Hlaata yee i mɔ̄ŋ Jisho
4
Fiana Wɛɛŋ hlə ja jə Jisho gəŋ bə wu ə nji lə hlaata mɔŋ wu. 2 I gəŋ yee i shī, i nɔ̄ŋ mə, kə diee fieŋ kə joo mbwɛɛnya ə bushi bə butuu. Bwɔɔ nnu dɨŋ jəbulə wu wu. 3 Wu nnu i màa i bā yo bəmɔŋ bəne hlə bwo yɔɔ bə wu lə, “Ə wə duŋ Ŋwa Nchu, wə yɔɔ tə́ ŋəhŋ chu chée yí buniɛŋ lə.” 4 Jisho chuu lə, “Fi duŋ bə́ bieŋna lə,‘Mbɛɛ dùŋ nə kwaa yu biləə kə.
Mbɛɛ dùŋ dəŋ yu die mənhliŋ nni i fù ə kijə ki Chu mə.’”
5 Nəni hlaata hlə jə gəŋ bə wu ə Jelushalɛŋ kibalaki kiwɛɛŋ mə, tɨŋ chi wu ə kinchu ki chəŋ ntofi bəŋ, 6 yɔɔ bə wu lə, “Ə wə duŋ Ŋwa Nchu, wə tee wa kwe, yu bə́ bieŋna lə,
‘Chu lə yɔɔ ə bənchinda biih fwoŋ wə.’
Fi duŋ dəŋ bə́ bieŋna lə,
‘Bə́ jɔŋ wə
ə wə nakə kɔɔ lə gbu wo ə tə go kə.’”
7 Jisho chuu bə wu lə, “Fi duŋ bə́ bieŋna dəŋ lə,
‘Wə kə mɔŋ nə Baba Chu wa kə.’”
8 Hlaata baa jə Jisho həmə, gəŋ chi wu ə kɔnɔ kindiɛɛ kidi bəŋ gbaaŋ, hlə nyii wu bitɨŋ bi yaŋ ə mbiŋ nu mə binhliŋ bə kiŋkuntaŋ kkɨŋ ki dùŋ ə bi mə. 9 Ye i nyii lə nəni, i hlə yɔɔ lə, “Nlə nnə bieŋ bɨhŋ binhliŋ bə wə, ə wə lə bwɔkwe bə mi.” 10 Jisho yɔɔ bə wu lə, “Kah no fəŋ Hlaata! Bə́ bieŋna lə,
‘Yee wə bwɔ̂kwe bə Baba wa Chu, yee wə nɨ̂ŋ kwaa ə duŋ bə wu.’”
11 Nəni Hlaata hlə tukwaŋ ə Jisho go. Fi duŋ lə bənchinda bə Chu mà bwoo həmə yee bə́ fwōŋ wu.
Jisho chɔɔ nimi liih ə Galilii
12 Lə Jisho wo lə bə́ kwoo Jɔɔŋ N'yiinjɔ fwaŋ ə chəŋ munfwa mə, i hlə no fiimə chu dɨŋ ə Galilii. 13 I gəŋ bwii ə Nashalit, ja həmə gəŋ yee i dūŋ ə kibalaki ki Kapanahuŋ mə. Kibalaki kɨhŋ duŋ baha ə Nɔ nnu Galilii tɨŋ maa baha ə bidi bi bəne bə Jebuluŋ bə Naftali mə. 14 Fɨhŋ nini mà duŋ nəni bəmbwo gbeemə yəəŋ ye mbɛɛ hlɨŋ Chu Ejaya mà yɔɔlə lə,
15 “Bidi bi Jebuluŋ bə bi Naftali
bbɨŋ bi dùŋ baha ə nɔ go, Kibee ki Joodaŋ wukwi,
ə shishɔ yi Galilii mə, dɔhɔ ki bəne bbəŋ bə́ dùŋ kə duŋ nə Bəjuu,
16 bəne bbəŋ bə́ màa bə́ dūŋ ə jɨbə mə,
ŋəŋna ə kinchaa kiŋkuntaŋ go.
Butuu woo
bə bəne bbəŋ bə́ màa bə́ dūŋ ə wɛɛ wu jɨbə wu kpe mə.”
17 Chɔɔ jə ə bwɔɔ yo bəŋ, Jisho hlə chɔɔ yee i dōntə bə bəne i yɔ̄ɔ lə, “Bə fii tɔ́ŋ ŋieeŋ, yulahalə muŋkɨŋ mu buh mwe baha baha.”
Jisho chee jə bəne bənua lə bə́ duŋ bəne biih bə kintu
18 Jisho ja yee i jāa baha ə Nɔ nnu Galilii tɨŋ, i ŋəŋ bəne bədi bəfwe, ə duŋ bə ŋwuŋ bə maani. Bəne bəhŋ duŋ Shaamuŋ nnu bə́ màa bə́ chēe dəŋ lə Pita, bəə maani Andulu, bə́ lɛ̄ɛ gbi ə nɔ mə, yu nimi libə màa fiɔŋ yí kwonə. 19 Jisho yɔɔ bə bə́ lə, “Yee bə bə̂lə mi, nlə nfə ə yee bə kwô ə duŋ bəne.” 20 Cha mi, bə́ hlə she gi ŋəbə ŋie yee bə́ bə̄lə wu. 21 Lə Jisho no həmə yee i gə̄ŋ, i baa ŋəŋ bəne bədi bəfwe, ə duŋ dəŋ bə ŋwuŋ bə maani. Bəne bəhŋ duŋ Jɛŋ bə maani Jɔɔŋ bwɔni bə Jebedee, bə́ duŋ ə kikpɔŋkɔ mə bəə tili bə́ Jebedee bə́ shwāali gi ŋəbə. I chee dəŋ bə́. 22 Cha mi bə́ hlə she kikpɔŋkɔ kie maa tili bə́ yee bə́ bə̄lə wu.
Jisho kèeh bəne i ŋwùhuŋ dəŋ jə́ŋ yibə
23 Jisho ja yee i jāa ə bidi bi Galilii mə binhliŋ i làanə bəne ə chə́ŋ yí cheenə Chu yibə mə, i baa i dòntə hlɨŋ nwaa ki muŋkɨŋ mu Chu. I màa i ŋwūhuŋ dəŋ go maa jə́ŋ yinhliŋ yí bəne. 24 Nəni, hlɨŋ yi ye hlaamə gəŋ ə kitɨŋ ki Shilia mə kinhliŋ. Bəne hlə yee bə́ bwō bə bəne bənhliŋ bbəŋ bə́ màa bə́ gɔ̄ŋ ləkə bbəŋ bə́ màa bə́ wō kinlogo, ləkə bbəŋ muŋkwini mà fəə bihi bə́, ləkə bbəŋ bə́ màa bə́ gbēkwe, ləkə bbəŋ bə́ mà kpee wɛɛ mwe. Bə́ mà bwoo həmə, i ŋwuhuŋ bə́ bənhliŋ. 25 Maa fəhəŋ nnu i màa i gə̄ŋ bimɔ bi bəne biŋkuntaŋ bə̄lə wu dɨŋ. Bəne bəhŋ nō ə bidi bi kitɨŋ ki Galilii mə, bədi nō ə Bibalaki bi Yuufi mə, bədi ə Jelushalɛŋ maa ə ŋəŋkwili ŋəndi ŋə Judia mə. Bədi nō ə Kibee ki Joodaŋ wukwi.