Lwarɩm saarɩm dɛ dɩm tɩtʋŋa
16
Arɔn biə bale na tɩgɩ tɩn kwaga nɩ Baŋa-Wɛ dɛɛn ŋɔɔnɩ dɩdaanɩ Moyisi. Ba dɛɛn tɩga dɩ ba na wʋ tɔgɩ cwǝŋǝ sɩ ba twɛ Baŋa-Wɛ yigə tɩn ŋwaanɩ mʋ. 2 Baŋa-Wɛ ma ta dɩ Moyisi DƖ wɩ:«Kaanɩ n zɩmbaarʋ Arɔn nɩ: kʋ daɩ sɩ o na lagɩ maŋa dɩ maŋa kalʋ, sɩ o zʋ amʋ di-laa cɩga cɩga kam gar-jalɩ dɩm na cɩgɩ-ka tɩn. O na fɩn o zʋ sɩ o twɛ amʋ ni-gonim daka kam, oó tɩ mʋ, kʋ na yɩ jǝgǝ kalʋ amʋ na yǝni a vɩɩrɩ a tɩtɩ kunkoŋo wʋnɩ tɩn ŋwaanɩ. Lwarɩm saarɩm nipugu kʋlʋ na pui ni-gonim daka kam tɩn baŋa nɩ mʋ kʋntʋ.
3 Arɔn nan na yǝni o zʋ amʋ jero-vwe dɩm wʋnɩ, sɩ o kɩ tɩntʋ: oó kwe na-bala sɩ o ma o kɩ lwarɩm saarɩm kaanɩm, dɩ pi-bala sɩ o ma o kɩ zwɛɛm kaanɩm o ja o zʋ.a 4 O maa wʋ́ swɛ o yɩra yɩ o daarɩ o zʋ Wɛ zulə gwar-laarʋ tɩlʋ ba na mɛ gar-fɩfalɩ ba sɔ tɩn mʋ. Yigə tɩn, oó zʋ gwar-dɩdɔrɔ kʋm dɩdaanɩ gar-kuri-kukuə kam sɩ o daarɩ o vɔ vʋvʋa kam o təŋə nɩ, yɩ o daarɩ o kwe yuu garyi dɩm o ma ba o yuu kʋm. 5 Yisɩrayɛlɩ kɔ-fɔrɔ kʋm dɩ wʋ́ lɩ bʋ-balɩ sɩle mʋ ba pa Arɔn sɩ o ma o kɩ lwarɩm saarɩm kaanɩm ba ŋwaanɩ. Ba ta wʋ́ pa‑o pi-bala sɩ o ma o kɩ zwɛɛm kaanɩm.
6 Arɔn maa wʋ́ kwe na-bala kam o kɩ lwarɩm saarɩm kaanɩm sɩ o lɩ o tɩtɩ lwarɩm dɩ o digə tiinə lwarɩm Wɛ yigə nɩ. 7 O ta wʋ́ ja bʋnɩ dɩle dɩm mʋ o vu jero-vwe dɩm ni nɩ o zɩgɩ Baŋa-Wɛ yigə nɩ. 8 O maŋɩ sɩ o ta jɔrɔ mʋ dáanɩ sɩ o lwarɩ bʋŋʋ kʋlʋ na wʋ́ taa yɩ Baŋa-Wɛ nyɩm tɩn, dɩ kʋlʋ na wʋ́ tʋŋɩ Azazɛlɩb culu tɩn. 9 Arɔn laan maa wʋ́ kwe bʋŋʋ kʋlʋ na yɩ Baŋa-Wɛ nyɩm tɩn o gʋ o ma o kɩ lwarɩm saarɩm kaanɩm. 10 Ba nan wʋ́ kwe bʋŋʋ kʋlʋ na zɩgɩ Azazɛlɩ culu ŋwaanɩ tɩn ba pa Baŋa-Wɛ yɩ kʋ ŋwɩ. Ba ta wʋ́ pa kʋ lɩ nɔɔna bam lwarɩm Wɛ yigə nɩ yɩ ba kwe-kʋ ba yagɩ kagʋa cwǝŋǝ nɩ sɩ kʋ viiri Azazɛlɩ culu kʋm ŋwaanɩ.
11 Kʋ na maŋɩ sɩ kʋ kɩ te tɩn, Arɔn wʋ́ ja na-bala kam o ba, sɩ o kwe-ka o ma o kɩ lwarɩm saarɩm kaanɩm sɩ o lɩ o tɩtɩ lwarɩm dɩ o digə tiinə lwarɩm Wɛ yigə nɩ. Oó go ka ban o gʋ, 12 yɩ o daarɩ o kwe min-cala zʋŋa, sɩ o toŋi mini Baŋa-Wɛ kaanɩm bimbim dɩm baŋa nɩ o kɩ ka wʋnɩ. O ta wʋ́ mɔ wǝǝnu tɩlʋ lwǝm na ywǝmmǝ tɩn ja-guli-yiə yale, sɩ o laan ja zʋŋa kam dɩ wǝǝnu tɩlʋ lwǝm na ywǝmmǝ tɩn o yɛɛrɩ gar-jalɩ dɩm o zʋ dɩ yigə nɩ. 13 O maa wʋ́ zɩgɩ Baŋa-Wɛ yigə nɩ, sɩ o kwe wǝǝnu tɩlʋ lwǝm na ywǝmmǝ tɩn o daŋɩ min-cala yam baŋa nɩ. Nyʋa laan wʋ́ guguli ka zaŋɩ ni-gonim daka kam baŋa nɩ ka pɩ lwarɩm saarɩm nipugu kʋm sɩ o yɩ na-kʋ. O na kɩ kʋntʋ, o bá tɩ. 14 Kʋntʋ kwaga nɩ, o laan wʋ́ dɩ o nʋa mʋ na-bala kam jana wʋnɩ, yɩ o miisi-ba lwarɩm saarɩm je sɩm yigə nɩ. O ta wʋ́ miisi-ba kuni bɩrpɛ mʋ ni-gonim daka kam yigə nɩ.
15 Arɔn ta wʋ́ gʋ bʋŋʋ kʋlʋ na wʋra nɔɔna bam lwarɩm saarɩm ŋwaanɩ tɩn mʋ, sɩ o ja kʋ jana bam o zʋ gar-jalɩ dɩm yigə nɩ. Oó kwe bʋŋʋ kʋm jana bam mʋ o miisi lwarɩm saarɩm je sɩm yigə nɩ, dɩ daka kam yigə nɩ, nɩnɛɛnɩ o ya na kɩ na-bala kam jana bam te tɩn. 16 O maŋɩ sɩ o tɔgɩ cwǝŋǝ kam kʋntʋ mʋ o kwɛ Wɛ-di-laa cɩga cɩga kam sɩ kʋ maŋɩ dɩ cullu tɩm, Yisɩrayɛlɩ tiinə bam na tusi yɩ ba cɔgɩ cullu tɩm dɩ ba lwarɩm dɩm tɩn ŋwaanɩ. O ta maa wʋ́ kɩ kʋntʋ doŋ o kwɛ jero-vwe dɩm maama sɩ dɩ maŋɩ dɩ cullu tɩm, dɩ na wʋ Yisɩrayɛlɩ tiinə zʋʋrɩm je sɩm tɩtarɩ nɩ yɩ ba yǝni ba cɔgɩ dɩ cullu tɩm tɩn ŋwaanɩ. 17 Arɔn nan na zʋ Wɛ-di-laa cɩga cɩga kam wʋnɩ sɩ o lɩ lwarɩm dɩm Wɛ yigə nɩ, nɔɔn-nɔɔnʋ daɩ sɩ o tɔgɩ o zʋ jero-vwe dɩm wʋnɩ. Oó maŋɩ da o yɩranɩ mʋ, o lɩ o tɩtɩ lwarɩm, dɩ o digə tiinə lwarɩm, dɩ Yisɩrayɛlɩ tiinə kɔgɔ kʋm maama lwarɩm Wɛ yigə nɩ. 18 O na kɩ kʋntʋ maama o ti, o nan ta wʋ́ nuŋi o yi kaanɩm bimbim dɩm na zɩgɩ Baŋa-Wɛ yigə nɩ tɩn sɩ o kwɛ-ka sɩ ka maŋɩ dɩ cullu tɩm. Oó kwe na-bala kam dɩ bʋŋʋ kʋm jana mʋ o ma o taagɩ kaanɩm bimbim dɩm nyɩa yana yam. 19 O laan maa wʋ́ dɩ o nʋa jana bam wʋnɩ o kwe-ba o miisi kuni bɩrpɛ kaanɩm bimbim dɩm baŋa nɩ, sɩ o ma o kwɛ-ka o joori o kɩ Wɛ jɩŋa nɩ, Yisɩrayɛlɩ tiinə bam na tusi yɩ ba cɔgɩ cullu tɩm tɩn ŋwaanɩ.
20 Arɔn nan na kwɛ Wɛ di-laa kʋm, dɩ jero-vwe dɩm maama, dɩ kaanɩm bimbim dɩm o ti, sɩ o laan ja bʋŋʋ kʋlʋ na wʋra Azazɛlɩ culu kʋm ŋwaanɩ yɩ kʋ ta ŋwɩ tɩn o nuŋi o zɩgɩ. 21 O laan wʋ́ kwe o jɩan yale o daŋɩ bʋŋʋ kʋm yuu nɩ mʋ, sɩ o daarɩ o bʋrɩ Yisɩrayɛlɩ tiinə bam zwabaniə kikiə dɩ ba lwarɩm maama, o yagɩ kʋ yuu nɩ. Baá lɩ nɔɔnʋ mʋ culu tɩtʋŋɩ dɩm kʋntʋ ŋwaanɩ, sɩ o vaŋɩ-kʋ o vu o yagɩ kagʋa nɩ. 22 Bʋŋʋ kʋm wʋ́ zɩŋɩ Yisɩrayɛlɩ tiinə lwarɩm dɩm maama kʋ ja kʋ vu kagʋa yuu nɩ, sɩ nɔɔnʋ wʋm laan bwəli-kʋ sɩ kʋ viiri.
23 Arɔn laan wʋ́ joori o zʋ jero-vwe dɩm wʋnɩ, sɩ o lɔɔrɩ gwar-laarʋ tɩlʋ o ya na lɛ-tɩ yɩ o zʋ Wɛ di-laa kʋm wʋnɩ tɩn. O maa wʋ́ yagɩ-tɩ vwe dɩm wʋnɩ. 24 Kʋ kwaga nɩ, oó zɩgɩ je sɩlʋ na yɩ lanyɩranɩ fasɩ tɩn nɩ mʋ o swɛ o yɩra, yɩ o daarɩ o zʋ o tɩtɩ gwaarʋ tɩm. O laan maa wʋ́ nuŋi sɩ o kɩ zwɛɛm kaanɩm o ma o lɩ o tɩtɩ lwarɩm Wɛ yigə nɩ, o daarɩ o kɩ zwɛɛm kaanɩm dɩdoŋ o ma o lɩ nɔɔna bam dɩ lwarɩm. 25 O ta wʋ́ kwe lwarɩm saarɩm varɩm lara kam mʋ o zwɛ kaanɩm bimbim dɩm baŋa nɩ.
26 Wʋlʋ nan na wʋ́ ja bʋŋʋ kʋm o vu o yagɩ kagʋa yuu nɩ Azazɛlɩ culu kʋm ŋwaanɩ tɩn dɩ maŋɩ sɩ o zarɩ o gwaarʋ mʋ sɩ o daarɩ o swɛ o yɩra. Kʋ kwaga nɩ o laan jɩgɩ cwǝŋǝ sɩ o joori o taa zʋʋrɩ Yisɩrayɛlɩ tiinə kɔgɔ kʋm wʋnɩ. 27 Kʋ na yɩ lwarɩm saarɩm na-bala kam, dɩ lwarɩm saarɩm bʋŋʋ kʋm, Arɔn na jaanɩ tɩ jana o zʋ Wɛ-di-laa cɩga cɩga kam sɩ o lɩ lwarɩm dɩm tɩn mʋ, ba maŋɩ sɩ ba ja vara bam kʋntʋ ba nuŋi ba vu dáa sɩ ba zwɛ-ba. Kʋ nan yɩ ba tankwallʋ, dɩ ba nwana, dɩ ba wʋ-zɩla maama mʋ baá zwɛ. 28 Wʋlʋ na wʋ́ zwɛ-tɩ tɩn maŋɩ sɩ o zarɩ o gwaarʋ mʋ sɩ o daarɩ o swɛ o yɩra. Kʋ kwaga nɩ o laan jɩgɩ cwǝŋǝ sɩ o joori o taa zʋʋrɩ Yisɩrayɛlɩ tiinə kɔgɔ kʋm wʋnɩ.
29 Abam maŋɩ sɩ á tɔgɩ amʋ Baŋa-Wɛ ni dɩntʋ mʋ sɩ kʋ taa ve maŋa maama: Bɩnɩ maama wʋnɩ, kʋ na yi canɩ sɩrpɛ cana kam da fugə dɛ nɩ, sɩ á vɔ ni, yɩ á bá tʋŋɩ dɩ dɛ dɩm wʋnɩ. Abam balʋ na yɩ tɩmbiə tɩn dɩdaanɩ vərə balʋ na zʋʋrɩ á wʋnɩ tɩn maama maŋɩ sɩ á pɩɩnɩ á tɩtɩ kʋntʋ doŋ mʋ. 30 Kʋ yɩ dɩntʋ dɛ dɩm wʋnɩ mʋ kaanɩm tu wʋm wʋ́ lɩ abam lwarɩm maama Baŋa-Wɛ yigə nɩ, sɩ DƖ fɔgɩ DƖ kwɛ abam sɩ á maŋɩ dɩ cullu tɩm. 31 Dɩ dɛ dɩm wʋ́ taa yɩ dɩ yɩra mʋ dɩ paɩ abam, sɩ á sin dɩ wʋnɩ yɩ á vɔ ni. Á wʋ́ tɔgɩ amʋ ni dɩm kʋntʋ mʋ sɩ kʋ taa ve maŋa maama. 32 Maŋa maama wʋnɩ wʋlʋ ba na yǝni ba tiŋi sɩ o ləri o ko yuu nɩ o joŋi Wɛ kaanɩm tɩtʋŋɩ dɩm tɩn mʋ wʋ́ zʋ Wɛ zulə gwar-laarʋ tɩm o kɩ lwarɩm saarɩm tɩtʋŋɩ dɩm. 33 O maŋɩ sɩ o kwɛ Wɛ-di-laa cɩga cɩga kam, dɩ jero-vwe dɩm maama, dɩ kaanɩm bimbim dɩm, sɩ tɩ maŋɩ dɩ cullu tɩm. O ta wʋ́ lɩ kaanɩm tiinə lwarɩm dɩdaanɩ Yisɩrayɛlɩ tiinə kɔ-fɔrɔ kʋm maama lwarɩm Wɛ yigə nɩ.
34 Amʋ ni dɩm kʋntʋ wʋ́ taa wʋra mʋ maŋa maama kʋ paɩ abam. Bɩnɩ maama wʋnɩ á maŋɩ sɩ á kɩ kʋntʋ mʋ á ma á lɩ Yisɩrayɛlɩ tiinə bam lwarɩm maama Wɛ yigə nɩ.»
Moyisi ma sɩɩnɩ o pa kʋ kɩ nɩ Baŋa-Wɛ na pɛ‑o ni sɩ o kɩ te tɩn.