Nadabɩ dɩdaanɩ Abiyu na tɩgɩ te tɩn
10
Arɔn biə bale Nadabɩ dɩdaanɩ Abiyu dɛɛn ma kwe ba mim zʋŋ-tanlɛ sɩm, yɩ ba dɩdʋa dɩdʋa kɩ mim o zʋŋa kam wʋnɩ o daarɩ o wǝli wǝǝnu tɩlʋ lwǝm na ywǝmmǝ tɩn da. Ba laan ma zʋ Baŋa-Wɛ yigə nɩ, sɩ ba zwɛ-tɩ ba zuli‑DƖ, yɩ ba kaanɩm dɩm kʋntʋ nan ya wʋ dɛ cwǝŋǝ, bɛŋwaanɩ Baŋa-Wɛ wʋ pɛ ni sɩ ba zwɛ min-yɔɔ kʋntʋ doŋ.a 2 Min-vʋgʋ ma da kʋ nuŋi Baŋa-Wɛ tee nɩ kʋ cu nɔɔna bale bam baŋa nɩ kʋ di-ba pa ba tɩ Baŋa-Wɛ yigə nɩ. 3 Moyisi ma ta Arɔn o wɩ: «Kʋ yɩ tɩntʋ ŋwaanɩ mʋ Baŋa-Wɛ ŋɔɔnɩ DƖ brɩ dɩbam yɩ DƖ wɩ:‹Balʋ na twɛ amʋ te sɩ ba tʋŋɩ ba pa-nɩ tɩn
maŋɩ sɩ ba lwarɩ nɩ amʋ yɩ lanyɩranɩ fasɩ mʋ.
Amʋ nɔɔna bam maama dɩ maa maŋɩ sɩ ba pa-nɩ zulə.› »
Arɔn na ni kʋntʋ tɩn, mʋ o maŋɩ da cɩmm.
4 Moyisi dɛɛn ma tʋŋɩ o bəŋi Mikayɛlɩ dɩ Elizafan sɩ ba ba. Bantʋ dɛɛn yɩ Arɔn ko nyaanɩ Uziyɛlɩ biə mʋ. Moyisi ma ta dɩ ba o wɩ: «Ba-na á zɩŋɩ á cʋrrʋ tɩm á ja á nuŋi jero-vwe dɩm ni nɩ. Ja-ba á nuŋi á vu dáa dáa tigisim jǝgǝ kam nɩ.» 5 Ba ma sɩɩnɩ ba kɩ te Moyisi na tagɩ tɩn. Ba ma ja twa bam ba gwaarʋ tɩm seeni ba nuŋi dáa dáa.
6 Moyisi ta ma ta Arɔn dɩdaanɩ o biə bale balʋ na daarɩ tɩn, Eleyazaarɩ dɩ Itamarɩ, o wɩ: «Yɩ vugimi á yuuywe, nan yɩ kaarɩ-na á gwaarʋ dɩ á wʋrʋ na cɔgɩ te maama tɩn dɩ. Abam na kɩ kʋntʋ, á dɩ wʋ́ tɩ mʋ. Baŋa-Wɛ banɩ ta maa wʋ́ zaŋɩ Yisɩrayɛlɩ tiinə kɔ-fɔrɔ kʋm maama baŋa nɩ. Kʋ daarɩ, á cʋrrʋ Yisɩrayɛlɩ dwi tiinə bam wʋ́ wanɩ ba keeri Nadabɩ dɩ Abiyu lwi sɩm, dɩ Baŋa-Wɛ na pɛ mim di-ba dɩ cɔgɩ tɩn. 7 Abam nan yɩ yagɩ-na jero-vwe dɩm ni nɩ sɩ á nuŋi. Á na kɩ kʋntʋ lele, á wʋ́ tɩ mʋ. Bɛŋwaanɩ, Baŋa-Wɛ swəlim nugə kam wʋ abam yuu nɩ mʋ, yɩ ka pɔɔrɩ abam sɩ á taá yɩ á yɩra Wɛ tɩtʋŋa ŋwaanɩ.» Ba dɛɛn ma sɛ Moyisi ni dɩm.
8 Baŋa-Wɛ laan ma ta dɩ Arɔn DƖ wɩ: 9 «Nmʋ dɩdaanɩ n biə bam na yǝni á zʋ jero-vwe dɩm wʋnɩ, kʋ daɩ sɩ á nyɔ sana. Abam na kɩ kʋntʋ, á wʋ́ tɩ mʋ. Amʋ ni dɩntʋ wʋ́ taa wʋra mʋ wuu kʋ paɩ abam dɩ á dwi dɩm. 10 Dɩ maa maŋɩ sɩ á wanɩ á pɔɔrɩ wǝǝnu tɩlʋ na yɩ tɩ yɩra amʋ ŋwaanɩ tɩn, dɩ tɩlʋ na wʋra dɛ dɛ tɩtʋŋa ŋwaanɩ tɩn daanɩ. Á ta maa wʋ́ pɔɔrɩ tɩlʋ na maŋɩ dɩ Wɛ cullu tɩm tɩn, dɩ tɩlʋ na jɩgɩ digiru cullu tɩm seeni tɩn daanɩ. 11 Kʋ yɩ abam tɩtʋŋɩ mʋ sɩ á kwe a niə yalʋ a na tɔgɩ Moyisi baŋa a pa Yisɩrayɛlɩ tiinə bam tɩn, á brɩ ba maama.»
12 Moyisi dɛɛn ma ta Arɔn dɩ o biə balʋ na daarɩ tɩn, Eleyazaarɩ dɩ Itamarɩ, o wɩ: «Kʋ na yɩ muni dɩlʋ ta na daarɩ Baŋa-Wɛ pɛɛra yam wʋnɩ tɩn, sɩ á kwe-dɩ á wɔ dɩpwa yalʋ dabɩlɩ na tǝri ya wʋnɩ tɩn. Á laan wʋ́ maŋɩ kaanɩm bimbim dɩm təŋə nɩ mʋ á di dɩpwa yam dáanɩ, kʋ na yɔɔrɩ kʋ yɩ kʋ yɩra kʋ pa Wɛ tɩn ŋwaanɩ. 13 Maŋɩ-na je sɩlʋ na yɩ lanyɩranɩ fasɩ tɩn nɩ á di-kʋ. Bɛŋwaanɩ, Baŋa-Wɛ pɔɔrɩ-kʋ sɩ kʋ taa yɩ abam dɩ á biə bam pʋpwara mʋ o wʋdiu pɛɛra yam wʋnɩ. Mʋ ni dɩlʋ DƖ na pɛ amʋ tɩn. 14 Kʋ nan na yɩ varɩm wʋm nyɔɔnɩ dɩ o cwe dɩm ba na zǝŋi wɛɛnɩ ba zuli Wɛ tɩn, abam dɩ á digə tiinə, baara dɩ kaana, mʋ jɩgɩ cwǝŋǝ sɩ á di-tɩ jǝgǝ kalʋ na kwɛ ka maŋɩ dɩ cullu tɩm tɩn nɩ. Wɛ pɔɔrɩ-tɩ Yisɩrayɛlɩ tiinə yazurə pɛɛra yam wʋnɩ sɩ tɩ taa yɩ abam dɩ á biə bam nyɩm mʋ.b 15 Yisɩrayɛlɩ tiinə bam maŋɩ sɩ ba kwe varɩm cwe dɩm dɩ o nyɔɔnɩ dɩm ba wǝli dɩ o lara kam ba zəŋi-tɩ wɛɛnɩ sɩ tɩ taa yɩ wʋdiu pɛɛrɩ tɩ paɩ Baŋa-Wɛ. Varɩm wʋm nyɔɔnɩ dɩm dɩ o cwe dɩm yɩ abam dɩ á biə bam nyɩm mʋ. Baŋa-Wɛ ni dɩm kʋntʋ wʋ́ taa wʋra maŋa maama mʋ.»
16 Moyisi dɛɛn ma bwe lwarɩm saarɩm pɛɛrɩ bʋŋʋ kʋm bwiə. O ma maanɩ nɩ ba maŋɩ ba zwɛ kʋ maama. O banɩ ma zaŋɩ dɩ Eleyazaarɩ dɩdaanɩ Itamarɩ yɩ o bwe-ba o wɩ: 17 «Bɛɛ mʋ kɩ yɩ abam wʋ maŋɩ jero-vwe dɩm nɩ á di varɩm wʋm nwana yam? Pɛɛrɩ dɩm kʋntʋ tiini dɩ yɩ lanyɩranɩ fasɩ mʋ. Baŋa-Wɛ kwe-dɩ DƖ pa abam Yisɩrayɛlɩ tiinə bam lwarɩm saarɩm ŋwaanɩ, sɩ á ma á kɩ kaanɩm á lɩ ba lwarɩm DƖ yigə nɩ mʋ. 18 Nii-na! Ba wʋ jaanɩ bʋŋʋ kʋm kʋntʋ jana ba zʋ jero-vwe dɩm wʋnɩ. Kʋntʋ ŋwaanɩ, kʋ ya maŋɩ sɩ á di kʋ nwana yam jero-vwe dɩm nɩ mʋ, nɩnɛɛnɩ amʋ na pɛ ni sɩ á kɩ te tɩn.»
19 Arɔn ma ləri Moyisi o wɩ: «Nan nii! Nɔɔna bam zɩm kwe ba lwarɩm saarɩm pɛɛrɩ dɩm dɩ ba zwɛɛm pɛɛrɩ dɩm mʋ ba kɩ kaanɩm ba pa Baŋa-Wɛ. Dɩ kʋntʋ dɩ, amʋ dɩ nan nɛ lɛɛrʋ dɩntʋ doŋ. Kʋntʋ tɩn, a ya na sɩɩnɩ a di lwarɩm saarɩm varɩm wʋm nwana yam zɩm, Baŋa-Wɛ yaá joŋi a kǝm dɩm na?» 20 Moyisi na ni kʋntʋ tɩn, o wʋʋ ma tʋ.