Cullu 23

Candi dim taanɩ

Baŋa-Wɛ daa ma ta Moyisi DƖ wɩ:

2 «Ta dɩ Yisɩrayɛlɩ tiinə bam nɩ: Da yalʋ á kɔgɔ kʋm na wʋ́ jeeri amʋ Baŋa-Wɛ yigə nɩ sɩ á di candiə tɩn mʋ tɩntʋ:

Wɛ siun dɛ

Nuŋim 20:8-11; 31:12-17; Gulə Tɔnɔ 5:12-15

3 Kwe-na da yardʋ á tʋŋɩ á tɩtʋŋa maama. Da yarpɛ dɛ dɩm nan yɩ siun dɛ mʋ dɩ paɩ abam. Abam na maŋɩ á wʋ je sɩlʋ maama nɩ, dɛ dɩm kʋntʋ yɩ dɩ yɩra mʋ Baŋa-Wɛ ŋwaanɩ. Á wʋ́ jeeri daanɩ sɩ á zuli Wɛ yɩ á ba tʋŋa dɩ fɩnfɩɩn dɩ.

Pakɩ dɩ dɩpɛ dɩlʋ na ba jɩgɩ dabɩlɩ dɩ wʋnɩ tɩn candiə kam

Nuŋim 12:1-20; Garɩm 28:16-25; Gulə Tɔnɔ 16:1-8

4 Baŋa-Wɛ nan pɛ ni sɩ á taá di candi sɩntʋ sɩ maŋa nɩ mʋ. Sɩ da yam na yǝni ya yi, sɩ á jeeri daanɩ á zuli Wɛ sɩ wʋnɩ.

5 Pulim cana kam da fugə-yana dɛ dɩm dɩdaan-ni maŋa nɩ mʋ á wʋ́ puli sɩ á di Pakɩ candiə kam á ma á zuli Baŋa-Wɛ. 6 Tɩga na pʋʋrɩ yɩ da fugə-yanu dɛ dɩm na yiǝ, sɩ á puli á di Dɩpɛ dɩlʋ na ba jɩgɩ dabɩlɩ dɩ wʋnɩ tɩn candiə kam á ma á zuli Baŋa-Wɛ. Kwe-na da yarpɛ á di dɩpɛ dɩlʋ dabɩlɩ na tǝrǝ kʋ wʋnɩ tɩn. 7 Da yam kʋntʋ pulim dɛ dɩm nɩ, sɩ á jeeri daanɩ á zuli Wɛ. Yɩ tʋŋɩ-na á dɛ dɛ tɩtʋŋa yam. 8 Da yarpɛ yam maama wʋnɩ sɩ á yǝni á ja wʋdiu pɛɛra kaanɩm á ba á kɩ á pa Baŋa-Wɛ. Kʋ daarɩ da yarpɛ dɛ dɩm na yiǝ, á wʋ́ jeeri daanɩ mʋ sɩ á zuli Wɛ, yɩ á bá tʋŋɩ á dɛ dɛ tɩtʋŋa yam.»

Dayigǝ wʋdiiru pɛɛra

9 Baŋa-Wɛ ta ma ta dɩ Moyisi DƖ wɩ:

10 «Ta dɩ Yisɩrayɛlɩ tiinə bam nɩ: Abam na tu á zʋ tɩga kalʋ amʋ na lagɩ a kwe a pa abam tɩn wʋnɩ, yɩ á puli á zagɩ á wʋdiiru, ja-na mɩn-zɔgɔ kʋlʋ á na puli á vɔ tɩn á vu kaanɩm tu wʋm te á pa‑o. 11 Kaanɩm tu wʋm dɩ maa wʋ́ zǝŋi á wʋdiiru tɩm Baŋa-Wɛ yigə nɩ sɩ Wɛ joŋi-tɩ abam tee nɩ. Kʋ nan yɩ dɛ dɩlʋ na saŋɩ Wɛ siun dɛ dɩm tɩn wʋnɩ mʋ oó kɩ kʋntʋ. 12 Dɛ dɩlʋ nɩ á na wʋ́ pa ba zǝŋi á wʋdiiru tɩm Wɛ yigə nɩ tɩn, sɩ á ta kwe pi-bala na yɩ bɩnɩ yɩ ka ba jɩgɩ gɛɛrɩ ka yɩra nɩ tɩn, á kɩ zwɛɛm kaanɩm á pa Baŋa-Wɛ. 13 Abam nan ta wʋ́ wǝli mun-bwe bwɛn sɩna na viiri dɩ nugə tɩn mʋ, sɩ kʋ taa yɩ á wʋdiu pɛɛrɩ kʋ pa Baŋa-Wɛ. Pɛɛrɩ dɩm kʋntʋ lwəm dɩm maa ywəmmə dɩ paɩ Baŋa-Wɛ. Abam ta wʋ́ kwe sana bwaŋa dɩdʋa á ma á kɩ wo-nyɔɔrʋ pɛɛrɩ á wǝli da. 14 Abam na puli á zagɩ á wʋdiiru tɩm, sɩ á yɩ di-na dɩpɛ, naa mɩn-wɔa, naa wo-val-dʋnnʋ tɩm biə bam, yɩ á ta wʋ jaanɩ pɛɛra yam kʋntʋ á ba á pa á Tu Wɛ dɩm. Abam dɩ á kwaga kam wʋ́ taá kɩ á tɔgɩ ni dɩntʋ na brɩ te tɩn mʋ sɩ kʋ taa ve wuu.

Faa wo-vallʋ candiə kam

Nuŋim 23:16; 34:22; Garɩm 28:26-31; Gulə Tɔnɔ 16:9-12

15 Kʋ na zɩgɩ dɛ dɩlʋ na saŋɩ Wɛ siun dɛ dɩm yɩ á zǝŋi á dayigə mɩna yam Wɛ yigə nɩ tɩn, sɩ á jeeli da yarpɛ kuni bɩrpɛ. 16 Da fiinnu mʋ á wʋ́ jeeli sɩ ya yi dɛ dɩlʋ na saŋɩ Wɛ siun dɛ dɩm na kɩ bɩrpɛ tɩn, sɩ á laan ja wʋdi-dʋŋʋ pɛɛra á ba á pa Baŋa-Wɛ. 17 Abam na zʋʋrɩ je sɩlʋ maama nɩ, sɩ á ja dɩpwa tɩle tɩle á ba jero-vwe dɩm nɩ sɩ á zəŋi-tɩ Baŋa-Wɛ yigə nɩ. Nɔɔnʋ maama wʋ́ kwe mun-bwe bwɛn sɩna mʋ o wǝli dɩ dabɩlɩ o ma wɔ dɩpɛ dɩm kʋntʋ. Kʋʋ́ taa yɩ á dayigǝ wʋdiiru pɛɛra mʋ á kwe á pa Baŋa-Wɛ. 18 Á kɔgɔ kʋm nan wʋ́ beeri pəlbiə sɩrpɛ na yɩ bɩnɩ dɩdʋa yɩ sɩ ba jɩgɩ gɛɛrɩ sɩ yɩra nɩ tɩn, dɩ na-bala dɩdʋa, dɩ pi-bɛ sɩle. Á maa wʋ́ kwe vara bam kʋntʋ á wǝli dɩ dɩpwa pɛɛra yam á kɩ zwɛɛm kaanɩm á pa Baŋa-Wɛ. Á ta wʋ́ kwe wʋdiu pɛɛra dɩ wo-nyɔɔrʋ pɛɛra á kaanɩ á pa‑DƖ. Pɛɛra yam kʋntʋ lwəm dɩm maa ywəmmə dɩ paɩ Baŋa-Wɛ. 19 Abam ta maa wʋ́ kwe bʋ-bala á ma á kɩ lwarɩm saarɩm kaanɩm, sɩ á daarɩ á kwe pi-balɩ sɩle na yɩ bɩnɩ bɩnɩ tɩn sɩ á ma á kɩ yazurə pɛɛrɩ kaanɩm. 20 Kaanɩm tu wʋm nan mʋ wʋ́ zǝŋi peeni sɩle sɩm wɛɛnɩ, sɩ sɩ taa yɩ pɛɛrɩ sɩ pa Baŋa-Wɛ, tɩntʋ dɩ dɩpwa pɛɛra yam maama. Pɛɛra yam kʋntʋ mʋ Baŋa-Wɛ pɔɔrɩ DƖ pa DƖ tɩtɩ, sɩ ya taa yɩ kaanɩm tu wʋm nyɩm. 21 Dɩntʋ dɛ dɩm nɩ, á wʋ́ pa á maama jeeri daanɩ sɩ á zuli Baŋa-Wɛ yɩ á bá tʋŋɩ á dɛ dɛ tɩtʋŋa yam. Abam na zʋʋrɩ je sɩlʋ maama nɩ, sɩ abam dɩ á kwaga kam maama taa tɔgɩ ni dɩntʋ sɩ kʋ taa ve maŋa maama.

22 Abam na ve á karɩ sɩm nɩ sɩ á zagɩ á wʋdiiru á joori sam, yɩ gwe-na wʋdiiru tɩlʋ maama na wʋ á karɩ sɩm ni nɩ tɩn, nan yɩ larɩ-na mɩna yalʋ wʋdi-zagɩna bam na daarɩ tɩn. Yagɩ-na tɩntʋ maama á pa yinigə tiinə, dɩ vərə balʋ na zʋʋrɩ dɩ abam tɩn, sɩ bantʋ dɩ larɩ ba di. Amʋ mʋ yɩ abam Tu Baŋa-Wɛ dɩm.»

Nabwaanʋ wum candiə kam

Garɩm 29:1-6

23 Baŋa-Wɛ ma ta Moyisi DƖ wɩ:

24 «Ta dɩ Yisɩrayɛlɩ tiinə bam nɩ: Bɩnɩ maama wʋnɩ canɩ sɩrpɛ cana kam dayigə dɛ dɩm nɩ, sɩ á pa dɩ ji siun dɛ na yɩ dɩ yɩra Wɛ ŋwaanɩ. Á maŋɩ sɩ á wu nabwaanʋ yɩ á daarɩ á jeeri daanɩ á zuli Wɛ. 25 Yɩ tʋŋɩ-na á dɛ dɛ tɩtʋŋa yam dɩntʋ dɛ dɩm nɩ. Yɔɔrɩ á kɩ-na wʋdiu pɛɛrɩ kaanɩm á pa Baŋa-Wɛ.»

Lwarɩm saarɩm dɛ dɩm

Garɩm 29:7-11

26 Baŋa-Wɛ ta ma ta dɩ Moyisi DƖ wɩ:

27 «Canɩ sɩrpɛ cana kam da fugə dɛ dɩm nan mʋ yɩ Lwarɩm saarɩm dɛ dɩm. Dɛ dɩm kʋntʋ wʋnɩ á wʋ́ jeeri daanɩ á zuli Wɛ. Á maŋɩ sɩ á tu á tɩtɩ mʋ, sɩ á daarɩ á kɩ wʋdiu pɛɛrɩ kaanɩm á pa Baŋa-Wɛ. 28 Nan yɩ tʋŋɩ-na dɛ dɩm kʋntʋ wʋnɩ. Bɛŋwaanɩ, dɩ yɩ Lwarɩm saarɩm dɛ dɩm ba na wʋ́ lɩ á lwarɩm Baŋa-Wɛ yigə nɩ dɩ wʋnɩ tɩn mʋ. 29 Dɛ dɩm kʋntʋ maama nɩ wʋlʋ maama na wʋ sɛ o tu o tɩtɩ amʋ yigə nɩ, ba maŋɩ sɩ ba lɩ kʋ tu sɩ o daa yɩ tɔgɩ o wǝli Yisɩrayɛlɩ dwi dɩm wʋnɩ mʋ. 30 Wʋlʋ maama dɩ na tʋŋɩ dɩntʋ dɛ dɩm nɩ, amʋ Baŋa-Wɛ tɩtɩ mʋ wʋ́ pa o ga o ŋwɩa amʋ nɔɔna bam tɩtarɩ nɩ. 31 Dɛ dɩm kʋntʋ daɩ sɩ abam tʋŋɩ dɩ wʋnɩ dɩ fɩnfɩɩn dɩ. Abam na wʋ́ taá zʋʋrɩ je sɩlʋ maama nɩ tɩn, abam dɩ á kwaga kam maama maŋɩ sɩ á taá tɔgɩ ni dɩm kʋntʋ sɩ kʋ taa ve maŋa maama mʋ. 32 Cana kam da nʋgʋ dɛ dɩm dɩdaan-ni maŋa nɩ, sɩ kʋ vu kʋ yi ka da fugə dɛ dɩm dɩdaan-ni maŋa nɩ, dɩ wʋ́ taa yɩ siun dɛ mʋ dɩ pa abam, sɩ á tu á tɩtɩ dɩ wʋnɩ.»

Vwə cwiim candiə kam

Nuŋim 23:16; Garɩm 29:12-34; Gulə Tɔnɔ 16:13-15

33 Baŋa-Wɛ ma ta dɩ Moyisi DƖ wɩ:

34 «Ta dɩ Yisɩrayɛlɩ tiinə bam nɩ: Bɩnɩ maama wʋnɩ canɩ sɩrpɛ cana kam da fugə-yanu dɛ dɩm nɩ sɩ á puli á di Vwə cwiim candiə kam. Ba nan wʋ́ di-ka da yarpɛ mʋ. 35 Candiə kam pulim dɛ dɩm wʋnɩ, sɩ á jeeri daanɩ á zuli Wɛ yɩ á bá tʋŋɩ á dɛ dɛ tɩtʋŋa yam. 36 Kʋ wǝli da, da yarpɛ yam kʋntʋ dɛ maama wʋnɩ, á wʋ́ taá jaanɩ wʋdiu pɛɛra mʋ á tui á kaanɩ á paɩ Baŋa-Wɛ. Da nana dɛ dɩm nɩ, sɩ á daa jeeri daanɩ á zuli Wɛ. Á laan maa wʋ́ kwe wʋdiu pɛɛrɩ á kaanɩ á pa Baŋa-Wɛ á kweeli. Dɛ dɩm kʋntʋ yɩ dɩ yɩra Wɛ ŋwaanɩ mʋ. Á ba maŋɩ sɩ á tʋŋɩ á dɛ dɛ tɩtʋŋa yam dɩ wʋnɩ.

37 Candi sɩlʋ Baŋa-Wɛ na zɩgɩ sɩ Yisɩrayɛlɩ tiinə bam taa di bɩnɩ maama wʋnɩ tɩn mʋ kʋntʋ. Á wʋ́ pa ya taa yɩ da yalʋ á na wʋ́ jeeri daanɩ ya wʋnɩ á zuli Wɛ, yɩ á jaanɩ wʋdiu pɛɛra á tui á pa Baŋa-Wɛ tɩn mʋ. Pɛɛra yam kʋntʋ wʋ́ taa yɩ zwɛɛm kaanɩm pɛɛra, dɩ wʋdiu pɛɛra, dɩ wo-nyɔɔrʋ pɛɛra, dɩ kaanɩm dɩlʋ maama á na wʋ́ kɩ á pa Wɛ tɩn mʋ. Á wʋ́ taá jaanɩ pɛɛra yam á tui da yalʋ na maŋɩ dɩ-ya tɩn mʋ. 38 Abam nan wʋ́ taa di candi sɩntʋ á wǝli dɩ Wɛ siun da yam maama. Pɛɛra yam kʋntʋ mʋ á ta wʋ́ wǝli dɩ pɛɛra yalʋ á na yǝni á jaanɩ á tui á paɩ Baŋa-Wɛ tɩn, dɩdaanɩ pɛɛra yalʋ á na kɩ wʋ-yoŋo ŋwaanɩ naa ni-gonim ŋwaanɩ tɩn.

39 Kʋntʋ tɩn, canɩ sɩrpɛ cana kam da fugə-yanu dɛ dɩm na yiǝ yɩ á zagɩ á karɩ wʋdiiru maama á ti, sɩ á puli á di candiə kam kʋntʋ. Á wʋ́ kwe da yarpɛ mʋ á di-ka. Ka dayigə dɛ dɩm nɩ wʋ́ taa yɩ siun dɛ mʋ. Ka da nana dɛ dɩm na ti candiə kam tɩn dɩ maa yɩ kʋntʋ. 40 Da yam kʋntʋ pulim dɛ dɩm nɩ, sɩ á beeri tiu bu-laarʋ, dɩ kʋrʋ tiu nɛ, dɩ tweeru dwi dwi vɔɔrʋ, dɩ bugə ni tweeru, yɩ á kwe-ya á ma kɩ wʋpolo á zuli á Tu Baŋa-Wɛ dɩm da yarpɛ yam wʋnɩ. 41 Bɩnɩ maama canɩ sɩrpɛ cana kam wʋnɩ á wʋ́ kwe da yarpɛ mʋ sɩ á di candiə kantʋ á zuli Baŋa-Wɛ. Abam dɩ á dwi dɩm maŋɩ sɩ á taá tɔgɩ ni dɩntʋ mʋ sɩ kʋ taa ve maŋa maama. 42 Abam balʋ na yɩ Yisɩrayɛlɩ tɩmbiə tɩn maŋɩ sɩ á cwi vwə mʋ, sɩ á jǝni ya kuri nɩ da yarpɛ. 43 Kʋntʋ mʋ wʋ́ pa á biə lwarɩ nɩ amʋ dɛɛn na jaanɩ ba nabaara bam a nuŋi Ezipi wʋnɩ tɩn, a pɛ ba zʋʋrɩ vwə wʋnɩ mʋ. Amʋ mʋ yɩ abam Tu Baŋa-Wɛ dɩm.»

44 Moyisi dɛɛn tagɩ tɩntʋ maama o brɩ Yisɩrayɛlɩ tiinə bam ba na wʋ́ taa di candi yalʋ Baŋa-Wɛ na tiŋi DƖ pa-ba sɩ ba taa zuli‑DƖ ya wʋnɩ tɩn mʋ.