Yɩra yawɩɩrʋ taanɩ
13
Baŋa-Wɛ dɛɛn ta ma ta Moyisi dɩdaanɩ Arɔn DƖ wɩ: 2 «Wʋlʋ na maanɩ nɩ wo-zwannʋ zaŋɩ o yɩra nɩ, naa o yɩra yam na kɩ kurisə kurisə, naa ya-tʋra mʋ jɩg-o, yɩ kʋ na jigi yawɩ-cɛɔ kʋlʋ na loŋi nɔɔna tɩn, sɩ ba ja kʋ tu ba vu Arɔn naa o dwi tu na yɩ kaanɩm tu tɩn te. 3 Kaanɩm tu wʋm maa wʋ́ nii kʋ tu ŋwanɩ dɩm zii. Kʋrʋ tɩlʋ na wʋ dɩ je sɩm ni nɩ tɩn na pɩɩrɩ, yɩ je sɩm na nyɩ sɩ pəni goŋo sɩ dwǝni o yɩra yam mɛ na gilimi da tɩn, kʋ yɩ yawɩʋ kʋlʋ na loŋi nɔɔna tɩn mʋ. Kaanɩm tu wʋm na nii o na kʋntʋ, oó pa kʋ nuŋi pooni nɩ nɩ kʋ tu wʋ maŋɩ dɩ cullu tɩm kikiə. 4 Ŋwanɩ dɩm nan na yɩ ŋwan-pwənə, yɩ je sɩm ba nyɩ sɩ pəni goŋo sɩ kʋ dwǝni o yɩra yam mɛ na gilimi-dɩ tɩn, yɩ dɩ ni kʋrʋ tɩm dɩ na wʋ pɩɩrɩ, kaanɩm tu wʋm wʋ́ pa ba pɩ kʋ tu mʋ dáa dáa o yɩranɩ sɩ kʋ yi da yarpɛ. 5 Da yarpɛ dɛ dɩm na yiǝ, kaanɩm tu wʋm wʋ́ joori o fɔgɩ o nii nɔɔnʋ wʋm yɩra maama mʋ zii. O na nii o na nɩ ŋɔnɩ dɩm wʋ ləni, yɩ dɩ ta wʋ jagɩ o yɩra je sɩdonnǝ nɩ, o ta wʋ́ pa ba pɩ kʋ tu mʋ da yarpɛ ba wǝli da. 6 Da yarpɛ yam kʋntʋ na ti, yɩ o na joori o nii kʋ tu pa o na nɩ ŋwanɩ dɩm wʋra dɩ jeə mʋ sɩ dɩ wʋ jagɩ o yɩra yam nɩ, kaanɩm tu wʋm wʋ́ pa kʋ nuŋi pooni nɩ o wɩ kʋ tu maŋɩ dɩdaanɩ cullu tɩm kikiə, ŋwanɩ dɩm na daɩ yawɩ-cɛɔ tɩn ŋwaanɩ. Nɔɔnʋ wʋm kʋntʋ wʋ́ zarɩ o gwaarʋ mʋ sɩ o laan maŋɩ dɩ cullu tɩm kikiə.7 Kaanɩm tu wʋm nan na pɛ kʋ nuŋi pooni nɩ o wɩ nɔɔnʋ maŋɩ dɩ cullu tɩm, yɩ kʋ kwaga seeni kʋ tu ŋwanɩ dɩm jagɩ o yɩra yam maama nɩ, o maŋɩ sɩ o joori o vu kaanɩm tu wʋm te mʋ sɩ o nii‑o. 8 Kaanɩm tu wʋm wʋ́ joori o fɔgɩ o nii nɔɔnʋ wʋm yɩra yam zii. O na maanɩ nɩ o ŋwanɩ dɩm sɩɩnɩ dɩ wʋra dɩ jagɩ mʋ, oó pa kʋ nuŋi pooni nɩ o wɩ nɔɔnʋ wʋm wʋ maŋɩ dɩdaanɩ cullu tɩm. Kʋ yɩ yawɩ-cɛɔ kʋlʋ na loŋi nɔɔna tɩn mʋ jɩg-o.
9 Wʋlʋ na jɩgɩ yawɩ-cɛɔ kʋlʋ na loŋi nɔɔna tɩn o yɩra yam nɩ, sɩ ba ja kʋ tu ba vu kaanɩm tu te. 10 Kaanɩm tu wʋm na maanɩ nɩ kʋ yɩ wo-zɔŋɔ mʋ yɩ kʋ pɩɩrɩ pa kʋ ni kʋrʋ tɩm dɩ pɩɩrɩ, yɩ mwana na wʋ kʋ wʋnɩ, 11 yawɩʋ kʋm yɩ yawɩ-cɛɔ kʋlʋ dwi na ba jeə tɩn mʋ. Kaanɩm tu wʋm wʋ́ pa kʋ nuŋi pooni nɩ o wɩ kʋ tu wʋ maŋɩ dɩ cullu tɩm kikiə. Kʋ daɩ sɩ ba pɩ-o ba kɩ dáa nɩ, kʋ na maŋɩ kʋ brɩ jaja nɩ o wʋ maŋɩ dɩ cullu tɩm tɩn ŋwaanɩ.
12 Nɔɔnʋ wʋlʋ na jɩgɩ yawɩʋ o yɩra yam nɩ, yɩ kʋ na jagɩ kʋ yi o yɩra yam maama pa kaanɩm tu maanɩ kʋ na yɩ te, kʋ zɩgɩ o yuu nɩ kʋ tu o napra nɩ, 13 kaanɩm tu wʋm mʋ wʋ́ fɔgɩ o nii kʋ tu yɩra yam maama zii, yɩ yawɩʋ kʋm na sɩɩnɩ kʋ kwǝli ya maama, oó pa kʋ nuŋi pooni nɩ o wɩ kʋ tu maŋɩ dɩ cullu tɩm mʋ. Bɛŋwaanɩ, o yɩra yam maama na pɩɩrɩ, kʋ brɩ nɩ o maŋɩ dɩ cullu tɩm mʋ. 14 Kʋ tu yɩra yam nan na joori ya magɩ pooru pa mwana zʋ, kʋ brɩ nɩ o wʋ maŋɩ dɩ cullu tɩm. 15 Kaanɩm tu wʋm na fɔgɩ o nii‑o zii, yɩ o na nɛ pooru o yɩra nɩ dɩ mwana, oó pa kʋ nuŋi pooni nɩ o wɩ kʋ tu wʋ maŋɩ dɩ cullu tɩm mʋ. Kʋ brɩ nɩ kʋ sɩɩnɩ kʋ yɩ yawɩ-cɛɔ kʋlʋ na loŋi nɔɔna tɩn mʋ pa nɔɔnʋ wʋm wʋ maŋɩ dɩ cullu tɩm. 16 O ŋwanɩ dɩm nan na je yɩ je sɩm pɩɩrɩ, kʋ tu wʋ́ joori o vu kaanɩm tu wʋm te mʋ. 17 Kaanɩm tu wʋm dɩ wʋ́ joori o fɔgɩ o nii‑o zii. O na maanɩ nɩ je sɩm sɩɩnɩ sɩ pɩɩrɩ, o laan wʋ́ pa kʋ nuŋi pooni nɩ o wɩ nɔɔnʋ wʋm laan maŋɩ dɩ cullu tɩm kikiə. Cɩga tɩn, kʋ tu sɩɩnɩ o kwɛ o maŋɩ dɩ cullu tɩm mʋ.
18 Nɔɔnʋ na jɩgɩ ŋwan-pwənə o yɩra nɩ yɩ ka laan ba ka je, 19 o ta na maanɩ nɩ je sɩm kʋntʋ nɩ woŋo daa ŋʋnɩ mʋ yɩ kʋ pɩɩrɩ, naa kʋ na sɩɩnɩ, o maŋɩ sɩ o ja o tɩtɩ mʋ o vu kaanɩm tu te o brɩ-o. 20 Kaanɩm tu wʋm maa wʋ́ nii kʋ tu yɩra yam zii. Ŋwanɩ dɩm je sɩm na nyɩ sɩ tiŋi goŋo sɩ dwǝni o yɩra yam mɛ na gilimi da tɩn, yɩ kʋrʋ tɩlʋ na wʋ dɩ je sɩm ni nɩ tɩn na pɩɩrɩ, oó pa kʋ nuŋi pooni mʋ o wɩ nɔɔnʋ wʋm wʋ maŋɩ dɩ cullu tɩm kikiə. Kʋ brɩ nɩ kʋ yɩ yawɩ-cɛɔ mʋ na puli ŋwan-pwənə kam je sɩm nɩ. 21 Kaanɩm tu wʋm nan na nii o na nɩ kʋrʋ tɩm wʋ pɩɩrɩ, yɩ je sɩm dɩ ba nyɩ sɩ tiŋi goŋo, yɩ o ta na maanɩ nɩ ŋwanɩ dɩm wʋra dɩ jeə, oó pɩ kʋ tu o yagɩ dáa dáa o yɩranɩ mʋ da yarpɛ. 22 Wo-zɔŋɔ kʋm na jagɩ kʋ tu yɩra yam nɩ, kaanɩm tu wʋm wʋ́ pa kʋ nuŋi pooni nɩ o wɩ kʋ tu wʋ maŋɩ dɩ cullu tɩm mʋ. Kʋ yɩ yawɩʋ kʋlʋ na loŋi nɔɔna tɩn mʋ. 23 Sɩ wo-zɔŋɔ kʋm nan na ba lənə yɩ kʋ wʋ jagɩ o yɩra yam nɩ, kʋ yɩ kalɔŋɔ mʋ ŋwan-pwənə kam na kɩ ka daarɩ tɩn. Kaanɩm tu wʋm wʋ́ pa kʋ nuŋi pooni nɩ o wɩ kʋ tu maŋɩ dɩ cullu tɩm kikiə.
24 Mim na di wʋlʋ yɩra yam yɩ je sɩm ya-nwana yam na pɩɩrɩ naa ya na yɩ nasʋŋ-pupwiu, 25 sɩ kaanɩm tu nii kʋ tu zii. Kʋrʋ tɩlʋ na wʋ ŋwanɩ dɩm ni nɩ tɩn na pɩɩrɩ, yɩ je sɩm dɩ na nyɩ sɩ tiŋi goŋo, kʋ brɩ nɩ kʋ yɩ yawɩ-cɛɔ kʋlʋ na loŋi nɔɔna tɩn mʋ puli ŋwanɩ dɩm wʋnɩ kʋntʋ. Kaanɩm tu wʋm wʋ́ pa kʋ nuŋi pooni nɩ o wɩ kʋ tu wʋ maŋɩ dɩ cullu tɩm kikiə. 26 Kʋ daarɩ, kaanɩm tu wʋm na nɛ nɩ kʋrʋ tɩlʋ na wʋra tɩn wʋ pɩɩrɩ, yɩ je sɩm dɩ ba nyɩ sɩ tiŋi goŋo, yɩ o ta na maanɩ nɩ ŋwanɩ dɩm wʋra dɩ jeə, oó pɩ kʋ tu mʋ dáa nɩ da yarpɛ. 27 Da yarpɛ dɛ dɩm na yiǝ, sɩ kaanɩm tu wʋm joori o nii‑o zii. O na maanɩ nɩ yawɩʋ kʋm jagɩ kʋ tu yɩra yam nɩ, oó pa kʋ nuŋi pooni nɩ o wɩ o wʋ maŋɩ dɩ cullu tɩm. Bɛŋwaanɩ, kʋ sɩɩnɩ kʋ yɩ yawɩ-cɛɔ kʋlʋ na loŋi nɔɔna tɩn mʋ jɩg-o. 28 Yawɩʋ kʋm nan na wʋ jagɩ yɩ ŋwanɩ dɩm na lagɩ dɩ je, kʋ brɩ nɩ kʋ yɩ kulu mʋ zaŋɩ zwɛɛm dɩm kwaga nɩ. Kaanɩm tu wʋm wʋ́ pa kʋ nuŋi pooni nɩ o wɩ kʋ tu maŋɩ dɩ cullu tɩm. Bɛŋwaanɩ, kʋ yɩ ŋwan-lɔŋɔ mʋ mim na zwɛ Kʋ daarɩ tɩn.
29 Baarʋ naa kaanɩ wʋlʋ na jɩgɩ ŋwanɩ o yuu nɩ naa o titogo nɩ, 30 kaanɩm tu mʋ wʋ́ fɔgɩ o nii-dɩ zii. O maa na maanɩ nɩ ŋwanɩ dɩm nyɩ dɩ tiŋi goŋo dɩ dwǝni o yɩra yam mɛ na gilimi da tɩn, yɩ kʋrʋ tɩlʋ na wʋra tɩn na yɩ ko-mɩmɩnɩ yɩ tɩ kɩ nɩnɛɛnɩ su-muni doŋ te, oó pa kʋ nuŋi pooni nɩ o wɩ kʋ tu wʋ maŋɩ dɩ cullu tɩm kikiə. Yawɩʋ kʋm kʋntʋ nyɩ dɩ sankwɛn mʋ na jaanɩ nɔɔnʋ yuu naa o titogo. Kʋ maa yɩ yawɩ-cɛɔ na waɩ kʋ loŋi nɔɔna tɩn. 31 Kaanɩm tu wʋm nan na nɛ nɩ ŋwanɩ dɩm ba nyɩ dɩ tiŋi goŋo, yɩ kʋrʋ-zwənnu dɩ tǝri je sɩm nɩ, oó pɩ kʋ tu mʋ o kɩ dáa dáa o yɩranɩ da yarpɛ. 32 Da yarpɛ dɛ dɩm na yiǝ, sɩ kaanɩm tu wʋm daa nii kʋ tu ŋwana yam zii. O na nɛ nɩ ya wʋ jagɩ o yɩra yam nɩ, yɩ kʋrʋ tɩm ba jɩgɩ su-muni nyɩnyʋgʋ, yɩ je sɩm dɩ maa ba nyɩ sɩ tiŋi goŋo, 33 oó pa ba ceeri kʋ tu yuu mʋ, sɩ ba daarɩ ba gigili ŋwanɩ dɩm je ba yagɩ. Kaanɩm tu wʋm ta wʋ́ pɩ kʋ tu dáa dáa mʋ o yɩranɩ da yarpɛ o wǝli da. 34 Da yarpɛ yam kʋntʋ na kɛ, kaanɩm tu wʋm daa wʋ́ fɔgɩ o nii ŋwanɩ dɩm mʋ. Dɩ ta na wʋ jagɩ o yɩra yam nɩ, yɩ je sɩm dɩ ba mʋʋra, o laan wʋ́ pa kʋ nuŋi pooni nɩ o wɩ kʋ tu maŋɩ dɩ cullu tɩm mʋ. Nɔɔnʋ wʋm maa wʋ́ zarɩ o gwaarʋ sɩ o laan maŋɩ dɩ cullu tɩm. 35 Ba na pɛ kʋ nuŋi pooni nɩ ba wɩ wʋlʋ maŋɩ dɩ cullu tɩm, yɩ ba laan ba ba maanɩ nɩ o ŋwanɩ dɩm jagɩ mʋ dɩ ve yigə, 36 kaanɩm tu wʋm daa wʋ́ fɔgɩ o nii kʋ tu yɩra yam mʋ zii. O ŋwanɩ dɩm nan na sɩɩnɩ dɩ jagɩ o yɩra yam nɩ mʋ, kʋ daa daɩ sɩ o lwarɩ kʋrʋ tɩm na yɩ te tɩn, sɩ kʋ brɩ jaja nɩ kʋ tu wʋ maŋɩ dɩ cullu tɩm mʋ kʋntʋ. 37 Sɩ kaanɩm tu wʋm na bʋŋɩ nɩ ŋwanɩ dɩm maŋɩ dɩ jǝgǝ kam nɩ, yɩ kʋrʋ-zwənnu joori tɩ wʋ je sɩm nɩ, kʋ brɩ nɩ sankwɛn sɩm je mʋ. O maa wʋ́ pa kʋ nuŋi pooni nɩ o wɩ kʋ tu maŋɩ dɩ cullu tɩm.
38 Baarʋ naa kaanɩ wʋlʋ na nɛ nɩ o yɩra je sɩlʋ tanɩ tanɩ ponə, 39 kaanɩm tu wʋ́ nii je sɩm kʋntʋ zii. Kʋ na yɔɔrɩ kʋ pɩɩrɩ fɩɩn mʋ, kʋ brɩ nɩ kʋ yɩ ya-tʋra yɩranɩ mʋ. Kʋ tu maŋɩ dɩ cullu tɩm kikiə.
40-41 Nɔɔnʋ yuu na tu kʋ ba kʋ yɔɔlɩ, yɩ ywe daa tərə, o yɩ yu-kalɩʋ tu mʋ, o maŋɩ dɩ cullu tɩm. Kʋ nan daa na ba yɩ, o tri ni ywe sɩm mʋ yɔɔlɩ, o yɩ tri baŋa yu-kalɩʋ tu mʋ, kʋ tu maŋɩ dɩ cullu tɩm. 42 Ŋwanɩ nan na wʋ kʋ tu yuu nɩ mɛ yuuywe na tǝrǝ tɩn, yɩ dɩ yɩ nasʋŋ-pupwiu dɩ wǝli da, kʋ brɩ nɩ kʋ yɩ yawɩ-cɛɔ kʋlʋ na loŋi nɔɔna tɩn mʋ kʋntʋ. 43 Kaanɩm tu wʋm wʋ́ fɔgɩ o nii kʋ tu zii mʋ. O maa na nɛ nɩ ŋwanɩ dɩm sɩɩnɩ dɩ yɩ nasʋŋʋ, nɩnɛɛnɩ yawɩʋ kʋlʋ na loŋi nɔɔna tɩn, 44 kʋ brɩ nɩ yawɩ-cɛɔ mʋ jɩgɩ nɔɔnʋ wʋm kʋntʋ, pa o wʋ maŋɩ dɩ cullu tɩm. Kaanɩm tu wʋm wʋ́ pa kʋ nuŋi pooni nɩ o wɩ kʋ tu wʋ maŋɩ dɩ cullu tɩm mʋ, ŋwanɩ dɩlʋ na wʋ o yuu nɩ tɩn ŋwaanɩ.
45 Yawɩ-cɛɔ na wʋ wʋlʋ maama yɩra nɩ, kʋ tu wʋ́ taa zʋʋrɩ gwar-zɩnzwara mʋ, yɩ o yagɩ o yuu sɩ kʋ vugimi. O laan maa wʋ́ yǝni o kwe o jɩan o kwǝli o yibiyə yɩ o tɔɔlɩ dɩ kwǝr-dɩa nɩ: ‹Amʋ wʋ maŋɩ dɩ cullu tɩm yoo!› 46 Yawɩʋ kʋm na loori kʋ wʋ o yɩra nɩ, o ta wʋ maŋɩ dɩ cullu tɩm. Kʋ tu wʋ́ taa zʋʋrɩ o yɩranɩ mʋ dáa dáa, sɩ o yɩ twɛ dɩ abam na zʋʋrɩ mɛ tɩn.
Gɩlangɔɔrʋ taanɩ na wʋ́ taa yɩ te tɩn
47-49 Nɔɔnʋ wʋlʋ na maanɩ nɩ gɩlangɔɔrʋa wʋ o gɔrɔ yɩra nɩ, kʋ tu maŋɩ sɩ o ja-kʋ mʋ o vu o brɩ kaanɩm tu. Gɔrɔ kʋm na yɩ peeni kʋrʋ mʋ ba mɛ ba sɔ-kʋ, naa kʋ yɩ gar-fɩfalɩ naa tankɔlɔ mʋ, yɩ kʋ na maŋɩ kʋ yɩ garyi dɩ, kʋ maama yɩ bɩdwɩ mʋ. Gɩlangɔɔrʋ na wʋra yɩ kʋ na sɩɩnɩ, naa kʋ jɩgɩ saa-nyʋa nyɩnyʋgʋ, kʋ brɩ nɩ kʋ yɩ kʋlʋ dwi na waɩ kʋ jagɩ kʋ kɩ wǝǝnu tɩdonnǝ yɩra nɩ tɩn mʋ. 50 Kaanɩm tu wʋm wʋ́ nii gɔrɔ kʋm kʋntʋ zii, yɩ o daarɩ o pɩ-kʋ o tiŋi dáa nɩ da yarpɛ. 51 Da yarpɛ dɛ dɩm na yiǝ, sɩ o joori o fɔgɩ o nii gɔrɔ kʋm, naa woŋo kʋlʋ gɩlangɔɔrʋ na wʋ kʋ yɩra nɩ tɩn. O na nɛ nɩ gɩlangɔɔrʋ je sɩm jagɩ mʋ, kʋ brɩ nɩ kʋ yɩ yawɩ-cɛɔ kʋlʋ na dana tɩn. Woŋo kʋm sɩɩnɩ kʋ wʋ maŋɩ dɩ cullu tɩm. 52 Kʋ maŋɩ sɩ kaanɩm tu wʋm zwɛ gɔrɔ kʋm mʋ kulə, yawɩʋ kʋm na waɩ kʋ loŋi wǝǝnu tɩdonnǝ kʋ cɔgɩ tɩn ŋwaanɩ.
53 Kaanɩm tu wʋm nan na nii gɔrɔ kʋm naa tankɔlɔ kʋm, yɩ o maanɩ nɩ gɩlangɔɔrʋ tɩm wʋ jagɩ kʋ yɩra nɩ, 54 oó pa ni mʋ sɩ ba zarɩ-kʋ, sɩ ba daarɩ ba tiŋi-kʋ dáa nɩ da yarpɛ ba wǝli da. 55 Ba na kɩ kʋntʋ, o daa ta wʋ́ nii-kʋ mʋ. O maa na nɛ nɩ gɩlangɔɔrʋ kʋm wʋ jagɩ, yɩ kʋ nyɩnyʋgʋ kʋm ta wʋ ləni, woŋo kʋlʋ yɩra nɩ yawɩʋ kʋm kʋntʋ na wʋra tɩn wʋ maŋɩ dɩ cullu tɩm. Kʋ maŋɩ sɩ ba zwɛ-kʋ mʋ. Kʋ na maŋɩ kʋ digimi kʋ yigə nɩ, naa kʋ kwaga nɩ dɩ, kʋ maama yɩ bɩdwɩ mʋ.
56 Ba nan na zarɩ gɔrɔ kʋm ba daarɩ, yɩ kaanɩm tu wʋm na nii o na nɩ yawɩʋ kʋm wʋra kʋ jeə, oó kaarɩ kʋ je sɩm mʋ o yagɩ o daarɩ gɔrɔ kʋm naa tankɔlɔ kʋm. 57 O nan na kɩ kʋntʋ, yɩ gɩlangɔɔrʋ tɩm ta na joori kʋ naɩ gɔrɔ kʋm yɩra nɩ, naa tankɔlɔ kʋm yɩra nɩ mʋ, kʋ brɩ nɩ yawɩʋ kʋm lagɩ kʋ jagɩ mʋ. Ba maŋɩ sɩ ba zwɛ woŋo kʋlʋ gɩlangɔɔrʋ na wʋ kʋ yɩra nɩ tɩn mʋ. 58 Ba nan na zarɩ gɔrɔ kʋm, yɩ yawɩʋ kʋm na sɩɩnɩ kʋ nuŋi kʋ yɩra nɩ, ba ta wʋ́ joori ba zarɩ-kʋ sɩ kʋ laan maŋɩ dɩ cullu tɩm kikiə.»
59 Wɛ niə yantʋ wʋra sɩ á taá ye gɩlangɔɔrʋ tɩtʋŋa ni nɩ, nɩnɛɛnɩ kʋ na jɩgɩ gɔrɔ naa tankɔlɔ kʋlʋ maama yɩra nɩ, sɩ á lwarɩ á na wʋ́ kɩ te á pɔɔrɩ kʋlʋ na maŋɩ dɩ cullu tɩm tɩn dɩ kʋlʋ na wʋ maŋɩ dɩ-tɩ tɩn daanɩ.