Wo-talooru zwɛɛm bimbim
30
«Pa ba kwe akasɩa dɛ ba ma kɩ bimbim dɩlʋ wǝǝnu tɩlʋ lwǝm na ywǝmmǝ tɩn na wʋ́ taa zwɛ dɩ baŋa nɩ tɩn. 2 Pa ba kɩ-dɩ sɩ dɩ sɛn sɩm taa maɩ daanɩ, saŋ-dɩdɔrɔ dɩ saŋ-kukugə seeni. Kʋʋ́ taa yɩ kantɩ ni maŋɩm bɩdwɩ mʋ, sɩ wɛ-baŋa maŋɩm taa yɩ kantɩ ni maŋɩm kuni bɩle. Daa dɩdʋa mʋ wʋ́ kɩ bimbim dɩm dɩdaanɩ nyɩa yana sɩ ya cəli wɛɛnɩ nɩnɛɛnɩ na-bɩa nyɩa te. 3 Kwe-na səbu-sɩŋa kalʋ na yɩ lanyɩranɩ tɩn á kwǝli bimbim dɩm maama, yɩ á daarɩ á ma səbu-sɩŋa kam á tɔgɩ ka niə yam. 4 Ta kɩ-na səbu-sɩŋa kwana yale á məəli-ya bimbim dɩm sɛn sɩle sɩm nɩ, sɩ ya maŋɩ dɩ ka niə yam kuri seeni. Laan tʋrɩ-na dɛ ya wʋnɩ sɩ nɔɔna taa maɩ ba zɩŋɩ-ka. 5 Dɛ sɩm kʋntʋ wʋ́ taa yɩ akasɩa dɛ mʋ á wʋ́ ma á kɩ yɩ á daarɩ á kwe səbu-sɩŋa á kwǝli sɩ maama. 6 Á maa wʋ́ zɩgɩ bimbim dɩm kʋntʋ sɩ ka taa wʋ gar-jalɩ dɩlʋ na cɩgɩ amʋ di-laa cɩga cɩga kam tɩn yigə nɩ. Ni-gonim daka kam dɩ ka nipugu kʋm wʋ́ taa wʋ gar-jalɩ dɩm kwaga nɩ. Kʋ maa yɩ lwarɩm saarɩm nipugu kʋm seeni mʋ amʋ wʋ́ jeeri‑m sɩ dɩ́ ŋɔɔnɩ.7 Dɛ maama tɩtɩɩtɩ sɩ Arɔn yǝni o zʋ o fɔgɩ o kwɛ min-zwǝǝnu tɩm, sɩ o daarɩ o zwɛ wǝǝnu tɩlʋ lwǝm na ywǝmmǝ tɩn bimbim dɩm baŋa nɩ. 8 Oó yǝni o kɩ kʋntʋ mʋ dɩdaan-ni maŋa nɩ. Wǝǝnu tɩlʋ lwǝm na ywǝmmǝ tɩn wʋ́ taa zwɛ ka pa amʋ Baŋa-Wɛ mʋ maŋa maama sɩ kʋ taa ve wuu. 9 Yɩ zwɛ-na wo-taloo-yɔɔ bimbim dɩm kʋntʋ baŋa nɩ. Nan yɩ kɩ-na zwɛɛm kaanɩm, naa muni pɛɛrɩ kaanɩm, naa wo-nyɔɔrʋ kaanɩm ka baŋa nɩ. 10 Arɔn nan wʋ́ taa kwɛ bimbim dɩm bɩdwɩ mʋ bɩnɩ maama wʋnɩ. O na lagɩ o kwɛ-ka, sɩ o kwe lwarɩm kaanɩm varɩm wʋm jana o ma taagɩ ka nyɩa yana yam. Á nan wʋ́ taá kɩ kʋntʋ mʋ bɩnɩ maama wʋnɩ sɩ kʋ taa ve wuu. Bɛŋwaanɩ, bimbim dɩm yɩ lanyɩranɩ fasɩ mʋ, ba na pwɛ-ka ba pa amʋ tɩn ŋwaanɩ.»
Jero-vwe dɩm kwɛɛm lampoo
11 Baŋa-Wɛ daa ma ta dɩ Moyisi DƖ wɩ:
12 «Pa ba jeeli Yisɩrayɛlɩ baara bam ni sɩ n lwarɩ ba na maɩ te. Á na lagɩ á kɩ kʋntʋ, nɔɔnʋ maama maŋɩ sɩ o kwe səbu o tiŋi o tɩtɩ ŋwɩa ŋwaanɩ mʋ. Kʋntʋ wʋ́ cɩ sɩ, á na wʋra á jeeli ba ni, sɩ yawɩ-cɛɛrʋ yɩ yaarɩ-ba. 13-15 Səbu kʋm ba dɩdʋa dɩdʋa na wʋ́ ŋwɩ tɩn wʋ́ taa maɩ daanɩ mʋ. Nadum bá ŋwɩ o dwǝni yinigə tu. Yinigə tu dɩ nan bá ŋwɩ sɩ kʋ muri nadum na wʋ́ ŋwɩ te tɩn. Nɔɔnʋ wʋlʋ maama na yi bɩna fiinle yɩ o tɔgɩ o wʋ jeelim dɩm wʋnɩ tɩn wʋ́ ŋwɩ sɛkɛlɩ cicoro mʋ, sɩ kʋ duuni tɔgɩ jero-vwe dɩm maŋɩm lanyɩranɩ.b Sɛkɛlɩa dɩdʋa maa yɩ gɛra-dala kuni fiinle. Səbu kʋm wʋ́ taa yɩ ŋwɩa joŋim pɛɛra mʋ kʋ pa-nɩ. 16 Nmʋ nan na joŋi səbu kʋm kʋntʋ Yisɩrayɛlɩ tiinə bam tee nɩ, sɩ á taá ma-kʋ á kwɛ jero-vwe dɩm dɩ sɩ tɩtʋŋa yam. Kʋʋ́ taa guli Yisɩrayɛlɩ tiinə bam dɩ a na joŋi ba ŋwɩa te tɩn.»c
Canna war-zʋŋa kam
17 Baŋa-Wɛ ta ma ta dɩ Moyisi DƖ wɩ:
18 «Pa ba kwe canna ba ma kɩ war-zʋŋa dɩ ka na wʋ́ taa zɩgɩ woŋo kʋlʋ baŋa nɩ tɩn. Laan kwe-ka á zɩgɩ jero-vwe dɩm dɩdaanɩ kaanɩm bimbim dɩm tɩtarɩ laŋa nɩ sɩ á daarɩ á mɔ na á kɩ da. 19 Arɔn dɩ o biə bam wʋ́ yǝni ba ma na bam kʋntʋ mʋ ba sɩn ba jɩan dɩ ba nɛ. 20 Ba na yǝni ba bʋŋɩ sɩ ba fʋfɔ ba yi amʋ te jero-vwe dɩm nɩ naa sɩ ba zwɛ pɛɛra kaanɩm bimbim dɩm baŋa nɩ, baá yǝni ba da yigə mʋ ba kwɛ ba tɩtɩ dɩ na bam kʋntʋ. Kʋ na daɩ kʋntʋ baá tɩ mʋ. 21 Bantʋ dɩ ba dwi dɩm maŋɩ sɩ ba taa sɩn ba jɩan dɩ ba nɛ mʋ, sɩ ba yɩ tɩ. Amʋ ni dɩm mʋ kʋntʋ sɩ kʋ taa ve wuu.»
Wɛ swəlim nugə kam
22 Baŋa-Wɛ daa ma ta dɩ Moyisi DƖ wɩ:
23 «Kɩ parfɛn nugə kalʋ na yɩ nu-ŋʋŋa ka dwe dɩdɩ tɩn. Kwe miiri nu-na kilo banu, n kwe sinamɔmɩ nugə kalʋ lwəm na ywənə tɩn kilo bɩle dɩ cicoro, n kwe miu nugə kalʋ lwəm na ywənə tɩm kilo bɩle dɩ cicoro, 24 dɩ Kasɩa tiu pʋrʋ kilo bardʋ mʋ. Kwe-na parfɛn dwiə yantʋ á viiri dɩ Olivi nugə sɩ ka yi kunkwəəlu tɩna. Nan maŋɩ-na tɩ maama sɩ tɩ duuni taa tɔgɩ jero-vwe dɩm maŋɩm lanyɩranɩ. 25 Laan pa wʋlʋ na tiini o ye tralɩ nugə kǝm tɩn viiri tɩ maama daanɩ o kɩ-ka. Amʋ swəlim nugə kam kʋntʋ wʋ́ taa yɩ ka yɩra mʋ amʋ ŋwaanɩ.
26 Nmʋ laan ma n wʋ́ kwe-ka n taagɩ jero-vwe dɩm, dɩ ni-gonim daka kam, 27 dɩ dɩpwa taabʋlʋ kʋm dɩ kʋ yɩra zɩla maama, dɩ min-zwǝn-zɩgʋ kʋm dɩ kʋ yɩra wǝǝnu tɩm, dɩ wǝǝnu tɩlʋ lwǝm na ywǝmmǝ tɩn zwɛɛm bimbim dɩm, 28 dɩ zwɛɛm kaanɩm bimbim dɩm dɩdaanɩ ka yɩra zɩla yam, dɩ war-zʋŋa kam dɩdaanɩ ka na zɩgɩ woŋo kʋlʋ baŋa nɩ tɩn maama. 29 Nmʋ nan na tɔgɩ cwǝŋǝ kam kʋntʋ n kwɛ-tɩ, tɩ laan wʋ́ taa yɩ tɩ yɩra mʋ tɩ pa-nɩ. Tɩ na pwɛ amʋ ŋwaanɩ kʋntʋ tɩn, wʋlʋ maama na dwe-tɩ, kʋntʋ tu dɩ pwɛ mʋ amʋ ŋwaanɩ.
30 Nmʋ nan na lagɩ n tiŋi Arɔn dɩ o bu-baara bam amʋ kaanɩm tɩtʋŋa yam ŋwaanɩ, sɩ n turi-ba dɩ nugə kam kʋntʋ. 31 Nan ta dɩ Yisɩrayɛlɩ tiinə bam nɩ: ‹Amʋ swəlim nugə kantʋ mʋ á wʋ́ taá ma á turi amʋ kaanɩm tiinə sɩ á pwɛ-ba amʋ ŋwaanɩ sɩ kʋ taa ve wuu. 32 Ka yɩ ka yɩra mʋ ka paɩ amʋ. Á ba maŋɩ sɩ á taá maɩ-ka á turi á yɩra yɔɔ yɔɔ. Yɩ kɩ-na ka dwi sɩ á ma á tʋŋɩ tɩtʋŋɩ dɩdoŋ. Abam nan wʋ́ pa ka taa yɩ ka yɩra mʋ maŋa maama. 33 Wʋlʋ nan na vɩn ni dɩntʋ yɩ o kwe nugə kam kʋntʋ o ma tʋŋɩ tɩtʋŋ-yɔɔ, baá lɩ kʋ tu mʋ sɩ o daa yɩ tɔgɩ o wǝli Yisɩrayɛlɩ dwi dɩm wʋnɩ.› »
Wǝǝnu tɩlʋ lwǝm na ywǝmmǝ tɩn
34 Baŋa-Wɛ daa ma ta DƖ brɩ Moyisi DƖ wɩ:
«Pa ba kwe wǝǝnu tɩntʋ ba ma kɩ wǝǝnu tɩlʋ lwǝm na ywǝmmǝ tɩn: Sɩtorasɩ maarʋ, dɩ Onigisi, dɩ Galibanum, dɩdaanɩ Wo-talooru wǝǝnu tɩlʋ lwǝm na ywǝmmǝ tɩn na yɩ lanyɩranɩ tɩn. Maŋɩ-tɩ sɩ tɩ bwaŋa kam taa maɩ daanɩ. 35 Laan pa wʋlʋ na ye tralɩ kǝm lanyɩranɩ tɩn gwaanɩ-tɩ daanɩ. Yɛ mʋ wʋ́ wǝli da sɩ ka ji wǝǝnu tɩlʋ lwǝm na ywǝmmǝ tɩn kalʋ na yɩ lanyɩranɩ yɩ ka yɩ ka yɩra amʋ ŋwaanɩ tɩn. 36 Nmʋ laan ma n wʋ́ zwɛ ka wʋnɩ n nanɩ yɔlɩ-yɔlɩ. N ta wʋ́ ja-ka n zʋ jero-vwe dɩm wʋnɩ sɩ n zɩzagɩ ni-gonim daka kam yigə nɩ, mɛ amʋ na wʋ́ jeeri‑m tɩn. Pa parfɛn kam kʋntʋ tiini ka taa yɩ ka yɩra ka pa-nɩ. 37 Yɩ kɩ-na ka dwi sɩ á ma á tʋŋɩ tɩtʋŋɩ dɩdoŋ á pa á tɩtɩ. Ba na kwe wǝǝnu tɩlʋ lwǝm na ywǝmmǝ tɩn kʋntʋ ba pa amʋ tɩn ŋwaanɩ mʋ ka yɩ lanyɩranɩ fasɩ. 38 Wʋlʋ nan na vɩn ni dɩntʋ yɩ o kɩ ka doŋ, baá lɩ kʋ tu mʋ sɩ o daa yɩ tɔgɩ o wǝli Yisɩrayɛlɩ dwi dɩm wʋnɩ.»