Wɛ ni-gonim daka kam
37
Bezalɩlɩ dɛɛn ma kwe akasɩa dɛ o ma kɩ Wɛ ni-gonim daka kam. Ka maa yɩ kantɩ ni maŋɩm kuni bɩle dɩ cicoro mʋ saŋ-dɩdɔrɔ nɩ. Saŋ-kukugə maa yɩ kantɩ ni maŋɩm dɩdʋa dɩ cicoro. Ka jazɩm baŋa seeni dɩ maa yɩ kantɩ ni maŋɩm dɩdʋa dɩ cicoro. 2 O ma kwe səbu-sɩŋa na tiini ka yɩ lanyɩranɩ tɩn o ma kwǝli ka yigə dɩ ka kwaga maama, yɩ o pa səbu-sɩŋa tɔgɩ ka niə yam maama. 3 O ta ma mɔ səbu-sɩŋa kwana yana. O ma kwe ya dɩdʋa dɩdʋa o məəli bimbim dɩm nɛ sɩna maama yɩra nɩ. Kwana yale maa wʋ daka kam saŋa dɩdʋa nɩ, yale maa wʋ saŋa kadoŋ nɩ. 4 O ma goni akasɩa da-dɩdwaarʋ tɩle o daarɩ o kwe səbu-sɩŋa o kwǝli dɛ sɩm kʋntʋ maama. 5 O ma kwe dɛ sɩm o tʋrɩ kwana yana yam wʋnɩ sɩ ba taa maɩ ba zɩŋɩ daka kam.6 O ma kwe səbu-sɩŋa kalʋ na tiini ka yɩ lanyɩranɩ tɩn o ma kɩ lwarɩm saarɩm nipugu sɩ kʋ pu daka kam. Ka saŋ-dɩdɔrɔ maa yɩ kantɩ ni maŋɩm bɩle dɩ cicoro, ka saŋ-kukugə dɩ maa yɩ kantɩ ni maŋɩm dɩdʋa dɩ cicoro. 7-8 O ta ma kwe səbu-sɩŋa o ma mɔ wǝǝnu tɩle na nyɩ dɩ malɛsɩ yɩ ba bǝi-ba nɩ Serubɛn tɩn. Serubɛn sɩle sɩm məəli sɩ zɩgɩ nipugu kʋm dɛ sɩle sɩm nɩ mʋ. O dɛɛn kwe səbu-sɩŋa kamɔgɔ dɩdʋa mʋ o magɩ-tɩ o kɩ Serubɛn sɩle sɩm dɩdaanɩ nipugu kʋm tɩtɩ. 9 Serubɛn sɩm dɛɛn jeeri daanɩ mʋ, yɩ sɩ yibiyə cɔɔlɩ tɩga nɩ sɩ sɩ taa nii daka kam nipugu kʋm seeni. Sɩ vwana dɩ maa yarɩgɩ wɛɛnɩ, yɩ sɩ laan kwaarɩ sɩ vwana yam daanɩ sɩ ma-ya sɩ kwǝli nipugu kʋm.
Dɩpɛ taabʋlʋ kʋm
10 Bezalɩlɩ daa ma kwe akasɩa dɛ o ma kɩ taabʋlʋ. Kʋ saŋ-dɩdɔrɔ maŋɩm yɩ kantɩ maŋɩm bɩle mʋ, yɩ kʋ saŋ-kukugə maŋɩm dɩm yɩ kantɩ ni maŋɩm bɩdwɩ. Kʋ wɛ-baŋa seeni maŋɩm maa yɩ kantɩ ni maŋɩm dɩdʋa dɩ cicoro mʋ. 11 O dɛɛn ma kwe səbu-sɩŋa na yɩ lanyɩranɩ tɩn o kwǝli kʋ yigə dɩ kʋ kwaga maama, yɩ o daarɩ o pa səbu-sɩŋa kam tɔgɩ kʋ niə yam. 12 Səbu-sɩŋa kam na tɔgɩ taabʋlʋ kʋm niə yam tɩn dɛɛn yɩ dayigǝ nʋa maŋɩm mʋ. 13 O ta ma kwe səbu-sɩŋa o mɔ kwana yana o məəli taabʋlʋ kʋm nɛ sɩna sɩm na wʋ mɛ tɩn. 14 Kwana yam kʋntʋ nan məəli ya bwələ dɩ taabʋlʋ kʋm niə yam mʋ, yɩ dɛ sɩlʋ ba na wʋ́ taa maɩ ba zɩŋɩ-kʋ tɩn tʋrɩ ya wʋnɩ. 15 O laan ma sarɩ akasɩa da-dɩdwaarʋ yɩ o daarɩ o taagɩ-sɩ dɩdaanɩ səbu-sɩŋa. 16 Kʋ kwaga nɩ mʋ o kwe səbu-sɩŋa na yɩ lanyɩranɩ tɩn o kɩ zwɩ dwi dwi taabʋlʋ kʋm tɩtʋŋa yam ŋwaanɩ. Sɩ maa yɩ zʋŋ-tanlɛ, dɩ kabǝli, dɩ kambi sɩlʋ na wʋ́ taa tʋŋɩ wo-nyɔɔrʋ pɛɛra tɩtʋŋa tɩn.
Min-zwǝn-zɩgʋ kʋm
17 Bezalɩlɩ nan ta kwe səbu-sɩŋa kalʋ na yɩ lanyɩranɩ tɩn o ma kɩ woŋo kʋlʋ min-zwǝǝnu na wʋ́ taa zɩgɩ kʋ baŋa nɩ tɩn. O dɛɛn mɛ səbu-sɩŋa kamɔgɔ dɩdʋa mʋ o magɩ sɩ o mɔ kʋ kuri, dɩ kʋ daa kam, dɩ zwɩ sɩlʋ min-zwǝǝnu tɩm na wʋ́ zɩgɩ sɩ wʋnɩ tɩn. Zwɩ sɩm maa nyɩ dɩ pun-kʋgɩla mʋ. 18 Min-zwǝn-zɩgʋ kʋm ya jɩgɩ nɛ sɩrdʋ mʋ, yɩ sɩ nuŋi tɩtarɩ daa kam yɩra nɩ. Nɛ sɩtɔ maa wʋ jazɩm baŋa nɩ yɩ sɩtɔ wʋ jagwiə baŋa nɩ. 19 Nɩnwaŋa punnu tɩtɔ mʋ wʋ naga maama nɩ, sɩ tɩ taa nyɩ dɩ Amandiə pun-kʋgɩla dɩ tɩ vɔɔrʋ. Nɛ sɩrdʋ sɩm maama maa yɩ kʋntʋ mʋ. 20 Kʋ tɩtarɩ daa kam tɩtɩ dɛɛn jɩgɩ nɩnwaŋa punnu tɩna mʋ na nyɩ dɩ Amandiə pun-kʋgɩla dɩ tɩ vɔɔrʋ tɩn. 21 Pun-kʋgɩlɩ dɩdwɩ maama na wʋ daa kam yɩra nɩ tɩn mʋ təli nɛ sɩle sɩlʋ maama na jeeri daanɩ ka yɩra nɩ tɩn. Kʋntʋ tɩn, pun-kʋgɩla yatɔ mʋ təli nɛ sɩrdʋ sɩm. 22 O ma magɩ səbu-sɩŋa kamɔgɔ dɩdʋa mʋ o ma kɩ pun-kʋgɩla yam, dɩ nɛ sɩrdʋ sɩm, dɩ tɩtarɩ daa kam tɩtɩ maama. 23 O ta ma kɩ min-zwǝǝnu tɩrpɛ sɩ tɩ taa zɩgɩ da, yɩ o daarɩ o kwe səbu-sɩŋa kam o ma kɩ wǝǝnu tɩlʋ na wʋ́ fɔgɩ tɩ kwɛ mim dɩm tɩn, dɩdaanɩ zʋŋ-tanlɛ sɩlʋ ba na wʋ́ taa maɩ ba pɛ tɩntwarɩm dɩm tɩn. 24 O dɛɛn kwe səbu-sɩŋa kalʋ yɩ lanyɩranɩ yɩ ka duuni maŋɩ dɩ kilo fiintɔ-tɩnu (35) tɩn mʋ o ma kɩ min-zwǝn-zɩgʋ kʋm dɩ kʋ zɩla yam maama.
Wo-talooru kaanɩm bimbim dɩm
25 Bezalɩlɩ daa ma kwe akasɩa dɛ o ma kɩ bimbim dɩlʋ wǝǝnu tɩlʋ lwǝm na ywǝmmǝ tɩn na wʋ́ taa zwɛ dɩ baŋa nɩ tɩn. Dɩ sɛn sɩm dɛɛn maɩ daanɩ mʋ, saŋ-dɩdɔrɔ dɩ saŋ-kukugə seeni. Saŋa maama maa yɩ kantɩ ni maŋɩm bɩdwɩ mʋ. Kʋ daarɩ ka wɛ-baŋa maŋɩm yɩ kantɩ ni maŋɩm kuni bɩle mʋ. O ma kɩ-ka dɩdaanɩ nyɩa yana sɩ ya cəli wɛɛnɩ nɩnɛɛnɩ na-bɩa nyɩa te. 26 O maa kwe səbu-sɩŋa kalʋ na yɩ lanyɩranɩ tɩn o kwǝli bimbim dɩm maama, yɩ o daarɩ o ma səbu-sɩŋa kam o tɔgɩ ka niə yam maama. 27 O laan ma kɩ səbu-sɩŋa kwana yale o məəli-ya bimbim dɩm sɛn sɩle sɩm nɩ sɩ ya maŋɩ dɩ ka niə yam kuri seeni. Kwana yam maŋɩ sɩ ba tʋrɩ dɛ mʋ ya wʋnɩ sɩ nɔɔna taa maɩ ba zɩŋɩ bimbim dɩm. 28 Dɛ sɩm tɩtɩ maa yɩ akasɩa dɛ mʋ o mɛ o kɩ, yɩ o daarɩ o kwe səbu-sɩŋa o kwǝli sɩ maama.
29 Bezalɩlɩ dɛɛn ma viiri Wɛ swəlim nugə kam na yɩ ka yɩra tɩn. O ma daarɩ o guugi wǝǝnu tɩlʋ na wʋ́ pa wǝǝnu tɩlʋ lwǝm na ywǝmmǝ tɩn taa yɩ lanyɩranɩ tɩn.