Kaanɩm tiinə dɩ ba tɩtʋŋa yam taanɩ
29
«Nmʋ na wʋ́ kɩ te sɩ n kwɛ Arɔn dɩ o biə bam amʋ ŋwaanɩ pa ba taa yɩ amʋ kaanɩm tiinə tɩn mʋ tɩntʋ:Lagɩ-na na-bɩa dɩdaanɩ pi-bɛ sɩle sɩlʋ na ba jɩgɩ gɛɛrɩ sɩ yɩra nɩ tɩn. 2 Nan ta lagɩ-na mun-bwe sɩ á ma á kɩ dɩpɛ dɩlʋ dabɩlɩ na wʋ wǝli kʋ wʋnɩ tɩn, dɩ maasa ya na ba jɩgɩ dabɩlɩ, yɩ kʋ yɩ nugə yɩranɩ mʋ ba mɛ ba fɔgɩ-ya tɩn, dɩ kɩnka, ya na ba jɩgɩ dabɩlɩ, yɩ ba ma nugə ba lɛ-ya tɩn. 3 Nmʋ laan ma n wʋ́ kwe tɩ maama n kɩ tɩtɔgɔ wʋnɩ, n ja-tɩ n wǝli dɩ na-bɩa kam, dɩ pi-bɛ sɩm n jeeri amʋ tee nɩ.
4 Pa Arɔn dɩ o biə bam maama ba ba zɩgɩ jero-vwe dɩm ni nɩ, yɩ n pa ba swɛ ba yɩra ba kwɛ ba tɩtɩ amʋ ŋwaanɩ. 5 Kʋ kwaga nɩ sɩ n pa Arɔn zʋ kaanɩm tiinə gwaarʋ tɩm: gwar-dɩdɔrɔ kʋm, dɩ gwar-bwərə kam, dɩ gwar-wʋgʋ kʋm, dɩdaanɩ nyɔɔnɩ gwar-palɩ dɩm. Ta kwe vʋvʋa kam n vɔ o təŋə nɩ. 6 Laan kwe yuu garyi dɩm n pu o yuu nɩ, sɩ n daarɩ n kwe səbu-sɩŋa wo-pɩlɔgɔ kʋm n məəli ka yɩra nɩ. 7 Lo Wɛ swəlim nugə o yuu nɩ sɩ n ma n tiŋ‑o o tɩtʋŋa ŋwaanɩ n pa amʋ. 8 Ja Arɔn bu-baara bam maama n jeeri sɩ ba dɩ zʋ ba gwar-dɩdwaarʋ tɩm. 9 Nan ta kwe təŋə vʋvwɩ sɩm n vɔ ba tee nɩ, sɩ n daarɩ n kwe ba yipwi sɩm n pu ba yum nɩ. N maŋɩ sɩ n kɩ kʋntʋ maama mʋ n tiŋi Arɔn dɩ o biə bam ba kaanɩm tɩtʋŋa yam ŋwaanɩ. Bantʋ dɩ ba dwi dɩm wʋ́ taa yɩ amʋ kaanɩm tiinə sɩ kʋ taa ve maŋa maama.
10 Ja na-bɩa kam n vu n zɩgɩ jero-vwe dɩm manco-pɩɩna nɩ. Pa Arɔn dɩ o biə bam kwe ba jɩan ba daŋɩ ka yuu nɩ. 11 Laan gʋ na-bɩa kam jero-vwe dɩm manco-pɩɩna ni dɩm nɩ sɩ kʋ taa bwələ dɩ amʋ kaanɩm bimbim dɩm. 12 Lɩ n nʋa n laŋɩ jana bam badonnǝ n taagɩ bimbim dɩm nyɩa yam nɩ. Jana balʋ na daarɩ tɩn, sɩ n lo-ba n yagɩ tɩga nɩ, bimbim dɩm təŋə nɩ. 13 Nmʋ laan ma n wʋ́ kwe varɩm wʋm wʋ-zɩla yɩra lara dɩ o cwɛ dɩm kuri seeni, dɩ o tapwal-biə yale yam, dɩ ya lara kam maama n zwɛ-tɩ kaanɩm bimbim dɩm baŋa nɩ sɩ tɩ nyʋa di wɛyuu. 14 Sɩ kʋ na yɩ na-bɩa kam nwana yam, dɩ ka tankɔlɔ kʋm, dɩ ka pugə wʋdiu kʋm maama, ja-na-tɩ á nuŋi dáa dáa á zwɛ-tɩ. Kʋ yɩ lwarɩm saarɩm kaanɩm mʋ kʋ pa-ba.a
15 Daa n ja pi-bɩa dɩdʋa n nuŋi, sɩ Arɔn dɩ o biə bam kwe ba jɩan ba daŋɩ ka yuu nɩ, 16 sɩ n laan gʋ-ka n daarɩ n kwe ka jana bam n zɩzagɩ kaanɩm bimbim dɩm sɛn sɩna sɩm maama nɩ. 17 Nan goni piə kam nwana yam yɩra yɩra, sɩ n daarɩ n zarɩ ka wʋ-zɩla yam dɩ ka nɛ sɩm. Laan kwe wǝǝnu tɩm kʋntʋ maama dɩ ka yuu kʋm n daŋɩ bimbim dɩm baŋa nɩ. 18 Nmʋ ma n wʋ́ zwɛ tɩ maama sɩ tɩ taa yɩ zwɛɛm kaanɩm tɩ pa-nɩ. Tɩ nyʋa kam lwəm wʋ́ taa ywənə dɩ pa amʋ, yɩ dɩ poli amʋ wʋʋ.b
19 Nan ja pi-bɩa kadoŋ kam n nuŋi, sɩ Arɔn dɩ o biə bam laan kwe ba jɩan ba daŋɩ ka yuu nɩ. 20 Kʋ kwaga nɩ sɩ n gʋ-ka. Laan kɩ ka jana bam n taŋɩ Arɔn dɩ o biə bam jazɩm zwa nɩ, dɩ ba jazɩm nʋ-kwɩɩrʋ tɩm, dɩdaanɩ ba jazɩm namimbi-kwɩɩrʋ tɩm maama. Jana balʋ na daarɩ tɩn, sɩ n zezagɩ-ba bimbim dɩm sɛn sɩna sɩm nɩ. 21 Kwe jana balʋ na wʋ bimbim dɩm baŋa nɩ tɩn badonnǝ, dɩ Wɛ swəlim nugə kam, n viiri-tɩ daanɩ n laan ma n zɩzagɩ Arɔn yɩra nɩ, sɩ n ta zezagɩ-tɩ o gwaarʋ tɩm nɩ. Ta zezagɩ-tɩ n kɩ o biə bam yɩra nɩ, sɩ n daarɩ n zezagɩ-tɩ ba gwaarʋ tɩm nɩ. Kǝm dɩntʋ wʋ́ pa Arɔn dɩ o biə bam dɩ ba gwaarʋ tɩm maama mʋ pwɛ ba yɩra amʋ ŋwaanɩ.
22 Pi-bɩa kam kʋntʋ tɔgɩ ka tʋŋɩ pulim tɩtʋŋɩ dɩm mʋ. Kʋntʋ ŋwaanɩ, lɩ ka jazɩm cwe dɩm, dɩ ka nabili dɩm mɛ na jɩgɩ lara tɩn, dɩ ka wʋ-zɩla yam lara kam, dɩ cwɛ dɩm kuri seeni, dɩdaanɩ tapwal-biə yale yam, dɩ ya lara kam maama. 23 Nii tɩtɔgɔ kʋm wʋnɩ mɛ ba na kɩ dɩpwa yalʋ na ba jɩgɩ dabɩlɩ tɩn, sɩ n lɩ dɩpɛ dɩdʋa, n lɩ maasɩ dɩdʋa, n laan wəli dɩ kɩnkɛ dɩdʋa, 24 sɩ n kwe-tɩ n pa Arɔn dɩ o biə bam, kʋ wǝli dɩ pi-bɩa kam nwana yam. Bantʋ wʋ́ zəŋi-tɩ wɛɛnɩ ba yaarɩ-tɩ amʋ yigə nɩ sɩ kʋ brɩ nɩ ba kwe-tɩ ba pa amʋ mʋ. 25 Kʋntʋ kwaga nɩ, sɩ n joŋi nwana yam dɩ dɩpwa tɩm maama n daŋɩ zwɛɛm kaanɩm dɩm baŋa nɩ sɩ n zwɛ-tɩ kaanɩm bimbim dɩm baŋa nɩ. Tɩ nyʋa kam lwəm wʋ́ taa ywənə dɩ pa amʋ, yɩ dɩ poli amʋ wʋʋ. 26 Kʋ na yɩ pulim tɩtʋŋɩ pi-bɩa kam, kwe ka nyɔɔnɩ seeni nwana yam, sɩ n zəŋi-ya wɛɛnɩ n yaarɩ amʋ yigə nɩ, sɩ n laan daarɩ n wanɩ-ya n di.
27 Á na yǝni á pwɛ kaanɩm tiinə amʋ ŋwaanɩ, á wʋ́ kwe pi-bɩa kam nyɔɔnɩ dɩm dɩ ka cwe dɩm á na zǝŋi amʋ yigə nɩ tɩn á pɔɔrɩ-ya sɩ ya taa yɩ amʋ nyɩm. Arɔn dɩ o biə bam mʋ wʋ́ taa te-ya. 28 Yisɩrayɛlɩ tiinə bam na yǝni ba ja yazurə kaanɩm ba ba sɩ ba zwɛ amʋ ŋwaanɩ, varɩm wʋm nyɔɔnɩ dɩm dɩdaanɩ o cwe dɩm nwana yam wʋ́ taa yɩ pɛɛrɩ dɩlʋ ba na maŋɩ sɩ ba pa-nɩ tɩn. Kʋ maa yɩ kaanɩm tiinə bam nyɩm mʋ sɩ ba wanɩ ba di. Amʋ ni dɩm mʋ kʋntʋ sɩ kʋ taa ve maŋa maama.
29 Arɔn nan na tɩga, sɩ á tiŋi o kaanɩm gwaarʋ tɩm sɩ tɩ taa cəgi o bu wʋlʋ na wʋ́ ləri o yuu nɩ o ji kaanɩm nakwɩ tu tɩn. Ba na lagɩ ba tiŋi kʋ tu, o maŋɩ sɩ o zʋ gwaarʋ tɩm kʋntʋ mʋ. 30 Wʋlʋ na wʋ́ ləri Arɔn yuu nɩ tɩn, maŋɩ sɩ ba kwe da yarpɛ mʋ ba pwɛ‑o ba zɩgɩ o tɩtʋŋɩ dɩm ŋwaanɩ. Oó zʋ gwaarʋ tɩm mʋ da yarpɛ yam maama wʋnɩ yɩ o zʋ amʋ di-laa kʋm wʋnɩ o tʋŋɩ o pa-nɩ.
31 Kwe pulim tɩtʋŋɩ pi-bɩa kam nwana yam n vu jero-vwe jəgə kalʋ na lɩ ka tiŋi kʋ ŋwaanɩ tɩn, n saŋɩ-ya. 32 Arɔn dɩ o biə bam yɩranɩ mʋ wʋ́ kwe nwana yam kʋntʋ dɩ dɩpɛ dɩlʋ na wʋ tɩtɔgɔ kʋm wʋnɩ tɩn ba di jero-vwe dɩm manco-pɩɩna ni nɩ. 33 Wʋdiu kʋm kʋntʋ yɩ kʋlʋ amʋ na tɔgɩ kʋ ŋwaanɩ a ma saarɩ ba lwarɩm pa ba ji amʋ kaanɩm tiinə tɩn mʋ. Nɔɔn-nɔɔnʋ ba jɩgɩ cwǝŋǝ sɩ o di-kʋ, kʋ na daɩ kaanɩm tiinə bam yɩranɩ, kʋ na yɩ a nyɩm tɩn ŋwaanɩ. 34 Nwana yam dɩ dɩpwa yam na zɩgɩ ya pʋʋrɩ tɩga, sɩ á zwɛ-ya. Á daa yɩ di-ya, ya na yɩ a nyɩm tɩn ŋwaanɩ.
35 Kwe da yarpɛ sɩ n ma n tiŋi Arɔn dɩ o biə bam amʋ kaanɩm tɩtʋŋa yam ŋwaanɩ. Yɔɔrɩ n kɩ sɩ kʋ maŋɩ dɩ a na brɩ-m te tɩn. 36 Dɛ maama wʋnɩ sɩ n gʋ na-bɩa n ma n kaanɩ n pa-nɩ lwarɩm saarɩm ŋwaanɩ.c Kʋ ta wʋ́ pa kaanɩm bimbim dɩm fɔgɩ ka kwɛ. Nmʋ nan ta wʋ́ kwe swəlim nugə mʋ n ma n turi bimbim dɩm yɩra nɩ sɩ kʋ pa dɩ taa yɩ lanyɩranɩ fasɩ. 37 Nmʋ na kɩ kʋntʋ bimbim dɩm baŋa nɩ sɩ kʋ yi da yarpɛ, dɩ wʋ́ yɔɔrɩ dɩ taa yɩ lanyɩranɩ fasɩ mʋ amʋ ŋwaanɩ. Nɔɔnʋ wʋlʋ dɩ woŋo kʋlʋ maama na dwe-dɩ tɩn dɩ wʋ́ ta yɩ kʋlʋ na vwe kʋ pa Wɛ tɩn mʋ.
Dɛ maama pɛɛra yam
38 Dɛ maama wʋnɩ nmʋ maŋɩ sɩ n pa ba kaanɩ tɩntʋ mʋ ba pa-nɩ bimbim dɩm baŋa nɩ:
Kwe-na pi-balɩ sɩle na jɩgɩ bɩnɩ dɩdʋa tɩn á ma á kɩ kaanɩm á pa-nɩ. 39 Dɩdʋa wʋ́ kwe ka kaanɩ zɩzɩŋa nɩ mʋ, sɩ kadoŋ kam kaanɩ dɩdaan-ni maŋa nɩ. 40 Á na kwe zɩzɩŋa pi-bɩa kam á tʋŋɩ, sɩ á kwe mun-bwe bwɛn sɩle á viiri dɩ Olivi nugə kalʋ na yɩ lanyɩranɩ tɩn bwaŋa dɩdʋa yɩ á wǝli-ya kaanɩm dɩm wʋnɩ á pa-nɩ. Ta kwe-na dɩvɛn bwaŋa dɩdʋa á kɩ sɩ ka taa yɩ wo-nyɔɔrʋ pɛɛrɩ. 41 Kʋ na yɩ dɩdaan-ni pi-bɩa kam, ta kwe-na muni, dɩ nugə, dɩ dɩvɛn kʋntʋ doŋ á wǝli da á kɩ kaanɩm á pa-nɩ. Kʋʋ́ taa yɩ wʋdiu pɛɛrɩ kʋ pa-nɩ. Kʋ nyʋa kam lwəm wʋ́ taa ywənə kʋ pa-nɩ yɩ kʋ poli amʋ wʋʋ.
42 Abam dɩ á biə wʋ́ taa kɩ zwɛɛm pɛɛrɩ dɩm kʋntʋ jero-vwe dɩm manco-pɩɩna yam ni nɩ mʋ á pa-nɩ. Nan taá zwɛ-ya dɛ maama, yɩ amʋ dɩ wʋ́ jeeri abam dáanɩ sɩ dɩ́ ŋɔɔnɩ daanɩ. 43 Cɩga tɩn, amʋ wʋ́ ba a jeeri Yisɩrayɛlɩ tiinə bam dáanɩ, yɩ a paarɩ-zulǝ yam mʋ wʋ́ tiini ya nyɩɩnɩ je sɩm kʋntʋ nɩ sɩ sɩ taa yɩ lanyɩranɩ fasɩ.
44 A maa wʋ́ pwɛ jero-vwe dɩm dɩ dɩ kaanɩm bimbim dɩm maama sɩ tɩ taa yɩ lanyɩranɩ fasɩ. A nan ta wʋ́ pɔɔrɩ Arɔn dɩ o bu-baara bam sɩ ba ji amʋ kaanɩm tiinə. 45 A maa wʋ́ taa zʋʋrɩ dɩ Yisɩrayɛlɩ tiinə bam, sɩ a taa yɩ ba Wɛ. 46 Bantʋ dɩ maa wʋ́ lwarɩ nɩ amʋ mʋ yɩ ba Tu Baŋa-Wɛ dɩm. A nan jaanɩ-ba mʋ a nuŋi Ezipi nɩ a ba yo seeni sɩ a taa zʋʋrɩ dɩ ba. Cɩga tɩn, amʋ mʋ yɩ ba Tu Baŋa-Wɛ dɩm.»