Matio 17

Jisho nyii kiŋkuntaŋ kiih kkɨŋ i mà kənə buh

Lə joo kah buhlɔ, Jisho jə Pita bəə Jɛŋ maa Jɔɔŋ dɨŋ Jɛŋ, bə́ biŋ ə kɔnɔ kindiɛɛ kidi go, yee bə́ dūŋ mə bə́ bə́. 2 Bə́ duŋ duŋ ŋəŋ gbo wi Jisho gaana ə bə́ dí, bushi bwii tə̄ ye kitaŋ lə, bindu biih tə̄ dəŋ nəni mwaŋ mwaŋ mwaŋ. 3 Fi duŋ lə, Mushe bəə Elaja duŋ duŋ fu bwo ə bə́ dí, yee bə́ yɔ̄ɔ bəə Jisho. 4 Pita hlə gəŋ yɔɔ bə Jisho lə, “Baba, fi nwaala ye kkə bie lə fəŋ. Ə wə lə leki ə ŋ'wɛɛ bichaŋ fəŋ bitɔh, ə kidi duŋ ko, kidi ki Mushe, kidi ki Elaja.” 5 Ye i kaani lə i yɔ̄ɔ, fi duŋ lə, joonə kiwu buuu ja bwo kəə bə́, die yɔɔ mə joonə kie mə lə, “Nu lə Ŋiaa, i dùŋ tɔŋ lɨŋŋ. Ŋ'wò njənjə bə wi gbaaŋ. Yee bə wô ə duŋ bə wu.” 6 Lə bəne biih bə kintu wo die ye, nɨŋ kwo bə́, bə́ gbe kəə mənhlɨŋ kwe. 7 Kwaalə Jisho gəŋ tuu ə bə́ go yɔɔ lə, “Bə́ ja fa. Bə kə yee bə lɔ̂ kə.” 8 Bwɔɔ nnu bə́ mà tu díi buh bə́ nakə ŋəŋ nə ə mbɛɛ ju go kə kahiŋ Jisho.

9 Lə bə́ no ə kɔnɔ kie go yee bə́ bwɔ̄, Jisho kɨnə bə́ lə, “Bə kə yɔɔ lə fieŋ ffɨŋ díi ŋieeŋ ŋəŋna kə, kahiŋ lə Ŋwa Mbɛɛ fwoo ə kpe mə.” 10 Bəne biih bə kintu bie bii bə wu ləə, “Ə duŋ yulaha ffɨŋ bəne bə keehnə bəŋkɨnə yɔɔ lə Elaja kənə bənhlaa bwo ə Nchuu Fwoo nnu Chu mà kaachi yo yá hlə bwo lə?” 11 Jisho chuu lə, “Ə chɛɛŋ lə Elaja kənə bənhlaa bwo lɛhiŋ chuu bieŋ binhliŋ. 12 Kwaalə n'yɔ̄ɔ bə bəŋ lə Elaja mà hlaa bwo, bə́ nakə kələ wu kə, bə́ hlə fə fieŋ ffɨŋ bə́ lèki fie bə wu. Ə duŋ dəŋ yəəŋ ye Ŋwa Mbɛɛ duŋ lə i wo ŋgə ə bə́ kwáŋ.” 13 Ye i yɔɔlə nəni, bəne biih bə kintu hlə kələ lə i yɔ̄ɔ ə duŋ ki Jɔɔŋ N'yiinjɔ.

Jisho ŋwuhuŋ ŋiaŋ ju nnu i màa i gbēkwe

(Maak 9:14-29; Lukaa 9:37-43a)

14 Lə Jisho bə bəne biih bə kintu bwɔ bwo bwii ye kimɔ ki bəne kie mà duŋ lə. Mbɛɛ ju bwo bɛŋ núh ə Jisho fwi, yɔɔ bə wu lə, 15 “Baba, kwo kwaa hlɨŋ bə ŋiaa nu. I gbèkwe, i wò ŋgə gbaaŋ. I bwò i gbè hətaŋ, bwɔɔ ju i gbe ə njɔ. 16 Nhə mbwoo bə wu ə bəne bwo bə kintu go, bə́ nakə kaa lə mu bəŋwuhuŋ wu kə.” 17 Jisho yɔɔ lə, “Ho! Ŋkaani nya nu, nnu i kə yii lə tɔŋ ə Chu mə kə. Nlə nduŋ bə bəŋ gəŋ bwii nyɛhɛŋ lə? Nlə ŋkwaa tɔŋ bə bəŋ gəŋ bwii nyɛhɛŋ lə? Bə bwo mi bə ŋiaŋ yo fəŋ.” 18 Bə bwo bə wu, Jisho nyieemi fiŋkwini ffɨŋ fi màa fi dūŋ fie ə ŋiaŋ yo go, fi fu, cha mi, i bu ŋwunə.

19 Bəne bə Jisho bə kintu duŋ duŋ gəŋ ŋəŋ wu dɨŋ dɨŋ, bii bə wu ləə, “Ə duŋ yulaha ffɨŋ kkə hə ju hləŋ hləŋ bənfwoo fiŋkwini fie ə wu go lə?” 20 I chuu bə bə́ lə, “Ə yulahalə kimbemi kieeŋ kie kinhlə. N'yɔ̄ɔ bəŋ kichɛɛŋ lə, ə bə lə kənə kimbemi kkɨŋ ki dùŋ ye munshaŋ muntə lə, kəə duŋ ə bə yɔɔ bə kɔnɔ kɨhŋ lə, ‘Ŋəəmə fu fəŋ wə gəŋ lemi filii,’ ə ki ŋəəmə, ə fieŋ nakə duŋ nə həmə ffɨŋ duŋ ə fi kah bəŋ. 21 [Kwaalə, dɨŋ fɨhŋ fiŋkwini duŋ ə fi fu ə mbɛɛ go kə, kahiŋ lə mbɛɛ yo cheela Chu shi biləə.]”^ª

Jisho baa yɔɔ ki dɨŋ kpe nni i yá kpe ye

(Maak 9:30-32; Lukaa 9:43b-45)

22 Ye Jisho bə bəne biih bə kintu mà bumə lə ə Galilii, i yɔɔ bə bə́ lə, “Bə́ yá yi nə Ŋwa Mbɛɛ ə kwáŋ ŋə bəne bə bieŋ biwaha mə, 23 ə bə́ jii wu, ə yá bwo chu ə joo bəŋ tɔh, ə i yá fu ə kpe mə.” Lə bə́ wo nəni, gbo kpe bə́ gbaaŋ.

Biyɔɔnə ki kiŋwaati ki kwonə ki chəŋ ntofi

24 Lə Jisho bə bəne biih bə kintu gəŋ bwii ə Kapanahuŋ, bəne bbəŋ bə́ màa bə́ kwō kiŋwaati ki chəŋ ntofi bwo ŋəŋ Pita bii bə wu ləə, “Mbɛɛ weŋ keehnə yii chùuŋkə dəŋ kiŋwaati ki chəŋ ntofi lə?”^ª 25 I bemi lə, “Eee.” Bwɔɔ nnu Pita mà chu chəŋ, Jisho hlaa chi diɛɛnə kie həkwe bə wu, hlə bii ləə, “Shaamuŋ, wə ŋəŋ ŋkwo wa lə ləhəŋ lə? Bəŋkɨŋ bə yaŋ kwe jə̀ kiŋwaati ki nimi ə duŋ bə nyəhə lə? Bə́ bà bənjə ə bwɔni bəniɛ bəbə kwáŋ, lii ə nfúuntə kwáŋ lə?” 26 Pita chuu lə, “Bə́ bà bənjə kwaa ə duŋ ə nfúuntə kwáŋ.” Jisho yɔɔ bə wu lə, “Ə chu duŋ lə bwɔni bəniɛ bə bəŋkɨŋ bəbə chùuŋkə lə kə. 27 Kwaalə, bənfə lə tɔŋ kə loo bə́, gəŋ lɛɛ ŋgooli ə nɔ mə, fiɔɔnə nni wə lə hlaa kwo ye, waa yi kijə, wə lə ŋəŋ kpo wi choo mwe, wə fwoo bwo gəŋ nə bə́ bənchuŋkə kiŋwaati kiaa bee wə mu.”