6
Baŋa-Wɛ ta ma ta dɩ Moyisi DƖ wɩ:
2 «Abam wʋlʋ na tusi yɩ o nuŋi Baŋa-Wɛ kwaga nɩ dɩ o na ganɩ o doŋ te tɩn, kʋ tu na maŋɩ sɩ o kɩ te tɩn mʋ tɩntʋ.a Kʋʋ́ taa yɩ nɩnɛɛnɩ o na pini o doŋ woŋo mʋ o ya na kwe o pa‑o sɩ o taa niə, naa o na yɔɔrɩ o vrɩ o doŋ wǝǝnu, naa o na kɩ swan o gan‑o, 3 naa o na nɛ woŋo kʋlʋ na je tɩn yɩ o fɔ vwan nɩ o wʋ nɛ-ya, naa o na fɔgɩ vwan wǝǝnu tɩdonnǝ ŋwaanɩ pa o tusi nɩ nabiinǝ na yǝni ba tusi te maama tɩn. 4 Nɔɔnʋ na tusi kʋntʋ doŋ yɩ o maanɩ nɩ o lwarɩm dɩm wʋ o yuu nɩ, kʋ tu maŋɩ sɩ o joori o ŋwɩ kʋlʋ o na vrɩ tɩn o pa o doŋ wʋm mʋ. Kʋ na yɩ wǝǝnu tɩlʋ o na pini tɩn, naa jɩjɩgɩrʋ tɩlʋ o na vrɩ tɩn, naa wo-jiu kʋlʋ o na nɛ tɩn, 5 naa woŋo kʋlʋ o na fɔgɩ vwan kʋ baŋa nɩ tɩn, sɩ o joori o ŋwɩ tɩ maama ni nɩ, yɩ o ta wǝli kʋ səbu pʋpwara dɩdʋa pɔɔrɩm sɩnu maama wʋnɩ. O maa wʋ́ kɩ kʋntʋ mʋ o pa tɩ tu wʋm dɛ dɩm o na tu sɩ o kɩ o lwarɩm jɩnɩ kaanɩm dɩm tɩn. 6 Kʋ tu ta maŋɩ sɩ o ja pi-bɩa kalʋ na ba jɩgɩ gɛɛrɩ ka yɩra nɩ tɩn mʋ o ba o pa Baŋa-Wɛ sɩ o ma o ŋwɩ o lwarɩm jɩnɩ. Oó kwe pi-bɩa kam o kɩ Wɛ kaanɩm tu jɩŋa nɩ sɩ o ma o kɩ lwarɩm jɩnɩ kaanɩm dɩm. Ka səbu wʋ́ maŋɩ dɩ kʋlʋ na yɩ cɩga cɩga tɩn. 7 Kaanɩm tu wʋm wʋ́ tɔgɩ cwǝŋǝ kam kʋntʋ mʋ sɩ o lɩ nɔɔnʋ wʋm lwarɩm dɩm Baŋa-Wɛ yigə nɩ. Wɛ ta wʋ́ yagɩ lwarɩm yalʋ maama o na kɩ kʋntʋ doŋ tɩn DƖ ma cɛ-o.»
Wɛ kaanɩm tiinə bam tɩtʋŋa
Vara zwɛɛm kaanɩm
8 Baŋa-Wɛ ta ma ta dɩ Moyisi DƖ wɩ:
9 «Ta n brɩ Arɔn dɩ o bu-baara bam amʋ niə yantʋ wɩ: Zwɛɛm kaanɩm dɩm maŋɩ sɩ dɩ kɩ tɩntʋ mʋ. Ba na zwɛ varɩm wʋlʋ ba kaanɩ ba pa Wɛ tɩn maŋɩ sɩ o maŋɩ kaanɩm bimbim dɩm baŋa nɩ mʋ, sɩ o zwɛ tɩtɩɩ dɩm maama wʋnɩ sɩ tɩga laan ba ka pʋʋrɩ. Abam nan wʋ́ pa kaanɩm bimbim dɩm mim dɩm taa di taan mʋ. 10 Tɩga na pʋʋrɩ, kaanɩm tu wʋm wʋ́ zʋ o gwar-bwərə kam dɩ o gar-kuri-kukuə kam, ba na mɛ gar-fɩfalɩ ba sɔ-tɩ tɩn mʋ. O laan maa wʋ́ pɛ tɩntwarɩm dɩlʋ varɩm wʋm na zwɛ o daarɩ kaanɩm bimbim dɩm nɩ tɩn, sɩ o ta la-dɩ o tiŋi kaanɩm bimbim dɩm təŋə nɩ. 11 Kaanɩm tu wʋm laan maa wʋ́ lɔɔrɩ o zulə gwaarʋ tɩm o tiŋi o daarɩ o zʋ gwaarʋ tɩdonnǝ, yɩ o kwe tɩntwarɩm dɩm o ja o nuŋi ba tigisim jǝgǝ kam o vu o yi pwələ kalʋ ba na kwɛ Wɛ cullu tɩm seeni tɩn o lo o yagɩ dáanɩ.
12 Kaanɩm bimbim dɩm baŋa mim dɩm daɩ sɩ dɩ dwe. Zɩzɩŋa maama nɩ kaanɩm tu wʋm maŋɩ sɩ o wǝli dɛ mʋ mim dɩm nɩ sɩ dɩ taa di. O laan maa wʋ́ tigisi zwɛɛm kaanɩm varɩm wʋm mim dɩm baŋa nɩ, sɩ o daarɩ o zwɛ varɩm lara kalʋ na yɩ yazurə pɛɛrɩ ka pa Wɛ tɩn. 13 Mim dɩm maŋɩ sɩ dɩ taa di mʋ taan, sɩ dɩ yɩ dwe maŋa dɩ maŋa!
Wʋdiu pɛɛrɩ kaanɩm
14 Wʋdiu pɛɛrɩ kaanɩm dɩm maŋɩ sɩ dɩ kɩ tɩntʋ mʋ. Arɔn bu-baara bam mʋ wʋ́ ja pɛɛrɩ dɩm kʋntʋ ba vu kaanɩm bimbim dɩm yigə nɩ sɩ ba kwe-dɩ ba pa Baŋa-Wɛ. 15 Ba wʋlʋ na zɩgɩ sɩ o tʋŋɩ kaanɩm tɩtʋŋa tɩn maa wʋ́ zwɛ pɛɛrɩ dɩm muni dɩ nugə o ja-bɔŋɔ nɩ, o wǝli dɩ wǝǝnu tɩlʋ lwǝm na ywǝmmǝ tɩn maama. Oó kwe pɛɛrɩ dɩm pʋpwara kantʋ mʋ o zwɛ kaanɩm bimbim dɩm baŋa nɩ sɩ ka taa yɩ gulim pɛɛrɩ ka pa Wɛ. Pɛɛrɩ dɩm kʋntʋ lwəm maa ywəmmə dɩ paɩ Baŋa-Wɛ. 16 Wʋdiu kʋlʋ maama na daarɩ tɩn wʋ́ taa yɩ Arɔn dɩ o biə bam nyɩm mʋ. Baá di-kʋ Wɛ jero-vwe dɩm kʋnkɔlɔ nɩ mɛ na yɩ lanyɩranɩ fasɩ tɩn. 17 Ba maŋɩ sɩ ba kwe muni dɩm ba ma ba wɔ dɩpɛ, yɩ dabɩlɩ tǝri dɩ wʋnɩ. Bɛŋwaanɩ, pɛɛrɩ dɩm dɩ yɩ lanyɩranɩ fasɩ mʋ, nɩ lwarɩm saarɩm kaanɩm dɩm dɩ lwarɩm jɩnɩ kaanɩm dɩm dɩ na yɩ te tɩn. Baŋa-Wɛ pɔɔrɩ wʋdiu kʋm kʋntʋ DƖ wʋdiu pɛɛra yam wʋnɩ mʋ DƖ pa kaanɩm tiinə bam. 18 Arɔn digə kam baara maama mʋ jɩgɩ cwǝŋǝ sɩ ba di-kʋ. Ni dɩm kʋntʋ wʋ́ taa wʋra taan kʋ paɩ Arɔn dɩ o kwaga kam, sɩ ba wanɩ ba joŋi ba nyɩm Baŋa-Wɛ wʋdiu pɛɛra yam wʋnɩ.b Wʋlʋ maama nan na dwe wʋdiu kʋm kʋntʋ, kʋ tu dɩ pwɛ mʋ amʋ ŋwaanɩ.»
19 Baŋa-Wɛ ta ma ta Moyisi DƖ wɩ:
20 «Ba na lagɩ ba lo nugə Arɔn dwi dɩm nɔɔnʋ yuu nɩ sɩ ba tiŋ‑o sɩ o ji kaanɩm tu, dɛ dɩm kʋntʋ nɩ nɔɔnʋ wʋm wʋ́ ja mun-bwe bwɛn sɩle sɩ kʋ maŋɩ dɩ wʋdiu pɛɛrɩ dɩm na yǝni dɩ kɩ te tɩn mʋ o ba. O maa wʋ́ kwe muni dɩm bwaŋa dɩdʋa o ma o kɩ kaanɩm zɩzɩŋa nɩ, sɩ o daarɩ o ma bwaŋa dɩdʋa o ma o kɩ kaanɩm dɩdaan-ni nɩ. 21 O ta wʋ́ wǝli nugə mʋ muni dɩm nɩ, yɩ o daarɩ o kwarɩ-dɩ luu baŋa nɩ. O laan wʋ́ mumugi wʋdiu kʋm o ma kɩ wʋdiu pɛɛrɩ o pa Baŋa-Wɛ sɩ dɩ lwəm taa ywəmmə dɩ pa‑o. 22 Arɔn bu wʋlʋ ba na lagɩ ba tiŋ‑o sɩ o ji Wɛ kaanɩm nakwɩ tu tɩn tɩtɩ mʋ wʋ́ kwɛ wʋdiu pɛɛrɩ dɩntʋ doŋ. O maŋɩ sɩ o zwɛ pɛɛrɩ dɩm maama mʋ o ma kɩ kaanɩm, dɩ maama na yɩ Baŋa-Wɛ nyɩm tɩn ŋwaanɩ. Kǝm dɩm kʋntʋ wʋ́ taa wʋra mʋ wuu. 23 Muni pɛɛrɩ dɩlʋ Wɛ kaanɩm tu na yǝni o kɩ tɩn, kʋ daɩ sɩ o di wʋdiu kʋm dɩ fɩnfɩɩn dɩ. Kʋ fɩn sɩ o zwɛ kʋ maama mʋ kulə.»
Lwarɩm saarɩm kaanɩm
24 Baŋa-Wɛ ta ma ta Moyisi DƖ wɩ:
25 «Ta dɩ Arɔn dɩ o biə bam nɩ: Lwarɩm saarɩm kaanɩm dɩm maŋɩ sɩ dɩ kɩ tɩntʋ mʋ. Baá gʋ lwarɩm saarɩm varɩm wʋm ba pa Baŋa-Wɛ jǝgǝ kalʋ nɩ ba na yǝni ba gʋ zwɛɛm kaanɩm varɩm wʋm da tɩn mʋ.c Bɛŋwaanɩ, kaanɩm dɩm kʋntʋ tiini dɩ yɩ lanyɩranɩ fasɩ mʋ. 26 Kaanɩm tu wʋlʋ nan na kɩ kaanɩm dɩm kʋntʋ, oó di varɩm wʋm jero-vwe dɩm kʋnkɔlɔ kʋm nɩ mɛ na yɩ lanyɩranɩ fasɩ tɩn mʋ. 27 Kʋlʋ maama na dwe varɩm wʋm kʋntʋ, kʋ dɩ pwɛ mʋ amʋ ŋwaanɩ. Varɩm wʋm jana na taŋɩ gɔrɔ kʋlʋ, sɩ á maŋɩ je sɩlʋ na yɩ lanyɩranɩ fasɩ tɩn wʋnɩ á zarɩ-kʋ. 28 Ba na kwe dɔgɔ kambiə ba ma saŋɩ nwana yam, sɩ ba laan lɔ-ka. Kʋ nan na yɩ canna kambiə mʋ ba mɛ ba saŋɩ, sɩ ba fɔgɩ ba titigi-ka sɩ ka gɔ lanyɩranɩ, yɩ ba daarɩ ba seeri. 29 Baarʋ wʋlʋ maama na nuŋi kaanɩm tiinə dwi dɩm wʋnɩ tɩn jɩgɩ cwǝŋǝ sɩ o di lwarɩm saarɩm varɩm nwana yam mʋ. Ya nan tiini ya yɩ lanyɩranɩ fasɩ mʋ. 30 Kʋ daarɩ kʋ na yɩ lwarɩm saarɩm varɩm wʋlʋ jana ba na jaanɩ ba zʋ jero-vwe dɩm wʋnɩ sɩ ba lɩ lwarɩm Wɛ yigə nɩ tɩn, á ba jɩgɩ cwǝŋǝ sɩ á di varɩm wʋm kʋntʋ. Kʋ maŋɩ sɩ á zwɛ o maama á pa Baŋa-Wɛ mʋ.»