Yɩra yawɩɩrʋ kwɛɛm cullu
14
Baŋa-Wɛ ma ta dɩ Moyisi DƖ wɩ:2 «Nɔɔnʋ yɩra yawɩʋ na ti yɩ kʋ tu lagɩ sɩ o kwɛ o tɩtɩ dɩ cullu tɩm, ba maŋɩ sɩ ba kɩ tɩntʋ mʋ. Dɛ dɩm kʋntʋ nɩ baá ja-o ba yi kaanɩm tu wʋm te mʋ. 3 Kaanɩm tu wʋm wʋ́ nuŋi kɔ-fɔrɔ kʋm na zʋʋrɩ mɛ tɩn o vu o yi‑o dáa dáa sɩ o fɔgɩ o nii nɔɔnʋ wʋm zii. Kʋ tu yawɩʋ kʋm na sɩɩnɩ kʋ je, 4 kaanɩm tu wʋm maa wʋ́ pa ni sɩ ba ja zunə bale na maŋɩ dɩ cullu tɩm yɩ ba ta ŋwɩ tɩn, dɩ Sɛdrɩ daa dɩdʋa, dɩ gar-ŋʋn-sɩŋa, dɩ Yisopi vɔɔrʋ ba ba ba pa‑o, sɩ o ma-tɩ o kwɛ nɔɔnʋ wʋm. 5 O ta wʋ́ pa ba ba mɔ buli yi na-ŋʋna ba daarɩ ba lo-ba kɔɔrʋ wʋnɩ. Ba laan maa wʋ́ go zuŋə kam dɩdʋa ban kɔɔrʋ kam baŋa nɩ. 6 Kaanɩm tu wʋm laan wʋ́ kwe zuŋə kalʋ ta na ŋwɩ tɩn, dɩ Sɛdrɩ daa kam, dɩ gar-ŋʋn-sɩŋa kam, dɩ Yisopi vɔɔrʋ tɩm maama o dɩ-tɩ zuŋə kalʋ ba na gʋ tɩn jana bam wʋnɩ. 7 O maa wʋ́ miisi jana bam mʋ nɔɔnʋ wʋlʋ na lagɩ kwɛɛm tɩn yɩra nɩ kuni bɩrpɛ, sɩ o daarɩ o ta sɩ kʋ nuŋi pooni o wɩ nɔɔnʋ wʋm maŋɩ dɩ cullu tɩm. O laan wʋ́ yagɩ zuŋə kalʋ na ŋwɩ tɩn mʋ pwələ nɩ sɩ ka jaanɩ ka viiri.
8 Nɔɔnʋ wʋlʋ na lagɩ kwɛɛm sɩ o maŋɩ dɩ cullu tɩm tɩn nan maŋɩ sɩ o zarɩ o gwaarʋ mʋ, yɩ o ceeri o yuu maama, o daarɩ o swɛ yɩra. Kʋntʋ brɩ nɩ o laan sɩɩnɩ o kwɛ dɩ cullu tɩm mʋ. O jɩgɩ cwǝŋǝ sɩ o joori o zʋ kɔ-fɔrɔ kʋm wʋnɩ, sɩ o nan ba maŋɩ sɩ o zʋ o vwe dɩm wʋnɩ sɩ kʋ kɩ da yarpɛ. 9 Da yarpɛ dɛ dɩm na yiǝ, sɩ o fanɩ o yɩra kʋrʋ dɩ o ywe maama dɩdɩ! Kʋ maa yɩ o yuuywe, dɩ o twana, dɩ o yi-kunnu tɩm mʋ. O laan maa wʋ́ zarɩ o gwaarʋ yɩ o daarɩ o swɛ o yɩra. Kʋntʋ brɩ nɩ o laan kwɛ mʋ o maŋɩ dɩ cullu tɩm.
10 Da nana dɛ dɩm na yiǝ, sɩ nɔɔnʋ wʋm laan ja pi-balɩ sɩle dɩ pi-cʋa dɩdʋa na jɩgɩ bɩnɩ, yɩ tɩ ba jɩgɩ gɛɛrɩ tɩ yɩra nɩ tɩn o ba wara-je sɩm nɩ. O ta wʋ́ wǝli mun-bwe bwɛ sɩrdʋa na viiri dɩ Olivi nugə tɩn sɩ kʋ taa yɩ wʋdiu pɛɛrɩ. O nan ta wʋ́ ja nugə kasam-bu dɩdʋa o wǝli da o ba. 11 Kaanɩm tu wʋlʋ na lagɩ o kwɛ‑o tɩn maa wʋ́ ja nɔɔnʋ wʋm dɩ o pɛɛra yam o vu jero-vwe dɩm ni nɩ sɩ ba jeeri Baŋa-Wɛ yigə nɩ. 12 Kaanɩm tu wʋm laan wʋ́ kwe pəlbiə sɩm dɩdʋa o wǝli dɩ nugə kasam-bu kʋm yɩ o daarɩ o zəŋi-tɩ wɛɛnɩ, sɩ o ma o kɩ lwarɩm jɩnɩ kaanɩm o pa Baŋa-Wɛ nɔɔnʋ wʋm ŋwaanɩ. 13 O maa maŋɩ sɩ o goni pəlbu kam kʋntʋ ba jero-vwe dɩm nɩ, mɛ ba na yǝni ba gʋ lwarɩm saarɩm vara dɩ zwɛɛm kaanɩm vara da tɩn. Pɛɛrɩ dɩm na yɩ lwarɩm jɩnɩ kaanɩm tɩn, piə kam yɩ Wɛ kaanɩm tu wʋm nyɩm mʋ, nɩ lwarɩm saarɩm vara dɩ na yɩ te tɩn. Pɛɛrɩ dɩm kʋntʋ tiini dɩ yɩ lanyɩranɩ fasɩ mʋ. 14 Kaanɩm tu wʋm laan wʋ́ kwe lwarɩm jɩnɩ kaanɩm piə kam jana bam badonnǝ, yɩ o taŋɩ-ba wʋlʋ na lagɩ kwɛɛm tɩn jazɩm zwɛ dɩm nɩ, dɩ o jazɩm nʋ-kwɩʋ kʋm, dɩdaanɩ o jazɩm namimbu-kwɩʋ kʋm nɩ. 15 O ta wʋ́ pwəri kasam-bu kʋm wʋ nugə kam o kɩ o tɩtɩ jagwiə ja-bɔŋɔ wʋnɩ. 16 O laan wʋ́ ma o jazɩm nʋa o laŋɩ nugə kam, yɩ o miisi-ka kuni bɩrpɛ Baŋa-Wɛ yigə nɩ. 17 O ta wʋ́ kwe nugə kam na daarɩ o ja-bɔŋɔ nɩ tɩn o ma o taŋɩ wʋlʋ na lagɩ kwɛɛm tɩn jazɩm zwɛ dɩm, dɩ o jazɩm nʋ-kwɩʋ kʋm, dɩdaanɩ o jazɩm namimbu-kwɩʋ kʋm, sɩ kʋ wǝli dɩ piə kam jana bam na maŋɩ ba taagɩ da tɩn. 18 O laan maŋɩ sɩ o kwe nugə kalʋ na daarɩ o ja-bɔŋɔ nɩ tɩn mʋ o lo nɔɔnʋ wʋm yuu nɩ. Kaanɩm tu wʋm wʋ́ tʋŋɩ kʋntʋ mʋ sɩ o lɩ nɔɔnʋ wʋm digiru Baŋa-Wɛ yigə nɩ.
19 Kʋ kwaga nɩ sɩ kaanɩm tu wʋm kwe pəlbu kam o ma o kɩ lwarɩm saarɩm kaanɩm wʋlʋ na lagɩ kwɛɛm dɩ o digiru tɩm tɩn ŋwaanɩ. O daa ta wʋ́ daarɩ o gʋ pəlbu kalʋ na daarɩ tɩn o ma o kɩ zwɛɛm pɛɛrɩ kaanɩm dɩm. 20 O laan wʋ́ kwe-ka o wǝli dɩ wʋdiu pɛɛrɩ dɩm o zwɛ-tɩ kaanɩm bimbim dɩm baŋa nɩ. Kaanɩm tu wʋm maŋɩ sɩ o tɔgɩ cwǝŋǝ kam kʋntʋ mʋ o lɩ nɔɔnʋ wʋm digiru Wɛ yigə nɩ pa o maŋɩ dɩ cullu tɩm.
21 Yinigə nan na jɩgɩ nɔɔnʋ wʋm yɩ o warɩ pɛɛra yam maama o yi, sɩ kʋ tu ja pi-bala dɩdʋa o ba sɩ ba zəŋi-ka wɛɛnɩ ba ma ba kɩ lwarɩm jɩnɩ kaanɩm o ŋwaanɩ. O ta wʋ́ wǝli mun-bwe bwɛn sɩle na viiri dɩ nugə tɩn sɩ kʋ taa yɩ wʋdiu pɛɛrɩ. O ta wʋ́ ja nugə kasam-bu dɩdʋa o wǝli da o ba. 22 Kʋ tu nan ta wʋ́ kwe kunkwənə bale naa kunkwən-puli sɩle sɩ kʋ maŋɩ dɩ o dam na waɩ te tɩn. Baá kwe ba dɩdʋa ba kɩ lwarɩm saarɩm kaanɩm, sɩ kadoŋ kam taa yɩ zwɛɛm kaanɩm ŋwaanɩ. 23 Da nana dɛ dɩm nɩ nɔɔnʋ wʋm wʋ́ ja wǝǝnu tɩm kʋntʋ o vu jero-vwe dɩm ni nɩ o pa kaanɩm tu wʋm, sɩ o wanɩ o kwɛ o tɩtɩ Baŋa-Wɛ yigə nɩ. 24 Kaanɩm tu wʋm wʋ́ kwe pi-bala kam na wʋra lwarɩm jɩnɩ kaanɩm ŋwaanɩ tɩn o wǝli dɩ nugə kasam-bu kʋm yɩ o daarɩ o zəŋi-tɩ wɛɛnɩ, sɩ tɩ taa yɩ pɛɛrɩ tɩ paɩ Baŋa-Wɛ. 25 O ta wʋ́ go lwarɩm jɩnɩ kaanɩm pi-bala kam ban, yɩ o daarɩ o kwe ka jana bam badonnǝ o taŋɩ-ba wʋlʋ na lagɩ kwɛɛm tɩn jazɩm zwɛ dɩm nɩ, dɩ o jazɩm nʋ-kwɩʋ kʋm, dɩdaanɩ o jazɩm namimbu-kwɩʋ kʋm mʋ. 26 O ta wʋ́ pwəri kasam-bu kʋm wʋ nugə kam mʋ o kɩ o tɩtɩ jagwiə ja-bɔŋɔ wʋnɩ. 27 O maa wʋ́ ma o jazɩm nʋa o laŋɩ nugə kam, yɩ o miisi-ka kuni bɩrpɛ Baŋa-Wɛ yigə nɩ. 28 O ta wʋ́ kwe nugə kam na daarɩ o ja-bɔŋɔ kʋm nɩ tɩn o ma o taŋɩ wʋlʋ na lagɩ kwɛɛm tɩn jazɩm zwɛ dɩm nɩ, dɩ o jazɩm nʋ-kwɩʋ kʋm, dɩdaanɩ o jazɩm namimbu-kwɩʋ kʋm, nɩ o na maŋɩ o kɩ te dɩ piə kam jana bam tɩn. 29 O laan maŋɩ sɩ o kwe nugə kalʋ na daarɩ o ja-bɔŋɔ nɩ tɩn mʋ o lo nɔɔnʋ wʋm yuu nɩ, sɩ o lɩ kʋ tu digiru Baŋa-Wɛ yigə nɩ. 30 Kaanɩm tu wʋm laan maa wʋ́ kwe kunkwənə bam, nɩ nɔɔnʋ wʋm na wanɩ kʋlʋ o ja o ba tɩn. 31 O maa wʋ́ kwe ba dɩdʋa o ma kɩ lwarɩm saarɩm kaanɩm, yɩ o daarɩ o ma kadoŋ kam o ma kɩ zwɛɛm pɛɛrɩ kaanɩm. O laan wʋ́ kwe wʋdiu pɛɛrɩ dɩm o wǝli da o kɩ kaanɩm o pa Baŋa-Wɛ. Kaanɩm tu wʋm maŋɩ sɩ o tɔgɩ cwǝŋǝ kam kʋntʋ o lɩ nɔɔnʋ wʋm digiru Wɛ yigə nɩ pa o maŋɩ dɩ cullu tɩm mʋ.»
32 Wɛ niə yantʋ wʋra sɩ á taá ye nɔɔnʋ wʋlʋ yawɩ-cɛɔ na jɩg-o o yɩra nɩ yɩ kʋ ba kʋ je tɩn ni nɩ mʋ. Kʋ tu na lagɩ kwɛɛm sɩ o maŋɩ dɩ cullu tɩm yɩ o warɩ sɩ o yi pɛɛra yam cɩga cɩga, o na maŋɩ sɩ o kɩ te tɩn mʋ kʋntʋ.
Nɔɔna sam nanywannʋ
33 Baŋa-Wɛ daa ma ta Moyisi dɩ Arɔn DƖ wɩ:
34 «Abam na zʋ Kaanan tɩga kam wʋnɩ, mɛ a na lagɩ a pa abam sɩ a taá te tɩn, yɩ amʋ na pɛ yawɩʋ jagɩ á sɔŋɔ kʋlʋ kabri nɩ pa kʋ jɩgɩ nanywannʋ yawɩʋ, 35 sɩ sɔŋɔ kʋm kʋntʋ tu vu kaanɩm tu te o ta o brɩ-o nɩ: ‹A maanɩ nɩ a sɔŋɔ kabri sɩm jɩgɩ yawɩʋ, kʋ nyɩ dɩ nanywannʋ mʋ te.› 36 Kaanɩm tu wʋm maa wʋ́ pa ni sɩ ba lu sɔŋɔ kʋm zɩla maama ba ja ba nuŋi pooni sɩ o wanɩ o vu o nii-kʋ zii. Ba na wʋ kɩ kʋntʋ, zɩla yalʋ maama na wʋ sɔŋɔ kʋm wʋnɩ tɩn dɩ wʋ́ taa jɩgɩ digiru Wɛ cullu tɩm seeni. Kaanɩm tu wʋm laan wʋ́ vu o zʋ sɔŋɔ kʋm wʋʋ, 37 sɩ o nii kʋ kabri sɩm na yɩ te tɩn. O na nɛ wɩ yawɩʋ mʋ wʋra yɩ kʋ nyɩnyʋgʋ yɩ nasɩn-sɩnab, naa kʋ nyɩ dɩ saa-nyʋa, yɩ kʋ je sɩm na mʋʋrɩ sɩ dwǝni ba na fɔgɩ kabri sɩm mɛ seeni tɩn, 38 o laan wʋ́ nuŋi sɔŋɔ kʋm nɩ mʋ yɩ o pa ba pɩ-kʋ ba zɩgɩ da yarpɛ. 39 Da yarpɛ dɛ dɩm na yiǝ, kaanɩm tu wʋm wʋ́ joori sɔŋɔ kʋm nɩ mʋ sɩ o daa nii-kʋ. O na nɛ nɩ yawɩʋ kʋm laan jagɩ mʋ kabri sɩm yɩra nɩ, 40 sɩ o pa ni sɩ ba lɩ sɔŋɔ kʋm kandwa yalʋ yawɩʋ kʋm na jɩgɩ tɩn, naa ya sɩɩnɩ tɩn, sɩ ba ja-ya ba nuŋi tɩʋ kʋm wʋnɩ ba vu ba dʋlɩ ba yagɩ jǝgǝ kalʋ ba na pɔɔrɩ wo-zɔɔna ŋwaanɩ tɩn. 41 Ba laan wʋ́ lɩ sɔŋɔ kʋm wʋ kabri tɩɩrʋ fɔgɩm mʋ sɩ ba ja-dɩ ba vu ba dʋlɩ ba yagɩ jǝgǝ kalʋ ba na pɔɔrɩ wo-zɔɔna ŋwaanɩ tɩn. 42 Ba ta wʋ́ beeri kandwa yadonnə sɩ ya ləri dayigə nyɩna yam yuu nɩ, yɩ ba joori ba kwe tɩɩrʋ ba ma fɔgɩ kabri sɩm ba zɩgɩ.
43 Ba na lɩ sɔŋɔ kʋm kʋntʋ kandwa, yɩ ba lɩ kʋ tɩɩrʋ fɔgɩm, ba daarɩ ba joori ba fɔgɩ-kʋ, yɩ kʋ kabri sɩm ta na jɩgɩ nanywannʋ, 44 kaanɩm tu wʋm daa wʋ́ vu o nii sɔŋɔ kʋm mʋ. O na maanɩ nɩ yawɩʋ kʋm ta jagɩ sɔŋɔ kʋm kabri sɩm nɩ maama, kʋ brɩ nɩ kʋ yɩ yawɩ-cɛɔ mʋ, pa sɔŋɔ kʋm kʋntʋ wʋ maŋɩ dɩ cullu tɩm. 45 O laan wʋ́ pa ba dɩ-kʋ tɩga nɩ. Ba maa wʋ́ coori kʋ kandwa maama, dɩ kʋ dɛ maama, dɩ kʋ tɩɩrʋ maama ba vu ba dʋlɩ ba yagɩ jǝgǝ kalʋ ba na pɔɔrɩ wo-zɔɔna ŋwaanɩ tɩn. 46 Ba nan na pɩ sɔŋɔ kʋm kʋntʋ yɩ nɔɔnʋ ta na zʋ kʋ wʋnɩ, kʋntʋ tu wʋ́ taa jɩgɩ digiru Wɛ cullu tɩm seeni sɩ kʋ yi dɩdaan-ni maŋa. 47 Wʋlʋ dɩ nan na pəni kʋ wʋnɩ, naa o na di wʋdiu kʋ wʋnɩ, kʋ tu maŋɩ sɩ o zarɩ o gwaarʋ mʋ.
48 Ba nan na joori ba fɔgɩ sɔŋɔ kʋm kabri sɩm, yɩ kaanɩm tu wʋm na yi da o nii o na nɩ yawɩʋ kʋm wʋ joori kʋ jagɩ je je, o laan wʋ́ ta sɩ kʋ nuŋi pooni mʋ o wɩ sɔŋɔ kʋm maŋɩ dɩ cullu tɩm. Bɛŋwaanɩ, yawɩʋ kʋm ti maama. 49 Kaanɩm tu wʋm maŋɩ sɩ o kwe zunə bale, dɩ Sɛdrɩ daa, dɩ gar-ŋʋn-sɩŋa, dɩ Yisopi vɔɔrʋ mʋ sɩ o ma o kwɛ sɔŋɔ kʋm sɩ kʋ maŋɩ dɩ cullu tɩm. 50 O ta wʋ́ pa ba ba mɔ na-ŋʋna buli-yi nɩ ba daarɩ ba lo-ba kikərə wʋnɩ, sɩ o daarɩ o go zuŋə kam dɩdʋa ba kikərə kam baŋa nɩ. 51 O laan wʋ́ kwe Sɛdrɩ daa kam, dɩ Yisopi vɔɔrʋ tɩm, dɩ gar-ŋʋn-sɩŋa kam, dɩ zuŋə kalʋ ta na ŋwɩ tɩn mʋ, o dɩ tɩ maama zuŋə kalʋ ba na gʋ tɩn jana bam na viiri dɩ na-ŋʋna bam tɩn wʋnɩ. O maŋɩ sɩ o kwe tɩntʋ maama o ma o miisi jana bam sɔŋɔ kʋm kabri sɩm nɩ kuni bɩrpɛ. 52 Kaanɩm tu wʋm wʋ́ tɔgɩ cwǝŋǝ kam kʋntʋ o ma zuŋə kam jana bam, dɩ na-ŋʋna bam, dɩ zuŋə kakam kam, dɩ Sɛdrɩ daa kam, dɩ Yisopi vɔɔrʋ tɩm, dɩ gar-ŋʋn-sɩŋa kam maama o kwɛ sɔŋɔ kʋm. 53 O laan maa wʋ́ ja zuŋə kalʋ na ŋwɩ tɩn o nuŋi tɩʋ kʋm daa nɩ, yɩ o yagɩ-ka pwələ nɩ sɩ ka jaanɩ ka viiri. Kʋʋ́ tɔgɩ cwǝŋǝ kam kʋntʋ mʋ sɩ kaanɩm tu wʋm kɩ kaanɩm sɔŋɔ kʋm ŋwaanɩ, sɩ kʋ wanɩ kʋ maŋɩ dɩ cullu tɩm.»
54-56 Wɛ niə yantʋ wʋra sɩ abam taá ye yɩra yawɩ-cɛɛrʋ tɩlʋ na loŋi nɔɔna tɩn, dɩ ya-tʋra, dɩ wo-zwannʋ, dɩ sankwɛn, dɩ ŋwan-pwe ni nɩ mʋ. Ya ta wʋra gwaarʋ tɩlʋ na kɩ gɩlangɔɔrʋ tɩn ŋwaanɩ, dɩ sam dɩlʋ kabri na jɩgɩ nanywannʋ tɩn ŋwaanɩ. Ya ta wʋra wo-ŋʋnnʋ, dɩ yɩra fʋʋsɩm ŋwaanɩ mʋ. 57 Á wʋ́ tɔgɩ niə yantʋ mʋ á pɔɔrɩ wǝǝnu tɩlʋ na maŋɩ dɩ cullu tɩm tɩn dɩdaanɩ tɩlʋ na jɩgɩ digiru yɩ tɩ wʋ maŋɩ tɩn daanɩ.
Niə yantʋ mʋ brɩ yawɩɩrʋ tɩlʋ na waɩ tɩ loŋi nɔɔna tɩn cullu tɩm.