Kandwa-pɩlɛ sɩlʋ na kɩ bɩle tu tɩn
34
Dɛ dɩdʋa Baŋa-Wɛ dɛɛn tagɩ dɩ Moyisi DƖ wɩ: «Daa n sarɩ kandwa-pɩlɛ sɩle nɩnɛɛnɩ pulim nyɩna yam a na kɩ yɩ n lɔ-ya tɩn.a Amʋ wʋ́ joori a pʋpʋnɩ a niə yam ya baŋa nɩ. 2 Nan ti n yigə sɩ jwa tɩtɩɩtɩ n di Sinayi piu kʋm yuu n ba amʋ te sɩ dɩ́ jeeri daanɩ. 3 Nɔɔn-nɔɔnʋ nan ba maŋɩ sɩ o tɔgɩ dɩ nmʋ o din piu kʋm yuu. Nɔɔna bam maama maŋɩ sɩ ba maŋɩ piu kʋm dáa nɩ mʋ. Yɩ pa-na sɩ á peeni, dɩ á bʋnɩ, dɩ á naanɩ taa bwələ piu kʋm təŋə nɩ sɩ dɩ di gaa.» 4 Moyisi ma sarɩ kandwa-pɩlɛ sɩle nɩ pulim nyɩna yam na yɩ te tɩn. Tɩga na pʋʋrɩ tɩtɩɩtɩ tɩn, o ma ja-ya o din Sinayi piu kʋm yuu, nɩnɛɛnɩ Baŋa-Wɛ na tagɩ te tɩn.5 Baŋa-Wɛ ma cu kunkoŋo kʋm wʋnɩ DƖ zɩgɩ Moyisi tee nɩ. Moyisi na zɩgɩ da yɩ Wɛ maa bɩɩnɩ tɩn, mʋ Wɛ dɛɛn bəŋi DƖ tɩtɩ yɩrɩ dɩm cɩga cɩga DƖ wɩ: ‹Yuutu Baŋa-Wɛ›.b 6 Baŋa-Wɛ ma tɔgɩ Moyisi yigə nɩ DƖ kɛ yɩ DƖ wɩ:
«Amʋ mʋ yɩ Baŋa-Wɛ dɩm,
Yuutu Baŋa-Wɛ!
A jɩgɩ nɔɔna ŋwaŋa,
yɩ a kɩ ba yu-yoŋo.
A maa yǝni a pɩɩnɩ a banɩ dɩ ba.
A sono kʋm gaalɩ,
yɩ a cɩga kam dɩ bá fɔgɩ ka ti.
7 Amʋ bá fɔgɩ a yagɩ a sono kʋm,
nɩ a na goni ni dɩ a nɔɔna bam
dɩ ba dwiə yam sɩ kʋ taa ve maŋa maama te tɩn.
A maa kwe nɔɔna lwarɩm
dɩ ba lwarɩm a maa cɛ-ba.
Sɩ kʋ na yɩ balʋ na gɛ bʋra tɩn,
a yǝni a waarɩ-ba mʋ dɩ ba biə maama
sɩ kʋ yi ba naarʋ,
dɩ ba na-jooru dwiə yatɔ naa yana laŋa nɩ.»c
8 Moyisi ma kɩ lɩla o kuni doonə o vi o yigə tɩga nɩ sɩ o zuli Baŋa-Wɛ. 9 O ma loori‑DƖ o wɩ: «Amʋ Yuutu, a kikiə nan na sɩɩnɩ ya su nmʋ yi, sɩ n tɔgɩ dɩbam sɩ dɩ́ vu. Cɩga ŋwaanɩ tɩn, nɔɔna bam sɩɩnɩ ba yɩ zwabani-nyɩna mʋ. Nan kwe ba lwarɩm dɩ ba gɛɛrɩ n ma n cɛ-ba. Ta pa dɩ́ taa yɩ nmʋ tɩtɩ nyɩm, sɩ n ta n te dɩbam.»
10 Baŋa-Wɛ daa ma ta DƖ wɩ:
«Nii mʋ! Amʋ ta lagɩ a goni ni dɩ abam mʋ. Nmʋ nɔɔna bam yigə nɩ mʋ amʋ wʋ́ kɩ wo-kɩnkagɩla yalʋ doŋ ta na wʋ fɔgɩ ya kɩ lʋgʋ baŋa nɩ tɩn. Tɩɩnɩ dɩlʋ na bwələ dɩ abam tɩn wʋ́ taa zɩgɩ ba niə yɩ fʋʋnɩ ja-ba mʋ, wo-kɩnkagɩla yalʋ amʋ Baŋa-Wɛ na wʋ́ kɩ abam tɩtarɩ nɩ tɩn ŋwaanɩ.
11 Abam nan maŋɩ sɩ á sɛ á kɩ niə yalʋ a zɩm na brɩ abam sɩ á kɩ te tɩn mʋ. Á na kɩ kʋntʋ, amʋ dɩ wʋ́ zəli Amɔɔrɩ tiinə bam, dɩ Kaanan tiinə bam, dɩ Hɛtɩ tiinə bam, dɩ Perezi tiinə bam, dɩ Hevi tiinə bam dɩdaanɩ Yebusi tiinə bam maama sɩ ba nuŋi ba daarɩ tɩga kam ba pa abam. 12 Taá ye-na sɩ á yɩ kɩ ni-mɔrɔ dɩ nɔɔna balʋ na zʋʋrɩ tɩga kam kʋntʋ nɩ tɩn. Sɩ á na mɩ dɩ ba, baá sʋgɩ abam sɩ á tusi amʋ yigə nɩ.d 13 Nan kɩ-na tɩntʋ dɩ ba: Cɔgɩ-na ba bimbinə yam, dɩ ba kandwa-sɩswələ tɩm na yɩ ba jwǝnǝ tɩn. Goni-na ba Asera nyɩnyʋgʋ dɛ sɩm á dɩ tɩga nɩ. 14 Amʋ lagɩ cɩga mʋ á tee nɩ sɩ á taá zuli amʋ yɩranɩ. Yɩ taá zuli-na wo-gaa á wəli amʋ wʋnɩ, amʋ yi na pagɩ abam baŋa nɩ tɩn ŋwaanɩ.e
15 Nan yɩ kɩ-na ni-mɔrɔ dɩdaanɩ nɔɔna balʋ na zʋʋrɩ tɩga kam kʋntʋ nɩ tɩn. Abam na mɩ dɩ ba, baá sʋgɩ abam sɩ á taá zuli ba jwǝnǝ yam, yɩ á daarɩ á wǝli ba wʋnɩ sɩ á tɔgɩ á di ba jwǝnǝ wʋdiiru tɩm mʋ. 16 Abam baara bam na di je sɩm kʋntʋ bukwa ba maa kɩ kaana, kaana bam kʋntʋ nan mʋ wʋ́ ganɩ-ba sɩ ba zuli ba jwǝnǝ yam. 17 Yɩ zaŋɩ-na á kwe luguru á nyɩɩnɩ á ma á mɔ wɛ.f
18 Abam wʋ́ taá di Dɩpɛ dɩlʋ na ba jɩgɩ dabɩlɩ dɩ wʋnɩ tɩn candiə kam mʋ. Bɩnɩ maama wʋnɩ, sɩ á kwe da yarpɛ á ma á di dɩpɛ dɩlʋ dabɩlɩ na wʋ wǝli kʋ wʋnɩ tɩn, Abibi cana kam nɩ.g Kʋ dɛɛn yɩ cana kam kʋntʋ nɩ mʋ abam nuŋi Ezipi tɩʋ kʋm wʋnɩ.
19 Á dayigə bu maama yɩ amʋ Baŋa-Wɛ mʋ tei. Kʋ nan yɩ bɩdwɩ mʋ dɩ abam vara dɩ dayigə biə balʋ na yɩ wo-bɛ tɩm. Kʋ zɩ yɩ nʋa na pelbu. 20 Kʋ nan na yɩ bɩnaga ceeri-bu, sɩ á kwe pǝlbu á ləri ka yuu nɩ. Kʋntʋ na warɩ, sɩ á bwəri ka ban á gʋ. Abam wʋ́ kwe wǝǝnu mʋ á ləri á bu-kwɩn sɩm yuu nɩ á pa-nɩ.
Nɔɔn-nɔɔnʋ yɩ ve dɩ jɩ-kʋrɩ o ba amʋ yigə yɩ o ba ze pɛɛrɩ.
21 Kwe-na da yardʋ á tʋŋɩ á tɩtʋŋa, sɩ á daarɩ á sin da yarpɛ dɛ dɩm nɩ.h Kʋ zɩ na yɩ mɩna varɩm maŋa naa wʋdiiru zagɩm maŋa dɩ, sɩ á sin da yarpɛ dɛ dɩm nɩ.
22 Á ta kwəri á taá di daa yarpɛ candiə kam, maŋa kam á na yəni á wʋra á kɩ á wo-vallʋ dayigə biə tɩn. Á daarɩ á ta di faa candiə bɩm dɩm tiim nɩ.i 23 Bɩnɩ maama wʋnɩ sɩ abam baara bam jeeri amʋ yigə nɩ kuni bɩtɔ, sɩ ba zuli-nɩ. Bɛŋwaanɩ, amʋ mʋ yɩ Yisɩrayɛlɩ tiinə Baŋa-Wɛ dɩm. 24 Amʋ lagɩ a zəli dwiə yalʋ na wʋ dáanɩ yɩ abam ta wʋ zʋ da tɩn mʋ, sɩ á na yǝni á jeeri kuni bɩtɔ sɩ á di candi yantʋ, nɔɔn-nɔɔnʋ yɩ kwaanɩ sɩ o joŋi á tɩga kam. A nan ta wʋ́ pa á tɩga kam yalɩ ka pa abam.
25 Abam na kwe varɩm sɩ á kɩ kaanɩm, yɩ wǝli-na dɩpɛ dɩlʋ dabɩlɩ na wʋ kʋ wʋnɩ tɩn da sɩ á kɩ pɛɛrɩ á pa-nɩ. Nan yɩ pa-na sɩ Pakɩ wʋdiu maŋɩ á tee nɩ kʋ pʋʋrɩ tɩga.
26 Bɩnɩ maama wʋnɩ sɩ á ja á karɩ sɩm wʋdiiru tɩlʋ na loori yigə tɩ kɩ yɩ tɩ lamma tɩn á ja á jeeri abam Tu Baŋa-Wɛ digə kam nɩ.
Nɔɔn-nɔɔnʋ yɩ kwe bʋ-bala dɩ ka nu nayɩla o saŋɩ mim wʋnɩ.»
27 Baŋa-Wɛ daa ta ma ta dɩ Moyisi DƖ wɩ: «Pʋpʋnɩ wǝǝnu tɩntʋ maama n tiŋi, sɩ kʋ yɩ a niə yam baŋa nɩ mʋ amʋ kɩ ni-mɔrɔ dɩdaanɩ nmʋ dɩ Yisɩrayɛlɩ tiinə bam maama.» 28 Moyisi nan ya maŋɩ piu kʋm yuu nɩ da fiinna mʋ. Wɩa dɩ tɩtɩɩ nɩ maama mʋ o dɛɛn wʋra dɩ Baŋa-Wɛ, yɩ o ba di wʋdiu, o nan ba nyɔ na. O ma pʋpʋnɩ Wɛ niə fugə kam na brɩ Wɛ ni-mɔrɔ dɩ o nɔɔna bam tɩn, o daŋɩ kandwa-pɩlɛ sɩm baŋa nɩ.
Moyisi yibiyə na nyɩɩnɩ te tɩn
29 Moyisi ma zɩgɩ piu kʋm yuu nɩ o tu nɔɔna bam te, yɩ o ze kandwa-pɩlɛ sɩm Wɛ ni-gonim dɩm bɩtara na pʋpʋnɩ da tɩn. Moyisi dɩ Baŋa-Wɛ nan ya na ŋɔɔnɩ daanɩ tɩn, mʋ o yibiyə tiini ka nyɩɩna yɩ o yǝri kʋ ni nɩ.j 30 Arɔn dɩ Yisɩrayɛlɩ tiinə bam maama na nɛ nɩ Moyisi yibiyə kam nyɩɩnɩ tɩn, ba ma kwarɩ sɩ ba fʋfɔ ba yi o yɩra. 31 Moyisi na maanɩ kʋntʋ tɩn, mʋ o bəŋi Arɔn dɩ Yisɩrayɛlɩ nakwa bam sɩ ba ba o te. Ba na yi da tɩn, o ma ŋɔɔnɩ dɩ ba. 32 Nɔɔna bam maama laan ma fʋfɔ ba yi ba gilimi Moyisi. O dɩ ma kwe Baŋa-Wɛ niə yam DƖ ya na pɛ‑o Sinayi piu kʋm yuu nɩ tɩn o pa-ba.
33 Moyisi yibiyə nan ta nyɩɩnɩ mʋ.k O na ŋɔɔnɩ dɩ nɔɔna bam o ti tɩn, mʋ o kwe gar-fɩfala o ma o kwǝli o yibiyə. 34 Moyisi dɛɛn na lagɩ sɩ o zʋ jero-vwe dɩm nɩ sɩ o dɩ Baŋa-Wɛ ŋɔɔnɩ daanɩ, o yǝni o lɩ gar-fɩfala kam mʋ. O laan maa na nuŋi pooni sɩ o daa yǝni o lwǝni Baŋa-Wɛ na brɩ te maama tɩn o brɩ nɔɔna bam, 35 ba daa ta ma na nɩ o yibiyə tiini ka nyɩɩnɩ mʋ. Moyisi ma na yǝni o ŋɔɔnɩ dɩ ba o ti, oó joori o kwe o gar-fɩfala kam mʋ o kwǝli o yibiyə. O dɛɛn ma yɔɔrɩ o kɩ kʋntʋ mʋ taan sɩ kʋ taa nii o daa na bʋŋɩ sɩ o vu o ŋɔɔnɩ dɩ Baŋa-Wɛ.