Wʋ-poŋo dɩ cɩga taanɩ
19
Baŋa-Wɛ daa ma ta dɩ Moyisi DƖ wɩ:2 «Ta dɩ Yisɩrayɛlɩ kɔ-fɔrɔ kʋm maama nɩ: Pɔɔrɩ-na á tɩtɩ sɩ á taá yɩ wʋ-poŋo tiinə, sɩ amʋ wʋlʋ na yɩ á Tu Baŋa-Wɛ dɩm tɩn tɩtɩ mʋ yɩ wʋ-poŋo tu. 3 Abam wʋnɩ nɔɔnʋ maama maŋɩ sɩ o taa nɩgɩ o nu dɩ o ko mʋ. Abam ta maŋɩ sɩ á taá ye amʋ siun da yam ni nɩ mʋ. Amʋ mʋ yɩ abam Tu Baŋa-Wɛ dɩm. 4 Yɩ lɔ-na amʋ kwaga nɩ á zuli jwǝnǝ. Ta yɩ kwe-na luuru á ma á mɔ wa-yɔɔrʋ á pa á tɩtɩ. Amʋ mʋ yɩ abam Tu Baŋa-Wɛ dɩm.
5 Abam na gʋ varɩm sɩ á ma á kɩ yazurə pɛɛrɩ á kaanɩ á pa Baŋa-Wɛ, tɔgɩ-na kʋ tɩtʋŋɩ dɩm cwǝŋǝ sɩ amʋ sɛ a joŋi-dɩ. 6 Á maŋɩ sɩ á di varɩm wʋm kʋntʋ nwana yam mʋ á ti dɛ dɩlʋ wʋnɩ á na kwe‑o á kɩ kaanɩm tɩn, naa tɩga na pʋʋrɩ sɩ á di-ya. Nwana yam kʋntʋ na yi da yatɔ dɛ dɩm, sɩ á zwɛ-ya. 7 Bɛŋwaanɩ, nwana yam na yi da yatɔ, yɩ nɔɔnʋ wʋlʋ na di-ya, a bá joŋi kʋ tu pɛɛrɩ dɩm, ya na wʋ maŋɩ dɩ cullu tɩm tɩn ŋwaanɩ. 8 Wʋlʋ nan na di da yatɔ nwana brɩ nɩ o kwe kʋlʋ na pɔɔrɩ amʋ ŋwaanɩ tɩn mʋ o pa kʋ yɩ wo-yɔɔ. Kʋntʋ tu daa bá tɔgɩ o wǝli Yisɩrayɛlɩ dwi dɩm wʋnɩ.
9 Abam na ve á karɩ sɩm nɩ sɩ á zagɩ á wʋdiiru á joori sam, yɩ gwe-na wʋdiiru tɩlʋ maama na wʋ á karɩ sɩm ni nɩ tɩn, nan yɩ larɩ-na mɩna yalʋ wʋdi-zagɩna bam na daarɩ tɩn. 10 Kʋ yɩ bɩdwɩ mʋ dɩ á na gwəri vinyə tiu biə á kadwi sɩm wʋnɩ, sɩ á yɩ joori á gwəri-ba á kɩ bɩle, naa á twɛ tiu biə balʋ na tʋ tɩga nɩ tɩn. Yagɩ-na tɩntʋ maama á pa yinigə tiinə, dɩ vərə balʋ na zʋʋrɩ dɩ abam tɩn, sɩ ba dɩ wanɩ ba larɩ ba di.a Amʋ mʋ yɩ abam Tu Baŋa-Wɛ dɩm.
11 Yɩ ŋɔ n doŋ wǝǝnu, nan yɩ gan‑o, naa n fɔ vwan n pa‑o.
12 Yɩ ma amʋ yɩrɩ n du durə vwan taanɩ baŋa nɩ. Kʋntʋ brɩ nɩ n yáalɩ amʋ yɩrɩ dɩm mʋ. Amʋ mʋ yɩ Baŋa-Wɛ dɩm.b
13 Yɩ pini n doŋ, nan yɩ vrɩ o wǝǝnu. Nmʋ dɩ nɔɔnʋ na maŋɩ daanɩ sɩ o tʋŋɩ o pa‑m, sɩ n pa‑o ŋwɩɩrʋ tɩlʋ o na maŋɩ sɩ o joŋi tɩn lɩla. Yɩ yagɩ sɩ tɩga na pʋʋrɩ, sɩ n laan pa‑o.c
14 Yɩ zaŋɩ n twɩ zwa-kɔgɔ. Nan yɩ tiŋi cɩkʋ lilwe cwǝŋǝ nɩ sɩ o garɩ o tʋ tɩga nɩ. Kwarɩ-na amʋ wʋlʋ na yɩ abam Tu Baŋa-Wɛ dɩm tɩn.
15 Yɩ kweeli-na cɩga á taanɩ dim baŋa nɩ. Kʋ daɩ sɩ á tɔgɩ nɔɔnʋ kwaga o yinigə ŋwaanɩ, naa o duuni ŋwaanɩ. Nan tɔgɩ-na cɩga kam yɩranɩ.d
16 Yɩ taá kaagɩ á jagɩ sawɩa sɩ á ma á cɔgɩ á donnǝ. Abam wʋlʋwʋlʋ yɩ kwɩɩlɩ cɩga sɩ o pa o doŋ ga o ŋwɩa. Amʋ mʋ yɩ Baŋa-Wɛ dɩm.
17 Yɩ ta n jɩgɩ n doŋ jʋʋ n bɩcarɩ nɩ. N doŋ wʋm nan na tusi, sɩ n yɔɔrɩ n kaan‑o, sɩ wʋntʋ lwarɩm yɩ taa wʋ n yuu nɩ.
18 Yɩ pa n banɩ zaŋɩ n doŋ baŋa nɩ sɩ n mɔ jɩm o kǝm-balɔrɔ ŋwaanɩ. Yɩ ta n culi n doŋ. Nan tan soe‑o sɩ kʋ maŋɩ dɩ n na soe n tɩtɩ te tɩn.e Amʋ mʋ yɩ Baŋa-Wɛ dɩm.
19 Taá sɛ-na amʋ kwiə yam maama. Yɩ pa-na sɩ vara dwi na yɩ təri təri tɩn di daanɩ ba lʋ. Yɩ kwe-na wo-dwə na yɩ dwi dwi tɩn á du kara dɩdʋa wʋnɩ. Nan yɩ zʋ-na gɔrɔ kʋlʋ ba na mɛ garyiə na yɩ təri təri ba ma sɔ-kʋ tɩn.
20 Nɔɔnʋ na pəni dɩ gaba-kana kalʋ ba na bʋŋɩ sɩ ba kwe ba pa nɔɔnʋ wʋdoŋ tɩn, yɩ kʋ tu ta na wʋ ŋwɩ gaba-kana kam jɩnɩ sɩ o taa te o tɩtɩ, baá waarɩ-ba mʋ. Kʋ daɩ sɩ ba tɩ. Bɛŋwaanɩ, gaba-kana kam ta wʋ yi sɩ o taa te o tɩtɩ. 21 Baarʋ wʋm maŋɩ sɩ o ja pi-bala mʋ o vu jero-vwe dɩm ni nɩ, sɩ o ma o kɩ lwarɩm jɩnɩ kaanɩm o pa Baŋa-Wɛ. 22 Kaanɩm tu wʋm dɩ maa wʋ́ kwe pi-bala kam kʋntʋ o kɩ kaanɩm o ma o lɩ nɔɔnʋ wʋm tusim dɩm Baŋa-Wɛ yigə nɩ. Wɛ laan maa wʋ́ kwe kʋntʋ tu lwarɩm DƖ ma DƖ cɛ-o.
23 Abam na zʋ Kaanan tɩga kam wʋnɩ, yɩ á jəri tweeru tɩlʋ na ləri biə pa nɔɔna di tɩn, sɩ á culi dɩ wo-biə bam bɩna yatɔ. Yɩ di-na tiu biə bam kʋntʋ, ba na wʋ maŋɩ dɩ cullu tɩm tɩn ŋwaanɩ. 24 Bɩna yana bɩnɩ dɩm na yiǝ, sɩ á pɔɔrɩ tiu biə bam maama sɩ ba taa yɩ Baŋa-Wɛ nyɩm, sɩ á di ywəəni amʋ ŋwaanɩ. 25 Kʋ daarɩ, bɩna yanu bɩnɩ dɩm wʋnɩ, á laan jɩgɩ cwǝŋǝ sɩ á di tɩ biə bam mʋ, á daarɩ á gwəri-ba á tɩtɩ ŋwaanɩ. Abam na kɩ tɩntʋ maama, á tweeru tɩm wʋ́ puli yɩ dɩ taa ləri biə zanzan dɩ pa abam. Amʋ mʋ yɩ abam Tu Baŋa-Wɛ dɩm.
26 Yɩ di-na nwana dɩ ya wʋ jana. Á nan yɩ zaŋɩ á kɩ liri-mwannʋ kikiə, dɩ yi-nɛɛrɩ tɩtʋŋa. 27 Á na fanɩ á yum, sɩ á daarɩ á tri seeni yuuywe sɩm. Nan yɩ fanɩ-na á twana niə yam.
28 Yɩ kɩ-na daalɩ á yɩra yam nɩ, naa sɩ á goni á yɩra, luə cullu ŋwaanɩ. Amʋ mʋ yɩ Baŋa-Wɛ dɩm.
29 Yɩ yigi n bukɔ n dɩ kabwərim wʋnɩ. Kǝm dɩm kʋntʋ yɩ n jɩg-o mʋ n yáala. Kʋ ta wʋ́ pa á tɩʋ kʋm maama su dɩ kabwərim dɩ wo-balwaarʋ kənə mʋ.
30 Taá ye-na amʋ siun da yam ni nɩ, sɩ á daarɩ á taá nɩgɩ amʋ jero-vwe dɩm. Amʋ mʋ yɩ Baŋa-Wɛ dɩm.
31 Yɩ zaŋɩ-na á vu sampwəri naa ciciri vʋra te sɩ ba vɩɩrɩ wǝǝnu ba brɩ abam. Á na kɩ kʋntʋ, á wʋ́ digimi á tɩtɩ dɩ cullu tɩm mʋ. Amʋ mʋ yɩ abam Tu Baŋa-Wɛ dɩm.
32 Nankwɩn na yǝni ba yi á te, sɩ á zaŋɩ wɛɛnɩ á zuli-ba. Kʋntʋ mʋ brɩ nɩ á kwarɩ amʋ. Amʋ mʋ yɩ Baŋa-Wɛ dɩm.
33 Kʋ na yɩ vərə balʋ na zʋʋrɩ abam tɩtarɩ nɩ tɩn, sɩ á yɩ bɛɛsɩ-ba. 34 Á wʋ́ taá kɩ-ba nɩ á na wʋ́ kɩ á donnǝ Yisɩrayɛlɩ tiinə bam te tɩn mʋ. Nan taá soe-ba nɩ á na soe á tɩtɩ te tɩn. Guli-na nɩ á dɩ dɛɛn yɩ vərə mʋ Ezipi tɩʋ kʋm wʋnɩ. Amʋ mʋ yɩ abam Tu Baŋa-Wɛ dɩm.
35 Abam na lagɩ á maŋɩ wǝǝnu á yəgi á pa á donnǝ, sɩ á yɩ pini-ba tɩ duuni naa tɩ kamunni baŋa nɩ. 36 Abam bwɛn sɩm, dɩ wǝǝnu tɩlʋ á na maɩ á maŋɩ wǝǝnu duuni na maɩ te tɩn maŋɩ sɩ tɩ taa yɩ cɩga cɩga mʋ. Amʋ mʋ yɩ abam Tu Baŋa-Wɛ dɩm. A dɛɛn mʋ jaanɩ abam a nuŋi Ezipi nɩ a ba yo.
37 Nan yɔɔrɩ á taá tɔgɩ amʋ kwiə yam dɩ a niə yam, sɩ á taá kɩ ya maama. Amʋ mʋ yɩ Baŋa-Wɛ dɩm.»