Jero-vwe dɩm min-zwǝǝnu tɩm
24
Baŋa-Wɛ ta ma ta dɩ Moyisi DƖ wɩ:2 «Ta dɩ Yisɩrayɛlɩ tiinə bam sɩ ba ja Olivi nugə kalʋ na yɩ lanyɩranɩ tɩn ba ba ba pa‑m min-zwǝǝnu tɩm ŋwaanɩ. Kʋntʋ mʋ wʋ́ pa tɩ mim taa di taan, yɩ dɩ ba dweə. 3 Dɛ maama wa-zʋʋrɩ maŋa nɩ, Arɔn wʋ́ nii mʋ sɩ min-zwǝǝnu tɩm taa di Baŋa-Wɛ yigə nɩ taan, sɩ tɩga vu ka pʋʋrɩ. Tɩ nan wʋ́ taa wʋ Wɛ jero-vwe di-laa kʋm nɩ mʋ mɛ gar-jalɩ dɩm na kwǝli ni-gonim daka kam tɩn. Abam dɩ á dwi dɩm wʋ́ taa tɔgɩ ni dɩntʋ mʋ maŋa maama. 4 Arɔn maa wʋ́ pa min-zwǝǝnu tɩm taa zɩgɩ səbu-sɩŋa min-zwǝn-zɩgʋ kʋm yuu nɩ kʋntʋ, sɩ tɩ mim taa di taan Baŋa-Wɛ yigə nɩ.
Jero-vwe dɩm dɩpɛ dɩm
5 Nan viiri-na mun-bwe sɩ á ma-dɩ á wɔ dɩpwa fugǝ-yale. Abam wʋ́ kwe muni bwɛn sɩna mʋ á ma á fɔgɩ dɩpwa maama. 6 Laan kwe-na dɩpwa yam á tiŋi gɩnɩ sɩle. Yardʋ wʋ́ taa wʋ gɩna maama wʋnɩ. Ya nan wʋ́ taa tigi taabʋlʋ kʋlʋ səbu-sɩŋa na kwǝli kʋ maama yɩ kʋ zɩgɩ Baŋa-Wɛ yigə nɩ tɩn baŋa nɩ mʋ. 7 Ta kwe-na wǝǝnu tɩlʋ lwǝm na ywǝmmǝ tɩn á kɩ gɩna maama wʋnɩ, sɩ tɩntʋ ləri dɩpwa yam yuu nɩ tɩ ji wʋdiu pɛɛrɩ tɩ pa Baŋa-Wɛ. 8 Wɛ siun dɛ maama wʋnɩ, Arɔn wʋ́ tiŋi dɩpwa yam kʋntʋ mʋ Baŋa-Wɛ yigə nɩ. Yisɩrayɛlɩ tiinə bam maŋɩ sɩ ba taa kɩ kʋntʋ mʋ maŋa maama sɩ kʋ ta ve wuu. 9 Dɩpwa yam kʋntʋ yɩ Arɔn dɩ o biə bam nyɩm mʋ. Ba nan maŋɩ sɩ ba di-ya jǝgǝ kalʋ na yɩ lanyɩranɩ fasɩ tɩn nɩ mʋ, ya na tiini ya yɩ lanyɩranɩ fasɩ tɩn ŋwaanɩ. Baŋa-Wɛ pɔɔrɩ-ya DƖ pɛɛra yam maama wʋnɩ sɩ ya taa yɩ kaanɩm tiinə bam nyɩm mʋ.»
Nɔɔnʋ na lwɛ Baŋa-Wɛ kʋ tu na wʋ́ na waarɩm dɩlʋ tɩn
10-11 Nɔɔnʋ wʋdoŋ dɛɛn wʋra o ko na yɩ Ezipi tu. O nu maa yɩ Yisɩrayɛlɩ tu, o yɩrɩ mʋ Selomiti. Wʋntʋ ko yɩrɩ mʋ Dibiri, yɩ o nuŋi Dan dwi dɩm wʋnɩ. Nɔɔnʋ wʋm dɛɛn nuŋi o kɩ jara dɩ Yisɩrayɛlɩ tu ba zʋʋrɩm je sɩm nɩ. Ba jara yam nɩ, mʋ nɔɔnʋ wʋm sɔɔlɩ lwarɩm o ma lwɛ Baŋa-Wɛ yɩrɩ dɩm. Ba ma ja-o ba vu Moyisi te. 12 Ba ma ja nɔɔnʋ wʋm ba pɩ, yɩ ba daarɩ ba cəgi sɩ Baŋa-Wɛ vɩɩrɩ DƖ wʋbʋŋa DƖ brɩ-ba nɔɔnʋ wʋm taanɩ dɩm baŋa nɩ.
13 Baŋa-Wɛ laan ma ta dɩ Moyisi DƖ wɩ:
14 «Ja-na nɔɔnʋ wʋm á nuŋi abam na zʋʋrɩ mɛ tɩn á vu dáa. Balʋ maama na ni nɔɔnʋ wʋm ta-balɔrɔ tɩn maa wʋ́ daŋɩ ba jɩan o yuu nɩ. Yisɩrayɛlɩ tiinə kɔ-fɔrɔ kʋm laan maa wʋ́ dʋl-o dɩ kandwa ba gʋ. 15 Nan ta dɩ Yisɩrayɛlɩ tiinə bam maama nɩ: wʋlʋ na lwɛ o Tu Wɛ dɩm, kʋntʋ tu tusim dɩm wʋ́ taa wʋ o yuu nɩ mʋ yɩ o maŋɩ sɩ o na waarɩm. 16 Wʋlʋ maama na yáalɩ Baŋa-Wɛ yɩrɩ, kʋntʋ tu maŋɩ sɩ o tɩ mʋ. Á kɔgɔ kʋm maama maŋɩ sɩ á dʋl-o á gʋ mʋ. O na yɩ Yisɩrayɛlɩ tu, naa o yɩ vəru mʋ dɩ, kʋ tu maŋɩ sɩ o tɩ mʋ.
17 Nɔɔnʋ na gʋ o doŋ, kʋ maŋɩ sɩ ba gʋ o dɩ mʋ. 18 Nɔɔnʋ nan na gʋ o doŋ varɩm, sɩ o joori o yiri varɩm o pa varɩm wʋm tu. Woŋo kʋlʋ na ŋwɩ tɩn mʋ wʋ́ ləri woŋo kʋlʋ na gɛ kʋ ŋwɩa tɩn yuu nɩ. Ŋwɩa mʋ baá yiri ba ma ba ləri ŋwɩa. 19 Nɔɔnʋ na kɩ zʋnnɩ o doŋ yɩra nɩ, sɩ ba kɩ o dɩ zʋnnɩ sɩ dɩ maŋɩ dɩ zʋnnɩ dɩlʋ o na kɩ o doŋ wʋm yɩra nɩ tɩn. 20 Wʋlʋ na bwəri o doŋ yɩra kuə, sɩ ba bwəri kʋ tu dɩ yɩra kuə. Yi mʋ baá lɩ ba ma ləri yi. Yəli dɩ mʋ baá guri ba ma ləri yəli. Zʋnnɩ dɩlʋ maama o na kɩ o doŋ yɩra nɩ tɩn, mʋ baá kɩ o dɩ yɩra nɩ.a 21 Nɔɔnʋ na gʋ varɩm, sɩ o joori o yiri varɩm wʋm o pa o na gʋ wʋlʋ varɩm tɩn. Wʋlʋ nan na gʋ o doŋ nabiinu, sɩ ba gʋ o dɩ.b 22 Ni dɩntʋ zɩgɩ dɩ paɩ Yisɩrayɛlɩ tiinə maama mʋ, dɩ vərə balʋ na zʋʋrɩ dɩ abam tɩn. Amʋ mʋ yɩ abam Tu Baŋa-Wɛ dɩm.»
23 Moyisi ma yɔɔrɩ o kwe Wɛ niə yam kʋntʋ maama o pa Yisɩrayɛlɩ tiinə bam. Ba laan ma ja nɔɔnʋ wʋm ba nuŋi ba kɔgɔ kʋm zʋʋrɩm jǝgǝ kam ba vu dáa. Ba ma dʋl-o dɩ kandwa ba gʋ. Kʋntʋ tɩn, Yisɩrayɛlɩ tiinə bam dɛɛn kɩ nɩ Baŋa-Wɛ na pɛ Moyisi ni sɩ ba kɩ te tɩn mʋ.