Nɔɔna yɩra na nuŋim cullu
15
Baŋa-Wɛ ma ta dɩ Moyisi dɩdaanɩ Arɔn DƖ wɩ:2 «Ta dɩ Yisɩrayɛlɩ tiinə bam nɩ: Baarʋ na ba jɩgɩ yazurə o pəni nɩ pa na nuŋǝ dɩ ni nɩ, na bam kʋntʋ paɩ o wʋ maŋɩ dɩ cullu tɩm. 3 Kʋ tu pəni dɩm na bam na yɔɔrɩ ba nuŋi mʋ naa ba na kɔgɩ dɩ, o ta jɩgɩ digiru Wɛ cullu tɩm seeni mʋ.
4 Baarʋ wʋm kʋntʋ na wʋ́ taa tigi woŋo kʋlʋ baŋa nɩ tɩn, dɩ o na wʋ́ jǝni kʋlʋ maama baŋa nɩ tɩn dɩ dɛ tɩ digimi mʋ. 5 Wʋlʋ maama na dwe woŋo kʋlʋ baŋa nɩ nɔɔnʋ wʋm na tigi tɩn, sɩ kʋ tu zarɩ o gwaarʋ. O ta wʋ́ swɛ o yɩra mʋ, sɩ dɩdaan-ni maŋa na yiǝ, sɩ o laan kwɛ dɩ cullu tɩm. 6 Wʋlʋ maama dɩ na jǝni kʋ tu na jǝni woŋo kʋlʋ baŋa nɩ tɩn, sɩ o zarɩ o gwaarʋ. O ta wʋ́ swɛ o yɩra mʋ, sɩ dɩdaan-ni maŋa na yiǝ, sɩ o laan kwɛ dɩ cullu tɩm.
7 Kʋ ta yɩ bɩdwɩ mʋ dɩ nɔɔnʋ na dwe baarʋ wʋlʋ pəni ni na nuŋi na tɩn. Kʋ tu dɩ maŋɩ sɩ o zarɩ o gwaarʋ yɩ o daarɩ o swɛ o yɩra, sɩ dɩdaan-ni maŋa na yiǝ, sɩ o laan kwɛ dɩ cullu tɩm. 8 Baarʋ wʋm na twɩ lileeru pa tɩ dwe wʋlʋ, kʋ tu dɩ maŋɩ sɩ o zarɩ o gwaarʋ mʋ yɩ o swɛ o yɩra, sɩ dɩdaan-ni maŋa na yiǝ, sɩ o laan kwɛ dɩ cullu tɩm.
9 Baarʋ wʋm na dɔgɩ gɔrɔ kʋlʋ naa pɔlɔ kʋlʋ baŋa nɩ tɩn dɩ digimi mʋ. 10 Wʋlʋ na dwe woŋo kʋlʋ maama baarʋ wʋm na dɔgɩ kʋ baŋa nɩ tɩn, kʋ tu dɩ digimi Wɛ seeni mʋ sɩ kʋ yi dɩdaan-ni maŋa. Wʋlʋ dɩ na zɩŋɩ woŋo kʋntʋ doŋ, o maŋɩ sɩ o zarɩ o gwaarʋ mʋ yɩ o swɛ o yɩra, sɩ dɩdaan-ni maŋa na yiǝ, sɩ o laan kwɛ dɩ cullu tɩm.
11 Baarʋ wʋlʋ pəni ni na nuŋi na tɩn na wʋ sanɩ o jɩan yɩ o dwe wʋlʋ maama, sɩ o zarɩ o gwaarʋ o daarɩ o swɛ o yɩra, sɩ dɩdaan-ni maŋa na yiǝ, sɩ o laan kwɛ dɩ cullu tɩm.
12 Baarʋ wʋm na dwe kamɔgɔ woŋo kʋlʋ maama, ba maŋɩ sɩ ba lɔ-kʋ mʋ ba dʋlɩ ba yagɩ. Kʋ nan na yɩ daa zʋŋa sɩ ba zarɩ-ka.
13 Baarʋ wʋm pəni ni daa na ba nuŋi na, sɩ o cəgi da yarpɛ sɩ o kwɛ o tɩtɩ dɩ cullu tɩm. O maŋɩ sɩ o zarɩ o gwaarʋ mʋ, yɩ o daarɩ o mɔ na-ŋʋna buli-yi nɩ o swɛ o yɩra. O na kɩ kʋntʋ, o laan wʋ́ maŋɩ dɩ cullu tɩm. 14 Da nana dɛ dɩm na yiǝ, sɩ o kwe kunkwənə bale naa kunkwən-puli sɩle o ja o vu jero-vwe dɩm ni nɩ o pa kaanɩm tu wʋm, sɩ o wanɩ o kwɛ o tɩtɩ Baŋa-Wɛ yigə nɩ. 15 Kaanɩm tu wʋm maa wʋ́ kwe kunkwǝŋǝ dɩdʋa o ma o kɩ lwarɩm saarɩm kaanɩm. O ta wʋ́ ma kadoŋ kam o kɩ zwɛɛm pɛɛrɩ kaanɩm mʋ. O maŋɩ sɩ o kɩ kʋntʋ mʋ sɩ o lɩ nɔɔnʋ wʋm digiru Baŋa-Wɛ yigə nɩ pa o kwɛ dɩ cullu tɩm o yɩra na nuŋim ŋwaanɩ.
16 Baarʋ nywannʋ na nuŋi yɔɔ, sɩ o swɛ o yɩra yam maama, sɩ dɩdaan-ni maŋa na yiǝ, sɩ o laan kwɛ dɩ cullu tɩm. 17 Gɔrɔ kʋlʋ, naa tankɔlɔ kʋlʋ na dwe kʋ tu nywannʋ tɩm, sɩ o zarɩ-kʋ. Kʋ dɩ digimi Wɛ seeni sɩ kʋ yi dɩdaan-ni maŋa mʋ. 18 Baarʋ dɩ o kaanɩ na pəni daanɩ ba ti, sɩ ba maama swɛ ba yɩra, sɩ dɩdaan-ni maŋa na yiǝ, sɩ ba laan kwɛ dɩ cullu tɩm.
19 Kaanɩ na jɩgɩ o cana wʋnɩ zarɩm o kɩ, o bá maŋɩ dɩ cullu tɩm sɩ kʋ yi da yarpɛ. Wʋlʋ nan na dwe‑o yantʋ da yam nɩ, kʋ tu dɩ wʋ maŋɩ dɩ cullu tɩm mʋ. 20 Da yam kʋntʋ wʋnɩ kaanɩ wʋm na tigi woŋo kʋlʋ baŋa nɩ tɩn, dɩ o na wʋ́ jǝni kʋlʋ maama baŋa nɩ tɩn dɩ wʋ maŋɩ dɩ cullu tɩm. 21 Wʋlʋ maama na dwe kaanɩ wʋm pwəgə je, sɩ kʋ tu zarɩ o gwaarʋ o daarɩ o swɛ o yɩra, sɩ dɩdaan-ni maŋa na yiǝ, sɩ o laan kwɛ dɩ cullu tɩm. 22 Wʋlʋ maama dɩ na dwe kʋ tu na je woŋo kʋlʋ baŋa nɩ tɩn, sɩ o zarɩ o gwaarʋ o daarɩ o swɛ o yɩra, sɩ dɩdaan-ni maŋa na yiǝ, sɩ o laan kwɛ dɩ cullu tɩm. 23 Kʋ na maŋɩ kʋ yɩ woŋo kʋlʋ maama kaanɩ wʋm na jǝni naa o tigi kʋ baŋa nɩ tɩn mʋ dɩ, yɩ wʋlʋ na dwe-kʋ, kʋ tu wʋ maŋɩ dɩ cullu tɩm sɩ kʋ yi dɩdaan-ni maŋa.
24 Baarʋ nan na pəni dɩd-o ya da yam wʋnɩ, yɩ kaanɩ wʋm kalugu jana bam na dwe‑o, kʋ tu dɩ dɛ o wʋ maŋɩ dɩ cullu tɩm mʋ sɩ kʋ vu kʋ yi da yarpɛ. Da yam kʋntʋ wʋnɩ o na wʋ́ pəni woŋo kʋlʋ maama baŋa nɩ tɩn dɩ digimi dɩ cullu tɩm mʋ.
25 Kaanɩ wʋlʋ jana bam nan na nuŋi kʋntʋ doŋ, yɩ kʋ daɩ o cana wʋnɩ zarɩm da yam wʋnɩ, naa jana bam nuŋim na gaalɩ dɩ da yam na yǝni ya yɩ te tɩn, kʋ tu dɩ bá maŋɩ dɩ cullu tɩm da yam kʋntʋ maama wʋnɩ. Kʋ ta yɩ bɩdwɩ dɩ o zarɩm dɩm na tɔgɩ cwǝŋǝ yɩ o wʋ maŋɩ dɩ cullu tɩm te tɩn mʋ. 26 Da yam kʋntʋ wʋnɩ, woŋo kʋlʋ maama baŋa nɩ kaanɩ wʋm na wʋ́ pəni, naa o na wʋ́ jǝni tɩn dɩ dɛ tɩ digimi mʋ, nɩ kʋ na yɩ te o cana wʋnɩ zarɩm da yam nɩ tɩn. 27 Wʋlʋ na dwe wǝǝnu tɩm kʋntʋ, sɩ kʋ tu zarɩ o gwaarʋ yɩ o daarɩ o swɛ o yɩra, sɩ dɩdaan-ni maŋa na yiǝ, sɩ o laan kwɛ dɩ cullu tɩm.
28 Kaanɩ cana zarɩm na ti, sɩ o cəgi da yarpɛ sɩ o laan kwɛ o tɩtɩ dɩ cullu tɩm. 29 Da nana dɛ dɩm na yiǝ, sɩ o kwe kunkwənə bale naa kunkwən-puli sɩle o ja o vu jero-vwe dɩm ni nɩ o pa kaanɩm tu wʋm. 30 Kaanɩm tu wʋm maa wʋ́ kwe kunkwǝŋǝ dɩdʋa o ma o kɩ lwarɩm saarɩm kaanɩm. O ta wʋ́ ma kadoŋ kam o kɩ zwɛɛm pɛɛrɩ kaanɩm mʋ. O maŋɩ sɩ o kɩ kʋntʋ mʋ sɩ o lɩ kaanɩ wʋm digiru Baŋa-Wɛ yigə nɩ pa o kwɛ dɩ cullu tɩm o cana zarɩm ŋwaanɩ.
31 Á wʋ́ pa Yisɩrayɛlɩ tiinə bam taa tɔgɩ cwe sɩm kʋntʋ sɩ ba pɔɔrɩ ba tɩtɩ dɩ wǝǝnu tɩlʋ na waɩ tɩ pa ba digimi ba tɩtɩ dɩ cullu tɩm tɩn. Ba na wʋ kɩ kʋntʋ, baá digimi amʋ jero-vwe dɩm na wʋ ba tɩtarɩ nɩ tɩn, pa ba tɔgɩ kǝm dɩntʋ baŋa nɩ ba tɩ.»
32 Wɛ niə yantʋ wʋra sɩ abam taá ye baarʋ wʋlʋ na digimi dɩ cullu tɩm o pəni ni na nuŋim ŋwaanɩ tɩn, dɩ wʋlʋ na digimi o nywannʋ nuŋim ŋwaanɩ tɩn ni nɩ mʋ. 33 Ya ta wʋra sɩ á taá ye kaanɩ wʋlʋ na wʋ o cana zarɩm maŋa nɩ tɩn, dɩ balʋ maama na jɩgɩ digiru ba yɩra na nuŋim ŋwaanɩ tɩn ni nɩ, ba na maŋɩ ba yɩ baara naa kaana mʋ dɩ. Ya ta wʋra sɩ á taá ye baarʋ wʋlʋ na wʋ́ pəni dɩ kaanɩ o cana zarɩm da yam nɩ tɩn ni nɩ mʋ.