Wɛ kaanɩm tiinə bam taanɩ
21
Baŋa-Wɛ ta ma ta dɩ Moyisi DƖ wɩ:«Ta dɩ Arɔn dwi kaanɩm tiinə bam nɩ: Kaanɩm dwi tu na tɩga, o nan yɩ da kʋ ŋwaanɩ o digimi o tɩtɩ dɩ cullu tɩm. 2 Kʋ nan na yɩ o cʋrʋ, o jɩgɩ cwǝŋǝ sɩ o zʋ kʋ tu luə nɩ. Kʋ na yɩ o nu, naa o ko, naa o bu-baarʋ, naa o bukɔ, naa o zɩmbaarʋ, naa o nyaanɩ, 3 naa o nakɔ wʋlʋ ta na wʋ zʋ barʋ yɩ o wʋ ba sɔŋɔ nɩ tɩn, o jɩgɩ cwǝŋǝ sɩ o digimi o tɩtɩ ba lwi baŋa nɩ. 4 Sɩ kʋ na yɩ balʋ na bwələ dɩd-o kadri ŋwaanɩ tɩn mʋ, kʋ daɩ sɩ o digimi o tɩtɩ bantʋ lwi baŋa nɩ.
5 Kaanɩm tiinə daɩ sɩ ba ceeri ba yum, naa ba fanɩ ba twana niə yam, naa ba goni ba yɩra luə cullu ŋwaanɩ. 6 Ba maŋɩ sɩ ba pɔɔrɩ ba tɩtɩ mʋ ba pa ba Tu Wɛ dɩm, sɩ ba yɩ yáalɩ DƖ yɩrɩ dɩm. Kʋ na yɩ te tɩn, bantʋ yǝni ba kwe wʋdiu pɛɛra mʋ ba paɩ Baŋa-Wɛ.a Pɛɛra yantʋ na yɩ wʋdiu ya paɩ ba Tu Wɛ dɩm tɩn ŋwaanɩ, kaanɩm tiinə bam maŋɩ sɩ ba taa jɩgɩ wʋ-poŋo mʋ.
7 Kaanɩm tu daɩ sɩ o kwe ka-boro o ma ji o kaanɩ. O nan ba maŋɩ sɩ o di kaanɩ wʋlʋ na zʋ barʋ yɩ o yag-o tɩn. Bɛŋwaanɩ, kaanɩm tiinə pɔɔrɩ ba tɩtɩ mʋ ba pa ba Tu Wɛ dɩm. 8 Nɔɔna maama nan maŋɩ sɩ ba taa nɩgɩ kaanɩm tiinə bam, ba na pɔɔrɩ ba tɩtɩ Wɛ ŋwaanɩ tɩn mʋ. Bantʋ mʋ kwe wʋdiu pɛɛra yam ba paɩ abam Tu Wɛ dɩm. Amʋ mʋ kʋntʋ. Amʋ yɩ Baŋa-Wɛ dɩm na yɩ lanyɩranɩ fasɩ tɩn mʋ. A ma pɔɔrɩ abam sɩ á dɩ taá yɩ lanyɩranɩ fasɩ amʋ ŋwaanɩ. 9 Kaanɩm tu bukɔ na digimi o tɩtɩ ka-boro tɩtʋŋa baŋa nɩ, kʋ tu yáalɩ o ko yɩrɩ mʋ. Ba maŋɩ sɩ ba zwɛ‑o mʋ sɩ o tɩ.
10 Kʋ na yɩ Wɛ kaanɩm yigə tu wʋm, ba logi Wɛ swəlim nugə wʋntʋ yuu nɩ mʋ ba pɔɔr‑o ba zɩgɩ o tɩtʋŋɩ dɩm ŋwaanɩ, yɩ o jɩgɩ cwǝŋǝ sɩ o taa zʋʋrɩ kaanɩm gwar-laarʋ tɩm. Kʋ nan daɩ sɩ kʋ tu vugimi o yuuywe, naa o kaarɩ o tɩtɩ gwaarʋ luə cullu ŋwaanɩ. 11 O ba maŋɩ sɩ o twɛ tʋʋ, kʋ na maŋɩ kʋ yɩ o ko, naa o nu dɩ. O na vɩn yɩ o kɩ kʋntʋ, oó digimi o tɩtɩ dɩ cullu tɩm mʋ. 12 Kaanɩm yigə tu wʋm daɩ sɩ o yagɩ jero-vwe dɩm o nuŋi sɩ o keeri luə. O kǝm dɩm kʋntʋ wʋ́ cɔgɩ wara-je sɩm dɩ cullu tɩm mʋ. Kʋ yɩ o Tu Wɛ dɩm swəlim nugə mʋ ba mɛ ba pɔɔr‑o kaanɩm tɩtʋŋɩ dɩm ŋwaanɩ. Amʋ mʋ yɩ Baŋa-Wɛ dɩm.
13 Kaanɩm yigə tu wʋm nan maŋɩ sɩ o beeri bukɔ wʋlʋ na yǝri baara tɩn mʋ, sɩ o di‑o o kɩ o kaanɩ. 14 O daɩ sɩ o kwe kadəm, naa kaanɩ wʋlʋ na zʋ barʋ yɩ o yag-o tɩn, naa ka-boro o maa kɩ o kaanɩ. Kaanɩm yigə tu wʋm wʋ́ di bukɔ wʋlʋ na yǝri baara, yɩ o ta yɩ o tɩtɩ dwi dɩm bukɔ tɩn mʋ. 15 Kʋ na daɩ kʋntʋ, biə balʋ o na wʋ́ lʋ tɩn bá maŋɩ dɩ cullu tɩm sɩ ba ji amʋ kaanɩm tiinə. Amʋ mʋ yɩ Baŋa-Wɛ dɩm. A ma pɔɔrɩ kaanɩm yigə tu wʋm sɩ o taa yɩ amʋ nyɩm.»
16 Baŋa-Wɛ ta ma ta dɩ Moyisi DƖ wɩ:
17 «Ta dɩ Arɔn nɩ: Kʋ zɩgɩ lele sɩ kʋ taa ve wuu, n dwi dɩm wʋnɩ wʋlʋ yɩra na jɩgɩ gɛɛrɩ, kʋntʋ tu daɩ sɩ o kwe wʋdiu pɛɛra o kaanɩ o pa o Tu Wɛ dɩm. 18 Wʋlʋ na yɩ lilwe, naa gwana, naa o yibiyə na cɔgɩ, naa o yɩra yam na ba maɩ daanɩ mɛ seeni, 19 naa o naga na bwəri, naa o jɩŋa na bwəri mʋ, 20 o nan na jɩgɩ pɔnɔ, naa o na yɩ naalɩ, naa o yiǝ ta na cɔgɩ, naa o na jɩgɩ ŋwana naa pooru o yɩra nɩ, naa ba na lwɩ kʋ tu mancala mʋ, o daɩ sɩ o kɩ kaanɩm jero-vwe dɩm wʋnɩ. 21 Amʋ kaanɩm tu Arɔn dwi tu wʋlʋ maama yɩra na jɩgɩ gɛɛrɩ, kʋ tu ba jɩgɩ cwǝŋǝ sɩ o kwe wʋdiu pɛɛra o kaanɩ o pa o Tu Wɛ dɩm. Kʋ daɩ sɩ o kɩ kʋntʋ, o yɩra yam na jɩgɩ gɛɛrɩ tɩn ŋwaanɩ. 22 Nɔɔnʋ wʋm kʋntʋ nan jɩgɩ cwǝŋǝ sɩ o da o di wʋdiu kʋlʋ ba na mɛ ba kɩ kaanɩm ba pa Wɛ tɩn, kʋ na maŋɩ kʋ yɩ kʋlʋ ba na pɔɔrɩ Wɛ ŋwaanɩ yɩ kʋ tiini kʋ yɩ lanyɩranɩ fasɩ tɩn mʋ dɩ. 23 Sɩ o nan daɩ sɩ o zʋ jero-vwe dɩm nɩ o twɛ gar-jalɩ dɩm mʋ. O ta daɩ sɩ o yi kaanɩm bimbim dɩm yigə. Bɛŋwaanɩ, o jɩgɩ gɛɛrɩ o yɩra yam nɩ. Kʋ na daɩ kʋntʋ, oó cɔgɩ amʋ jero-vwe dɩm dɩ sɩ zɩla yalʋ na pɔɔrɩ amʋ zulə ŋwaanɩ tɩn. Amʋ mʋ yɩ Baŋa-Wɛ dɩm. Amʋ ma pɔɔrɩ wǝǝnu tɩm kʋntʋ sɩ tɩ taa yɩ lanyɩranɩ fasɩ amʋ ŋwaanɩ.»
24 Moyisi dɛɛn tagɩ wǝǝnu tɩm kʋntʋ maama o brɩ Arɔn, dɩ o biə bam, dɩ Yisɩrayɛlɩ tiinə bam maama.