Lwarɩm jɩnɩ kaanɩm
7
«Lwarɩm jɩnɩ kaanɩm dɩm maŋɩ sɩ dɩ kɩ tɩntʋ mʋ. Kaanɩm dɩm kʋntʋ tiini dɩ yɩ lanyɩranɩ fasɩ mʋ. 2 Baá gʋ lwarɩm jɩnɩ kaanɩm varɩm wʋm jǝgǝ kalʋ ba na yǝni ba gʋ zwɛɛm kaanɩm varɩm wʋm da tɩn mʋ.a Kaanɩm tu wʋm laan wʋ́ kwe varɩm wʋm jana mʋ o miisi miisi kaanɩm bimbim dɩm sɛn sɩna sɩm nɩ. 3 Nɔɔnʋ wʋm maŋɩ sɩ o lɔɔnɩ varɩm wʋm lara maama sɩ ba ma kɩ kaanɩm ba pa Wɛ. Kʋ maa wʋ́ taa yɩ o nabili-bogo kʋm, dɩ lara kalʋ na məəli o wʋ-zɩla yam yɩra nɩ tɩn, 4 dɩdaanɩ o tapwal-biə bale bam dɩ lara kalʋ na məəli da tɩn mʋ, kʋ ta wǝli dɩ o cwɛ dɩm candiə kam seeni. 5 Kaanɩm tu wʋm maa wʋ́ zwɛ wǝǝnu tɩm kʋntʋ maama kaanɩm bimbim dɩm baŋa nɩ, sɩ tɩ taa yɩ pɛɛrɩ tɩ paɩ Baŋa-Wɛ. Kʋntʋ yɩ lwarɩm jɩnɩ kaanɩm mʋ. 6 Baarʋ wʋlʋ maama na nuŋi kaanɩm tiinə dwi dɩm wʋnɩ tɩn jɩgɩ cwǝŋǝ sɩ o di varɩm wʋm nwana yam. Ba nan maŋɩ sɩ ba di-ya jǝgǝ kalʋ na yɩ lanyɩranɩ fasɩ tɩn nɩ mʋ, ya na tiini ya yɩ lanyɩranɩ fasɩ tɩn ŋwaanɩ.7 Lwarɩm jɩnɩ kaanɩm dɩm dɩdaanɩ lwarɩm saarɩm kaanɩm dɩm maama jɩgɩ culu dɩdʋa mʋ. Kaanɩm tu wʋlʋ na kɩ-ya o ma lɩ nɔɔnʋ lwarɩm Wɛ yigə nɩ tɩn mʋ jɩgɩ cwǝŋǝ sɩ o di ya nwana yam. 8 Kʋ nan na yɩ zwɛɛm pɛɛrɩ kaanɩm dɩm, Kaanɩm tu wʋlʋ na kaanɩ-dɩ o pa Wɛ tɩn mʋ te varɩm wʋm tɔnɔ kʋm. 9 Kʋ ta na yɩ muni pɛɛrɩ dɩlʋ maama ba na wɔga kurə wʋnɩ, naa ba na saŋɩ, naa ba na wʋ́ kwarɩ luu baŋa nɩ tɩn, kʋ yɩ kaanɩm tu wʋlʋ na kɩ kaanɩm dɩm tɩn nyɩm mʋ. 10 Kʋ daarɩ muni pɛɛra yadonnə yam yalʋ na yɩ wʋdi-gwe tɩn, Arɔn bu-baara bam maama wʋ́ cɛ-tɩ mʋ ba pa daanɩ sɩ kʋ taa maɩ daanɩ, nɩnɛɛnɩ nugə na wǝli muni dɩm wʋnɩ, naa ka na wʋ wǝli da dɩ.
Yazurə pɛɛrɩ kaanɩm
11 Yazurə pɛɛrɩ kaanɩm dɩlʋ nɔɔnʋ na wʋ́ kɩ o pa Baŋa-Wɛ tɩn maŋɩ sɩ dɩ kɩ tɩntʋ mʋ. 12 Nɔɔnʋ na kɩ pɛɛrɩ kʋntʋ doŋ sɩ o ma kɩ Wɛ le, kʋ tu maŋɩ sɩ o kwe dɩpɛ o ja o ba o wǝli dɩ kaanɩm dɩm varɩm wʋm. Oó gwaanɩ muni dɩ nugə mʋ o ma kɩ dɩpɛ dɩlʋ dabɩlɩ na tǝri kʋ wʋnɩ tɩn. O ta wʋ́ kwe muni dɩm o ma wɔ dɩpɛ dɩlʋ na ba jɩgɩ dabɩlɩ dɩ wʋnɩ tɩn o daarɩ o ma nugə o taagɩ taagɩ dɩ maama. O daa ta wʋ́ kwe mun-bwe mʋ o gwaanɩ dɩ nugə o ma wɔ dɩpɛ dwi dɩdoŋ. 13 Kʋ tu na kɩ yazurə pɛɛrɩ kaanɩm le-kəm ŋwaanɩ, o ta maŋɩ sɩ o kwe dɩpɛ dɩlʋ dabɩlɩ na wǝli kʋ wʋnɩ tɩn o ja o ba o wǝli da. 14 Kʋ tu laan wʋ́ lɩ dɩpɛ dwiə yam kʋntʋ maama wʋnɩ dɩdʋa dɩdʋa o ba o ma kɩ kaanɩm o pa Baŋa-Wɛ. Dɩpwa tɩm kʋntʋ wʋ́ taa yɩ kaanɩm tu wʋlʋ na kwe yazurə kaanɩm varɩm wʋm jana bam o miisi miisi kaanɩm bimbim dɩm yɩra nɩ tɩn nyɩm mʋ. 15 Kʋ na yɩ varɩm wʋm tɩtɩ nwana yam, ba maŋɩ sɩ ba di ya maama dɛ dɩlʋ wʋnɩ ba na kɩ kaanɩm dɩm tɩn mʋ. Ba yɩ pa tɩga pʋʋrɩ yɩ ya ta wʋra.
16 Nɔɔnʋ nan na kɩ yazurə pɛɛrɩ kaanɩm ni-gonim ŋwaanɩ, naa kʋ yɩ o wʋ-yoŋo pɛɛrɩ mʋ, baá di varɩm wʋm nwana yam dɛ dɩm ba na kɩ kaanɩm dɩm tɩn wʋnɩ, ba jɩgɩ cwǝŋǝ sɩ ba tiŋi nwana yalʋ ba na di ba daarɩ tɩn sɩ tɩga na pʋʋrɩ, sɩ ba di-ya. 17 Kaanɩm dɩm nwana yam kʋntʋ ta na wʋra ya yi da yatɔ dɛ dɩm nɩ, sɩ á zwɛ-ya. 18 Da yatɔ dɛ dɩm nɩ, yazurə kaanɩm dɩm nwana yam na daarɩ yɩ nɔɔnʋ na di-ya, Baŋa-Wɛ bá sɛ o joŋi kʋ tu pɛɛrɩ dɩm. Kaanɩm dɩm bá taa jɩgɩ nyɔɔrɩ dɩ pa wʋlʋ na kɩ-dɩ tɩn. Dɩ jigi wo-zɔɔnɩ mʋ Wɛ tee nɩ, yɩ kʋ tu maŋɩ sɩ o na waarɩm.
19 Nwana yam na dwe woŋo kʋlʋ maama na jɩgɩ digiru Wɛ cullu tɩm seeni tɩn, kʋ daɩ sɩ á di-ya. Á maŋɩ sɩ á zwɛ nwana yam kʋntʋ mʋ. Kʋ daarɩ kʋ na yɩ nwana yadonnə yam, wʋlʋ maama na kwɛ o tɩtɩ Wɛ ŋwaanɩ tɩn jɩgɩ cwǝŋǝ sɩ o di-ya. 20 Wʋlʋ nan na wʋ kwɛ o tɩtɩ dɩ o digiru tɩn na tɔgɩ o di yazurə kaanɩm dɩm nwana yalʋ na yɩ Baŋa-Wɛ nyɩm tɩn, baá lɩ kʋ tu sɩ o daa yɩ tɔgɩ o wǝli Yisɩrayɛlɩ dwi dɩm wʋnɩ mʋ. 21 Kʋ ta wǝli da, nɔɔnʋ wʋlʋ na dwe woŋo kʋlʋ na jɩgɩ digiru Wɛ cullu tɩm seeni tɩn, kʋ na maŋɩ kʋ yɩ nabiinu wo-digiru, naa varɩm wo-digiru, naa wo-zɔɔnɩ dɩlʋ Wɛ na culi tɩn, yɩ o na tɔgɩ o di kaanɩm dɩm nwana yam, ba maŋɩ sɩ ba lɩ kʋ tu dɩ sɩ o daa yɩ tɔgɩ o wǝli Yisɩrayɛlɩ dwi dɩm wʋnɩ mʋ.»
Wɛ culi sɩ Yisɩrayɛlɩ tiinə bam di jana dɩdaanɩ lara
22 Baŋa-Wɛ ta ma ta dɩ Moyisi DƖ wɩ:
23 «Ta n brɩ Yisɩrayɛlɩ tiinə bam nɩ: Yɩ di-na lara kalʋ na wʋ naanɩ yɩra nɩ tɩn, naa peeni yɩra nɩ tɩn, naa bʋnɩ yɩra nɩ tɩn. 24 Á vara bam dɩdʋa na tɩgɩ o tɩtɩ tʋʋnɩ, naa ga-vara na tʋr‑o, á jɩgɩ cwǝŋǝ sɩ á kwe o lara kam á kɩ kʋlʋ maama á na lagɩ tɩn, sɩ á nan yɩ di-ka. 25 Wʋlʋ na di vara balʋ dwi na maŋɩ sɩ ba ma ba kɩ wʋdiu pɛɛrɩ ba pa Baŋa-Wɛ tɩn lara, ba maŋɩ sɩ ba lɩ kʋ tu sɩ o daa yɩ tɔgɩ o wǝli Yisɩrayɛlɩ dwi dɩm wʋnɩ mʋ. 26 Abam na ve á zʋʋrɩ je sɩlʋ maama nɩ, yɩ fɔgɩ á di-na varɩm jana, naa zunə jana. 27 Abam wʋnɩ wʋlʋ na di jana, ba maŋɩ sɩ ba lɩ kʋ tu sɩ o daa yɩ tɔgɩ o wǝli Yisɩrayɛlɩ dwi dɩm wʋnɩ mʋ.»
Kaanɩm tiinə na wʋ́ joŋi kʋlʋ kaanɩm dɩm nɩ tɩn
28 Baŋa-Wɛ ta ma ta dɩ Moyisi DƖ wɩ:
29 «Ta dɩ Yisɩrayɛlɩ tiinə bam nɩ: Wʋlʋ maama na bʋŋɩ sɩ o ja yazurə pɛɛrɩ o ba o kɩ kaanɩm o pa Baŋa-Wɛ, sɩ o pɔɔrɩ dɩ wʋnɩ kʋlʋ na wʋ́ taa yɩ Baŋa-Wɛ tɩtɩ nyɩm tɩn. 30 Kʋ tu nan wʋ́ ja-dɩ dɩ o tɩtɩ jɩan mʋ o ba o kɩ wʋdiu pɛɛrɩ o pa Baŋa-Wɛ. Oó kwe varɩm wʋm lara kam dɩ o nyɔɔnɩ seeni nwana yam, o zəŋi-tɩ wɛɛnɩ sɩ tɩ taa yɩ pɛɛrɩ tɩ pa Baŋa-Wɛ. 31 Kaanɩm tu wʋm maa wʋ́ zwɛ varɩm wʋm lara kam kaanɩm bimbim dɩm baŋa nɩ o pa Wɛ, sɩ kʋ na yɩ varɩm wʋm nyɔɔnɩ dɩm, dɩ yɩ Arɔn dɩ o biə bam nyɩm mʋ. 32 Abam na kɩ yazurə pɛɛrɩ kaanɩm maama, sɩ á kwe varɩm wʋm jazɩm cwe dɩm á pa kaanɩm tu wʋm sɩ dɩ taa yɩ o nyɩm. 33 Kʋ yɩ kaanɩm tu wʋlʋ na kwe varɩm wʋm lara dɩ o jana bam o ma o kɩ yazurə kaanɩm dɩm tɩn mʋ wʋ́ joŋi-dɩ. 34 Kʋ na yɩ yazurə pɛɛrɩ kaanɩm dɩlʋ Yisɩrayɛlɩ tiinə bam na yǝni ba kɩ tɩn, amʋ Baŋa-Wɛ mʋ joŋi varɩm wʋm nyɔɔnɩ dɩm, dɩ o jazɩm cwe dɩm mʋ ba tee nɩ a daarɩ a kwe-ya a pa Arɔn dwi dɩm kaanɩm tiinə bam. Amʋ ni dɩm kʋntʋ wʋ́ taa wʋra mʋ maŋa maama.»
35 Baŋa-Wɛ wʋdiu pɛɛra yam wʋnɩ pʋpwara kam kʋntʋ mʋ pɔɔrɩ ka pa Arɔn dɩ o biə bam, kʋ zɩgɩ dɛ dɩm ba na tiŋi-ba sɩ ba ji Baŋa-Wɛ kaanɩm tiinə tɩn. 36 Kʋ maa yɩ dɛ dɩlʋ nɩ ba na logi nugə ba yum nɩ sɩ ba ji Wɛ kaanɩm tiinə tɩn, mʋ Baŋa-Wɛ pɛ Yisɩrayɛlɩ tiinə bam ni sɩ ba taa jaanɩ pɛɛra yam kʋntʋ ba tui ba pa ba dɩ ba dwi dɩm. DƖ nan kɩ sɩ ni dɩm kʋntʋ taa wʋra wuu mʋ.
37 Cullu tɩm kʋntʋ mʋ wʋra kaanɩm dwi dwi ŋwaanɩ. Kʋ maa yɩ zwɛɛm pɛɛrɩ kaanɩm dɩm, dɩ wʋdiu pɛɛrɩ kaanɩm dɩm, dɩ lwarɩm saarɩm kaanɩm dɩm, dɩ lwarɩm jɩnɩ kaanɩm dɩm, dɩ kaanɩm tiinə tiŋim kaanɩm dɩm, dɩdaanɩ yazurə pɛɛrɩ kaanɩm dɩm. 38 Baŋa-Wɛ dɛɛn na kwe niə yantʋ DƖ pa Moyisi sɩ Yisɩrayɛlɩ tiinə bam taa tɔgɩ-ya ba ma kwe ba pɛɛra yam ba kɩ kaanɩm ba pa‑DƖ tɩn, dɩ ba dɛɛn wʋ Sinayi Piu kʋm təŋə nɩ mʋ kagʋa kam yuu nɩ.