə mɛŋ ə bibiaa biih bie go, kwaa bibiaa bie bə bindu, hlə tu wu ə hlɔmbwaa wi nnu i màa i jāa yo ə wu bəŋ, gəŋ bə wu ə chəŋ kpuuni mə yee i fwōŋ wu. 35 Bə́ nɔŋ, lə bu fu wu, i fwoo bənchuku gi fwe nə bə mbɛɛ chəŋ yo yɔɔ bə wu lə, ‘She yee wə fwōŋ mi mbɛɛ nu. Ə wə she bihi kpo kah wuhŋ, ə n'yá mbwo nchuu wə wi.’”
36 Ye Jisho gbalə nəni, i hlə bii bə mbɛɛ nnu i kə̀lə yo bəŋkɨnə ləə, “Ə bəne bə bətɔh bəhŋ mə, wə ŋəŋ lə mbɛɛ nnu i mà nyii lə i dùŋ dɨŋ mbɛɛ nnu bəbuyi mà kwuŋ yo lə nwɛhɛŋ lə?”
37 I chuu lə, “Ə màa mbɛɛ nnu i mà kwo yo hlɨŋ bə mbɛɛ yo.” Jisho hlə yɔɔ bə wu lə, “Gəŋ, yee wə fə̂ dəŋ lə.”
Jisho gah gəŋ ə bə Maata bə Meeli chəŋ
38 Jisho bə bəne biih bə kintu ja yee bə́ gə̄ŋ, bə́ gəŋ lɛɛ ə kwili lidi mə kpɛ ju duŋ həmə nnu bə́ chèe wu lə Maata. I ja tɨŋ jə gəŋ bə Jisho ə wu chəŋ. 39 I mà kənə maani ju nnu bə́ chèe wu lə Meeli. Ye Jisho mà gəŋ lɛɛ lə mu, Meeli hlə gəŋ shii baha ə wu tɨŋ yee i wə̄lə fieŋ ffɨŋ Jisho kēeh. 40 Maata duŋ ŋkwo wi i fɨ̄mə bənchu bəne. I ja bwo bii bə Jisho ləə, “Baba, wə kə ŋəŋ nə lə ŋgwoŋ nu tookwaŋ ə mi go n'yu fə̄ faanə mii mboŋ, wə bii lə kə lə? Yɔɔ kwaa lə i bwo chɨnə mi.”