Sar-pwəgə taanɩ
18
Baŋa-Wɛ daa ma ta dɩ Moyisi DƖ wɩ:2 «Ta dɩ Yisɩrayɛlɩ tiinə bam nɩ: Amʋ mʋ yɩ abam Tu Baŋa-Wɛ dɩm. 3 Abam dɛɛn zʋʋrɩ Ezipi nɩ mʋ, nan yɩ lwəni-na ba kikiə yam. Amʋ nan na lagɩ a pa abam zʋ Kaanan tɩga kam nɩ kʋntʋ tɩn, yɩ lwəni-na ba dɩ kikiə. 4 Yɔɔrɩ á taá tɔgɩ amʋ niə yam yɩranɩ. Taá ye-na sɩ á sɛ amʋ kwiə yam. Amʋ mʋ yɩ abam Tu Baŋa-Wɛ dɩm. 5 Abam wʋlʋ kikiə nan na sɩɩnɩ ya tɔgɩ amʋ kwiə yam dɩ a niə yam, kʋ tu wʋ́ na ŋwɩa ya baŋa nɩ.a Amʋ mʋ yɩ Baŋa-Wɛ dɩm.
6 Abam wʋlʋwʋlʋ yɩ kɩ sar-pwəgə dɩ o cʋrʋ. Amʋ mʋ yɩ Baŋa-Wɛ dɩm.
7 Yɩ yáalɩ n ko yuu sɩ n pəni dɩ n nu. Nmʋ nan daɩ sɩ n yáalɩ n nu dɩ kʋntʋ.
8 Nan yɩ zʋ n ko kaana wʋnɩ sɩ n kɩ sar-pwəgə dɩ ba wʋlʋwʋlʋ. Kǝm dɩm kʋntʋ yáalɩ n ko mʋ.
9 Yɩ kɩ sar-pwəgə dɩ n nakɔ, o ya zɩ yɩ n nakɔ vɩkɩ, naa á na yɩ nu daanɩ, naa ko daanɩ mʋ dɩ. Kʋ yɩ bɩdwɩ mʋ dɩ wʋlʋ á na bɩgɩ daanɩ sɔŋɔ dɩdʋa nɩ, naa wʋlʋ na bɩgɩ je sɩdonnǝ nɩ, yɩ á lwarɩ daanɩ tɩn.
10 Yɩ kɩ sar-pwəgə dɩ n naa. Kʋ na yɩ n bu-baarʋ bukɔ mʋ, naa n bukɔ bu dɩ, wʋlʋ na pəni dɩd-o, kʋ tu yáalɩ o tɩtɩ mʋ.
11 Yɩ kɩ sar-pwəgə dɩ n ko kaana bam wʋlʋ bukɔ. O na yɩ bukɔ wʋlʋ n ko na lʋgɩ tɩn, o yɩ n nakɔ mʋ kʋntʋ.
12 Yɩ kɩ sar-pwəgə dɩ n ko nakɔ, wʋntʋ na yɩ n ko cʋrʋ tɩn ŋwaanɩ.
13 Yɩ kɩ sar-pwəgə dɩ n nu nyaanɩ, naa o zɩmbaarʋ, bantʋ na yɩ n nu cʋrrʋ tɩn ŋwaanɩ.
14 Yɩ yáalɩ n ko cʋrʋ, sɩ n pəni dɩ o kaanɩ. O yɩ n nu mʋ kʋntʋ.
15 Yɩ kɩ sar-pwəgə dɩ n bu-kaanɩ.
16 Yɩ yáalɩ n zɩmbaarʋ, naa n nyaanɩ sɩ n pəni dɩ o kaanɩ.
17 Nmʋ dɩ kaanɩ wʋlʋ na kɩ sar-pwəgə daanɩ tɩn, nan daa n yɩ soe o bukɔ, naa o naa. Bantʋ maama yɩ cʋrrʋ mʋ. Kǝm dɩm kʋntʋ tiini dɩ jɩgɩ cavɩɩra mʋ.
18 N kaanɩ ta na ŋwɩ: yɩ zaŋɩ n soe o nyaanɩ naa o zɩmbaarʋ n ma n kɩ n kaanɩ. Kʋʋ́ pa ba zwɩ kazwɩ daanɩ mʋ.
19 Kaanɩ na jɩgɩ o cana zarɩm o kɩ, yɩ pəni dɩd-o, sɩ o wʋ maŋɩ dɩ cullu tɩm.
20 Yɩ pəni dɩ n doŋ kaanɩ. Kʋntʋ wʋ́ pa n digimi Wɛ cullu tɩm seeni mʋ.
21 Kʋ na yɩ biə balʋ nmʋ na lʋgɩ tɩn, sɩ n yɩ kwe ba wʋlʋwʋlʋ n pa ba kaan‑o ba pa Molɔkɩ jwəm dɩm. Kʋntʋ wʋ́ pa á yáalɩ á Tu Wɛ dɩm yɩrɩ. Amʋ mʋ yɩ Baŋa-Wɛ dɩm.b
22 Baarʋ ba maŋɩ sɩ o pəni dɩ o doŋ baarʋ, nɩ baarʋ na pəni dɩ kaanɩ te tɩn. Kǝm dɩm kʋntʋ yɔɔrɩ dɩ yɩ wo-zɔɔnɩ mʋ.c
23 Baarʋ daɩ sɩ o kɩ sar-pwəgə dɩ varɩm. Kaanɩ dɩ nan ba maŋɩ sɩ o kwe o tɩtɩ o pa varɩm pəni dɩd-o. Kikiə yam kʋntʋ yɔɔrɩ ya jɩgɩ cavɩɩra mʋ.
24 Abam yɩ zaŋɩ-na á tɔgɩ kikiə yantʋ baŋa á digimi á tɩtɩ dɩ cullu tɩm. Dwi-gɛ tiinə balʋ nan na zʋʋrɩ yo seeni tɩn kaagɩ ba kɩ kikiə yam kʋntʋ mʋ, yɩ ba digimi ba tɩtɩ. Amʋ laan maa lagɩ a zəli-ba sɩ ba nuŋi ba daarɩ tɩga kam ba pa abam. 25 Ba wo-zɔɔna yam cɔgɩ tɩga kam mʋ. Kʋntʋ ŋwaanɩ a lagɩ a pa cam ba ka baŋa nɩ, pa ka vɩn ka nɔn-biə bam ka dʋlɩ ka yagɩ. 26 Abam nan maŋɩ sɩ á yɔɔrɩ á sɛ amʋ niə yam dɩ a kwiə yam mʋ. Á ba maŋɩ sɩ á kɩ wo-zɔɔna kikiə yantʋ doŋ, nɩ á na yɩ tɩmbiə naa á yɩ vərə mʋ dɩ. 27 Dwi-gɛ tiinə balʋ ya na zʋʋrɩ tɩga kam nɩ tɩn yǝni ba kɩ kǝm-balwaarʋ tɩntʋ maama mʋ pa ba cɔgɩ tɩga kam. A laan maa jɩgɩ abam a ve dáanɩ. 28 Abam dɩ nan na kɩ kʋntʋ doŋ á cɔgɩ tɩga kam, ka lagɩ ka vɩn abam ka dʋlɩ ka yagɩ, nɩ ka na maŋɩ ka kɩ te dɩ dwi-gɛ tiinə bam tɩn mʋ. 29 Cɩga tɩn, abam wʋlʋ maama nan na kaagɩ o kɩ wo-zɔɔna yam kʋntʋ, kʋntʋ tu daa bá tɔgɩ o wǝli Yisɩrayɛlɩ dwi dɩm wʋnɩ.
30 Ta á sɛ-na a niə yam. Nan yɩ tɔgɩ á kɩ wo-zɔɔna yantʋ na culi kǝm yɩ dwi-gɛ tiinə balʋ ya na zʋʋrɩ tɩga kam nɩ tɩn yǝni ba kɩ-ya tɩn. Abam na kɩ-ya, á wʋ́ cɔgɩ á tɩtɩ dɩ cullu tɩm mʋ. Amʋ nan mʋ yɩ abam Tu Baŋa-Wɛ dɩm.»