Siun dɛ cullu
35
Moyisi ma bəŋi Yisɩrayɛlɩ tiinə kɔgɔ kʋm maama yɩ o ta dɩ ba o wɩ: «Baŋa-Wɛ na tagɩ sɩ á kɩ te tɩn mʋ tɩntʋ: 2 Kwe-na da yardʋ á ma á tʋŋɩ á tɩtʋŋa. Kʋ daarɩ sɩ da yarpɛ dɛ dɩm taa yɩ dɩ yɩra dɩ pa abam. Kʋ maa yɩ siun dɛ, amʋ Baŋa-Wɛ ŋwaanɩ.a Wʋlʋ na tʋŋɩ dɩ dɛ dɩm kʋntʋ nɩ, sɩ á gʋ kʋ tu. 3 Yɩ tarɩgɩ-na mim á sam wʋnɩ sɩ á saŋɩ wʋdiiru da yarpɛ dɛ dɩm nɩ.»Jero-vwe dɩm yɩra zɩla yam
4 Moyisi ta ma ta dɩ Yisɩrayɛlɩ tiinə kɔgɔ kʋm o wɩ: «Baŋa-Wɛ na tagɩ sɩ á kɩ wǝǝnu tɩlʋ tɩn mʋ tɩntʋ: 5 Abam nɔɔnʋ dwi maama maŋɩ sɩ o kɩ sono-pɛɛrɩ mʋ Baŋa-Wɛ ŋwaanɩ. Nɔɔnʋ wʋlʋ maama na jɩgɩ wʋpolo tɩn wʋ́ ja pɛɛra yantʋ dwi mʋ, o ja o ba o pa Baŋa-Wɛ:
səbu-sɩŋa, dɩ səbu-poŋo, dɩdaanɩ canna,
6 dɩ gar-ŋʋnɩ sɩlʋ nyɩnyʋrʋ na yɩ nazon-pupwiə, dɩ nasʋŋ-pupwiə, dɩ nasʋŋʋ cwɛ-cwɛ tɩn, dɩ gar-fɩfalɩ, dɩdaanɩ bʋŋʋ kʋrʋ,
7 dɩ pi-bɩa twannʋ tɩlʋ ba na taŋɩ sɩna tɩn, dɩ dofɛn twaanʋb,
dɩ akasɩa dɛ,
8 dɩ min-zwǝǝnu nugə,
dɩ wǝǝnu tɩlʋ lwǝm na ywǝmmǝ tɩn, tɩlʋ ba na wʋ́ ma ba kɩ Wɛ swəlim nugə kam, dɩ tɩlʋ ba na wʋ́ zwɛ jero-vwe dɩm tɩtʋŋa ŋwaanɩ tɩn,
9 dɩ Onisi kandwa, dɩ kandwa-ŋʋna ya dwi ya dwi, sɩ ba kɩ-ya kaanɩm nakwɩ tu wʋm gwar-wʋgʋ kʋm nɩ, ba daarɩ ba kɩ yadonnə o gwar-palɩ dɩm nɩ.
10 Abam balʋ nan na waɩ ba tʋŋɩ tɩtʋŋɩ dwi dɩlʋ lanyɩranɩ, sɩ ba kwe ba yǝno kʋm ba wǝli sɩ kʋlʋ maama Baŋa-Wɛ na pɛ ni sɩ á kɩ tɩn tɔgɩ cwǝŋǝ. 11 Kʋ maa yɩ tɩntʋ:
Jero-vwe dɩm dɩdaanɩ dɩ gwaarʋ, dɩ tankwallʋ tɩlʋ na wʋ́ kwǝli-dɩ tɩn, dɩ gwəli sɩm, dɩdaanɩ ywə yam, dɩ ya dagarɩ sɩm, dɩ da-dɛɛrʋ tɩm, dɩ luuru tɩlʋ tɩ na zɩgɩ tɩ baŋa nɩ tɩn,
12 kʋ wǝli dɩ Wɛ ni-gonim daka kam, dɩ dɛ sɩlʋ ba na wʋ́ taa ma zɩŋɩ-ka tɩn,
dɩ lwarɩm saarɩm nipugu kʋm,
dɩ gar-jalɩ dɩlʋ na cɩgɩ Wɛ-di-laa cɩga cɩga kam tɩn,
13 dɩ taabʋlʋ kʋm, dɩ kʋ dɛ sɩlʋ ba na wʋ́ taa maa zɩŋɩ-kʋ tɩn, dɩ kʋ yɩra zɩla yam maama, dɩ dɩpwa yalʋ na tigi da Wɛ ŋwaanɩ tɩn,
14 dɩ min-zwǝn-zɩgʋ kʋm dɩ kʋ zɩla yam maama, dɩ min-zwǝǝnu tɩrpɛ tɩm, dɩdaanɩ tɩ nugə kam,
15 dɩ wǝǝnu tɩlʋ lwǝm na ywǝmmǝ tɩn zwɛɛm bimbim dɩm, dɩ dɛ sɩlʋ ba na wʋ́ taa ma zɩŋɩ-ka tɩn,
dɩ wǝǝnu tɩlʋ lwǝm na ywǝmmǝ tɩn tɩtɩ, dɩ Wɛ swəlim nugə kam,
dɩdaanɩ gar-jalɩ dɩlʋ na wʋ́ palɩ jero-vwe dɩm ni nɩ tɩn,
16 dɩ zwɛɛm kaanɩm bimbim dɩm, dɩdaanɩ ka canna luu kʋlʋ na məəli ka yɩra nɩ tɩn, dɩ dɛ sɩlʋ ba na wʋ́ taa maa zɩŋɩ-ka tɩn, dɩ ka yɩra zɩla yam maama,
dɩdaanɩ canna war-zʋŋa kam, dɩ ka na wʋ́ zɩgɩ woŋo kʋlʋ baŋa nɩ tɩn,
17 dɩ kʋnkɔlɔ kʋm gar-jala yam, dɩ dɛ sɩlʋ ya na wʋ́ palɩ sɩ baŋa nɩ tɩn, dɩ sɩ luuru tɩm,
dɩ gar-jalɩ dɩlʋ na wʋ́ cɩ kʋnkɔlɔ kʋm manco-pɩɩna ni dɩm tɩn,
18 dɩ paara yalʋ na wʋ́ cwi ya ja vwe dɩm dɩ kʋnkɔlɔ kʋm zɩla yam tɩn, dɩ ya ŋʋnɩ sɩm,
19 kʋ ta wǝli dɩ nɩnwaŋa gwaarʋ tɩlʋ Wɛ kaanɩm tu Arɔn dɩ o bu-baara bam na wʋ́ taa zʋʋrɩ sɩ ba yǝni ba zʋ Wɛ-digə kam wʋnɩ ba kɩ kaanɩm ba pa‑DƖ tɩn.»
20 Moyisi dɛɛn na ŋɔɔnɩ o ti tɩn, nɔɔna bam ma joori ba vwə nɩ ba daarɩ‑o. 21 Balʋ maama na bʋŋɩ kǝm yɩ ba jɩgɩ wʋpolo kʋ ŋwaanɩ tɩn ma ja pɛɛra ba ba ba pa Baŋa-Wɛ sɩ ya wǝli jero-vwe dɩm tɩtʋŋa yam, dɩ kaanɩm tɩtʋŋa yam, dɩdaanɩ kaanɩm tiinə bam gwaarʋ tɩm sɔɔm. 22 Baara dɩ kaana balʋ maama wʋrʋ na poli tɩn ma ja səbu-sɩŋa wo-nyɩnnʋ dwi dwi ba ba. Ba pɛɛra yam dɛɛn yɩ səbu-sɩŋa gwəli, dɩ zwa-kwana, dɩ jafʋla, dɩdaanɩ zambilə mʋ. Ba maama ma zǝŋi ba pɛɛra yam wɛɛnɩ ba yaarɩ-ya Baŋa-Wɛ yigə nɩ.
23 Badonnǝ dɛɛn ma ja gar-ŋʋnɩ sɩlʋ nyɩnyʋrʋ na yɩ nazon-pupwiə, dɩ nasʋŋ-pupwiə, dɩ nasʋŋʋ cwɛ-cwɛ tɩn, dɩ gar-fɩfalɩ, dɩdaanɩ bʋŋʋ kʋrʋ, dɩ pi-bɩa twannʋ tɩlʋ ba na taŋɩ sɩna tɩn, dɩ twan-nyɩnnʋc ba ba. 24 Balʋ maa na jɩgɩ səbu-poŋo, naa canna, naa akasɩa dɛ sɩlʋ na wʋ́ wǝli tɩtʋŋa yam tɩn, ba dɩ ma ja-tɩ ba ba ba zǝŋi Baŋa-Wɛ yigə nɩ. 25 Kaana balʋ dɩ na ye gar-ŋʋnɩ ŋʋm tɩn dɩ ma ja gar-fɩfalɩ dɩ gar-ŋʋnɩ sɩlʋ ba na ŋʋgɩ tɩn ba ja ba ba. Gar-ŋʋnɩ sɩm nyɩnyʋrʋ maa yɩ nazon-pupwiə, dɩ nasʋŋ-pupwiə, dɩ nasʋŋʋ cwɛ-cwɛ. 26 Kaana bam badonnǝ dɩ ma kwe bʋŋʋ kʋrʋ ba ma ŋʋ gar-ŋʋnɩ.
27 Yigǝ tiinǝ bam ma ja Onisi kandwa dɩ kandwa-ŋʋna dwi dwi ba ba sɩ ba kwe-ya ba məəli kaanɩm yigə tu gwar-wʋgʋ kʋm dɩdaanɩ o gwar-palɩ dɩm yɩra nɩ. 28 Ba ta ma ja min-zwǝǝnu nugə kam, dɩ wo-talooru tɩlʋ ba na wʋ́ wǝli wǝǝnu tɩlʋ lwǝm na ywǝmmǝ tɩn kam wʋnɩ dɩdaanɩ Wɛ swəlim nugə kam wʋnɩ tɩn ba ja ba ba. 29 Moyisi nan ya tagɩ Baŋa-Wɛ na lagɩ sɩ Yisɩrayɛlɩ tiinə bam kɩ tɩtʋŋa yalʋ tɩn o brɩ-ba, pa nɔɔna bam zanzan wʋbʋŋa ja sɩ ba ja wʋ-yoŋo pɛɛra ba ba ba kɩ Wɛ jɩŋa nɩ.
Bezalɩlɩ dɩdaanɩ Oholɩabɩ taanɩ
30 Moyisi laan ma ta dɩ Yisɩrayɛlɩ tiinə bam o wɩ: «Nii-na. Baŋa-Wɛ mʋ kuri Yuri bu Bezalɩlɩ. Wʋntʋ ko-nakwɩ maa yɩ Huuri yɩ o nuŋi Zuda dwi dɩm wʋnɩ. 31 Wɛ kwe DƖ Joro mʋ DƖ pa‑o, pa o jɩgɩ swan, dɩ yi-pʋrʋ, dɩ yǝno sɩ kʋ tiini kʋ gaalɩ, yɩ o waɩ o gɔgɩrɩ wǝǝnu dwi dwi. 32 O waɩ o kwe səbu-sɩŋa, dɩ səbu-poŋo, dɩ canna o maa kɩ wǝǝnu tɩlʋ na tiini tɩ lana tɩn. 33 O ta waɩ o kwe kandwa-ŋʋna dɩ dɛ o sara o maa gɔgɩrɩ wǝǝnu dwi dwi. O yɔɔrɩ o yɩ gɔgɔ mʋ cɩga cɩga. 34 Ayisamakɩ bu Oholɩabɩ dɩ maa wʋra, o na nuŋi Dan dwi dɩm wʋnɩ tɩn. Baŋa-Wɛ ma pa wʋntʋ dɩ Bezalɩlɩ swan sɩ ba brɩ nɔɔna gɔgɔ tɩtʋŋa dwi dwi na yɩ te tɩn. 35 Baŋa-Wɛ ta pɛ-ba swan zanzan, yɩ ba waɩ ba gɔgɩrɩ wo-laarʋ dwi dwi nɩnɛɛnɩ ba na bʋŋɩ te tɩn. Ba ta waɩ ba sɔ gar-fɩfalɩ yɩ ba kwe gar-ŋʋnɩ sɩlʋ nyɩnyʋrʋ na yɩ nazon-pupwiə, dɩ nasʋŋ-pupwiə, dɩ nasʋŋʋ cwɛ-cwɛ tɩn ba ma gɔgɩrɩ nyɩnyʋrʋ ba kɩ da. Ba maa waɩ ba kɩ wo-laarʋ dwi maama pa tɩ tɔgɩ cwǝŋǝ lanyɩranɩ.