Wʋdiu pɛɛra yam taanɩ
22
Baŋa-Wɛ daa ma ta dɩ Moyisi DƖ wɩ:2 «Ta Arɔn dɩ o biə bam nɩ: ba ta taa nii pɛɛra yalʋ Yisɩrayɛlɩ tiinə bam na jaanɩ ba tui ba pa-nɩ tɩn baŋa nɩ, sɩ ba nɩgɩ-ya, ya na yɩ lanyɩranɩ fasɩ tɩn ŋwaanɩ. Kʋ na daɩ kʋntʋ, baá yáalɩ amʋ yɩrɩ dɩm na yɩ lanyɩranɩ fasɩ tɩn. Amʋ mʋ yɩ Baŋa-Wɛ dɩm. 3 Ta n brɩ-ba nɩ: Abam dwi dɩm wʋnɩ wʋlʋ na jɩgɩ digiru cullu tɩm seeni, yɩ o ta fʋfɔ o yi o dwe pɛɛra yalʋ Yisɩrayɛlɩ tiinə bam na jaanɩ ba tui ba pa Baŋa-Wɛ tɩn, kʋ tu daa bá zɩgɩ amʋ yigə nɩ o tʋŋɩ o pa-nɩ. Amʋ mʋ yɩ Baŋa-Wɛ dɩm.
4 Arɔn dwi kaanɩm tiinə bam wʋnɩ, wʋlʋ maama na jɩgɩ yɩra yawɩ-cɛɔ kʋlʋ na loŋi nɔɔna tɩn, naa o pəni ni na mʋ na nuŋǝ pa o daa wʋ maŋɩ dɩ cullu tɩm, kʋntʋ tu ba jɩgɩ cwǝŋǝ sɩ o da o di kaanɩm wʋdiu pɛɛra yam. O maŋɩ sɩ o kwɛ o tɩtɩ dɩ cullu tɩm mʋ sɩ o daarɩ o di. Kaanɩm tu na dwe kʋlʋ na digimi twa ŋwaanɩ tɩn, naa o nywannʋ na nuŋǝ, o dɩ wʋ́ taa jɩgɩ digiru Wɛ cullu tɩm seeni mʋ. 5 Kʋ ta yɩ bɩdwɩ mʋ dɩ o na dwe tɩga wo-vəlu, naa o na dwe nɔɔnʋ wʋlʋ na jɩgɩ digiru cullu tɩm seeni tɩn. 6 Kaanɩm tu na tʋ tɩntʋ wʋnɩ, o ta wʋ́ digimi mʋ sɩ kʋ yi dɩdaan-ni maŋa. O ta bá wanɩ o di kaanɩm wʋdiu pɛɛra yam, kʋ na daɩ nɩ o swɛ o yɩra o ma kwɛ o tɩtɩ. 7 Wɛ na zʋa, kʋntʋ tu laan wʋ́ maŋɩ dɩ cullu tɩm. O maa jɩgɩ cwǝŋǝ sɩ o di wʋdiu pɛɛra yam, wʋdiu kʋm kʋntʋ na yɩ kaanɩm tiinə bam nyɩm tɩn ŋwaanɩ. 8 Kaanɩm tu ba maŋɩ sɩ o di varɩm wʋlʋ na tɩgɩ o tɩtɩ tʋʋnɩ tɩn, naa ga-vara na tʋr‑o ba gʋ tɩn. O na di nwana yam kʋntʋ, kʋʋ́ pa o digimi dɩ cullu tɩm mʋ. Amʋ mʋ yɩ Baŋa-Wɛ dɩm.
9 Kaanɩm tiinə bam maama maŋɩ sɩ ba taa tɔgɩ cullu cwe sɩm a na pɛ-ba tɩn mʋ. Kʋ na daɩ kʋntʋ, ba tusim wʋ́ taa wʋ ba yuu nɩ mʋ, yɩ ba tɩ, ba na yáalɩ amʋ kwiə yam tɩn ŋwaanɩ. Amʋ mʋ yɩ Baŋa-Wɛ dɩm. Amʋ mʋ pɔɔrɩ-ba sɩ ba taa yɩ lanyɩranɩ fasɩ amʋ ŋwaanɩ.
10 Kʋ na yɩ kaanɩm wʋdiu pɛɛra yam, wʋlʋ na daɩ kaanɩm tiinə dwi dɩm nɔɔnʋ tɩn ba jɩgɩ cwǝŋǝ sɩ o di-ya. Vəru wʋlʋ na zʋʋrɩ kaanɩm tu wʋm tee nɩ, naa tɩntʋŋnʋ wʋlʋ kaanɩm tu wʋm na jɩn‑o sɩ o tʋŋɩ o pa‑o mʋ, bantʋ daɩ sɩ ba di. 11 Kaanɩm tu nan na jɩgɩ gambaa kalʋ, kʋ tu wʋ́ da o di kaanɩm tu wʋm wʋdiu kʋm, nɩ o na yɩ gambaa kalʋ kaanɩm tu wʋm na yəgi dɩ səbu tɩn, naa o yɩ wʋlʋ ba na lʋg-o kaanɩm tu wʋm sɔŋɔ wʋnɩ tɩn. 12 Kaanɩm tu bukɔ nan na zʋ wʋlʋ na daɩ kaanɩm tu tɩn, wʋntʋ daɩ sɩ o da o di kaanɩm wʋdiiru tɩm. 13 Bukɔ wʋm nan na jigi kadəm, naa o na yagɩ o barʋ, yɩ o ba jɩgɩ biə sɩ ba taa nii o baŋa nɩ pa o joori o vu o ko sɔŋɔ nɩ o je da, kʋ tu jɩgɩ cwǝŋǝ sɩ o di o ko wʋdiu pɛɛra yam wʋnɩ. Kaanɩm tiinə dwi dɩm nɔɔna yɩranɩ mʋ jɩgɩ cwǝŋǝ sɩ ba di wʋdiu kʋm kʋntʋ.
14 Nɔn-yɔɔ nan na di kaanɩm pɛɛra wʋdiu, yɩ o wʋ paalɩ o kɩ, sɩ o joori o ŋwɩ o na di te tɩn o pa kaanɩm tu wʋm, sɩ o ta wǝli wʋdiu kʋm kwǝrǝ kuni bɩnu maama wʋnɩ, pʋpwara dɩdʋa o pa‑o. 15 Kaanɩm tiinə bam daɩ sɩ ba gooni pɛɛra yalʋ Yisɩrayɛlɩ tiinə bam na jaanɩ ba tui ba paɩ Baŋa-Wɛ tɩn, 16 dɩ ba na wʋ́ pa nɔn-yɔɔrʋ da ba di ya wʋnɩ tɩn. Kʋntʋ na kɩa, kʋʋ́ pa nɔɔna bam lwarɩm mʋ taa wʋ ba yuu nɩ, sɩ waarɩm ba ba baŋa. Amʋ mʋ yɩ Baŋa-Wɛ dɩm. Amʋ ma pɔɔrɩ pɛɛra yam kʋntʋ sɩ ya taa yɩ lanyɩranɩ fasɩ amʋ ŋwaanɩ.»
Kaanɩm tɩtʋŋa yam taanɩ
17 Baŋa-Wɛ daa ma ta dɩ Moyisi DƖ wɩ:
18 «Ta Arɔn, dɩ o biə bam, dɩ Yisɩrayɛlɩ tiinə bam maama nɩ: Yisɩrayɛlɩ dwi tu, naa vəru wʋlʋ na zʋʋrɩ dɩ ba tɩn na lagɩ sɩ o kɩ zwɛɛm pɛɛrɩ kaanɩm o pa Baŋa-Wɛ, kʋ na yɩ ni-gonim ŋwaanɩ, naa kʋ yɩ o wʋ-yoŋo pɛɛrɩ mʋ dɩ, varɩm wʋm daɩ sɩ o taa jɩgɩ gɛɛrɩ o yɩra nɩ. 19 Kʋ na yɩ na-bala, naa pi-bala, naa bʋ-bala mʋ kʋ tu jaanɩ o ba, Wɛ wʋ́ sɛ o joŋi-ka, nɩ kʋ na daɩ nɩ ka jɩgɩ gɛɛrɩ ka yɩra nɩ. 20 Abam wʋlʋ nan na kwe varɩm wʋlʋ na jɩgɩ gɛɛrɩ o yɩra nɩ tɩn sɩ o ma kɩ kaanɩm o pa Baŋa-Wɛ, Wɛ bá joŋi kʋ tu kaanɩm dɩm.
21 Wʋlʋ nan na bʋŋɩ sɩ o kɩ yazurə pɛɛrɩ kaanɩm o pa Baŋa-Wɛ, kʋ na yɩ ni-gonim ŋwaanɩ, naa kʋ yɩ o wʋ-yoŋo pɛɛrɩ mʋ dɩ, varɩm wʋm daɩ sɩ o taa jɩgɩ gɛɛrɩ o yɩra nɩ. Kʋntʋ baŋa nɩ mʋ Wɛ wʋ́ joŋi o pɛɛrɩ dɩm. 22 Yɩ zaŋɩ-na á kwe varɩ-lilwə, naa vara balʋ naga na bwəri naa ba yɩra fuuli tɩn, naa balʋ na jɩgɩ ŋwana naa yɩra yawɩɩrʋ dwi dwi tɩn, sɩ á ja á ba jero-vwe dɩm nɩ á ma á kɩ kaanɩm á pa Baŋa-Wɛ. 23 Naa kʋlʋ naa piə kalʋ yɩra nan na ba maɩ daanɩ tɩn mʋ, á wʋ́ wanɩ á kwe á ma á kɩ yazurə pɛɛrɩ kaanɩm dɩlʋ na yɩ n wʋ-yoŋo pɛɛrɩ tɩn. Kʋ daarɩ, yɩ kwe-na vara bam kʋntʋ doŋ á ma á kɩ kaanɩm dɩlʋ na yɩ ni-gonim ŋwaanɩ tɩn. 24 Yɩ kwe-na varɩm wʋlʋ mancala ba na magɩ naa ya cɔgɩ te maama tɩn, naa ba na lwɩ wʋlʋ tɩn, á kɩ kaanɩm á pa Baŋa-Wɛ. Kʋ daɩ sɩ á kɩ kʋntʋ doŋ maŋa kalʋ maama á na wʋ́ taá zʋʋrɩ á tɩga kam wʋnɩ tɩn. 25 Á na joŋi vara bam kʋntʋ doŋ dwi-gɛ tiinə tee nɩ, sɩ á yɩ kwe-ya á kɩ wʋdiu pɛɛrɩ á pa á Tu Wɛ dɩm. Bantʋ vara bam yɩra sɩɩnɩ ya cɔgɩ mʋ. Wɛ bá sɛ o joŋi kaanɩm dɩm.»
26 Baŋa-Wɛ daa ma ta Moyisi DƖ wɩ:
27 «Sɔŋɔ vara na lʋga, bu maama wʋ́ maŋɩ o nu tee nɩ mʋ da yarpɛ, nɩ kʋ na yɩ nʋa, naa pǝlbu, naa bʋbʋna mʋ. Da nana dɛ dɩm nɩ sɩ kʋ taa veǝ, ka laan wʋ́ maŋɩ sɩ ba kwe-ka ba ma kɩ wʋdiu pɛɛrɩ ba pa Baŋa-Wɛ. 28 Yɩ kwe-na varɩm dɩ o bu á gʋ á ma á kɩ kaanɩm dɛ dɩdʋa wʋnɩ.
29 Abam wʋlʋ na bʋŋɩ sɩ o kɩ le-kǝm kaanɩm o pa Baŋa-Wɛ, sɩ o tɔgɩ kaanɩm dɩm cwǝŋǝ cɩga cɩga. Kʋntʋ baŋa nɩ mʋ Wɛ wʋ́ joŋi kʋ tu pɛɛrɩ dɩm. 30 Ba nan maŋɩ sɩ ba di varɩm wʋm nwana yam maama dɛ dɩlʋ wʋnɩ ba na kɩ kaanɩm dɩm tɩn mʋ. Ba yɩ pa tɩga pʋʋrɩ yɩ ya ta wʋra. Amʋ mʋ yɩ Baŋa-Wɛ dɩm.
31 Yɔɔrɩ á taá tɔgɩ amʋ niə yam yɩ á kɩ á tɔgɩ ya na brɩ te tɩn. Amʋ mʋ yɩ Baŋa-Wɛ dɩm. 32 Yɩ yaalɩ-na amʋ yɩrɩ dɩm, dɩ na yɩ lanyɩranɩ fasɩ tɩn ŋwaanɩ. Yisɩrayɛlɩ tiinə bam maama maŋɩ sɩ ba sɛ amʋ mʋ nɩ a yɩ lanyɩranɩ fasɩ. Amʋ mʋ yɩ Baŋa-Wɛ dɩm. Amʋ ma pɔɔrɩ abam mʋ sɩ á dɩ taa yɩ lanyɩranɩ fasɩ. 33 Amʋ nan jaanɩ abam a nuŋi Ezipi nɩ a ba yo, sɩ a taa yɩ abam Tu Wɛ dɩm mʋ. Amʋ mʋ yɩ Baŋa-Wɛ dɩm.»