Wɛ kaanɩm tiinə kwɛɛm taanɩ
8
Baŋa-Wɛ daa ta ma ta Moyisi DƖ wɩ:2-3 «Pa Arɔn dɩ o bu-baara bam ba ba jeeri jero-vwe dɩm manco-pɩɩna ni dɩm nɩ. Nan ta ja ba kaanɩm gwar-laarʋ tɩm, dɩ Wɛ swəlim nugə kam, dɩ tɩtɔgɔ kʋlʋ na jɩgɩ dɩpwa yalʋ na ba jɩgɩ dabɩlɩ ya wʋnɩ tɩn n wǝli da n ja n ba. Kwe lwarɩm saarɩm kaanɩm na-bɩa kam, dɩ pi-bɛ sɩle sɩm n ja n ba. Nan ta dɩ Yisɩrayɛlɩ kɔ-fɔrɔ kʋm maama sɩ ba dɩ da ba jeeri dáanɩ.»
4 Moyisi ma sɩɩnɩ o kɩ kʋlʋ Baŋa-Wɛ na tagɩ tɩn, pa Yisɩrayɛlɩ tiinə bam jeeri jero-vwe dɩm ni nɩ. 5 O ma ta dɩ nɔn-kɔgɔ kʋm o wɩ: «Baŋa-Wɛ na pɛ ni dɩlʋ sɩ dɩ kɩ tɩn mʋ tɩntʋ.»
6 Moyisi ma pa Arɔn dɩ o biə bam nuŋi ba zɩgɩ, yɩ o daarɩ o pa ba swɛ ba yɩra ba kwɛ ba tɩtɩ Wɛ ŋwaanɩ. 7 O laan ma kwe kaanɩm gwar-dɩdɔrɔ kʋm o zʋ Arɔn. O ma kwe garyi kam o vɔ Arɔn təŋə nɩ, yɩ o daarɩ o pa o zʋ gwar-bwərə kam. O ma kwe gwar-wʋgʋ kʋm o zʋ-o yɩ o ta kwe kʋ təŋə garyi kam o vɔ o kɩ da. 8 O ta ma kwe nyɔɔnɩ gwar-palɩ dɩm o zʋ-o yɩ o daarɩ o kɩ Yurim dɩ Tumim kandwa yam dɩ gwar-fɛɛla wʋnɩ. 9 O dɛɛn ta kwe yuu garyi dɩm mʋ o ba o yuu nɩ. O ma daarɩ o kwe səbu-sɩŋa wo-pɩlɔgɔ kʋlʋ na brɩ nɩ kaanɩm tu wʋm yɩ Wɛ nyɩm tɩn o le garyi kam o tri dɩm seeni, sɩ kʋ tɔgɩ ni dɩlʋ Baŋa-Wɛ ya na pɛ Moyisi sɩ o kɩ tɩn.a
10 Moyisi dɛɛn ma kwe Wɛ swəlim nugə kam o lo o yagɩ Wɛ jero-vwe dɩm maama dɩ wǝǝnu tɩlʋ maama na wʋ dɩ wʋnɩ tɩn yɩra nɩ, sɩ tɩ taa yɩ tɩ yɩra Baŋa-Wɛ ŋwaanɩ. 11 O ta ma kwe nugə kam o miisi kaanɩm bimbim dɩm yɩra nɩ kuni bɩrpɛ, yɩ o daarɩ o miisi ka yɩra zɩla yam, dɩ canna war-zʋŋa kam dɩdaanɩ ka na zɩgɩ woŋo kʋlʋ baŋa nɩ tɩn, sɩ tɩ maama taa yɩ tɩ yɩra Baŋa-Wɛ ŋwaanɩ. 12 Kʋ ta na yɩ Arɔn, Moyisi dɛɛn logi Wɛ swəlim nugə kam wʋntʋ yuu nɩ mʋ o tiŋ‑o Wɛ kaanɩm tɩtʋŋa ŋwaanɩ, sɩ o dɩ taa yɩ Wɛ nyɩm. 13 Moyisi laan ma pa Arɔn biə bam dɩ nuŋi ba zɩgɩ o yigə nɩ. O ma kwe kaanɩm gwar-dɩdwaarʋ o zʋ ba maama. O ma vɔ vʋvwɩ ba tee nɩ yɩ o daarɩ o kwe ba yipwi o pu ba yum nɩ. O dɛɛn kɩ Baŋa-Wɛ ya na brɩ-o sɩ o kɩ te tɩn mʋ.
14 Moyisi ma ja na-bɩa kam ba na wʋ́ kwe ba kɩ lwarɩm saarɩm kaanɩm dɩm tɩn o ja o nuŋi. Arɔn dɩ o biə bam dɩ ma daŋɩ ba jɩan ka yuu nɩ. 15 Moyisi ma goni ka ban. O ma lwəri ka jana bam badonnǝ o daarɩ o ma o nʋa o laŋɩ-ba o ma o taagɩ kaanɩm bimbim dɩm ka nyɩa yana yam seeni sɩ o kwɛ-ka Wɛ ŋwaanɩ. O laan ma lo jana balʋ na daarɩ tɩn kaanɩm bimbim dɩm təŋə nɩ. O na kɩ te maama tɩn pɛ kaanɩm bimbim dɩm yɩ lanyɩranɩ fasɩ mʋ, pa ka maŋɩ dɩ lwarɩm saarɩm tɩtʋŋa. 16 Moyisi ta ma lɔɔnɩ na-bɩa kam lara kalʋ na məəli ka wʋ-zɩla yam yɩra nɩ tɩn, o wǝli dɩ ka cwɛ dɩm kuri seeni dɩm, dɩ ka tapwal-biə bam dɩ lara kalʋ na məəli da tɩn maama. O dɛɛn ma zwɛ tɩ maama kaanɩm bimbim dɩm baŋa nɩ. 17 Kʋ na yɩ na-bɩa kam tɔnɔ kʋm, dɩ ka nwana yam, dɩ ka wʋ-zɩla yalʋ na daarɩ tɩn, o jaanɩ-ba o nuŋi dáa nɩ mʋ, yɩ o zwɛ-tɩ sɩ kʋ tɔgɩ ni dɩlʋ Baŋa-Wɛ ya na pɛ‑o sɩ o kɩ tɩn.
18 Moyisi ta ma ja pi-bɩa kalʋ ba na wʋ́ ma ba kɩ zwɛɛm pɛɛrɩ kaanɩm dɩm tɩn o nuŋi o zɩgɩ. Arɔn dɩ o bu-baara bam dɩ ma kwe ba jɩan ba daŋɩ ka yuu nɩ. 19 O laan ma goni ka ban. Moyisi ma lwəri ka jana bam o miisi miisi kaanɩm bimbim dɩm sɛn sɩna sɩm maama nɩ. 20 O ta ma goni piə kam nwana yam yɩra mugə-mugə. O laan ma kwe ka nwana yam, dɩ ka yuu kʋm, dɩ ka lara kam o zwɛ. 21 O ma zarɩ ka wʋ-zɩla yam dɩ ka nɛ sɩm yigə sɩ o laan zwɛ tɩ maama kulə kaanɩm bimbim dɩm baŋa nɩ sɩ kʋ tɔgɩ ni dɩlʋ Baŋa-Wɛ ya na pɛ‑o sɩ o kɩ te tɩn. Zwɛɛm kaanɩm dɩm kʋntʋ maa yɩ wʋdiu pɛɛrɩ dɩ pa Baŋa-Wɛ. Dɩ lwəm maa ywəmmə dɩ pa‑DƖ.
22 Moyisi daa ma ja pi-bɩa kadoŋ kam na wʋra kaanɩm tiinə kwɛɛm ŋwaanɩ tɩn o ja o nuŋi. Arɔn dɩ o biə bam dɩ ma kwe ba jɩan ba daŋɩ ka yuu nɩ. 23 O ma goni ka ban. Moyisi ma daarɩ o lwəri ka jana bam badonnǝ o taŋɩ Arɔn jazɩm zwɛ dɩm nɩ, dɩ o jazɩm nʋ-kwɩʋ kʋm, dɩdaanɩ o jazɩm namimbu-kwɩʋ kʋm. 24 Moyisi ta ma pa Arɔn biə bam nuŋi yɩ o kwe piə kam jana o taŋɩ ba dɩdʋa dɩdʋa jazɩm zwa yam, dɩ ba jazɩm nʋ-kwɩɩrʋ tɩm, kʋ wǝli dɩ ba jazɩm namimbi-kwɩɩrʋ tɩm. O laan ma daarɩ o kwe jana balʋ na daarɩ tɩn o miisi miisi o yagɩ kaanɩm bimbim dɩm sɛn sɩna sɩm nɩ. 25 Moyisi ma lɔɔnɩ piə kam lara kam maama, dɩ ka nabili-bogo kʋm, dɩ lara kalʋ na məəli o wʋ-zɩla yam yɩra nɩ tɩn, o ta wǝli cwɛ dɩm kuri seeni dɩdaanɩ tapwal-biə bale bam dɩ lara kalʋ na məəli da tɩn. O dɛɛn ta kwe ka jazɩm cwe dɩm mʋ o wǝli da. 26 O laan ma kwe tɩtɔgɔ kʋm dɩ kʋ dɩpwa yalʋ na ba jɩgɩ dabɩlɩ ya wʋnɩ tɩn na yɩ Baŋa-Wɛ nyɩm tɩn o lɩ dɩpwa dwiə yatɔ yam wʋnɩ dɩdʋa dɩdʋa, yɩ dabɩlɩ tǝri ya wʋnɩ. O laan ma kwe ya maama o daŋɩ lara kam dɩ piə kam jazɩm cwe dɩm baŋa nɩ. 27 O ma kwe wǝǝnu tɩm kʋntʋ maama o kɩ Arɔn dɩ o biə bam jɩan yam nɩ sɩ ba zəŋi-tɩ wɛɛnɩ sɩ tɩ taa yɩ pɛɛrɩ tɩ pa Baŋa-Wɛ. 28 Kʋntʋ kwaga nɩ mʋ Moyisi joŋi-tɩ ba jɩŋa nɩ o daarɩ o daŋɩ-tɩ zwɛɛm kaanɩm varɩm wʋlʋ na wʋ kaanɩm bimbim dɩm baŋa nɩ tɩn o zwɛ, sɩ kʋ taa yɩ kaanɩm tiinə kwɛɛm kaanɩm. Kaanɩm dɩm kʋntʋ yɩ wʋdiu pɛɛrɩ mʋ kʋ paɩ Baŋa-Wɛ. Dɩ lwəm maa ywəmmə dɩ pa‑DƖ. 29 Moyisi laan ma kwe pi-bɩa kam nyɔɔnɩ dɩm o zǝŋi wɛɛnɩ sɩ dɩ taa yɩ pɛɛrɩ dɩ paɩ Baŋa-Wɛ. Wʋntʋ tɩtɩ pʋpwara mʋ kʋntʋ o na jɩgɩ cwǝŋǝ sɩ o lɩ-ka kaanɩm tiinə kwɛɛm pi-bɩa kam wʋnɩ, nɩ Baŋa-Wɛ ya na pɛ‑o ni sɩ o kɩ te tɩn.
30 Kʋntʋ na ti tɩn, mʋ Moyisi kwe Wɛ swəlim nugə kam dɩdaanɩ jana balʋ na wʋ kaanɩm bimbim dɩm baŋa nɩ tɩn badonnǝ o miisi Arɔn dɩ o gwaarʋ tɩm yɩra nɩ. O ta ma miisi-tɩ Arɔn biə bam dɩ ba dɩ gwaarʋ tɩm yɩra nɩ. Kǝm dɩm kʋntʋ dɛɛn pɛ Arɔn dɩ o biə bam dɩdaanɩ ba gwaarʋ tɩm maama yɩ tɩ yɩra mʋ Baŋa-Wɛ ŋwaanɩ.
31 Moyisi laan ma ta Arɔn dɩ o bu-baara bam o wɩ: «Kwe-na kaanɩm dɩm nwana yalʋ na daarɩ tɩn á vu á saŋɩ jero-vwe dɩm ni nɩ, sɩ á maŋɩ dáanɩ á di-ya dɩ dɩpwa yalʋ amʋ na lɩ tɩtɔgɔ kʋm wʋnɩ tɩn, nɩnɛɛnɩ Wɛ na pɛ ni nɩ: Arɔn dɩ o biə bam jɩgɩ cwǝŋǝ sɩ ba di-ya te tɩn. 32 Kʋ na yɩ nwana yalʋ dɩ dɩpwa yalʋ á na wʋ́ di á daarɩ tɩn, sɩ á zwɛ-tɩ. 33 Nan maŋɩ-na jero-vwe dɩm ni nɩ da yarpɛ, sɩ culu kʋlʋ na yɩ abam kwɛɛm ŋwaanɩ tɩn na ti, sɩ á nuŋi pooni. 34 Baŋa-Wɛ dɛɛn pɛ ni nɩ dɩ́ kɩ tɩntʋ mʋ sɩ dɩ́ wanɩ dɩ́ lɩ abam lwarɩm dɩm DƖ yigə nɩ. 35 Abam maŋɩ sɩ á maŋɩ jero-vwe dɩm ni nɩ da yarpɛ, wɩa dɩ tɩtɩ maama, kʋ na yɩ Wɛ ni dɩm tɩn ŋwaanɩ. Wʋlʋ nan na vɩn yɩ o nuŋi pooni, kʋ tu maŋɩ sɩ o tɩ mʋ. Mʋ ni dɩlʋ Baŋa-Wɛ na pɛ amʋ tɩn.»
36 Arɔn dɩ o bu-baara bam dɩ dɛɛn ma kɩ kʋlʋ maama Baŋa-Wɛ na pɛ Moyisi ni sɩ ba kɩ tɩn.