36
Kʋ na yɩ Bezalɩlɩ dɩ Oholɩabɩ dɩdaanɩ gwarʋ tɩlʋ maama Baŋa-Wɛ na pɛ-ba swan dɩdaanɩ yi-pʋrʋ sɩ ba taa waɩ ba kɩ jero-vwe dɩm dɩ sɩ zɩla yam maama tɩn, bantʋ maŋɩ sɩ ba yɔɔrɩ ba tʋŋɩ sɩ kʋ tɔgɩ kʋlʋ maama Baŋa-Wɛ na brɩ te tɩn mʋ.»
2 Moyisi dɛɛn ma bəŋi Bezalɩlɩ dɩ Oholɩabɩ dɩdaanɩ gwarʋ tɩlʋ maama Baŋa-Wɛ na pɛ-ba dam yɩ ba wʋbʋŋa ja sɩ ba tʋŋɩ tɩn sɩ ba ba. O laan ma ta dɩ ba sɩ ba puli tɩtʋŋa yam. 3 Ba dɩ maa joŋi pɛɛra yalʋ maama nɔɔna bam na pɛ ba maa kɩ jero-vwe dɩm tɩn Moyisi jɩŋa nɩ. Sɩ kʋ na yɩ nɔɔna bam, ba ta yɔɔrɩ ba jaanɩ wʋ-yoŋo pɛɛra mʋ ba tui Moyisi te dɛ maama zɩzɩŋa nɩ, yɩ ya laan tiini ya gaalɩ. 4 Tɩntʋŋna bam laan ma yagɩ jero-vwe dɩm tɩtʋŋa yɩ ba vu Moyisi te ba wɩ: 5 «Pɛɛra yalʋ nɔɔna bam na jaanɩ ba ba tɩtʋŋa yam ŋwaanɩ tɩn daga ya dwe tɩtʋŋɩ dɩlʋ Baŋa-Wɛ na pɛ dɩbam ni sɩ dɩ́ tʋŋɩ tɩn.»a
6 Moyisi ma tʋŋɩ kwǝrǝ sɩ ka yi nɔɔna bam maama sɩ ba daa yɩ ja pɛɛra ba ba jero-vwe dɩm tɩtʋŋa yam ŋwaanɩ. Ba ma sɩɩnɩ ba yagɩ. 7 Bɛŋwaanɩ, ba na maŋɩ ba pa te tɩn yi sɩ kʋ tʋŋɩ tɩtʋŋa yam sɩ ya ti.
Jero-vwe dɩm lɔɔm
8 Gwarʋ tɩlʋ na tiini ba jɩgɩ swan tɩn dɛɛn ma kɩ daanɩ ba kɩ jero-vwe dɩm. Ba ma kwe gar-jalɩ-laarʋ fugə na nuŋi gar-fɩfalɩ dɩlʋ na yɩ lanyɩranɩ tɩn, yɩ ba daarɩ ba kwe gar-ŋʋnɩ sɩlʋ nyɩnyʋrʋ na yɩ nazon-pupwiə, dɩ nasʋŋ-pupwiə, dɩ nasʋŋʋ cwɛ-cwɛ tɩn ba ma gɔgɩrɩ Serubɛn nyɩnyʋrʋ ba kɩ gar-jala yam yɩra nɩ. 9 Gar-jala fugə kam maama dɛɛn maɩ daanɩ mʋ. Gar-jalɩ dɩdwɩ dɩdwarɩm maa yɩ kantɩ ni maŋɩm kuni fiinle-nana. Dɩ saŋ-kukugə maa yɩ kantɩ ni maŋɩm kuni bɩna. 10 Ba ma nyaanɩ gar-jala yanu ba toŋi daanɩ, ba ta daarɩ ba nyaanɩ yanu yadonnə yam dɩ ba toŋi daanɩ. Tɩ laan ma ji garɩ-punə yale. 11-12 Ba daa ta maa kwe gar-ŋʋnɩ sɩlʋ nyɩnyʋrʋ na yɩ nazon-pupwiə tɩn ba kɩ kunə fiinnu ba lə garɩ-pum ni-dɩdɔrɔ kʋm seeni. Ba ma daarɩ ba kɩ kʋntʋ garɩ-pum dɩdoŋ dɩm nɩ. Ba ma kɩ kunə yam garɩ-punə yale niə dɩdwaarʋ tɩm na jeeri daanɩ tɩn yɩra nɩ. 13 Ba ta ma kɩ səbu-sɩŋa gwəli fiinnu mʋ sɩ sɩ ja garɩ-punə yale yam sɩ kɩ daanɩ. Kʋ ma pa garɩ-punə yale yam məəli daanɩ pa jero-vwe dɩm ji woŋo dɩdʋa.
14 Ba dɛɛn ma kwe bʋŋʋ kʋrʋ ba sɔ gar-jala sɩ ba ma-ya ba pu jero-vwe dɩm yuu kʋm seeni. Ya maama kɩ daanɩ sɩ ya taa yɩ fugə-dɩdʋa mʋ. 15 Ya maa maɩ daanɩ mʋ. Ya saŋ-dɩdɔrɔ yɩ kantɩ ni maŋɩm kuni fiintɔ. Ya saŋ-kukugə maa yɩ kantɩ ni maŋɩm kuni bɩna. 16 Ba ma kwe gar-jala yanu ba toŋi daanɩ sɩ ya ji garɩ-pum, yɩ ba daarɩ ba kwe gar-jala yardʋ yam na daarɩ tɩn mʋ ba toŋi daanɩ sɩ ya dɩ ji garɩ-pum. 17 Ba ma kɩ kunə fiinnu ba lə garɩ-pum ni-dɩdɔrɔ kʋm seeni, yɩ ba daarɩ ba kɩ kʋntʋ garɩ-pum dɩdoŋ dɩm nɩ. 18 Ba dɛɛn ta kwe canna ba maa kɩ gwəli fiinnu pa sɩ toŋi garɩ-punə yale yam daanɩ sɩ ya ji gɔrɔ dɩdʋa. 19 Ba ta ma pwəni pi-bɛ twannʋ tɩ na taŋɩ sɩna sɩ ba maa kwǝli jero-vwe dɩm, yɩ ba kwe dofɛn twaanʋ ba daŋɩ pulim twannʋ tɩm baŋa nɩ.
20 Ba dɛɛn ma kwe akasɩa dɛ ba ma kɩ ywə yalʋ na zɩgɩ cɛpɩ tɩn, sɩ ba ma kɩ jero-vwe dɩm. 21 Ywe maama saŋ-dɩdɔrɔ maŋɩm maa yɩ kantɩ ni maŋɩm kuni fugə mʋ, yɩ dɩ saŋ-kukugə seeni yɩ kantɩ ni maŋɩm dɩdʋa dɩ cicoro. 22 Ba laan ma sarɩ nwa bale ywe maama yɩra nɩ sɩ ba pa ywe maama taa waɩ dɩ toŋi dɩdaanɩ dɩdoŋ na saŋɩ-dɩ tɩn. 23 Ba ta kɩ ywə fiinle sɩ ya zɩgɩ ya maŋɩ dɩ jero-vwe dɩm jagwiə seeni, 24 yɩ ba daarɩ ba kwe səbu-poŋo ba maa kɩ wǝǝnu tɩlʋ na wʋ́ təli ywə yam tɩn fiinna, pa luuru tɩle taa zɩgɩ ywe dɩdʋa maama ŋwaanɩ. Tɩ maa jɩgɩ cwiim je sɩle mʋ sɩ ywe nwa bam wanɩ ba zɩgɩ sɩ wʋnɩ. 25 Ba daa ta ma kɩ kʋntʋ sɩ kʋ maŋɩ dɩ jero-vwe dɩm jazɩm baŋa seeni saŋa kam dɩ, sɩ ywə fiinle taa zɩgɩ da. 26 Ba ma kɩ səbu-poŋo wǝǝnu fiinna sɩ tɩ təli ywə yam. Luuru tɩle maa wʋra ywe dɩdʋa maama ŋwaanɩ. 27 Kʋ na yɩ saŋa kalʋ na wʋ bri-kwaga nɩ yɩ ka jeeri wa-zʋʋrɩ seeni tɩn, ba ma kɩ ywə yardʋ sɩ ba cwi-tɩ dáanɩ. 28 Ba ta ma kɩ ywə yale ba wǝli da sɩ ba cwi-tɩ vwe dɩm kwaga saŋa kam gugwəəru tɩle tɩm nɩ. 29 Ba ma toŋi gugwəəru ywə yam kʋntʋ sɩ ya məəli daanɩ. Kʋ zɩgɩ tɩga kam nɩ mʋ kʋ məəli sɩ kʋ taa diini baŋa kam mɛ səbu-sɩŋa kwanɩb dɩm na lǝgi da tɩn. 30 Bri-kwaga kam seeni ywə yam dɛɛn yɩ nana mʋ, yɩ ya jɩgɩ luuru fugə-tɩrdʋ tɩlʋ na təli-tɩ tɩn.
31-32 Ba ma kwe akasɩa dɛ mʋ ba ma-sɩ ba garɩ jero-vwe dɩm sɛn sɩm maama. Dagarɩ sɩnu mʋ garɩ ywə yam na wʋ saŋa kalʋ maama nɩ tɩn, sɩ ya ja daanɩ lanyɩranɩ. Jagwiə seeni saŋa kam, dɩ jazɩm baŋa seeni saŋa kam dɩ bri-kwaga seeni saŋa kam mʋ kʋntʋ. 33 Tɩtarɩ dagara kam ma tʋlɩ ka zɩgɩ saŋa kam daa dɩdʋa nɩ ka vu ka yi daa kadoŋ kam, ka toŋi ywə yam maama ka kɩ daanɩ. 34 Ba dɛɛn ta kwe səbu-sɩŋa ba kwǝli ywə yam, yɩ ba daarɩ ba maa kɩ kwana ba məəli ywə yam yɩra nɩ sɩ dagarɩ sɩm taa tʋrɩ ya wʋnɩ. Ba ta ma kwǝli dagarɩ sɩm dɩ səbu-sɩŋa.
35 Ba ta ma kwe gar-fɩfalɩ dɩ gar-ŋʋnɩ sɩlʋ nyɩnyʋrʋ na yɩ nazon-pupwiə, dɩ nasʋŋ-pupwiə, dɩ nasʋŋʋ cwɛ-cwɛ tɩn ba ma sɔ gar-jalɩ dɩlʋ na wʋ́ cɩ Wɛ-di-laa cɩga cɩga kam tɩn. Ba ma daarɩ ba gɔgɩrɩ Serubɛn nyɩnyʋrʋ ba kɩ gar-jalɩ dɩm yɩra nɩ. 36 Ba ta ma sarɩ akasɩa da-dɛɛrʋ tɩna mʋ ba taagɩ-sɩ dɩ səbu-sɩŋa, sɩ gar-jalɩ dɩm lə sɩ yɩra nɩ. Ba laan ma kɩ səbu-sɩŋa gwəli sɩna ba məəli sɩ yɩra nɩ, yɩ ba daarɩ ba kwe səbu-poŋo ba ma kɩ luuru sɩ tɩ təli da-dɛɛrʋ tɩm.
37 Kʋ na yɩ jəro-vwe ni dɩm, ba ma kwe gar-fɩfalɩ sɩlʋ na yɩ lanyɩranɩ tɩn dɩ gar-ŋʋnɩ sɩlʋ nyɩnyʋrʋ na yɩ nazon-pupwiə, dɩ nasʋŋ-pupwiə, dɩ nasʋŋʋ cwɛ-cwɛ tɩn ba ma sɔ gar-jalɩ dɩlʋ na wʋ́ lə ni dɩm nɩ tɩn. Ba ma daarɩ ba gɔgɩrɩ nyɩnyʋrʋ gar-jalɩ dɩm yɩra nɩ. 38 Ba ma kɩ da-dɛɛrʋ tɩnu, yɩ ba məəli gwəli tɩ yɩra nɩ. Ba ma kwǝli sɩ yum tɩm dɩ sɩ niə yam dɩ səbu-sɩŋa. Ba ta ma kwe canna ba ma mɔ luuru tɩnu sɩ tɩ təli da-dɛɛrʋ tɩm, yɩ ba palɩ gar-jalɩ dɩm dɛ sɩm baŋa nɩ.