Yazurə pɛɛrɩ kaanɩm
3
Abam wʋlʋ na bʋŋɩ sɩ o kɩ yazurə pɛɛrɩ o kaanɩ o pa Baŋa-Wɛ, yɩ kʋ tu na kuri na-bɩa, naa nacʋa o vara bam wʋnɩ, kʋʋ́ taa yɩ kalʋ na ba jɩgɩ gɛɛrɩ ka yɩra nɩ tɩn mʋ. 2 Kʋ tu laan maa wʋ́ kwe o jɩŋa o daŋɩ varɩm wʋm yuu nɩ yɩ o daarɩ o go varɩm wʋm ban jero-vwe dɩm ni dɩm nɩ. Arɔn dwi dɩm kaanɩm tiinə bam maa wʋ́ kwe varɩm wʋm jana bam ba miisi miisi kaanɩm bimbim dɩm sɛn sɩna sɩm yɩra nɩ. 3 Nɔɔnʋ wʋm wʋ́ lɩ o yazurə pɛɛrɩ dɩm wʋnɩ kʋlʋ na wʋ́ taa yɩ pɛɛrɩ kʋ paɩ Baŋa-Wɛ tɩn. Kʋ maa wʋ́ taa yɩ lara kalʋ na məəli varɩm wʋm wʋ-zɩla yam yɩra nɩ tɩn maama, 4 dɩdaanɩ o tapwal-biə bale bam dɩ lara kalʋ na məəli da tɩn mʋ. O ta wʋ́ lɩ cwɛ dɩm kuri seeni mʋ o wǝli da. 5 Kaanɩm tiinə bam laan maa wʋ́ kwe wǝǝnu tɩm kʋntʋ maama ba ja vu ba tiŋi kaanɩm bimbim dɩm baŋa nɩ ba zwɛ-tɩ ba wǝli dɩ zwɛɛm pɛɛrɩ dɩlʋ na maŋɩ dɩ wʋra mim nɩ tɩn. Pɛɛrɩ dɩm kʋntʋ lwəm maa ywəmmə kʋ paɩ Baŋa-Wɛ.6 Nɔɔnʋ nan ta wʋ́ wanɩ o ma piə, naa bʋŋʋ sɩ o ma o kɩ yazurə pɛɛrɩ o pa Baŋa-Wɛ. Kʋ waɩ kʋ yɩ wo-bala naa wo-kana kalʋ na ba jɩgɩ gɛɛrɩ ka yɩra nɩ tɩn. 7 Kʋ na yɩ piə mʋ nɔɔnʋ wʋm jaanɩ o ba, sɩ o ja-ka o jeeri Baŋa-Wɛ yigə nɩ. 8 O laan maa wʋ́ kwe o jɩŋa o daŋɩ ka yuu nɩ yɩ o daarɩ o go varɩm wʋm ban jero-vwe dɩm yigə nɩ. Arɔn biə bam laan maa wʋ́ kwe varɩm wʋm jana bam ba miisi miisi kaanɩm bimbim dɩm sɛn sɩna sɩm yɩra nɩ. 9 Nɔɔnʋ wʋm wʋ́ lɩ o yazurə pɛɛrɩ dɩm wʋnɩ kʋlʋ na wʋ́ taa yɩ pɛɛrɩ kʋ paɩ Baŋa-Wɛ tɩn. Kʋ maa wʋ́ taa yɩ varɩm wʋm lara kam maama, dɩ lara kalʋ na məəli o wʋ-zɩla yam yɩra nɩ tɩn dɩ. Ba maŋɩ sɩ ba goni o nabili dɩm tɩtarɩ kuə kam seeni, sɩ ba lɩ nabili-bogo kʋm dɩ kʋ lara kam. 10 Ba ta wʋ́ lɩ varɩm wʋm tapwal-biə bale bam dɩ lara kalʋ na məəli da tɩn, dɩ cwɛ dɩm kuri seeni ba wǝli da. 11 Kaanɩm tu wʋm laan wʋ́ kwe-tɩ o ja o vu o zwɛ kaanɩm bimbim dɩm baŋa nɩ, sɩ kʋ taa yɩ nwana mʋ na yɩ pɛɛra ya paɩ Baŋa-Wɛ.
12 Kʋ nan na yɩ bʋŋʋ mʋ nɔɔnʋ jaanɩ o ba sɩ o ma o kɩ pɛɛrɩ dɩm kʋntʋ o pa Baŋa-Wɛ, 13 kʋ tu wʋ́ kwe o jɩŋa mʋ o daŋɩ kʋ yuu nɩ, yɩ o daarɩ o go kʋ ba jero-vwe dɩm yigə nɩ. Arɔn biə bam maa wʋ́ kwe bʋŋʋ kʋm jana bam ba miisi miisi kaanɩm bimbim dɩm sɛn sɩna sɩm maama yɩra nɩ. 14 Nɔɔnʋ wʋm wʋ́ lɩ o pɛɛrɩ dɩm wʋnɩ kʋlʋ na wʋ́ taa yɩ pɛɛrɩ kʋ paɩ Baŋa-Wɛ tɩn. Kʋ nan yɩ lara kalʋ na məəli bʋŋʋ kʋm wʋ-zɩla yam yɩra nɩ tɩn mʋ, 15 dɩdaanɩ kʋ tapwal-biə bale bam dɩ lara kalʋ na məəli da tɩn. O ta wʋ́ lɩ cwɛ dɩm kuri seeni mʋ o wǝli da. 16 Kaanɩm tu wʋm laan maa wʋ́ kwe-tɩ o ja o vu o zwɛ kaanɩm bimbim dɩm baŋa nɩ, sɩ kʋ taa yɩ wʋdiu na yɩ pɛɛrɩ kʋ paɩ Baŋa-Wɛ tɩn. Pɛɛrɩ dɩm kʋntʋ lwəm maa ywəmmə kʋ paɩ Baŋa-Wɛ.