Yisɩrayɛlɩ tiinə bam yagɩ Sinayi piu kʋm je sɩm
33
Baŋa-Wɛ daa ma ta dɩ Moyisi DƖ wɩ: «Zaŋɩ-na sɩ á kɛ! Nan ja Yisɩrayɛlɩ tiinə bam n na jaanɩ n nuŋi Ezipi nɩ n ba yo seeni tɩn, sɩ á vu tɩga kalʋ amʋ na goni ni dɩdaanɩ á nabaara Abraham, dɩ Yizakɩ, dɩ Zakɔbɩ sɩ a pa bantʋ dɩ ba dwi dɩm tɩn.a 2 Amʋ wʋ́ tʋŋɩ malɛka sɩ ka tɔgɩ á yigə ka brɩ abam cwǝŋǝ. Amʋ tɩtɩ nan wʋ́ zəli Kaanan tiinə bam, dɩ Amɔɔrɩ tiinə bam, dɩ Hɛtɩ tiinə bam, dɩ Perezi tiinə bam, dɩ Hevi tiinə bam, dɩ Yebusi tiinə bam maama. 3 Ba tɩga kam á na maa ve tɩn tiini ka ywəmmə dɩ varɩm dɩ kɔnɔ. Amʋ nan za bá tɔgɩ dɩ abam sɩ dɩ́ vu, á na yɩ zwabani-nyɩna tɩn ŋwaanɩ. Amʋ na tɔgɩ dɩ abam, a waɩ a cɔgɩ abam cwǝŋǝ nɩ.»4 Nɔɔna bam na ni ta-cɛɛrɩ dɩm kʋntʋ tɩn, ba maa keerǝ yɩ ba vɩn sɩ ba zʋ gwar-laarʋ dɩ wo-nyɩnnʋ. 5 Baŋa-Wɛ nan ya wuuri DƖ ta Moyisi mʋ sɩ o ta dɩ Yisɩrayɛlɩ tiinə bam nɩ: «Baŋa-Wɛ na maŋɩ DƖ tɔgɩ dɩ abam fɩnfɩɩn dɩ, DƖ wʋ́ cɔgɩ abam mʋ, á zwa na ba ni tɩn ŋwaanɩ. Nan lɩ-na á yɩra wo-nyɩnnʋ sɩ Wɛ laan lwarɩ DƖ na wʋ́ kɩ abam te tɩn.» 6 Kʋntʋ ŋwaanɩ, Yisɩrayɛlɩ tiinə bam na zɩgɩ Sinayi piu kʋm je sɩm nɩ ba maa kɛ tɩn, ba daa wʋ kwe wo-nyɩnnʋ ba kɩ ba yɩra nɩ.
Jeerim vwe dɩm
7 Ba na yǝni ba beeri ba yi mɛ ba na wʋ́ tigisi tɩn, Moyisi dɛɛn yǝni o vu dáa dáa mʋ dɩ ba o cwi vwe dɩdoŋ. O dɛɛn bəŋi-dɩ nɩ: ‹Jeerim vwe› mʋ. Wʋlʋ maa na yǝni o lagɩ sɩ o ni Baŋa-Wɛ kwǝrǝ tɩn wʋ́ vu o zʋ vwe dɩm wʋnɩ mʋ.
8 Moyisi na yǝni o maa ve sɩ o zʋ Jeerim vwe dɩm wʋnɩ, nɔɔna bam maama wʋ́ nuŋi ba zɩgɩ ba vwə yam niə nɩ mʋ. Ba laan maa nii‑o sɩ o vu o yi vwe dɩm o zʋ dɩ wʋnɩ. 9 O nan na zʋ vwe dɩm wʋnɩ, kunkoŋo kʋlʋ na zɩgɩ dəki tɩn laan yǝni kʋ ba kʋ dɔgɩ vwe dɩm ni dɩm nɩ mʋ, yɩ Baŋa-Wɛ laan zɩgɩ kunkoŋo kʋm wʋnɩ DƖ ŋɔɔnɩ dɩ Moyisi.b 10 Nɔɔna bam nan na nɛ kunkoŋo kʋm kʋntʋ, baá yǝni ba zɩgɩ ba vwə yam niə nɩ mʋ, yɩ ba kuni doonə tɩga nɩ ba zuli Wɛ. 11 Moyisi na yǝni o zʋ vwe dɩm wʋnɩ, Baŋa-Wɛ ŋɔɔnɩ dɩd-o jaja nɩnɛɛnɩ nɔɔnʋ na ŋɔɔnɩ dɩ o doŋ te tɩn mʋ.c Kʋ kwaga nɩ Moyisi maa yǝni o joori nɔɔna bam te, mɛ ba na zʋʋrɩ tɩn. Nɔn-dʋŋʋ wʋlʋ na yɩ Moyisi zənnu tɩn maa yǝni o maŋɩ Jeerim vwe dɩm wʋnɩ. Wʋntʋ maa yɩ Nun bu Zozwe.
Baŋa-Wɛ paarɩ-zulǝ yam
12 Moyisi dɛɛn tagɩ dɩ Baŋa-Wɛ mʋ o wɩ: «Nmʋ sɩɩnɩ n brɩ-nɩ nɩ a tɔgɩ nɔɔna bantʋ yigə sɩ a ja-ba a vu tɩga kam baŋa. Nmʋ nan ta wʋ pɛ a lwarɩ a zənnu wʋm mʋ. Nmʋ ta ma n tɛ nɩ nmʋ ye amʋ wʋʋ yɩ a kikiə su n yi. 13 Tɩntʋ maama nan na sɩɩnɩ kʋ yɩ cɩga, sɩ n brɩ-nɩ n cwe sɩm cɩga cɩga. Kʋntʋ wʋ́ pa a fɔgɩ a sɛ nmʋ ni lanyɩranɩ, yɩ a ta kɩ nmʋ wʋbʋŋa yam na lagɩ te tɩn. Nan yɩ swe nɩ n tɩtɩ mʋ kuri dwi dɩm kʋntʋ nɔɔna bam sɩ ba taa yɩ nmʋ nyɩm.» 14 Baŋa-Wɛ ma ləri Moyisi DƖ wɩ: «Amʋ tɩtɩ mʋ wʋ́ taa wʋ nmʋ tee nɩ, yɩ a pa n bɩcarɩ zuri.»
15 Moyisi ma ta o wɩ: «Nmʋ nan na ba lagɩ n tɔgɩ dɩbam sɩ dɩ́ vu, sɩ n yɩ pa dɩ́ gɔ naga. 16 Nmʋ nan na tɔgɩ n wʋ dɩ́ tee nɩ yɩ dɩ́ veǝ, nɔɔna maama wʋ́ lwarɩ nɩ nɔɔna bantʋ kikiə su nmʋ yi. Ba ta wʋ́ lwarɩ nɩ dɩbam yɩ dɩ́ yɩra mʋ lʋgʋ baŋa nɔɔna maama wʋnɩ.»
17 Baŋa-Wɛ laan ma ta dɩ Moyisi DƖ wɩ: «Amʋ wʋ́ kɩ kʋlʋ maama nmʋ na lagɩ tɩn, a na ye nmʋ wʋʋ yɩ n kikiə su amʋ yi tɩn ŋwaanɩ.»
18 Moyisi daa ma ta dɩ Baŋa-Wɛ o wɩ: «A loori‑m mʋ sɩ n pa-nɩ pwələ sɩ a na nmʋ paarɩ-zulǝ yam.»
19 Baŋa-Wɛ ma ləri DƖ wɩ: «Amʋ mʋ yɩ Baŋa-Wɛ dɩm. Amʋ wʋ́ duri wʋlʋ maama a na kuri tɩn yibwənə yɩ a kɩ kʋ tu yu-yoŋo. Amʋ nan wʋ́ brɩ-m a lanyɩranɩ dɩm sɩ n yiǝ na-dɩ, yɩ a daarɩ a pa n ni a yɩrɩ dɩm cɩga cɩga. 20 Nmʋ nan ba maŋɩ sɩ n na a yibiyə mʋ, bɛŋwaanɩ wʋlʋ maama na nɛ amʋ yibiyə, kʋntʋ tu wʋ́ tɩ mʋ. 21 Nii yo! Piu kʋdoŋ zɩgɩ yo seeni bwələ bwələ. Ve n tan zɩgɩ kʋ baŋa nɩ. 22 Amʋ nan na lagɩ a tɔgɩ n tee nɩ sɩ a kɛ dɩ a paarɩ-zulǝ yam, aá ja‑m sɩ n səgi piu gugoro nɩ, yɩ a kwǝli n yibiyə dɩ a jɩŋa, sɩ a wanɩ a gaalɩ‑m a kɛ. 23 Kʋ kwaga nɩ a laan wʋ́ dwanɩ a jɩŋa sɩ n wanɩ n na amʋ kwaga kam. Sɩ kʋ na yɩ amʋ yibiyə, n ba maŋɩ sɩ n na-ka.»