Lwarɩm saarɩm taanɩ
5
Abam wʋlʋ na nɛ kǝm dɩ o yi, naa o ni dɩ ŋwa, yɩ ba na bǝŋ-o sɩ o ba o pa maana, kʋ tu na vɩn sɩ o zaŋɩ o ta o brɩ cɩga kǝm dɩm kʋntʋ baŋa nɩ, o tusi mʋ. O maŋɩ sɩ o na waarɩm kʋ ŋwaanɩ.2 Abam wʋlʋ na dwe wo-tɩkʋ kʋlʋ na jɩgɩ digiru Wɛ cullu tɩm seeni tɩn, yɩ o na wʋ maanɩ kʋ ni nɩ, kʋ tu lwarɩm ta wʋ o yuu nɩ mʋ. Wo-tɩkʋ kʋm na yɩ ga-varɩm, naa sɔŋɔ varɩm, naa tɩga wo-vəlu, yɩ kʋ tu na dwe-kʋ, o digimi o tɩtɩ mʋ dɩ cullu tɩm.
3 Abam wʋlʋ ta na dwe woŋo kʋlʋ na nuŋi nabiinǝ yɩra yam nɩ yɩ kʋ digimi nɔɔna tɩn mʋ, kʋ na maŋɩ kʋ jɩgɩ digiru dwi dɩlʋ, kʋ tu ya na wʋ maanɩ yɩ o laan ba o lwarɩ kʋ ni nɩ, o lwarɩm ta wʋ o yuu nɩ mʋ.
4 Kʋ ta wǝli da, abam wʋlʋ na wʋ zuri o yɩra yɩ o du durə yɔɔ yɩranɩ, kʋ na yɩ o goni ni sɩ o kɩ tɩtʋŋ-laa naa tɩtʋŋ-balɔrɔ, kʋ tu tusi mʋ. O na dugi durə yɔɔ yɔɔ woŋo kʋlʋ maama ŋwaanɩ, nɩ o ya na maŋɩ o yǝri kʋ ni nɩ yɩ o laan ba o lwarɩ, kʋ tu lwarɩm wʋ o yuu nɩ mʋ.
5 Cwe sɩntʋ maama wʋnɩ mʋ, abam wʋlʋ na tu o maanɩ nɩ o sagɩ cwǝŋǝ, sɩ o ta o lwarɩm jaja Wɛ yigə nɩ. 6 Kʋ tu nan wʋ́ ja pi-kana naa bʋ-cʋa mʋ o ja o ba o kɩ lwarɩm saarɩm kaanɩm o pa Baŋa-Wɛ sɩ o ma o ŋwɩ o lwarɩm jɩnɩ. Kaanɩm tu wʋm maa wʋ́ kwe varɩm wʋm o ma o lɩ kʋ tu lwarɩm dɩm Wɛ yigə nɩ.
7 Wʋlʋ nan na warɩ varɩm o yi, sɩ kʋ tu ja kunkwənə bale, naa kunkwən-pulə bale o ba, sɩ o ma o ŋwɩ o lwarɩm jɩnɩ. Oó kwe zuŋə dɩdʋa o ma o kɩ lwarɩm saarɩm kaanɩm, sɩ dɩdʋa kam dɩ tʋŋɩ zwɛɛm kaanɩm. 8 Kʋ tu wʋ́ ja kunkwənə bam o vu o kɩ kaanɩm tu wʋm jɩŋa nɩ. Kaanɩm tu wʋm maa wʋ́ sɩŋɩ o kwe dɩdʋa o ma o kɩ lwarɩm saarɩm kaanɩm dɩm. O maŋɩ sɩ o bwəri ka ban mʋ sɩ o yɩ gwəri ka yuu. 9 O ta wʋ́ ma kan jana bam badonnǝ o miisi kaanɩm bimbim dɩm saŋa dɩdʋa nɩ. Jana balʋ na daarɩ tɩn, sɩ o lo ba maama o yagɩ kaanɩm bimbim dɩm təŋə nɩ. Kʋntʋ yɩ lwarɩm saarɩm kaanɩm dɩm mʋ. 10 O maa wʋ́ ma kunkwǝŋǝ kadoŋ kam o kɩ zwɛɛm kaanɩm dɩm, nɩnɛɛnɩ dɩ cwǝŋǝ kam na yɩ te tɩn. Kaanɩm tu wʋm maŋɩ sɩ o tɔgɩ kʋntʋ baŋa mʋ o ma lɩ nɔɔnʋ wʋm lwarɩm dɩm, sɩ Wɛ kwe kʋ tu tusim dɩm DƖ ma cɛ-o.
11 Nɔɔnʋ nan na ba jɩgɩ kunkwənə bale, naa kunkwən-pulə bale sɩ o ja o ba, kʋ tu nan wʋ́ ja mun-bwe bwɛn sɩlea o ja o ba o ma o kɩ lwarɩm saarɩm kaanɩm mʋ. O nan yɩ wǝli nugə naa wǝǝnu tɩlʋ lwǝm na ywǝmmǝ tɩn dɩ wʋnɩ, Bɛŋwaanɩ, kʋ yɩ lwarɩm saarɩm kaanɩm mʋ. 12 Kʋ tu wʋ́ ja muni dɩm o vu o kɩ kaanɩm tu wʋm jɩŋa nɩ. Kaanɩm tu wʋm wʋ́ zwɛ ja-guli-yi sɩ dɩ taa yɩ gulim pɛɛrɩ dɩ pa Wɛ mʋ. Oó zwɛ-dɩ kaanɩm bimbim dɩm baŋa nɩ o wǝli dɩ wʋdiu pɛɛra yadonnə na zwɛ ya paɩ Baŋa-Wɛ tɩn. Kʋntʋ yɩ lwarɩm saarɩm kaanɩm dɩm mʋ. 13 Kaanɩm tu wʋm wʋ́ tɔgɩ cwǝŋǝ kam kʋntʋ mʋ, sɩ o lɩ nɔɔnʋ wʋm lwarɩm dɩm Wɛ yigə nɩ, sɩ Wɛ dɩ yagɩ o tusim dɩm DƖ ma cɛ-o. Muni dɩlʋ maama na daarɩ, dɩ yɩ kaanɩm tu wʋm nyɩm mʋ, nɩnɛɛnɩ wʋdiu pɛɛrɩ na daarɩ, kʋ dɩ na yɩ o nyɩm te tɩn.»
Lwarɩm jɩnɩ kaanɩm
14 Baŋa-Wɛ ta ma ta dɩ Moyisi DƖ wɩ:
15 «Abam wʋlʋ maama na sagɩ cwǝŋǝ yɩ o na pini Baŋa-Wɛ wǝǝnu tɩlʋ na yɩ lanyɩranɩ fasɩ tɩn baŋa nɩ, yɩ o wʋ paalɩ o kɩ o tusi kʋntʋ, kʋ tu wʋ́ ja pi-bɩa kalʋ na ba jɩgɩ gɛɛrɩ ka yɩra nɩ tɩn mʋ o ja o ba o pa Baŋa-Wɛ sɩ o ŋwɩ o lwarɩm dɩm jɩnɩ. Pi-bɩa kam səbu wʋ́ maŋɩ dɩ səbu-poŋo tɩlʋ duuni na tɔgɩ digə kam maŋɩm lanyɩranɩ tɩn. Kʋntʋ yɩ lwarɩm jɩnɩ kaanɩm dɩm mʋ. 16 Kʋ tu ta wʋ́ joori o ŋwɩ o na pini Wɛ kʋlʋ baŋa nɩ tɩn jɩnɩ dɩm, sɩ o ta ŋwɩ jɩnɩ dɩm pʋpwara dɩdʋa sɩnu maama wʋnɩ o wǝli da. Oó ŋwɩ tɩntʋ maama o pa Wɛ kaanɩm tu wʋm, sɩ wʋntʋ laan kwe pi-bɩa kam o ma kɩ lwarɩm jɩnɩ kaanɩm sɩ o lɩ nɔɔnʋ wʋm lwarɩm dɩm Wɛ yigə nɩ. Wɛ maa wʋ́ yagɩ kʋ tu tusim dɩm DƖ ma cɛ-o.
17 Abam wʋlʋ na cɔgɩ o kɩ kʋlʋ na culi Baŋa-Wɛ ni dɩlʋ maama wʋnɩ tɩn, yɩ o ya na yǝri kʋ ni nɩ dɩ, kʋ tu tusim dɩm wʋ o yuu nɩ mʋ yɩ o maŋɩ sɩ o na waarɩm. 18 Kʋ tu nan maŋɩ sɩ o ja pəlbu kalʋ na ba jɩgɩ gɛɛrɩ ka yɩra nɩ tɩn mʋ o ja o ba o kɩ kaanɩm tu wʋm jɩŋa nɩ sɩ wʋntʋ ma o kɩ lwarɩm jɩnɩ kaanɩm. Varɩm wʋm səbu wʋ́ maŋɩ dɩ kʋlʋ na yɩ cɩga cɩga tɩn. Kʋ na kɩ kʋntʋ, kaanɩm tu wʋm wʋ́ lɩ nɔɔnʋ wʋm lwarɩm dɩm Wɛ yigə nɩ, dɩ o na tusi yɩ o wʋ paalɩ o kɩ te tɩn. Wɛ maa wʋ́ yagɩ kʋ tu tusim dɩm DƖ ma cɛ-o.
19 Kʋntʋ yɩ lwarɩm jɩnɩ kaanɩm mʋ, kʋ tu na cɔgɩ Baŋa-Wɛ yigə nɩ pa o lwarɩm wʋ o yuu nɩ tɩn ŋwaanɩ.»