Səbu-sɩŋa nʋa
32
Moyisi dɛɛn nan ya maŋɩ piu kʋm yuu nɩ mʋ o daanɩ. Nɔɔna bam ma vu ba jeeri Arɔn tee nɩ ba wɩ: «Moyisi mʋ sɩɩnɩ o ja dɩbam o nuŋi Ezipi nɩ o ba yo seeni. Dɩ́ nan yǝri kʋlʋ na yi‑o tɩn. Nan kɩ woŋo sɩ kʋ lwǝni wɛ n pa dɩbam sɩ kʋ taa tɔgɩ dɩbam yigə.»2 Arɔn ma lǝri-ba o wɩ: «Lɩ-na səbu-sɩŋa zwa-kwana yam abam kaana dɩ á biə dɩ á bukwa bam na kɩ ba zwa nɩ tɩn á ja á ba á pa-nɩ.» 3 Nɔɔna bam ma sɩɩnɩ ba ja səbu-sɩŋa zwa-kwana yam kʋntʋ ba vu ba pa‑o. 4 Arɔn na joŋi səbu-sɩŋa kam tɩn, o ma nyɩɩnɩ-ka yɩ o laan mɔ kamɔgɔ nɩnɛɛnɩ nʋa o pa-ba. Nɔɔna bam na nɛ-ka tɩn, mʋ ba kaasɩ dɩ kwǝr-dɩa ba brɩ daanɩ ba wɩ: «Yisɩrayɛlɩ tiinə bam, á wɛ dɩm mʋ tɩntʋ, dɩ na jaanɩ dɩbam dɩ ja nuŋi Ezipi nɩ dɩ ba yo seeni.»
5 Arɔn ma na kʋlʋ na kɩ tɩn yɩ o lɔ bimbim nʋa kam yigə nɩ. O ma ta o wɩ: «Jwaanɩ, sɩ dɩ́ maama jeeri dɩ́ di candiə dɩ́ ma zuli Baŋa-Wɛ.» 6 Tɩga na pʋʋrɩ tɩtɩɩtɩ tɩn, nɔɔna bam ma ba ba gʋ vara sɩ ba ma kɩ zwɛɛm kaanɩm, yɩ ba kwe badaara ba kɩ yazurə kaanɩm sɩ ba di nwana yam. Ba dɛɛn lɛɛrɩ ba di wʋdi-fɔrɔ mʋ yɩ ba nyɔa, ba daarɩ ba zaŋɩ ba kwɛɛrɩ yɔɔ yɔɔ.
7 Baŋa-Wɛ ma ta dɩ Moyisi DƖ wɩ: «Kɩ lɩla n tu n nɔɔna bam tee nɩ. N na jaanɩ balʋ n nuŋi Ezipi tɩʋ kʋm nɩ tɩn sɩŋɩ sɩ ba tʋŋɩ jwərim mʋ. 8 Ba garɩ ba vɩn cwǝŋǝ kalʋ amʋ na brɩ-ba sɩ ba tɔgɩ tɩn mʋ, yɩ ba kɩ jwəm na nyɩ dɩ nʋa. Ba maa tɛ daanɩ ba wɩ: ‹Yisɩrayɛlɩ tiinə bam, á wɛ dɩm mʋ tɩntʋ, dɩ na jaanɩ abam dɩ nuŋi Ezipi nɩ dɩ ba yo seeni.› »
9 Baŋa-Wɛ ta ma ta DƖ wɩ: «Moyisi, amʋ nɛ nɩ nɔɔna bantʋ zwabaniə tiini ka gaalɩ. 10 Amʋ banɩ nan zaŋɩ dɩ ba mʋ yɩ kʋ maŋɩ sɩ a cɔgɩ-ba. Yɩ cɩ a yigə dɩ a bʋbʋŋɩ dɩm. Amʋ nan ta wʋ́ zɩgɩ nmʋ baŋa nɩ sɩ a pa n dwi dɩm puli dɩ ji dwi kamunu.»
11 Moyisi ma kwaanɩ o loori o Tu Baŋa-Wɛ dɩm sɩ DƖ ləri DƖ bʋbʋŋɩ dɩm. O ma ta o wɩ: «Baŋa-Wɛ, nmʋ mʋ mɛ n dam-fɔrɔ n ja nɔɔna bantʋ n zɩgɩ Ezipi nɩ n ba yo seeni. Kɔɔ ŋwaanɩ mʋ nmʋ banɩ wʋ́ zaŋɩ dɩ ba sɩ n cɔgɩ-ba?a 12 Nmʋ na cɔgɩ-ba, Ezipi tiinə bam wʋ́ taa tɛ nɩ: ‹Wɛ ganɩ DƖ nɔɔna bam mʋ DƖ ja DƖ vu pweeru tɩm je nɩ sɩ DƖ gʋ-ba. Ba yɩrɩ maa wʋ́ saarɩ lʋgʋ baŋa nɩ!› A loori-m! Yagɩ n ban-zɔŋɔ kʋm, sɩ n ləri n wʋbʋŋa sɩ n yɩ cɔgɩ-ba, ba na yɩ nmʋ tɩtɩ nɔɔna bam tɩn ŋwaanɩ. 13 Guli n ni-gonim dɩm n dɛɛn na kɩ dɩ Abraham, dɩ Yizakɩ dɩdaanɩ Zakɔbɩ tɩn gulə. Nmʋ tɩtɩɩ nɩ mʋ n dugi dɩ ba nɩ ba dwi dɩm wʋ́ ba dɩ puli nɩnɛɛnɩ wɛyuu calɩcwɩ na yɩ te tɩn, sɩ ba daarɩ ba taa te tɩga kantʋ.» 14 Moyisi na tagɩ kʋntʋ tɩn, Baŋa-Wɛ ma ləni DƖ bʋbʋŋɩ dɩm DƖ ya na jɩga sɩ DƖ cɔgɩ nɔɔna bam tɩn, yɩ DƖ daa wʋ cɔgɩ-ba.
15 Moyisi ma pipiri o kwe cwǝŋǝ o maa tu piu kʋm kuri nɩ. O dɛɛn ze kandwa-pɩlɛ sɩle sɩlʋ Wɛ ni-gonim dɩm bɩtara na pʋpʋnɩ ya baŋa nɩ, yigə dɩ kwaga tɩn mʋ. 16 Baŋa-Wɛ tɩtɩ ni-taanɩ mʋ DƖ dɛɛn nan pʋpʋnɩ dɩ DƖ jɩŋa. DƖ ma sarɩ-ya DƖ tiŋi kandwa-pɩlɛ sɩm baŋa nɩ.
17 Moyisi zənnu Zozwe dɛɛn ma ni nɔɔna bam na jɩgɩ sɔɔ kʋlʋ ba kɩ tɩn ŋwa. O ma ta dɩ Moyisi o wɩ: «Sɔɔ kʋntʋ nyɩ nɩnɛɛnɩ tiguri-kaasa mʋ tɩn nɔɔna bam na gilimi mɛ tɩn wʋnɩ.» 18 Moyisi dɩ ma lǝr-o o wɩ: «Sɔɔ kʋntʋ wʋ brɩ nɩ ba wanɩ ba dʋna, kʋ nan wʋ brɩ nɩ ba dʋna di-ba. Kʋ yɩ kwɛɛra sɔɔ mʋ.»
19 Moyisi na fʋfɔ o yi piu kʋm kuri nɩ tɩn, mʋ o nɛ ba jwəm dɩm. O ta ma na nɔɔna bam na saɩ te tɩn. O banɩ ma tiini dɩ zaŋɩ. O ban-zɔŋɔ kʋm baŋa nɩ, mʋ o dʋlɩ kandwa-pɩlɛ sɩm dɩ dam piu kʋm təŋə nɩ yɩ ya lɔ. 20 O ta ma kwe nʋa jwəm dɩm o dɩ mim nɩ pa dɩ nyɩɩnɩ. O laan ma cʋ-dɩ pa dɩ ji muni, yɩ o daarɩ o viiri dɩ muni dɩm dɩ na o kwe o pa nɔɔna bam sɩ ba nyɔ.
21 Moyisi ma daarɩ o bwe Arɔn o wɩ: «Nɔɔna bantʋ kɩ bɛɛ mʋ ba cɔgɩ n yigə yɩ n pa ba tiini ba tusi tɩntʋ?» 22 Arɔn ma lǝr-o o wɩ: «A loori-m! Yɩ pa n banɩ zaŋɩ dɩ amʋ, sɩ n maŋɩ n ye nɩ: ba na bʋŋɩ sɩ ba kɩ kʋlʋ, nɔɔnʋ warɩ-ba o gwi. 23 Ba tu amʋ tee nɩ mʋ ba wɩ: ‹Moyisi na jaanɩ dɩbam o nuŋi Ezipi nɩ o ba yo seeni tɩn, dɩ́ yǝri kʋlʋ na yi‑o tɩn. Nan kɩ woŋo sɩ kʋ lwǝni wɛ n pa dɩbam sɩ kʋ taa tɔgɩ dɩbam yigə.› 24 Amʋ dɩ ma ta dɩ ba sɩ ba ja ba səbu-sɩŋa zwa-kwana ba ja ba ba ba pa-nɩ. Ba na lɩ-ya ba pa-nɩ tɩn, mʋ a dʋlɩ-ya a dɩ mim wʋnɩ yɩ ya ji nʋa kantʋ!»
25 Moyisi ma maanɩ nɩ nɔɔna bam daa warɩ ba ja. O ta lwarɩ nɩ kʋ zɩgɩ Arɔn yɩra nɩ mʋ yɩ ba kɩ kʋntʋ, bɛŋwaanɩ nɔɔna bam dɛɛn ya tʋŋɩ jwərim mʋ pa ba dʋna mwanɩ-ba. 26 O ma cɩ nɔɔna bam na gilimi je sɩlʋ nɩ tɩn ni dɩm, yɩ o ta o wɩ: «Wʋlʋ maama na zɩgɩ o pa Baŋa-Wɛ sɩ kʋntʋ tu ba amʋ te yo seeni.» Levi dwi dɩm maama ma fʋfɔ ba yi o te ba zɩgɩ. 27 O ma ta dɩ ba o wɩ: «Yisɩrayɛlɩ Baŋa-Wɛ dɩm mʋ pɛ abam ni sɩ á maama kwe á sʋ-lwaanʋ á zʋ nɔɔna bam wʋnɩ á taá gʋɩ yɔɔ. Yɩ kuri-na á cʋrrʋ, dɩ á badonnǝ, dɩ á fara á yagɩ.»
28 Levi dwi tiinə bam ma sɛ Moyisi ni dɩm, yɩ dɛ dɩm kʋntʋ nɩ ba gʋ nɔɔna mʋrrʋ tɩtɔ (3,000). 29 Moyisi ta ma ta dɩ ba o wɩ: «Abam na sɛ Wɛ ni dɩm yɩ á gʋ á biə dɩ á cʋrrʋ tɩn ŋwaanɩ, á laan wʋ́ taá yɩ Baŋa-Wɛ kaanɩm tiinə mʋ sɩ á taá tʋŋɩ á pa DƖ nɔɔna bam. Baŋa-Wɛ yu-yoŋo kʋm laan nan wʋ á baŋa nɩ.»
30 Tɩga na pʋʋrɩ tɩn, Moyisi ma ta dɩ nɔɔna bam o wɩ: «Abam ya tiini á kɩ lwarɩm. Amʋ nan wʋ́ joori a din Baŋa-Wɛ te sɩ a kwaanɩ a kɩ abam dɩ Baŋa-Wɛ daanɩ sɩ DƖ ma DƖ cɛ abam.»
31 Moyisi ma joori o din Baŋa-Wɛ te yɩ o ta dɩ DƖ o wɩ: «Nɔɔna bam tiini ba kɩ lwarɩm ba ja ba gaalɩ. Ba kwe səbu-sɩŋa mʋ ba kɩ jwəm ba pa ba tɩtɩ. 32 Popo! Amʋ nan loori‑m sɩ n yagɩ ba lwarɩm dɩm n cɛ-ba. Kʋ nan na daɩ kʋntʋ, sɩ n yɔɔrɩ n saarɩ amʋ yɩrɩ sɩ dɩ yɩ taa wʋ nmʋ tɔnɔ kʋm wʋnɩ.»b 33 Baŋa-Wɛ ma lǝr-o DƖ wɩ: «Awo! Wʋlʋ na kɩ o cɔgɩ amʋ yigə nɩ, mʋ amʋ wʋ́ saarɩ kʋ tu yɩrɩ a yagɩ sɩ dɩ daa yɩ taa wʋ amʋ tɔnɔ kʋm wʋnɩ. 34 Nan joori n vu n tɔgɩ nɔɔna bam yigə sɩ á vu mɛ amʋ na tagɩ dɩ nmʋ sɩ á vu tɩn. Amʋ malɛka kam wʋ́ taa wʋ á yigə nɩ. Maŋa nan na yiǝ, amʋ laan wʋ́ waarɩ-ba ba lwarɩm dɩntʋ ŋwaanɩ.»
35 Baŋa-Wɛ ma pa yawɩ-cɛɛrʋ tʋ Yisɩrayɛlɩ tiinə bam baŋa nɩ dɩ ba na pɛ Arɔn kɩ səbu-sɩŋa nʋa jwəm dɩm o pa-ba tɩn.