Cullu Tɔnɔ
Zwɛɛm pɛɛrɩ kaanɩm
1
Baŋa-Wɛ dɛɛn zɩgɩ jero-vwe dɩm nɩ mʋa DƖ bəŋi Moyisi, yɩ DƖ ta dɩd-o DƖ wɩ: 2 «Ta dɩ Yisɩrayɛlɩ tiinə bam nɩ:Abam wʋlʋ na yǝni o bʋŋɩ sɩ o ja pɛɛra o ba o kaanɩ o pa Baŋa-Wɛ, sɩ o lɩ o sɔŋɔ vara bam wʋnɩ o ja o ba.
3 Wʋlʋ na kuri sɩ o kwe naa o ma o kɩ zwɛɛm kaanɩm, sɩ o nii o naanɩ dɩm wʋnɩ o lɩ na-bɩa kalʋ na ba jɩgɩ gɛɛrɩ ka yɩra nɩ tɩn o ja o ba. Kʋ tu laan maa wʋ́ ja-ka o vu o zɩgɩ jəro-vwe ni dɩm nɩ, sɩ Baŋa-Wɛ laan sɛ sɩ o joŋi-kab. 4 Kʋ tu ta wʋ́ kwe o jɩŋa mʋ o daŋɩ na-bɩa kam yuu nɩ sɩ kʋ brɩ nɩ varɩm wʋm ləri o yuu nɩ mʋ, sɩ Wɛ wanɩ DƖ saarɩ o lwarɩm dɩm DƖ yagɩ.c 5 O laan maa wʋ́ goni na-bɩa kam ba Baŋa-Wɛ yigə nɩ, sɩ Arɔn dwi dɩm na yɩ kaanɩm tiinə tɩn dɩ laan kwe ka jana bam ba ja vu ba miisi miisi kaanɩm bimbim dɩm na wʋ jəro-vwe ni dɩm nɩ tɩn sɛn sɩna sɩm yɩra nɩ. 6 Kʋ tu ta wʋ́ pwəni varɩm wʋm mʋ sɩ o daarɩ o ca o nwana yam mugə-mugə. 7 Kaanɩm tiinə bam dɩ maa wʋ́ tarɩgɩ mim kaanɩm bimbim dɩm baŋa nɩ, yɩ ba daarɩ ba tigisi dɛ ba daŋɩ mim dɩm baŋa nɩ. 8 Ba ta wʋ́ kwe varɩm wʋm nwana, dɩ o yuu, dɩ o lara kam maama ba daŋɩ dɛ sɩm na jɩgɩ mim tɩn baŋa nɩ mʋ. 9 Kʋ nan na yɩ varɩm wʋm nɛ sɩm, dɩ o lʋrʋ tɩm, sɩ kʋ tu zarɩ tɩntʋ yigə sɩ kaanɩm tu wʋm laan zwɛ tɩ maama kulə kaanɩm bimbim dɩm baŋa nɩ. Pɛɛrɩ dɩm kʋntʋ yɩ zwɛɛm kaanɩm mʋ. Dɩ lwəm maa ywəmmə dɩ paɩ Baŋa-Wɛ.
10 Kʋ nan na yɩ piə, naa bʋŋʋ mʋ kʋ tu kuri sɩ o ma o kɩ zwɛɛm kaanɩm, sɩ o lɩ pi-bɩa naa bʋbɔlɔ o vara bam wʋnɩ, yɩ gɛɛrɩ tǝri ka yɩra nɩ. 11 O laan maa wʋ́ ja varɩm wʋm o vu kaanɩm bimbim dɩm saŋa kalʋ na jeeri jazɩm baŋa seeni tɩn o gʋ-o Baŋa-Wɛ yigə nɩ. Kaanɩm tiinə bam dɩ maa wʋ́ kwe varɩm wʋm jana bam ba miisi miisi kaanɩm bimbim dɩm sɛn sɩna sɩm yɩra nɩ. 12 Nɔɔnʋ wʋm ta wʋ́ ca varɩm wʋm nwana yam mugə-mugə, sɩ kaanɩm tu wʋm kwe o nwana yam, dɩ o yuu, dɩ o lara maama o daŋɩ dɛ sɩlʋ na jɩgɩ mim yɩ sɩ wʋ kaanɩm bimbim dɩm baŋa nɩ tɩn nɩ. 13 Kʋ nan na yɩ varɩm wʋm nɛ sɩm, dɩ o lʋrʋ tɩm, sɩ kʋ tu zarɩ tɩntʋ yigə sɩ kaanɩm tu wʋm laan zwɛ tɩ maama kulə kaanɩm bimbim dɩm baŋa nɩ. Pɛɛrɩ dɩm kʋntʋ yɩ zwɛɛm kaanɩm mʋ. Dɩ lwəm maa ywəmmə dɩ paɩ Baŋa-Wɛ.
14 Kʋ nan na yɩ zunə dwi dɩm mʋ kʋ tu kuri sɩ o ma kɩ zwɛɛm kaanɩm o pa Baŋa-Wɛ, sɩ o kwe kunkwǝŋǝ, naa kunkwən-pulə o ma o tʋŋɩ. 15 Kaanɩm tu wʋm mʋ wʋ́ ja-ka o yi kaanɩm bimbim dɩm je sɩm sɩ o jujugi ka yuu o gwəri yɩ o daarɩ o zwɛ ka yuu kʋm kaanɩm bimbim dɩm baŋa nɩ. O daarɩ o pa jana duri Wɛ kaanɩm bimbim dɩm sapala yam nɩ. 16 O ta wʋ́ lɩ ka fwɛɛlɩ dɩm dɩ kʋlʋ maama na wʋ kʋ wʋnɩ tɩn, yɩ o daarɩ o dʋlɩ-tɩ o yagɩ kaanɩm bimbim dɩm saŋa kalʋ na jeeri wa-puli seeni tɩn nɩ, tɩntwarɩm na tiŋi mɛ tɩn. 17 Kaanɩm tu wʋm ta wʋ́ ja kunkwǝŋǝ kam mʋ ka vwana seeni o kaarɩ bɩle sɩ ka yɩ tʋrɩ. O maa wʋ́ kwe-ka o zwɛ dɛ sɩm na jɩgɩ mim yɩ sɩ wʋ kaanɩm bimbim dɩm baŋa nɩ tɩn. Pɛɛrɩ dɩm kʋntʋ yɩ zwɛɛm kaanɩm mʋ. Dɩ lwəm maa ywəmmə dɩ paɩ Baŋa-Wɛ.