Vara gʋm cullu
17
Baŋa-Wɛ daa ma ta dɩ Moyisi DƖ wɩ:2 «Ta amʋ ni dɩntʋ n brɩ Arɔn dɩ o biə bam, kʋ wǝli dɩ Yisɩrayɛlɩ tiinə bam maama: 3-4 Yisɩrayɛlɩ dwi tu wʋlʋ na zɩgɩ je sɩlʋ maama nɩ o gʋ naa, naa piə, naa bʋŋʋ sɩ o ma kɩ kaanɩm, yɩ o wʋ jaanɩ varɩm wʋm o vu wara-je sɩm sɩ ba gʋ-o jero-vwe dɩm ni nɩ ba kaanɩ ba pa Baŋa-Wɛ, kʋ tu sagɩ dɩ cullu tɩm mʋ dɩ o na pwəri jana te tɩn. Kʋ daa daɩ sɩ o tɔgɩ o wǝli Yisɩrayɛlɩ dwi dɩm wʋnɩ. 5 Ni dɩntʋ wʋ́ cɩ Yisɩrayɛlɩ tiinə bam sɩ ba yɩ taa kaagɩ gaa wʋnɩ ba kɩ kaanɩm yɔɔ yɔɔ. Ba laan maa wʋ́ yǝni ba ja ba kaanɩm vara maama ba jeeri jero-vwe dɩm ni nɩ ba pa Baŋa-Wɛ. Kaanɩm tu wʋm wʋ́ kwe ba pɛɛra yam kʋntʋ o kɩ kaanɩm o pa Baŋa-Wɛ sɩ ya taa yɩ yazurə pɛɛra kaanɩm. 6 Kaanɩm tu wʋm maa wʋ́ kwe varɩm jana bam o miisi miisi o yagɩ kaanɩm bimbim dɩm na wʋ Wɛ jero-vwe ni dɩm nɩ tɩn sɛn sɩm nɩ. O ta wʋ́ zwɛ varɩm lara kam, sɩ ka lwəm dɩm taa ywəmmə dɩ paɩ Baŋa-Wɛ. 7 Yisɩrayɛlɩ tiinə bam daɩ sɩ ba ywəri Wɛ kwaga nɩ sɩ ba taa gʋɩ ba vara gaa wʋnɩ ba kaanɩ ba paɩ ciciri na jiri bʋnɩ tɩn.
Yisɩrayɛlɩ tiinə bam dɩ ba kwaga kam maŋɩ sɩ ba tɔgɩ ni dɩm kʋntʋ mʋ sɩ kʋ taa ve maŋa maama.
8 Daa n ta ta dɩ ba nɩ: Kʋ na yɩ Yisɩrayɛlɩ dwi tiinə naa vərə balʋ na zʋʋrɩ ba wʋnɩ tɩn, ba wʋlʋwʋlʋ na gʋ varɩm sɩ o ma o kɩ zwɛɛm kaanɩm naa kaanɩm dɩlʋ maama, 9 yɩ o na wʋ jaanɩ kaanɩm dɩm o jeeri Wɛ jero-vwe dɩm ni nɩ sɩ o kɩ kaanɩm o pa Baŋa-Wɛ, sɩ á lɩ kʋntʋ tu sɩ o daa yɩ tɔgɩ o wǝli Yisɩrayɛlɩ dwi dɩm wʋnɩ.»
Jana dim cullu
10 «Yisɩrayɛlɩ tiinə bam dɩ vərə balʋ na zʋʋrɩ ba wʋnɩ tɩn wʋnɩ wʋlʋ na di jana, amʋ wʋ́ nuŋi kʋ tu kwaga nɩ. A ta wʋ́ lɩ-o Yisɩrayɛlɩ dwi dɩm wʋnɩ. 11 Kʋ na yɩ te tɩn, woŋo maama jɩgɩ kʋ ŋwɩa kʋ jana bam ŋwaanɩ mʋ. Amʋ ma kwe jana bam a pa abam sɩ á taá ma-ba á kɩ kaanɩm sɩ á lɩ á lwarɩm amʋ yigə nɩ. Kʋ yɩ jana bam kʋntʋ mʋ paɩ á lwarɩm saarɩ, ba na ləri ŋwɩa kam yuu nɩ tɩn ŋwaanɩ.a 12 Kʋntʋ ŋwaanɩ mʋ pɛ a ta dɩ Yisɩrayɛlɩ tiinə bam nɩ: ba wʋlʋwʋlʋ dɩ vərə balʋ maama na zʋʋrɩ ba wʋnɩ tɩn daɩ sɩ ba di jana.
13 Yisɩrayɛlɩ tiinə bam dɩ vərə balʋ na zʋʋrɩ dɩ ba tɩn wʋlʋ na ve sɩ o tɔɔrɩ, yɩ o na gʋ varɩm wʋlʋ, naa zuŋə kalʋ na maŋɩ dɩ dim cullu tɩm baŋa nɩ tɩn, kʋ tu maŋɩ sɩ o pa jana kam nuŋi, yɩ o daarɩ o kalɩ kasʋlʋ o ma o suli-ka. 14 Bɛŋwaanɩ, woŋo maama yǝni kʋ jɩgɩ kʋ ŋwɩa kʋ jana bam ŋwaanɩ mʋ. Amʋ ma da kʋ ŋwaanɩ a wɩ: Yisɩrayɛlɩ tiinə bam daɩ sɩ ba di woŋo yɩ jana bam ta wʋ kʋ yɩra nɩ, sɩ wʋlʋ na di jana, kʋ tu daa bá tɔgɩ o wǝli amʋ nɔɔna bam wʋnɩ.
15 Nɔɔnʋ wʋlʋ nan na nɛ varɩm wʋlʋ na tɩgɩ o tɩtɩ tʋʋnɩ, naa ga-vara na tʋr‑o ba gʋ tɩn, yɩ kʋ tu na di varɩm wʋm nwana, sɩ o zarɩ o gwaarʋ o daarɩ o swɛ o yɩra, sɩ dɩdaan-ni maŋa na yiǝ, sɩ o laan kwɛ dɩ cullu tɩm. Ni dɩm kʋntʋ wʋra dɩ paɩ Yisɩrayɛlɩ tɩmbiə dɩ vərə balʋ na zʋʋrɩ ba wʋnɩ tɩn mʋ. 16 Kʋ tu nan na vɩn sɩ o zarɩ o gwaarʋ yɩ o swɛ o yɩra, o tusim dɩm wʋ o yuu nɩ mʋ yɩ o maŋɩ sɩ o na waarɩm.»