Tusim na jɩgɩ waarɩm te tɩn
20
Baŋa-Wɛ daa ma ta Moyisi DƖ wɩ:2 «Ta dɩ Yisɩrayɛlɩ tiinə bam nɩ: Abam balʋ na yɩ Yisɩrayɛlɩ dwi tiinə dɩ vərə balʋ na zʋʋrɩ á wʋnɩ tɩn wʋlʋ maama na kwe o bu o kɩ kaanɩm o pa Molɔkɩ jwəm dɩm, kʋ tu maŋɩ sɩ o tɩ mʋ. Á tɩʋ nɔn-kɔgɔ kʋm maama wʋ́ dʋl-o dɩ kandwa mʋ ba gʋ. 3 Amʋ wʋ́ nuŋi kʋ tu kwaga nɩ sɩ o daa yɩ tɔgɩ o wǝli Yisɩrayɛlɩ dwi dɩm wʋnɩ. Bɛŋwaanɩ, o kɩ o cɔgɩ amʋ jero-vwe dɩm mʋ yɩ o daarɩ o yáalɩ amʋ yɩrɩ dɩm na yɩ lanyɩranɩ fasɩ tɩn, dɩ o na kwe o bu o kɩ Molɔkɩ jwəm dɩm jɩŋa nɩ tɩn ŋwaanɩ. 4 Á tɩʋ kʋm nɔɔna bam yigə nan na tǝrǝ dɩ kʋntʋ tu na kɩ kǝm-lɔŋɔ kʋlʋ tɩn, yɩ ba vɩn sɩ ba gʋ-o kʋ ŋwaanɩ, 5 amʋ tɩtɩ mʋ wʋ́ nuŋi kʋ tu dɩdaanɩ o sɔŋɔ tiinə bam maama kwaga nɩ sɩ ba daa yɩ tɔgɩ ba wǝli ba dwi tiinə bam wʋnɩ. Amʋ ta wʋ́ kɩ kʋntʋ dɩ balʋ maama na dɛ ba zuli Molɔkɩ ba daarɩ amʋ tɩn mʋ.
6 Abam wʋlʋ na ywəri amʋ kwaga nɩ o daarɩ o vu sampwəri naa ciciri vʋra te sɩ ba vɩɩrɩ wǝǝnu ba brɩ-o, amʋ wʋ́ nuŋi kʋntʋ tu kwaga nɩ. A nan wʋ́ lɩ-o sɩ o daa yɩ tɔgɩ o wǝli Yisɩrayɛlɩ dwi dɩm wʋnɩ. 7 Pɔɔrɩ-na á tɩtɩ dɩ wo-digiru maama, sɩ á taá yɩ wʋ-poŋo tiinə. Bɛŋwaanɩ, amʋ mʋ yɩ abam Tu Baŋa-Wɛ dɩm. 8 Taá sɛ-na amʋ kwiə yam, sɩ á taá tɔgɩ-ya. Bɛŋwaanɩ, amʋ mʋ yɩ Baŋa-Wɛ dɩlʋ na lʋŋɩ abam tɩn mʋ.
9 Wʋlʋ maama na sɔɔlɩ lwarɩm o pa o ko naa o nu, kʋntʋ tu maŋɩ sɩ o tɩ mʋ. Kʋ nan wʋ́ taa yɩ o tɩtɩ yigə mʋ dɩ o na wʋ́ tɩ tɩn.
10 Nɔɔnʋ na kɩ kabwəŋə dɩ o doŋ kaanɩ, sɩ ba gʋ baarʋ wʋm dɩ kaanɩ wʋm maama. 11 Nɔɔnʋ nan na pəni dɩ o ko kaanɩ, o yáalɩ o ko wʋm mʋ kʋntʋ. Baarʋ wʋm dɩ kaanɩ wʋm maama mʋ maŋɩ sɩ ba tɩ. Kʋʋ́ taa yɩ ba tɩtɩ yigə dɩ ba na wʋ́ tɩ tɩn. 12 Nɔɔnʋ nan na pəni dɩ o bu-kaanɩ, ba maama bale maŋɩ sɩ ba tɩ mʋ. Ba yɔɔrɩ ba tʋŋɩ kʋlʋ na jɩgɩ cavɩɩra tɩn mʋ. Kʋʋ́ taa yɩ ba tɩtɩ yigə dɩ ba na wʋ́ tɩ tɩn. 13 Baarʋ dɩ o doŋ baarʋ na pəni daanɩ, nɩ baarʋ na yǝni o pəni dɩ kaanɩ te tɩn, ba yɔɔrɩ ba tʋŋɩ wo-zɔɔnɩ mʋ. Ba maama bale maŋɩ sɩ ba tɩ mʋ. Kʋʋ́ taa yɩ ba tɩtɩ yigə dɩ ba na wʋ́ tɩ tɩn. 14 Nɔɔnʋ na di kaanɩ yɩ o ta soe o kaanɩ wʋm nu o wǝli da, kʋ yɩ kǝm-balwaarʋ mʋ kʋntʋ o kɩa. Ba maŋɩ sɩ ba zwɛ bantʋ batɔ maama mʋ ba gʋ. Yɩ sɛ-na sɩ kǝm-lɔŋɔ kʋm kʋntʋ kɩ á tɩtarɩ nɩ.
15 Baarʋ wʋlʋ na kɩ sar-pwəgə dɩ varɩm, kʋ tu maŋɩ sɩ o tɩ mʋ, sɩ á daarɩ á gʋ varɩm wʋm dɩ. 16 Kaanɩ nan na kwe o tɩtɩ o pa varɩm pəni dɩd-o, á wʋ́ gʋ kaanɩ wʋm dɩ varɩm wʋm maama mʋ. Ba maŋɩ sɩ ba tɩ mʋ. Kʋʋ́ taa yɩ ba tɩtɩ yigə dɩ ba na wʋ́ tɩ tɩn.
17 Nɔɔnʋ na di o nakɔ, ba na yɩ nu daanɩ, naa ko daanɩ mʋ dɩ, yɩ ba pəni daanɩ, ba yɔɔrɩ ba kɩ cavɩɩra kǝm mʋ. Baá ja-ba ba vu ba dwi tiinə yigə nɩ mʋ, yɩ ba zəli-ba sɩ ba daa yɩ tɔgɩ ba wǝli ba dwi tiinə bam wʋnɩ. Baarʋ wʋm na pəni dɩ o nakɔ wʋm tɩn ŋwaanɩ, kʋʋ́ ni wʋntʋ mʋ. 18 Nɔɔnʋ na pəni dɩ kaanɩ wʋlʋ ta na jɩgɩ o cana zarɩm o kɩ tɩn, ba maama tusi cullu tɩm seeni pa ba digimi. Ba maŋɩ sɩ ba zəli ba maama mʋ, sɩ ba daa yɩ tɔgɩ ba wǝli ba dwi tiinə bam wʋnɩ.
19 Kʋ daɩ sɩ baarʋ pəni dɩ o nu zɩmbaarʋ, naa o nu nyaanɩ, naa o ko nakɔ. Wʋlʋ na kɩ kǝm dɩm kʋntʋ, kʋ tu yáalɩ o cʋrʋ mʋ. Ba maama maŋɩ sɩ ba na waarɩm mʋ. 20 Nɔɔnʋ nan na pəni dɩ o ko zɩmbaarʋ kaanɩ, naa o ko nyaanɩ kaanɩ, o yáalɩ o ko cʋrʋ kʋm mʋ. Baarʋ wʋm dɩ kaanɩ wʋm yɔɔrɩ ba maŋɩ sɩ ba na waarɩm mʋ. Ba nan bá na dwi. 21 Nɔɔnʋ na di o zɩmbaarʋ kaanɩ, naa o nyaanɩ kaanɩ, yɩ o pəni dɩd-o, kʋ tu jɩgɩ digiru Wɛ cullu tɩm seeni mʋ, yɩ o ta yáalɩ o cʋrʋ kʋm. Ba nan bá na dwi.
22 Nan yɔɔrɩ á taá tɔgɩ amʋ kwiə yam dɩ a niə yam, sɩ á taá kɩ ya maama. Abam na wʋ kɩ kʋntʋ, amʋ na lagɩ a ja abam a zʋ tɩga kalʋ wʋnɩ tɩn wʋ́ vɩn abam mʋ. 23 Kʋ nan na yɩ dwi-gɛ tiinə balʋ amʋ na lagɩ a zəli-ba sɩ ba daarɩ tɩga kam ba pa abam tɩn, sɩ á yɩ taá tɔgɩ-na ba cwe sɩm. Amʋ nan culi-ba mʋ, ba na kɩ wo-zɔɔna yantʋ doŋ tɩn ŋwaanɩ. 24 Amʋ nan goni ni mʋ dɩ abam sɩ a kwe ba tɩga kantʋ a pa abam sɩ á taá te-ka yɩ á zʋʋrɩ ka wʋnɩ. Tɩga kam kʋntʋ tiini ka ywəmmə dɩ varɩm dɩ kɔnɔ. Amʋ mʋ yɩ abam Tu Baŋa-Wɛ dɩm. A ma pɔɔrɩ abam sɩ á taá yɩ á yɩra dɩ dwi-gɛ tiinə maama. 25 Kʋntʋ ŋwaanɩ abam maŋɩ sɩ á taá pɔɔrɩ vara dɩ zunə balʋ na maŋɩ dɩ cullu tɩm tɩn, dɩ balʋ na jɩgɩ digiru cullu tɩm seeni tɩn daanɩ mʋ. Nan yɩ digimi-na á tɩtɩ dɩ wǝǝnu tɩlʋ amʋ na pɛ tɩ taa yɩ wo-zɔɔna tɩ paɩ abam tɩn, nɩ tɩ na yɩ vara dɩ zunə dɩ tɩga wo-vəəlu dɩ. 26 Pɔɔrɩ-na á tɩtɩ amʋ ŋwaanɩ sɩ á taá yɩ wʋ-poŋo tiinə. Bɛŋwaanɩ, amʋ Baŋa-Wɛ dɩm yɩ wʋ-poŋo tu mʋ. A ma pɔɔrɩ abam sɩ á yɔɔrɩ á taá yɩ á yɩra dɩ dwi-gɛ tiinə maama, sɩ á daarɩ á taá yɩ amʋ tɩtɩ nɔɔna bam.
27 Abam wʋnɩ baarʋ wʋlʋ, naa kaanɩ wʋlʋ na yɩ sampwərə naa ciciri vʋrʋ, kʋ tu maŋɩ sɩ o tɩ mʋ. Á wʋ́ dʋlɩ-ba dɩ kandwa mʋ á gʋ. Kʋʋ́ taa yɩ ba tɩtɩ yigə dɩ ba na wʋ́ tɩ tɩn.»