Bezalɩlɩ dɩ Oholɩabɩ taanɩ
31
Baŋa-Wɛ dɛɛn ma ta dɩ Moyisi DƖ wɩ:2 «Amʋ mʋ kuri Yuri bu Bezalɩlɩ. O ko-nakwɩ maa yɩ Huuri yɩ wʋntʋ nuŋi Zuda dwi dɩm wʋnɩ. 3 Amʋ kwe a joro mʋ a pa‑o, pa o jɩgɩ swan, dɩ yi-pʋrʋ, dɩ yǝno sɩ kʋ tiini kʋ gaalɩ, yɩ o waɩ o gɔgɩrɩ wǝǝnu dwi dwi. 4 O ta waɩ o kwe səbu-sɩŋa, dɩ səbu-poŋo, dɩ canna o ma naanɩ wǝǝnu tɩlʋ na tiini tɩ lana tɩn. 5 O ta waɩ o kwe kandwa-ŋʋna dɩ dɛ o sara o ma gɔgɩrɩ wǝǝnu dwi dwi. 6 Amʋ nan lɩ Dan dwi tu Ayisamakɩ bu Oholɩabɩ mʋ sɩ ba taa tʋŋɩ daanɩ. Gɔgɔ kʋlʋ maama na daarɩ tɩn, a ta pɛ-ba swan dwi dwi sɩ ba dɩ tɔgɩ ba wǝli sɩ kʋlʋ maama amʋ na brɩ-m tɩn wanɩ kʋ tʋŋɩ lanyɩranɩ. Wǝǝnu tɩm mʋ tɩntʋ:
7 Jero-vwe dɩm, dɩ ni-gonim daka kam, dɩ lwarɩm saarɩm nipugu kʋm na kwǝli-ka tɩn, dɩdaanɩ wǝǝnu tɩlʋ maama na paɩ vwe dɩm lamma tɩn mʋ kʋntʋ,
8 dɩ taabʋlʋ kʋm dɩ kʋ zɩla yam, dɩ səbu-sɩŋa min-zwǝn-zɩgʋ kʋm dɩ kʋ zɩla yam maama, dɩ wo-talooru zwɛɛm bimbim dɩm,
9 dɩ zwɛɛm kaanɩm bimbim dɩm dɩ ka zɩla yam maama, dɩ war-zʋŋa kam dɩ ka na wʋ́ zɩgɩ woŋo kʋlʋ baŋa nɩ tɩn,
10 dɩ nɩnwaŋa gwaarʋ tɩlʋ kaanɩm tu Arɔn dɩ o biə bam na maŋɩ sɩ ba zʋ-tɩ sɩ ba tʋŋɩ kaanɩm tɩtʋŋa tɩn, 11 dɩ Wɛ swəlim nugə kam, dɩ wǝǝnu tɩlʋ lwǝm na ywǝmmǝ tɩn ba na wʋ́ zwɛ Wɛ di-laa kʋm nɩ tɩn.
Nan pa ba kɩ woŋo maama sɩ kʋ tɔgɩ amʋ na brɩ-m te tɩn.»
Siun dɛ dɩm taanɩ
12 Baŋa-Wɛ ta ma ta dɩ Moyisi DƖ wɩ:
13 «Ta Yisɩrayɛlɩ tiinə bam sɩ ba taa ye da yarpɛ dɛ dɩm ni nɩ. Abam na kɩ á tɔgɩ amʋ ni dɩm da yarpɛ dɛ dɩm ŋwaanɩ, kʋʋ́ taa yɩ maana abam dɩ á dwi maama tee nɩ, sɩ á lwarɩ nɩ amʋ Baŋa-Wɛ mʋ kuri abam sɩ á taá yɩ amʋ nyɩm. 14 Da yarpɛ dɛ dɩm wʋ́ taa yɩ dɩ yɩra mʋ amʋ ŋwaanɩ. Wʋlʋ nan na cɔgɩ dɩ cullu tɩm, o maŋɩ sɩ o tɩ mʋ. Nɔɔnʋ wʋlʋ maama na tʋŋɩ tɩtʋŋa dɛ dɩm kʋntʋ nɩ, kʋ tu daa yɩ tɔgɩ o wǝli Yisɩrayɛlɩ dwi dɩm wʋnɩ. 15 Kwe-na da yardʋ á tʋŋɩ á tɩtʋŋa. Kʋ daarɩ sɩ da yarpɛ dɛ dɩm taa yɩ dɩ yɩra dɩ paɩ amʋ Baŋa-Wɛ. Kʋ maa yɩ siun dɛ mʋ. Wʋlʋ na tʋŋɩ dɩ dɛ dɩm nɩ, sɩ á gʋ kʋ tu. 16 Yisɩrayɛlɩ tiinə bam dɩ ba dwi maama wʋ́ taa nɩgɩ da yarpɛ dɛ dɩm mʋ yɩ ba tɔgɩ dɩ cullu tɩm sɩ kʋ taa ve wuu. 17 Dɛ dɩm kʋntʋ yɩ maana dɛ mʋ dɩ pa amʋ dɩ Yisɩrayɛlɩ tiinə bam sɩ kʋ taa ve wuu, sɩ á guli nɩ amʋ kwe da yardʋ mʋ a ma a naanɩ wɛyuu dɩ tɩga baŋa. A laan ma sin da yarpɛ dɛ dɩm nɩ, a naanɩm tɩtʋŋɩ dɩm na ti tɩn ŋwaanɩ.»
18 Baŋa-Wɛ na ŋɔɔnɩ dɩ Moyisi Sinayi Piu kʋm yuu nɩ DƖ ti tɩn, mʋ DƖ kwe kandwa-pɩlɛ sɩle sɩm DƖ pa‑o. Wɛ nan ya mʋ mɛ DƖ tɩtɩ jɩŋa DƖ pʋpʋnɩ DƖ ni-gonim dɩm bɩtara ya baŋa nɩ.a