Wɛ kaanɩm tiinə puli ba tɩtʋŋa
9
Da nana dɛ dɩm nɩ yɩ ba kɩ kaanɩm tiinə kwɛɛm culu kʋm ba ti tɩn, mʋ Moyisi bəŋi Arɔn, dɩ o bu-baara bam, dɩ Yisɩrayɛlɩ nakwa bam sɩ ba jeeri. 2 O ma ta Arɔn o wɩ: «Beeri na-bala na ba jɩgɩ gɛɛrɩ ka yɩra nɩ tɩn sɩ n ma n kɩ lwarɩm saarɩm kaanɩm n pa Baŋa-Wɛ, sɩ n daarɩ n beeri pi-bala na ba jɩgɩ gɛɛrɩ tɩn dɩ sɩ n ma n kɩ zwɛɛm pɛɛrɩ kaanɩm n pa‑DƖ. 3 Nan ta dɩ Yisɩrayɛlɩ tiinə bam sɩ ba beeri bʋ-bala lwarɩm saarɩm kaanɩm ŋwaanɩ. Ba ta maa wʋ́ beeri na-bala na yɩ bɩnɩ, dɩ pi-bala na yɩ bɩnɩ tɩn mʋ sɩ ba ma ba kɩ zwɛɛm pɛɛrɩ kaanɩm. Tɩ nan ba maŋɩ sɩ gɛɛrɩ taa wʋ tɩ yɩra nɩ. 4 Ba ta wʋ́ beeri na-bɩa, dɩ pi-bɩa mʋ sɩ ba ma ba kɩ yazurə pɛɛrɩ kaanɩm ba pa Baŋa-Wɛ. Ba ta wʋ́ ja muni pɛɛrɩ dɩlʋ nugə na viiri dɩ wʋnɩ tɩn sɩ ba ma ba kɩ kaanɩm. Bɛŋwaanɩ, Baŋa-Wɛ zɩm wʋ́ ba DƖ vɩɩrɩ DƖ tɩtɩ ba tɩtarɩ nɩ.»5 Ba ma sɩɩnɩ ba ja kʋlʋ maama Moyisi na pɛ-ba ni sɩ ba ja ba ba tɩn ba jeeri Wɛ jero-vwe dɩm manco-pɩɩna yam nɩ. Yisɩrayɛlɩ tiinə kɔ-fɔrɔ kʋm maama dɩ ma fʋfɔ ba yi je sɩm sɩ ba zuli Baŋa-Wɛ. 6 Moyisi dɛɛn ma ta dɩ ba o wɩ: «Tɩntʋ maama tɔgɩ ni dɩlʋ Baŋa-Wɛ na pɛ abam sɩ á kɩ tɩn, sɩ DƖ laan ba DƖ vɩɩrɩ DƖ tɩtɩ dɩ DƖ paarɩ-zulǝ yam abam yigə nɩ.»
7 O ma daarɩ o ta Arɔn o wɩ: «Fʋfɔ n yi kaanɩm bimbim dɩm sɩ n kɩ lwarɩm saarɩm kaanɩm dɩm, dɩ zwɛɛm pɛɛrɩ kaanɩm dɩm, sɩ n tɔgɩ tɩntʋ baŋa n ma n lɩ nmʋ tɩtɩ lwarɩm dɩdaanɩ nɔɔna bam lwarɩm Wɛ yigə nɩ.a Ta kwe Yisɩrayɛlɩ tiinə vara bam n ma n kɩ kaanɩm ba ŋwaanɩ, sɩ n lɩ ba lwarɩm Wɛ yigə nɩ, nɩnɛɛnɩ Baŋa-Wɛ na pɛ ni sɩ n kɩ te tɩn.»
8 Arɔn ma sɩɩnɩ o yi kaanɩm bimbim dɩm yɩ o kwe na-bɩa kalʋ na wʋra o tɩtɩ lwarɩm saarɩm ŋwaanɩ tɩn o goni ka ban. 9 O biə bam ma ja ka jana ba yi o te ba pa‑o, yɩ o kwe o nʋa o laŋɩ jana bam. O laan ma kwe-ba o taagɩ kaanɩm bimbim dɩm nyɩa yam, yɩ o daarɩ o lo balʋ na daarɩ tɩn kaanɩm bimbim dɩm təŋə nɩ. 10 O ma lɩ na-bɩa kam lara kam, dɩ ka tapwal-biə bam, dɩ cwɛ dɩm kuri seeni dɩm maama o kwe-tɩ o zwɛ kaanɩm bimbim dɩm baŋa nɩ, nɩnɛɛnɩ Baŋa-Wɛ na pɛ Moyisi ni sɩ ba kɩ te tɩn. 11 Kʋ nan na yɩ varɩm wʋm nwana yam, dɩ o tɔnɔ kʋm, o jaanɩ-ba mʋ o nuŋi ba tigisim jǝgǝ kam o vu dáa o zwɛ.
12 Kʋ kwaga nɩ, Arɔn ma kwe varɩm wʋlʋ na wʋra zwɛɛm pɛɛrɩ kaanɩm ŋwaanɩ tɩn o goni o ban. O biə bam ma ja ka jana bam ba vu ba pa‑o. O dɩ ma kwe-ba o miisi miisi o yagɩ kaanɩm bimbim dɩm sɛn sɩna sɩm nɩ. 13 Ba ma kwe varɩm wʋm nwana yam yɩra yɩra ba ja vu ba pa‑o, dɩ o yuu kʋm dɩ. O ma zwɛ tɩ maama kaanɩm bimbim dɩm baŋa nɩ. 14 O ta ma zarɩ varɩm wʋm wʋ-zɩla yam, dɩ o nɛ sɩm, yɩ o laan kwe tɩ maama o daŋɩ zwɛɛm pɛɛrɩ dɩm baŋa nɩ o zwɛ o pa Wɛ.
15 Arɔn dɛɛn ta kɩ kaanɩm nɔɔna bam maama ŋwaanɩ. O ma kwe bʋ-bala kalʋ na wʋra ba lwarɩm saarɩm ŋwaanɩ tɩn o goni ka ban, yɩ o kɩ kaanɩm o pa Wɛ sɩ o saarɩ ba lwarɩm, nɩnɛɛnɩ o na kɩ te dɩdaanɩ o tɩtɩ nyɩm dɩm tɩn.
16 O laan ma kwe zwɛɛm pɛɛrɩ dɩm o kɩ kaanɩm sɩ kʋ maŋɩ dɩ dɩ cwǝŋǝ kam na yɩ te tɩn. 17 O dɛɛn ta ma kwe wʋdiu pɛɛrɩ dɩm dɩ o wǝli da. O ma zwɛ muni ja-guli-yi dɩ wʋnɩ o kwe o wǝli dɛ maama ba na kɩ zwɛɛm pɛɛrɩ dɩlʋ tɩtɩɩtɩ tɩn wʋnɩ, yɩ o zwɛ-tɩ kaanɩm bimbim dɩm baŋa nɩ.
18 O ta ma kwe na-bɩa kam dɩ pi-bala kam na wʋra sɩ sɩ kɩ yazurə pɛɛrɩ kaanɩm nɔɔna bam ŋwaanɩ tɩn o goni sɩ ban. O biə bam ma ja vara bam jana ba vu ba pa‑o. O dɩ ma kwe-ba o miisi miisi o yagɩ kaanɩm bimbim dɩm sɛn sɩna sɩm nɩ. 19 Ba laan ma tigisi lara kalʋ maama na wʋ na-bala kam dɩ pi-bala kam yɩra nɩ tɩn. Kʋ maa yɩ vara bam nabili-boru tɩm, dɩ lara kalʋ na məəli ba wʋ-zɩla yam yɩra nɩ tɩn, dɩ ba tapwal-biə bam, dɩ ba cwə yam kuri seeni mʋ. 20 Tɩntʋ maama mʋ ba dɛɛn kwe ba daŋɩ vara bam nyɔɔna baŋa nɩ, yɩ Arɔn kwe lara kam o zwɛ kaanɩm bimbim dɩm baŋa nɩ. 21 Kʋ daarɩ vara bam nyɔɔna yam, dɩ ba jazɩm cwə yam, Arɔn dɛɛn zəŋi-tɩ wɛɛnɩ mʋ, sɩ tɩ ta yɩ pɛɛrɩ tɩ paɩ Baŋa-Wɛ. Kʋ nan kɩ nɩnɛɛnɩ Moyisi na pɛ-ba ni sɩ ba kɩ te tɩn mʋ.
22 Arɔn dɛɛn na kɩ kaanɩm dɩm dwi maama o ti tɩn, o ma zǝŋi o jɩan o jeeri Yisɩrayɛlɩ kɔ-fɔrɔ kʋm yɩ o kɩ ba yu-yoŋo. O laan ma zɩgɩ kaanɩm bimbim dɩm təŋə nɩ o joori o tu tɩga.
23 Moyisi dɩdaanɩ Arɔn ma zʋ jero-vwe dɩm wʋnɩ. Ba daa na nuŋi tɩn, mʋ ba bʋrɩ ba sɔɔlɩ Wɛ ba pa nɔɔna bam. Baŋa-Wɛ ma vɩɩrɩ DƖ paarɩ-zulǝ yam nɔɔna bam maama yigə nɩ. 24 Min-vʋgʋ ma da kʋ nuŋi Baŋa-Wɛ tee nɩ kʋ cu kʋ di zwɛɛm pɛɛrɩ dɩm, dɩdaanɩ lara kam maama na wʋ kaanɩm bimbim dɩm baŋa nɩ tɩn kulə!b Nɔɔna bam maama na nɛ kʋntʋ tɩn, mʋ ba kaasɩ dɩ kwǝr-dɩa yɩ ba daarɩ ba vin ba yibiyə tɩga nɩ ba zuli Wɛ.