Wʋdiu pɛɛrɩ kaanɩm
2
Abam wʋlʋ na bʋŋɩ sɩ o ja muni pɛɛrɩ o ba sɩ o kaanɩ o pa Baŋa-Wɛ, kʋ tu maŋɩ sɩ o beeri mun-bwe dɩlʋ na lamma lanyɩranɩ tɩn. Oó lo Olivi nugə dɩ baŋa nɩ, sɩ o daarɩ o wǝli wǝǝnu tɩlʋ lwǝm na ywǝmmǝ tɩn da. 2 O laan maa wʋ́ ja o pɛɛrɩ dɩm o vu Arɔn dwi dɩm kaanɩm tiinə bam te. Ba dɩdʋa mʋ wʋ́ zwɛ muni dɩm na gwaanɩ dɩ nugə tɩn, dɩ wǝǝnu tɩlʋ lwǝm na ywǝmmǝ tɩn maama o kɩ o ja-bɔŋɔ nɩ. O laan wʋ́ zwɛ pɛɛrɩ dɩm pʋpwara kantʋ mʋ kaanɩm bimbim dɩm baŋa nɩ sɩ ka taa yɩ gulim pɛɛrɩ ka pa Wɛ. Pɛɛrɩ dɩm kʋntʋ lwəm maa ywəmmə dɩ paɩ Baŋa-Wɛ. 3 Muni pɛɛrɩ dɩlʋ ta na daarɩ tɩn wʋ́ taa yɩ Arɔn dɩ o biə bam nyɩm mʋ. Dɩ maa tiini dɩ yɩ lanyɩranɩ fasɩ mʋ, dɩ na nuŋi Baŋa-Wɛ wʋdiu pɛɛra yam wʋnɩ tɩn ŋwaanɩ.4 Abam wʋlʋ nan na bʋŋɩ sɩ o wɔ dɩpɛ kurə wʋnɩ sɩ o kwe o ma kɩ kaanɩm dɩntʋ doŋ, kʋ tu maŋɩ sɩ o kwe mun-bwe dɩlʋ na tiini dɩ lamma lanyɩranɩ, yɩ dabɩlɩ wʋ wǝli da tɩn. O waɩ o gwaanɩ muni dɩm dɩ nugə o ma kɩ dɩpɛ dɩm, naa sɩ o kwe muni dɩm o ma wɔ dɩpɛ dɩlʋ na ba jɩgɩ dabɩlɩ dɩ wʋnɩ tɩn o daarɩ o ma nugə o taagɩ taagɩ dɩ maama. 5 Kʋ tu nan na lagɩ sɩ o wɔ dɩpɛ dɩm luu baŋa nɩ, sɩ o kwe mun-bwe dɩlʋ na tiini dɩ lamma lanyɩranɩ tɩn o ma kɩ wʋdiu pɛɛrɩ dɩm kʋntʋ. Oó wǝli nugə da, sɩ o yɩ pa dabɩlɩ wǝli dɩ wʋnɩ. 6 Kʋ kwaga nɩ, oó fɔ-dɩ mɩna-mɩna mʋ, yɩ o daarɩ o lo nugə kʋ baŋa nɩ, sɩ kʋ taa yɩ wʋdiu pɛɛrɩ. 7 Kʋ tu nan na saŋɩ o wʋdiu pɛɛrɩ dɩm kambiə wʋnɩ, sɩ o kwe mun-bwe dɩlʋ na tiini dɩ lamma lanyɩranɩ tɩn, yɩ o wǝli nugə dɩ wʋnɩ.
8 Nmʋ na mɛ wǝǝnu tɩm kʋntʋ n kɩ wʋdiu pɛɛrɩ dɩm sɩ n kaanɩ n pa Baŋa-Wɛ, n laan wʋ́ ja-dɩ n vu n pa Wɛ kaanɩm tu wʋm. Wʋntʋ dɩ laan wʋ́ ja-dɩ o vu kaanɩm bimbim dɩm təŋə. 9 Oó kwe pɛɛrɩ dɩm o pɔɔrɩ pʋpwara kadoŋ sɩ ka taa yɩ gulim pɛɛrɩ ka pa Wɛ, yɩ o zwɛ-ka kaanɩm bimbim dɩm baŋa nɩ. Pɛɛrɩ dɩm kʋntʋ lwəm maa ywəmmə dɩ paɩ Baŋa-Wɛ. 10 Wʋdiu pɛɛrɩ dɩlʋ ta na daarɩ tɩn wʋ́ taa yɩ Arɔn dɩ o biə bam nyɩm mʋ. Dɩ maa tiini dɩ yɩ lanyɩranɩ fasɩ mʋ, dɩ na nuŋi Baŋa-Wɛ wʋdiu pɛɛra yam wʋnɩ tɩn ŋwaanɩ.
11 Abam wʋlʋ na lagɩ sɩ o kwe wʋdiu pɛɛrɩ o kaanɩ o pa Baŋa-Wɛ, sɩ o yɩ wǝli dabɩlɩ dɩ wʋnɩ. Bɛŋwaanɩ, dabɩlɩ dɩdaanɩ tʋʋrʋ daɩ sɩ abam ma-tɩ á zwɛ á kɩ pɛɛrɩ á pa Baŋa-Wɛ. 12 Kʋ tu nan na lagɩ sɩ o kwe wʋdiiru tɩlʋ na loori yigə tɩ kɩ tɩn o pa Baŋa-Wɛ, o jɩgɩ cwǝŋǝ sɩ o wǝli dabɩlɩ dɩ tʋʋrʋ tɩ wʋnɩ. Kʋ nan daɩ sɩ á kwe wǝǝnu tɩm kʋntʋ á zwɛ kaanɩm bimbim dɩm baŋa nɩ sɩ tɩ lwəm taa ywəmmə. 13 Á nan maŋɩ sɩ á wǝli yɛ á wʋdiu pɛɛra yam maama wʋnɩ. Bɛŋwaanɩ, yɛ dɩm zɩgɩ dɩ paɩ ni-gonim dɩlʋ Wɛ na kɩ dɩ abam tɩn mʋ. Kʋntʋ ŋwaanɩ, yǝni á zɩzagɩ yɛ á wʋdiu pɛɛra yam wʋnɩ.
14 Abam wʋlʋ nan na bʋŋɩ sɩ o kwe o kara wʋdiu kʋlʋ na dɛ yigə kʋ kɩ tɩn o pa Baŋa-Wɛ, sɩ kʋ tu kwe kʋ biə o nɔ kʋ wʋdi-dʋŋʋ maŋa nɩ yɩ o daarɩ o wɔ dɩ mim. 15 O ta wʋ́ gwaanɩ nugə kʋ wʋnɩ o daarɩ o kwe wǝǝnu tɩlʋ lwǝm na ywǝmmǝ tɩn o wǝli da, sɩ kʋ taa yɩ wʋdiu pɛɛrɩ mʋ. 16 Kaanɩm tu laan maa wʋ́ pɔɔrɩ gulim pɛɛrɩ pʋpwara kʋ wʋnɩ sɩ o kwe o zwɛ o pa Wɛ. Mɩn-biə bam cicoro dɩ nugə kam cicoro dɩdaanɩ wǝǝnu tɩlʋ lwǝm na ywǝmmǝ tɩn maama mʋ o maŋɩ sɩ o kwe o zwɛ kʋntʋ, kʋ na yɩ wʋdiu pɛɛrɩ mʋ kʋ paɩ Baŋa-Wɛ tɩn ŋwaanɩ.