Cullu 12

Ka-sɔŋɔ na wʋ́ kwɛ o tɩtɩ te tɩn

Baŋa-Wɛ daa ma ta dɩ Moyisi DƖ wɩ:

2 «Ta dɩ Yisɩrayɛlɩ tiinə bam nɩ: Kaanɩ na jaanɩ pugə yɩ o lʋ bəkərə, o jɩgɩ digiru Wɛ cullu tɩm seeni sɩ kʋ yi da yarpɛ mʋ. Kʋ ta nyɩ dɩ o na yǝni o yɩ te o cana zarɩm maŋa nɩ tɩn mʋ. 3 Da nana dɛ dɩm nɩ, sɩ o pa ba goni o bu wʋm pəni. 4 Kaanɩ wʋm ta wʋ́ pɩɩnɩ sɩ da fiintɔ-yatɔ mʋ kɛ, sɩ o laan kwɛ o jana pwərim digiru tɩm o ti. Da yam kʋntʋ nɩ o digiru kwɛɛm maŋa kam ta na wʋ ti, kʋ daɩ sɩ o dwe woŋo kʋlʋ na yɩ lanyɩranɩ fasɩ tɩn, naa sɩ o zʋ Wɛ jero-vwe dɩm nɩ.

5 Kaanɩ wʋm nan na lʋgɩ bɩsankana, oó taa jɩgɩ digiru sɩ kʋ yi da fugə-yana mʋ, nɩ o na yǝni o yɩ te o cana zarɩm maŋa nɩ tɩn. O ta wʋ́ pɩɩnɩ sɩ da fusɩrdʋ-yardʋ mʋ kɛ, sɩ o laan kwɛ dɩ o jana-pwərim digiru tɩm.

6 Kʋ na yɩ bəkərə mʋ, naa bɩsankana mʋ o lʋga, yɩ o digiru kwɛɛm maŋa kam na ti, sɩ o ja pəlbu wʋlʋ na yi bɩnɩ tɩn o vu jero-vwe dɩm manco-pɩɩna ni nɩ o kwe-o o pa kaanɩm tu wʋm, sɩ o ma o kɩ zwɛɛm pɛɛrɩ kaanɩm o pa Wɛ. Kaanɩ wʋm ta wʋ́ ja kunkwǝŋǝ naa kunkwən-pulə o vu o pa‑o sɩ o ma o kɩ lwarɩm saarɩm kaanɩm. 7 Kaanɩm tu wʋm laan wʋ́ kwe-tɩ o kɩ kaanɩm o pa Baŋa-Wɛ sɩ DƖ lɩ kaanɩ wʋm digiru tɩm Wɛ yigə nɩ. Kʋntʋ na kɩa, kaanɩ wʋm laan wʋ́ ba o kwɛ dɩ o jana-pwərim digiru tɩm.

Kaanɩ lʋra kwaga nɩ, sɩ ba tʋŋɩ ba tɔgɩ Wɛ ni dɩm kʋntʋ, nɩ kʋ na yɩ bəkərə naa bɩsankana mʋ o lʋga. 8 Kaanɩ nan na warɩ piə sɩ o yi, sɩ o ja kunkwənə bale naa kunkwən-puli sɩle o vu o pa kaanɩm tu wʋm, sɩ o kwe ba dɩdʋa o ma o kɩ zwɛɛm pɛɛrɩ kaanɩm dɩm, sɩ kadoŋ kam o ma o kɩ lwarɩm saarɩm kaanɩm dɩm. Kaanɩm tu wʋm wʋ́ kɩ kʋntʋ sɩ o lɩ kaanɩ wʋm digiru tɩm Wɛ yigə nɩ. Kaanɩ wʋm laan wʋ́ ba o kwɛ mʋ dɩ o digiru tɩm.»