Ŋgaŋga ki mbɛɛ nnu i mà jə bəne bə nimi yii ə wu sho
20
Jisho baa yɔɔ lə, “Muŋkɨŋ mu buh duŋ ye che kwili ju nnu i mà fu fili fili lə i gəŋ jə bəne bə nimi yii ə wu sho. 2 Ye i mà gəŋ lə gəŋ ŋəŋ ə bə́ go, bəə bə́ hlə fə chuŋ lə mə lə hluŋ bə́ kibwa kibwa ə butuu go. I hlə faŋ bə́, bə́ gəŋ yee bə́ nɨ̄ŋ ə wu sho. 3 Lə yee ə dūŋ ye bitaŋ fumayuufi lə, i hlə fu gəŋ ŋəŋ bədi bəne lema ə shibəŋ fieŋ fi fənə hləŋ. 4 I yɔɔ bə bə́ lə, ‘Bə gəŋ nɨŋ dəŋ ə mi sho, nlə hluŋ bəŋ fieŋ ffɨŋ fi dùŋ yəəŋ.’ Bə́ hlə gəŋ. 5 I baa fu gəŋ ye hlɨŋ bushi lə, ə chu gəŋ bwii dəŋ ye bitaŋ bitɔh lə, i jə dəŋ bəne bə nimi. 6 Ə chu gəŋ ye bitaŋ bitiŋ lə hə kitaŋ, i baa fu gəŋ ŋəŋ bəne bədi lema. I bii bə bə́ ləə, ‘Ə yulaha ffɨŋ bə́ shī fəŋ bə jɨ̄ɨŋkə nya butuu bumbɨŋ lə?’ 7 Bə́ chuu lə, ‘Ə yulahalə mbɛɛ kə jəə be ə nimi mə kə.’ I hlə yɔɔ bə bə́ lə, ‘Bə gəŋ nɨŋ ə mi sho.’8 Ə bwo duŋ hə kitaŋ, che wɛɛh yo bwo yɔɔ bə ŋkafwi bəne biih bə nimi bie lə, ‘Dii bəne bə nimi bie, nnə bikoonə bibə, gbe jə bə bəne bbəŋ bə́ hə bwo bie dɨŋ, gəŋ kpee həŋgbɔŋ bə bbəŋ bə́ hə hlaa bie bwo fwii.’ 9 I hlə chɔɔ bənhluŋ bə́. Bəne bbəŋ bə́ mà jə bie bə́ ə nimi mə ə bitaŋ bəŋ bitiŋ bwo i hluŋ bə́ bibwa gi fwe. 10 Bwɔɔ nnu bəne bbəŋ bə́ mà hlaa bie jə bwo, bə́ hle lə mə lə hluŋ bə́ kah bədi bie. Kwaalə, bə́ hluŋ dəŋ bə́ bibwa gi fwe. 11 Bə́ jə bikoonə bibə bie hlə gbe bəŋwuunə ki che wɛɛh yo, 12 bə́ yɔ̄ɔ lə, ‘Bəne bbəŋ wə hə jə bie dɨŋ nɨŋna kwaa ntaŋ bwɔɔ mwi, bələh wə hluŋna be bə bə́ yəəŋ, ə duŋ be bbəŋ kkə hə shi bəŋɛkɛ bənimi butuu bumbɨŋ ə ŋwiŋ nte.’ 13 Che wɛɛh yo chuu bə mbɛɛ ju ə bə́ mə lə, ‘Mbweŋ, ŋkə bihi fieŋ bə wə kə. Bee wə hə kə fəə chuŋ yi nimi yu bibwa gi fwe kə lə? 14 Jə bikoonə bwo yee wə gə̄ŋ. Ə leki mi nlə nhluŋ mbɛɛ nnu dɨŋ dəŋ yəəŋ ye nhluŋ lə wə. 15 Ŋkə̀nə lə muŋgeni bənfə fieŋ ffɨŋ nlèki bə fieŋ ffɨŋ fi dùŋ fɨŋŋ kə lə? Lii wə kpooli yulahalə ŋ'wɛɛ kwáŋ ŋəŋŋ bə bəne lə?’” 16 Ye Jisho yɔɔlə nəni, i hlə kaanə lə, “Ə lə dəŋ yəəŋ ye bəne bbəŋ bə́ dùŋ dɨŋ fidiɛɛ yáa bə́ dūŋ bəne bə fwi, ə bə fwi yee bə́ dūŋ bə dɨŋ.”
Jisho baa yɔɔ ki dɨŋ kpe nni mə lə kpe ye
17 Lə Jisho ja yee i bīŋ ə Jelushalɛŋ, wu bəə bəne biih bə kintu bə yuufi ə nchɔ bəfwe bie fu ə je, i chee jə bə́, bə́ chu həkpɛɛli, i yɔɔ bə bə́ lə, 18 “Bə wələ wo, kkə bie kkə bīŋ gəŋ ə Jelushalɛŋ, bə́ lə gəŋ nə Ŋwa Mbɛɛ ə kwáŋ ŋə bəche ntofi bəŋkuntaŋ bəŋkuntaŋ mə maa bəne bbəŋ bə́ kèeh bəŋkɨnə bə Chu, ə bə́ hlaah wu kaalə lə bə́ jii wu, 19 hlə nə wu ə kwáŋ ŋə bəne bbəŋ bə́ dùŋ kə duŋ nə Bəjuu, ə yee bə́ fē bə wu, kwuŋ wu bə muntələ, hlə bweeni wu ə kiŋgwa go, əə bwo chu ə joo bəŋ tɔh ə Chu fwoo chuu wu ə kpe mə.”
Mah Jɔɔŋ bə Jɛŋ noŋ biŋkaa bi bwɔni biih bə Jisho
20 Mah bwɔni bə Jebedee ja bwo chili Jisho bə bwɔni biih, bɛŋ núh ə wu fwi bənoŋ fieŋ. 21 Jisho bii bə wu ləə, “Wə kiɛɛ ə duŋ laha lə?” I yɔɔ bə wu lə, “Kaŋ lə ə yáa ə dūŋ bwɔɔ nnu wə yáa wə hlāah muŋkɨŋ mwo, ə bwɔni bəŋŋ bə bəfwe bəhŋ yá shii baha ə wə go, ju yo ə kwaŋ wi diee, ju yo kwaŋ məə.” 22 Jisho chuu bə mah bwɔni bie lə, “Bə kə kələ fieŋ ffɨŋ bə bīi fie kə. Ə duŋ ə bə yá kaamu bəŋwi ə kwooh ki ŋgə kkɨŋ n'yá ŋŋwi kie mə lə?” Bə́ chuu lə, “Duŋ ə kkə kaamu.” 23 I yɔɔ bə bə́ lə, “Bə lə ŋwi ə kwooh kɨŋŋ mə bə kichɛɛŋ. Kwaalə bənshii ə kwaŋ wuŋŋ wi diee mə bə wi məə mə kə duŋ nə dɔhɔ kɨŋŋ bənnə bə bəŋ kə. Bidɔhɔ bie dùŋ ə duŋ bə bəne bbəŋ Tah mà bwɛɛla chi bə bə́.” 24 Ə chulə bəne bə kintu bə Jisho bə yuufi bəhŋ wo ki fieŋ fie, tɔ́ŋ lo bə́ bə bəne bə bəfwe bie. 25 Kwaalə Jisho hlə chee bə́ bənhliŋ, bə́ bwo i yɔɔ bə bə́ lə, “Bə kə kələ lə bəne bbəŋ bə́ hlàah bitɨŋ shìi ə bəne bəbə bəŋ, bəne bəŋkuntaŋ bəŋkuntaŋ bəbə nyìi muŋgeni mubə gbaaŋ yu bə́ lə? 26 Fimbini fie fieŋ kə duŋ nə ə bəŋ mə kə. Mbɛɛ nnu i kìɛɛ lə yee i dūŋ mbɛɛ ŋkuntaŋ ə bəŋ mə, ə wu nnu i duŋ lə yee i nɨ̄ŋ ə bəŋ mə. 27 Mbɛɛ nnu i kìɛɛ lə yee i dūŋ mbɛɛ nnu fwi ə bəŋ mə, kəə i kənə bənduŋ nfwa weŋ. 28 Ə lə dəŋ yəəŋ ye Ŋwa Mbɛɛ mà kə bwoo lə yee bəne nɨ̄ŋ ə wu dɨŋ kə. I mà bwo lə yee i nɨ̄ŋ ə duŋ bə bəne, i nə kinduŋh kiih bən'yah bəne kiŋaaŋkə ə kpe mə.”
Jisho wɛ díi ŋə bəmbandii bəfwe
29 Lə Jisho bə bəne biih bə kintu yee bə́ kāh ə Jeliku, kimɔ ki bəne kiŋkuntaŋ bə̄lə wu dɨŋ gbɛɛɛ. 30 Fi duŋ lə bəmbandii bədi bəfwe, ə duŋ bənəə bbəŋ bə́ màa bə́ bā bənshii ə je, ə chu lə bə́ wo lə Jisho yu kāh, yee bə́ gɛ̄ɛmə bə́ yɔ̄ɔ lə, “Baba, Ŋwa Ŋkɨŋ Daafi, kwo hlɨŋ bə be.” 31 Kimɔ ki bəne kie yee ki nyīeemi bə́ ki yɔ̄ɔ lə, bə́ maalə. Kwaalə bə́ gaa gɛɛmə gəŋ fwi fwi lə, “Baba, Ŋwa Ŋkɨŋ Daafi kwo hlɨŋ bə be.” 32 Jisho hlə lemi, chee bə́, bə́ bwo, i bii ləə, “Bə kiɛɛ lə nfə bəŋ laha lə?” 33 Bə́ chuu lə, “Baba, fə díi ŋiaa wɛɛmə.” 34 Hlɨŋ kwo Jisho, i tuu ə díi ŋəbə go. Cha mi bə́ hlə gbe bə mbaa ŋəŋ chuu ə bieŋ go, bə́ hlə ja yee bə́ bə̄lə Jisho.