Matio 18

Mbɛɛ ŋkuntaŋ ə muŋkɨŋ mu buh mə

Ə mà duŋ dəŋ ə bwɔɔ yo bəŋ, bəne bə Jisho bə kintu bwo bii bə wu ləə, “Mbɛɛ nnu i kò kah mbɛɛ mənhliŋ ə muŋkɨŋ mu buh mə lə nyəhə lə?” 2 Jisho hlə chee jə ŋiaŋ wɛ ju chi ə bə́ mə kintekinte, 3 yɔɔ lə, “N'yɔ̄ɔ bəŋ kichɛɛŋ lə, ə bə nakə gaanə chu ye bwɔni bə wɛ lə, kəə duŋ ə bə yá lɛɛ ə muŋkɨŋ mu buh mə kə. 4 Maa nyəhə nnu i jə̀ gbo wiih ye ŋiaŋ wɛ nu lə, ə wu nnu i yá duŋ ŋwuŋ ŋkuntaŋ ə muŋkɨŋ mu buh mə. 5 Ə mbɛɛ lə tɨŋ jə ŋiaŋ wɛ ye nu lə ə yii lɨŋŋ bəŋ, kəə i tɨ̀ŋ jə ə duŋ mi.

(Maak 9:42-48; Lukaa 17:1-2)

6 Ə duŋ lə mbɛɛ ju yee i fə̄ bə mbɛɛ nnu i yiila tɔŋ ə mi mə ye bwɔni bə wɛ bəhŋ lə, lə bə́ fə yiwaha, ə fi nwaa lə bə́ hlu mbɛɛ yo niɛɛ liŋkuntaŋ ə mɛɛ kiih go, yəə wu ə dɔhɔ ki duumə ki nɔ mə. 7 Ŋgə ŋkuntaŋ duŋ bə bəne bə yaŋ mbiŋ nte, yu bieŋ bbɨŋ bi lɛ̀ɛnti bəne bə́ fə̀ yíwaha. Bieŋ bɨhŋ kənə bənduŋ, kwaalə ŋgə ŋkuntaŋ dùŋ bə mbɛɛ nnu i bwò yo bə bieŋ bie. 8 Ə kwaŋ wo ləkə gbu wo lə fə lə yee wə fə̄ yiwaha, wə kaalə kwaŋ we ləkə gbu we lɛɛ tələ. Fi nwaa lə wə lɛɛ ə kinduŋh ki kə kaa mə bə kwaŋ wuŋkaŋnə ləkə bə gbu wuŋkaŋnə, kahiŋ bəŋkənə kwáŋ ŋənhliŋ ləkə wuh ŋənhliŋ ə bə́ jə lɛɛ wə ə bwii wu kə kaa mə. 9 Ə dii lo lə fə lə yee wə fə̂ yiwaha, wə chɔ fwoo dii le lɛɛ tələ. Fi nwaa lə wə lɛɛ ə kinduŋh ki kə kaa mə bə dii mwe, kahiŋ bəŋkənə díi ŋo ŋənhliŋ lə bə́ lɛɛ wə ə bwii wuŋkuntaŋ mə.”

Ŋgaŋga ki shɔŋ nni i mà la

(Lukaa 15:3-7)

10 Yee bə jə̂ bwɔɔ, bə kə yee bə jə̂ bwɔni bə wɛ ə bəŋ mə kwe kə. N'yɔ̄ɔ bə bəŋ lə, ə buh ə bənchinda bə Chu bbəŋ bə́ shì bə bə́, bə́ bà bwɔɔ mənhliŋ ə Tah fwi nnu i dùŋ yo buh. 11 [Ŋwa Mbɛɛ mà bwo bənchɨnə bəne bbəŋ bə́ laa.]^ª

12 Bə hlè lə laha lə? Ə mbɛɛ lə kənə shɔ́ŋ gbi, ə mi lə la ə yí mə, ə i nakə hlaa lə tukwaŋ ə yí gbi fumayuufi ə nchɔ fumayuufi yé ə kɔnɔ go, gəŋ kiɛɛ shɔŋ mi nni mə hə la ye lə? 13 N'yɔ̄ɔ bəŋ kichɛɛŋ lə, ə mə kiɛɛ ŋəŋ ə yi go, ə yee i wō njənjə bə shɔŋ mi ye kah yí gbi fumayuufi ə nchɔ fumayuufi yyɨŋ yí hə na yé kə laa kə. 14 Ə lə dəŋ yəəŋ ye Chwa weŋ nnu i dùŋ yo ə buh dùŋ kə leki lə mbɛɛ mwi ə bwɔni bə wɛ bəhŋ mə la kə.

Ye duŋ ə mbɛɛ bwɛɛ bieŋ bə maani

15 Ə mwaa lə fə fieŋ fiwaha bə wə, wə gəŋ ŋəŋ wu yɔɔ gbenə kiih bə wu kwaa bəŋ bəə wu bəfwe. Ə mə wo fieŋ ffɨŋ wə yɔ̀ɔ, kəə wə jəə chuu mwaa dɨŋ. 16 Ə mə lə nakə woo fieŋ ffɨŋ wə yɔ̄ɔ, wə jə mbɛɛ mwi ləkə bəfwe kəənə bə wə, bə baa gəŋ ə wu go, fo biyɔɔnə binhliŋ lə kənə bəne bəfwe ləkə bətɔh bbəŋ bə́ lə bemi kah bə bi. 17 Ə mə nɨhŋ bəŋ'wo fieŋ ffɨŋ bə́ yɔ̀ɔ, wə jə wu fidiɛɛ gəŋ bə wu ə kimbumə ki bəne bə kimbemi mə. Ə mə nakə woo dəŋ kimbumə ki bəne bə kimbemi kie, wə jə wu ye mbɛɛ nnu i dùŋ kə kələ Chu ləkə ye mbɛɛ nnu i kwò kiŋwaati.

18 N'yɔ̄ɔ bəŋ kichɛɛŋ lə, fieŋ ffɨŋ bə lə kwaa yaŋ kwe, ə fi ffɨŋ bə́ kwaala ə buh, fieŋ ffɨŋ bə lə hlooli yaŋ kwe, kəə ə fi ffɨŋ bə́ hloola ə buh. 19 Mbaa n'yɔ̄ɔ bə bəŋ lə, ə bəne bəfwe ə bəŋ mə lə bemi bə fieŋ yaŋ kwe, noŋ bə Chu cheenə, ə Tah nnu i dùŋ yo buh fə bə́ fi. 20 Yee bə kə̂lə lə dɔhɔ kkɨŋ bəne bəfwe ləkə bətɔh bùmə ə yii lɨŋŋ bəŋ, kəə n'yo ə bə́ mə.

Ŋgaŋga ki mbɛɛ fie nnu i dùŋ kə kwoo hlɨŋ

21 Pita hlə baŋ gəŋ bii bə Jisho ləə, “Baba, ə chá miɛhɛŋ yyɨŋ ŋgwoŋ lə fə bieŋ biwaha bə mi, ə nlaamə nə wu lə? Duŋ ə fi gəŋ bwii ə chá bəŋ fumanyaaŋ lə?” 22 Jisho chuu bə wu lə, “Duŋ ə nnakə yɔɔ lə bə wə lə ə kwaa chá fumanyaaŋ kə. N'yɔ̄ɔ lə ə chá gbi fumanyaaŋ bə chá fumanyaaŋ. 23 Fiee fieŋ ffɨŋ duŋ ə bə́ fɛhiŋ fie muŋkɨŋ mu buh bə ŋkɨŋ ju nnu i mà kiɛɛ bəmbwɛɛ bə bəne biih bə nimi bbəŋ kpo wiih mà duŋ ə kwáŋ ŋəbə mə. 24 Ye i mà chɔɔlə bəmbuhuŋ, bə́ bwo bə mbɛɛ ju nnu i dùŋ wu bə fie bibwa bi kpo yuufi. 25 Ye i mà duŋ lə kə kaa lə mu bənhluŋ, ŋkɨŋ yo hlə yɔɔ lə bə́ jə wu bəə kpɛɛ maa bwɔni biih, maa bieŋ biih kiɛkiɛ taa bwo bə kpo we bwo hluŋ fie ye mu. 26 Ye ŋkɨŋ yo yɔɔlə nəni, mbɛɛ yo gbe wu fwi kwi kwáŋ, yɔɔ lə, ‘Baba, kwaa tɔŋ bə mi, n'yá yi nhluŋ fieŋ finhliŋ.’ 27 Hlɨŋ yi kwonə fə ŋwuŋ ŋkuntaŋ wi yo tukwaŋ ə wu go, laamə nə fie ye. 28 Kwaalə, bwɔɔ nnu mbɛɛ yo kibɛɛ mà fu gəŋ, i fu ə mbɛɛ ju nnu bəə wu nɨ̀ŋ bə ŋkɨŋ yo, i kə̀nə wu fie kibwa ki kpo mwe. I bu maŋ wu həgbe yɔɔ lə, ‘Hluŋ fie wa.’ 29 Mbɛɛ nimi yo gbe dəŋ ə wu fwi, kɔnɔ wu yɔɔ lə, ‘Kwaa tɔŋ bə mi, n'yá yi nhluŋ wə.’ 30 I nɨhŋ, jə gəŋ fwaŋ wu ə chəŋ munfwa mə lə yee i dūŋ mu gəŋ bwii ye mə hluŋ fie yi. 31 Lə bəne bədi bbəŋ bəə bə́ màa bə́ nɨ̄ŋ bie ŋəŋ fieŋ ffɨŋ fi duŋna fie, fi lo bə́ go gbaaŋ. Bə́ hlə gəŋ yɔɔ fieŋ finhliŋ ffɨŋ fi hə duŋna bə ŋkɨŋ yo. 32 Ŋkɨŋ yo chee wu i bwo, i yɔɔ bə wu lə, ‘Wə duŋ fieŋ finya. Nhə nlaama nə fie wa mənhliŋ, yulahalə wə hə kwee mi kwáŋ. 33 Ə hə duŋ ə wə nakə kwoo dəŋ hlɨŋ bə mbɛɛ nnu bə nɨ̄ŋ yo bəə wu ye nhə ŋkwolə dəŋ bə wə lə?’ 34 Ŋkɨŋ yo fwoo tɔŋ, nə wu lə bə́ gəŋ fwaŋ ə chəŋ munfwa mə, yee bə́ fɨ̄hɨŋ wu gəŋ bwii ye mə hluŋ kaa fie ye. 35 Nəni, ə lə yəəŋ ye Chwa nnu i dùŋ yo ə buh yá fə li bə mbɛɛ mənhliŋ ə bəŋ mə, ə duŋ lə i kə laamə nə maani bə tɔŋ liih linhliŋ kə.”