Wʋdiiru tɩlʋ na maŋɩ dɩ dim dɩ tɩlʋ na wʋ maŋɩ tɩna
11
Baŋa-Wɛ dɛɛn ma ta Moyisi dɩ Arɔn DƖ wɩ:2 «Ta-na dɩ Yisɩrayɛlɩ tiinə bam nɩ: Vara balʋ na kaagɩ ba ve tɩga baŋa nɩ tɩn wʋnɩ, abam jɩgɩ cwǝŋǝ sɩ á di vara bantʋ dwi mʋ:
3 Á waɩ á di varɩm wʋlʋ maama napɔɔna na lɔgɩ bɩle yɩ ba yǝni ba dʋnɩ gaa ba guli ba joori ba dʋnɩ tɩn.
4-6 Vara badonnǝ nan dʋnɩ gaa ba guli ba joori ba dʋna, yɩ ba napɔɔna laan wʋ lɔgɩ bɩle. Kʋ daɩ sɩ abam di-ba. Yogondə, dɩ pa-nyaanɩ, dɩ zoonə yɩ kʋntʋ doŋ mʋ. Vara bam kʋntʋ wʋ maŋɩ dɩ cullu tɩm. 7 Tǝrǝ dɩ nan wʋ maŋɩ sɩ á di-ba. Ba napɔɔna lɔgɩ bɩle cɩga cɩga, yɩ ya laan ba dʋnɩ gaa ya gulə ya joori ya dʋna. 8 Vara bam kʋntʋ maama dwi daɩ sɩ á dʋnɩ ba nwana. Ba na tɩga, brɩ á yɩ dwe-ya. Ba wʋ maŋɩ dɩ cullu tɩm abam tee nɩ.
9 Kʋ na yɩ wǝǝnu tɩlʋ na wʋ nanɩɩrʋ tɩm wʋnɩ, naa bwi sɩm wʋnɩ tɩn, kale yalʋ maama na jɩgɩ nabili-pɩlwarʋ, yɩ pʋrʋ ta kwǝli tɩ yɩra tɩn, á jɩgɩ cwǝŋǝ sɩ á di-ya. 10 Kʋ daarɩ kʋ na yɩ wǝǝnu tɩlʋ maama na zʋʋrɩ na wʋnɩ yɩ tɩ ba jɩgɩ nabili-pɩlwarʋ dɩdaanɩ pʋrʋ tɩ yɩra nɩ tɩn, tɩ na maŋɩ tɩ yɩ kale naa wo-kʋrrʋ mʋ, wǝǝnu tɩntʋ dwi yɩ wo-zɔɔna mʋ tɩ paɩ abam. 11 Kʋntʋ ŋwaanɩ, abam daɩ sɩ á di-tɩ, nan yɩ dwe-na tɩ wo-tɩgɩrʋ dɩ. 12 Woŋo kʋlʋ maama na zʋʋrɩ na wʋnɩ tɩn na ba jɩgɩ nabili-pɩlwarʋ dɩdaanɩ pʋrʋ, kʋ yɩ wo-zɔɔnɩ mʋ abam tee nɩ.
13 Kʋ ta na yɩ zunə, á wʋ́ culi ba dwiə yantʋ mʋ. Ba daɩ sɩ á di-ba, ba na yɩ wo-zɔɔna tɩn ŋwaanɩ.
Maarʋ, dɩ duurə dwi maama, 14 dɩ ciləciiru, dɩ kalwəənu dwi maama, 15 dɩ bacangaarʋ dwi maama, 16-18 dɩ kukwəəru dwi maama, dɩ lɩnlanɩ, dɩ nɩnɩʋ zunə, dɩ kawuli dwi maama, dɩ bugə-ceeni, dɩ nakɩlakwarʋ, 19 dɩ bugə ni zunə, dɩ tintəli dwi maama, dɩ pɛbiə, dɩdaanɩ jɩnjwaanʋ.
20 Wo-kʋrrʋ tɩlʋ na jɩgɩ vwana yɩ tɩ kaagɩ tɩ ve tɩga nɩ tɩn wʋ́ taa yɩ wo-zɔɔna abam tee nɩ. 21 Á nan jɩgɩ cwǝŋǝ sɩ á di wo-kʋrrʋ tɩm kʋntʋ dwiə yalʋ nɛ sɩm na paɩ tɩ faŋɩ dɩ cwi tɩga nɩ tɩn. 22 Tɩ maa yɩ kayɩrɩ, dɩ manjwəəlu, dɩ carɩ-bʋmbʋrɩ, dɩ wo-kʋrrʋ tɩntʋ dwi. Tɩntʋ maama maŋɩ sɩ á di-tɩ. 23 Sɩ kʋ na daarɩ wo-kʋrrʋ tɩlʋ na jɩgɩ vwana yɩ tɩ ta kaagɩ tɩ tuuri tɩga nɩ tɩn, tɩ yɩ wo-zɔɔna mʋ tɩ paɩ abam.
Wo-zɔɔna cullu tɩm
24 Wǝǝnu tɩm kʋntʋ maama na tɩga, tɩ yɩra yam wʋ́ loŋi wʋlʋ maama na dwe-ya, pa kʋ tu taa jɩgɩ digiru Wɛ cullu tɩm seeni sɩ kʋ yi dɩdaan-ni maŋa. 25 Wʋlʋ na kwe tɩ wo-tɩkʋ, kʋ tu maŋɩ sɩ o zarɩ o gwaarʋ mʋ, sɩ dɩdaan-ni maŋa na yiǝ, sɩ o laan kwɛ o tɩtɩ dɩ cullu tɩm.
26 Varɩ-dwi dɩlʋ maama na wʋ lɔgɩ dɩ napɔɔna yam tɩtarɩ nɩ bɩle cɩga cɩga tɩn, naa dwi dɩlʋ na ba guli gaa o joori o dʋnɩ o liri tɩn wʋ maŋɩ dɩ cullu tɩm. Wʋlʋ maa na dwe wo-tɩkʋ kʋntʋ dwi, kʋ tu dɩ jɩgɩ digiru Wɛ cullu tɩm seeni mʋ. 27 Vara balʋ maama na ve nɛ sɩna baŋa nɩ yɩ ba maɩ jataala mʋ ba veǝ tɩn wʋ maŋɩ dɩ Wɛ cullu tɩm. Wʋlʋ maa na dwe ba wo-tɩgɩrʋ, kʋ tu dɩ wʋ́ taa jɩgɩ digiru cullu tɩm seeni mʋ sɩ kʋ yi dɩdaan-ni maŋa. 28 Wʋlʋ maama na zɩŋɩ vara bam kʋntʋ wo-tɩkʋ, kʋ tu maŋɩ sɩ o zarɩ o gwaarʋ mʋ sɩ dɩdaan-ni maŋa na yiǝ, sɩ o laan kwɛ o tɩtɩ dɩ cullu tɩm, vara bam kʋntʋ na yɩ wo-digiru tɩ paɩ abam tɩn ŋwaanɩ.
29 Kʋ nan na yɩ tɩga wo-vəəlu, tɩ dwiə yantʋ mʋ yɩ wo-digiru tɩ paɩ abam:
Twaarʋ, dɩ baywə, dɩ titwə, dɩ balwəru dwi maama, 30 dɩ kacɩlacɩrʋ, dɩ kweeru, dɩ bale, dɩ bwɩ: dɩ puswəəlu, dɩ manlɛ.
31 Tɩga wo-vəəlu maama wʋnɩ, wǝǝnu tɩm kʋntʋ yɩ wo-digiru tɩ paɩ abam. Tɩ dwi na tɩga yɩ nɔɔnʋ wʋlʋ na dwe-kʋ, kʋ tu dɩ wʋ́ taa jɩgɩ digiru Wɛ cullu tɩm seeni sɩ kʋ yi dɩdaan-ni maŋa. 32 Wǝǝnu tɩm kʋntʋ nan na tɩga yɩ tɩ tʋ woŋo kʋlʋ maama baŋa nɩ, kʋ dɩ wʋ́ taa jɩgɩ digiru mʋ. Kʋ na yɩ daa mʋ ba mɛ ba kɩ-kʋ, naa gɔrɔ, naa tankɔlɔ, naa gwar-zɩnzwara dɩ, ba nan na jɩgɩ-kʋ ba tʋŋɩ tɩtʋŋɩ dɩlʋ tɩn maama dɩ, ba maŋɩ sɩ ba miisi-kʋ na wʋnɩ mʋ, sɩ dɩdaan-ni maŋa na yiǝ, sɩ kʋ laan kwɛ dɩ cullu tɩm. 33 Wo-digiru tɩm kʋntʋ dɩdʋa na tɩga yɩ kʋ tʋ kɔɔrʋ wʋnɩ, woŋo kʋlʋ maama na wʋ kɔɔrʋ wʋm wʋnɩ tɩn dɩ wʋ́ taa jɩgɩ digiru. Ba maŋɩ sɩ ba lɔ kɔɔrʋ wʋm mʋ. 34 Na na zɩgɩ kɔɔrʋ wʋm kʋntʋ nɩ yɩ ba lo ba dwe wʋdiu kʋlʋ ya na maŋɩ sɩ ba di-kʋ tɩn, kʋ dɩ daa bá maŋɩ sɩ ba di-kʋ. Wo-nyɔɔrʋ tɩlʋ maama na wʋ kɔɔrʋ wʋm kʋntʋ wʋnɩ tɩn dɩ nan jɩgɩ digiru Wɛ cullu tɩm seeni mʋ. 35 Wo-digiru tɩm na tɩga yɩ tɩ tʋ tɩ dwe woŋo kʋlʋ maama, kʋ dɩ taa jɩgɩ digiru mʋ. Kʋ na yɩ kurə, naa kambiə mʋ tɩ dwe, abam maŋɩ sɩ á cɔgɩ kurə yam, naa kambiə kam mʋ. 36 Kʋ nan na yɩ buli-yi, naa goŋo kʋlʋ ba na kʋgɩ sɩ nɔɔna taa ve ba mɔɔnɩ na kʋ wʋnɩ tɩn, yɩ wo-tɩkʋ kʋm na tʋ je sɩm kʋntʋ wʋnɩ, sɩ bá taa jɩgɩ digiru. Sɩ wʋlʋ nan na liiri wo-tɩkʋ kʋm, kʋ tu mʋ wʋ́ taa jɩgɩ digiru Wɛ cullu tɩm seeni. 37 Wo-digiru tɩm kʋntʋ na tɩga yɩ tɩ tʋ wo-dwə balʋ abam na lagɩ á du tɩn wʋnɩ, wo-dwə bam ta bá taa jɩgɩ digiru. 38 Sɩ wo-dwə bam na wʋ na wʋnɩ ba bugi mʋ, yɩ wo-tɩkʋ kʋm na tʋ ba wʋnɩ, wo-dwə bam wʋ́ taa jɩgɩ digiru tɩ paɩ abam.
39 Varɩm wʋlʋ na maŋɩ dɩ dim tɩn na tɩga yɩ wʋlʋ dwe‑o, kʋ tu wʋ́ taa jɩgɩ digiru Wɛ cullu tɩm seeni mʋ sɩ kʋ yi dɩdaan-ni maŋa. 40 Wʋlʋ na di varɩm wʋm kʋntʋ nwana yadonnə, kʋ tu wʋ́ zarɩ o gwaarʋ mʋ, sɩ dɩdaan-ni maŋa na yiǝ, sɩ o laan kwɛ o tɩtɩ dɩ cullu tɩm. Wʋlʋ dɩ na kwe varɩm wʋm, o dɩ wʋ́ zarɩ o gwaarʋ mʋ, sɩ dɩdaan-ni maŋa na yiǝ, sɩ o dɩ laan kwɛ o tɩtɩ dɩ cullu tɩm.
41 Kʋ nan na yɩ tɩga wo-vəəlu, tɩ maama yɩ wo-zɔɔna mʋ. Kʋ culǝ sɩ á di-tɩ. 42 Tɩntʋ na tuurə, naa tɩ na ve nɛ sɩna baŋa nɩ, naa tɩ na jɩgɩ nɛ zanzan mʋ tɩ veǝ dɩ, kʋ culǝ sɩ á di-tɩ. Tɩ yɩ wo-zɔɔna mʋ. 43 Nan yɩ cɔgɩ-na á tɩtɩ dɩ-tɩ, sɩ á tɔgɩ tɩ ŋwaanɩ á ji wo-digiru. 44 Amʋ mʋ yɩ abam Tu Baŋa-Wɛ dɩm. Pɔɔrɩ-na á tɩtɩ dɩ wo-digiru maama, sɩ á taá yɩ wʋ-poŋo tiinə. Bɛŋwaanɩ, amʋ tɩtɩ yɩ wʋ-poŋo tu mʋ. Nan yɩ cɔgɩ-na á tɩtɩ dɩ tɩga wo-vəəlu, naa wo-kʋrrʋ tɩlʋ na kaagɩ tɩ ve tɩga kam baŋa nɩ tɩn. 45 Amʋ mʋ yɩ Baŋa-Wɛ dɩm. A dɛɛn jaanɩ abam a nuŋi Ezipi nɩ sɩ a taa yɩ abam Tu Wɛ dɩm mʋ. Nan taá yɩ-na wʋ-poŋo tiinə, amʋ tɩtɩ na yɩ wʋ-poŋo tu tɩn ŋwaanɩ.»b