Lwarɩm saarɩm kaanɩm
4
Baŋa-Wɛ laan ma ta dɩ Moyisi DƖ wɩ:2 «Ta dɩ Yisɩrayɛlɩ tiinə bam nɩ: Abam wʋlʋ na kɩ woŋo kʋlʋ Baŋa-Wɛ niə yam na brɩ nɩ kʋ culi tɩn, yɩ kʋ tu na wʋ paalɩ o kɩ o tusi mʋ, pa-na sɩ o kɩ tɩntʋ:
3 Wɛ kaanɩm tiinə yigə tu wʋm mʋ na kɩ o tusi kʋntʋ doŋ, pa o lwarɩm jɩnɩ ba nɔɔna bam maama yuu nɩ, oó ja na-bɩa kalʋ na ba jɩgɩ gɛɛrɩ tɩn mʋ o ba sɩ o ma o kɩ lwarɩm saarɩm kaanɩm o pa Baŋa-Wɛ. 4 O maŋɩ sɩ o ja na-bɩa kam mʋ o ja o ba jero-vwe dɩm ni nɩ sɩ o jeeri Baŋa-Wɛ yigə nɩ. O laan wʋ́ kwe o jɩŋa o daŋɩ ka yuu nɩ, sɩ o daarɩ o go ka ban dáanɩ. 5 Kaanɩm tiinə yigə tu wʋm maa wʋ́ lo na-bɩa kam jana badonnǝ o kɩ zʋŋa nɩ o ja o zʋ jero-vwe dɩm wʋnɩ. 6 O laan maa wʋ́ kwe o nʋa o laŋɩ jana bam, yɩ o miisi jana bam sɩ kʋ jeeri gar-jalɩ dɩlʋ na lǝgi dɩ cɩ Wɛ-di-laa cɩga cɩga kam tɩn.a O maŋɩ sɩ o kɩ kʋntʋ Baŋa-Wɛ yigə nɩ kuni bɩrpɛ mʋ. 7 O ta wʋ́ ma jana bam o taagɩ wo-talooru zwɛɛm bimbim na wʋ jero-vwe dɩm nɩ yɩ dɩ zɩgɩ Baŋa-Wɛ yigə nɩ tɩn, dɩ nyɩa yana yam seeni.b Jana balʋ laan na daarɩ tɩn mʋ, oó ja-ba o vu o zɩgɩ jəro-vwe ni dɩm nɩ yɩ o daarɩ o lo-ba zwɛɛm kaanɩm bimbim dɩm təŋə nɩ. 8 Kaanɩm tiinə yigə tu wʋm laan maŋɩ sɩ o lɩ lwarɩm saarɩm na-bɩa kam lara kam maama, dɩ lara kalʋ na məəli ka wʋ-zɩla yam yɩra nɩ tɩn dɩ mʋ. 9 O ta wʋ́ lɩ ka tapwal-biə bale bam dɩ lara kalʋ na məəli da tɩn, dɩ cwɛ dɩm kuri seeni o wǝli da. 10 O na wʋ́ lɩ wǝǝnu tɩm kʋntʋ tɩn yɩ bɩdwɩ dɩ o na yǝni o kɩ tɩte dɩ na-bɩa kalʋ nɔɔnʋ na jaanɩ o ba sɩ o ma kɩ yazurə pɛɛrɩ o pa Wɛ tɩn. O laan maa wʋ́ zwɛ tɩ maama zwɛɛm kaanɩm bimbim dɩm baŋa nɩ. 11 Kʋ na daarɩ na-bɩa kam tankɔlɔ kʋm, dɩ ka nwana yam, dɩ ka yuu kʋm, dɩ ka nɛ sɩm, dɩ ka wʋ-zɩla yam, dɩ ka lʋrʋ tɩm, 12 kaanɩm tiinə yigə tu wʋm maŋɩ sɩ o kwe tɩ maama na daarɩ tɩn o ja nuŋi ba tigisim jǝgǝ kam o yi dáa dáa. Je sɩm kʋntʋ wʋ́ taa yɩ pwələ kalʋ ba na kwɛ Wɛ cullu tɩm ŋwaanɩ yɩ ba dʋlɩ zwɛɛm kaanɩm tɩntwarɩm da tɩn. Oó kwe tɩntʋ maama o ja o vu dáanɩ o zwɛ dɛ sɩlʋ na jɩgɩ mim tɩn baŋa nɩ, ba na tiŋi tɩntwarɩm mɛ tɩn.
13 Kʋ nan na yɩ Yisɩrayɛlɩ tiinə kɔ-fɔrɔ kʋm maama na kɩ ba tusi Wɛ yigə nɩ, yɩ ba wʋ paalɩ ba kɩ, ba ta wʋ́ ga ba bʋra mʋ, ba na kɩ kʋlʋ Baŋa-Wɛ niə yam na brɩ nɩ kʋ culi tɩn ŋwaanɩ, dɩ ba na maŋɩ ba wʋ lwarɩ nɩ ba tusi mʋ dɩ. 14 Ba na tu ba maanɩ ba tusim dɩm ni nɩ, kʋ maŋɩ sɩ ba ja na-bɩa mʋ ba ba sɩ ba ma kɩ lwarɩm saarɩm kaanɩm ba pa Wɛ. Baá kwe-ka ba ja ba vu jero-vwe dɩm yigə nɩ. 15 Yisɩrayɛlɩ nakwa bam maa wʋ́ vu Baŋa-Wɛ yigə nɩ ba kwe ba jɩan ba daŋɩ na-bɩa kam yuu nɩ, yɩ ba dɩdʋa goni ka ban o gʋ. 16 Kaanɩm tiinə yigə tu wʋm maa wʋ́ lo na-bɩa kam jana badonnǝ o kɩ zʋŋa nɩ o ja o zʋ jero-vwe dɩm wʋnɩ. 17 O laan maa wʋ́ kwe o nʋa o laŋɩ jana bam, yɩ o miisi jana bam sɩ kʋ jeeri Wɛ di-laa kʋm gar-jalɩ dɩm. O maŋɩ sɩ o kɩ kʋntʋ Baŋa-Wɛ yigə nɩ kuni bɩrpɛ mʋ. 18 O ta wʋ́ ma jana bam o taagɩ wo-talooru zwɛɛm bimbim dɩlʋ na wʋ jero-vwe dɩm nɩ yɩ dɩ zɩgɩ Baŋa-Wɛ yigə nɩ tɩn, dɩ nyɩa yana yam seeni. Jana balʋ laan na daarɩ tɩn mʋ, oó ja-ba o vu o zɩgɩ jəro-vwe ni dɩm nɩ yɩ o daarɩ o lo-ba zwɛɛm kaanɩm bimbim dɩm təŋə nɩ. 19 Kaanɩm tiinə yigə tu wʋm ta wʋ́ lɔɔnɩ na-bɩa kam lara maama mʋ, yɩ o daarɩ o zwɛ-ka kaanɩm bimbim dɩm baŋa nɩ. 20 O na yǝni o kɩ tɩte dɩ na-bɩa kalʋ o na zwɛ o tɩtɩ lwarɩm saarɩm ŋwaanɩ tɩn mʋ, o ta wʋ́ kɩ kʋntʋ doŋ dɩ na-bɩa kam kʋntʋ. Kaanɩm tu wʋm wʋ́ da cwǝŋǝ kam kʋntʋ o ma lɩ nɔɔna bam lwarɩm sɩ Wɛ dɩ kwe ba tusim dɩm DƖ yagɩ DƖ ma cɛ-ba. 21 O ta maŋɩ sɩ o kwe na-bɩa kam o ja o nuŋi ba tigisim jǝgǝ kam o vu dáa dáa, yɩ o daarɩ o zwɛ-ka, nɩnɛɛnɩ o na kɩ te dɩ na-bɩa kakam kam tɩn. Kʋ maa yɩ lwarɩm saarɩm kaanɩm mʋ kʋ paɩ Yisɩrayɛlɩ nɔn-kɔgɔ kʋm maama.
22 Yigǝ tiinǝ bam wʋnɩ dɩdʋa na kɩ o tusi Wɛ yigə nɩ, yɩ o wʋ paalɩ o kɩ, o ta wʋ́ ga o bʋra mʋ, o na kɩ kʋlʋ o Tu Baŋa-Wɛ niə yam na brɩ nɩ kʋ culi tɩn ŋwaanɩ. 23 Ba na pɛ o maanɩ nɩ o sagɩ cwǝŋǝ, sɩ o ja bʋ-bala kalʋ na ba jɩgɩ gɛɛrɩ tɩn o ba o kɩ kaanɩm. 24 O maŋɩ sɩ o kwe o jɩŋa mʋ o daŋɩ ka yuu nɩ, sɩ o laan goni ka ban o gʋ. Oó kɩ kʋntʋ kʋ maŋɩ dɩ jǝgǝ kalʋ ba na yǝni ba gʋɩ zwɛɛm kaanɩm vara bam Baŋa-Wɛ yigə nɩ tɩn mʋ. Nɔɔnʋ wʋm kaanɩm dɩm kʋntʋ yɩ lwarɩm saarɩm kaanɩm mʋ. 25 Kaanɩm tu wʋm laan maa wʋ́ dɩ o nʋa bʋŋʋ kʋm jana nɩ, sɩ o ma jana bam o taagɩ zwɛɛm kaanɩm bimbim dɩm nyɩa yana yam. Jana balʋ na daarɩ tɩn maŋɩ sɩ o lo-ba zwɛɛm kaanɩm bimbim dɩm təŋə nɩ mʋ. 26 Sɩ kʋ na yɩ varɩm wʋm lara kam maama, o maŋɩ sɩ o zwɛ ka maama mʋ kaanɩm bimbim dɩm baŋa nɩ, nɩnɛɛnɩ o na zwɛ lara o ma kɩ yazurə pɛɛrɩ dɩm te tɩn. Kaanɩm tu wʋm wʋ́ da cwǝŋǝ kam kʋntʋ mʋ o ma lɩ nɔɔnʋ wʋm lwarɩm, sɩ Wɛ dɩ kwe o tusim dɩm DƖ ma cɛ-o.
27 Á kɔgɔ kʋm wʋnɩ nɔɔnʋ dɩ nɔɔnʋ na kɩ o tusi Wɛ yigə, yɩ o wʋ paalɩ o kɩ, o ta wʋ́ ga o bʋra mʋ, o na kɩ kʋlʋ Baŋa-Wɛ niə yam na brɩ nɩ kʋ culi tɩn ŋwaanɩ. 28 Ba na pɛ o maanɩ o tusim dɩm ni nɩ, sɩ o ja pi-bala kalʋ na ba jɩgɩ gɛɛrɩ ka yɩra nɩ tɩn o ba o kɩ kaanɩm o lwarɩm dɩm ŋwaanɩ. 29 O maŋɩ sɩ o kwe o jɩŋa mʋ o daŋɩ ka yuu nɩ, sɩ o laan goni ka ban, jǝgǝ kalʋ ba na yǝni ba gʋɩ zwɛɛm kaanɩm vara bam da tɩn. 30 Kaanɩm tu wʋm laan maa wʋ́ dɩ o nʋa bʋŋʋ kʋm jana nɩ, sɩ o ma jana bam o taagɩ zwɛɛm kaanɩm bimbim dɩm nyɩa yana yam. Jana balʋ na daarɩ tɩn maŋɩ sɩ o lo-ba zwɛɛm kaanɩm bimbim dɩm təŋə nɩ mʋ. 31 O ta maŋɩ sɩ o lɔɔnɩ kʋ lara kam mʋ, nɩnɛɛnɩ o na kɩ te dɩdaanɩ yazurə pɛɛrɩ varɩm lara kam tɩn. O ta wʋ́ zwɛ lara kam kaanɩm bimbim dɩm baŋa nɩ sɩ ka lwəm taa ywəmmə kʋ paɩ Baŋa-Wɛ. Kaanɩm tu wʋm wʋ́ da cwǝŋǝ kam kʋntʋ o ma lɩ nɔɔnʋ wʋm lwarɩm, sɩ Wɛ dɩ kwe o tusim dɩm DƖ ma cɛ-o.
32 Nɔɔnʋ nan na kuri piə o ma o kɩ lwarɩm kaanɩm, kʋ tu wʋ́ ja pəlbu mʋ na ba jɩgɩ gɛɛrɩ ka yɩra nɩ tɩn o ja o ba. 33 O laan maa wʋ́ kwe o jɩŋa o daŋɩ piə kam yuu nɩ, yɩ o daarɩ o go ka ban sɩ kʋ taa yɩ lwarɩm saarɩm kaanɩm. Oó kɩ kʋntʋ jǝgǝ kalʋ ba na yǝni ba gʋɩ zwɛɛm kaanɩm vara bam da tɩn. 34 Kaanɩm tu wʋm laan maa wʋ́ dɩ o nʋa bʋŋʋ kʋm jana nɩ, sɩ o ma jana bam o taagɩ zwɛɛm kaanɩm bimbim dɩm nyɩa yana yam. Jana balʋ na daarɩ tɩn maŋɩ sɩ o lo-ba zwɛɛm kaanɩm bimbim dɩm təŋə nɩ mʋ. 35 O ta maŋɩ sɩ o lɔɔnɩ piə kam lara kam mʋ, nɩnɛɛnɩ o na kɩ te dɩdaanɩ yazurə pɛɛrɩ piə lara kam tɩn. O ta wʋ́ kwe lara kam o daŋɩ Baŋa-Wɛ pɛɛra yadonnə yam baŋa nɩ o daarɩ o zwɛ-ka kaanɩm bimbim dɩm baŋa nɩ. Kaanɩm tu wʋm wʋ́ da cwǝŋǝ kam kʋntʋ o ma lɩ lwarɩm dɩlʋ nɔɔnʋ wʋm na kɩ tɩn, sɩ Wɛ dɩ kwe o tusim dɩm DƖ ma cɛ-o.