Zwɛɛm kaanɩm bimbim dɩm
38
Bezalɩlɩ dɛɛn kwe akasɩa dɛ mʋ o kɩ bimbim sɩ ba taa zwɛ kaanɩm dɩ baŋa nɩ. O ma kɩ-dɩ pa dɩ sɛn sɩna sɩm taa maɩ daanɩ, kantɩ ni maŋɩm kuni bɩnu. Kʋ daarɩ dɩ wɛ-baŋa maŋɩm dɩm maa yɩ kantɩ ni maŋɩm kuni bɩtɔ. 2 O ma sarɩ wǝǝnu tɩna na nyɩ dɩ nyɩa o kɩ bimbim dɩm gugwəəru tɩna tɩm nɩ. Tɩntʋ dɩ bimbim dɩm maama dɛɛn yɩ woŋo dɩdʋa mʋ, yɩ o ma canna o taagɩ ka dɩdaanɩ ka nyɩa yam maama. 3 O ta ma kwe canna o kɩ bimbim dɩm yɩra tɩtʋŋa zɩla maama. O ma mɔ zwɩ sɩlʋ ba na wʋ́ taa maɩ ba pɛ tɩntwarɩm tɩn, dɩ sɛbʋllʋ, dɩ na-zwɩ dɩ mim zʋŋ-tanlɛ, dɩdaanɩ wǝǝnu tɩlʋ na wʋ́ taa maɩ tɩ cu nwana tɩn. 4 O ma maŋɩ bimbim dɩm tɩtarɩ nɩ o kɩ wo-daŋɔ o məəli ka yɩra nɩ. O laan ma kwe canna luuru o sɔ o lɛɛnɩ daanɩ, yɩ o daarɩ o kɩ woŋo kʋm kʋntʋ sɩ kʋ yi wo-daŋɔ kʋm kuri nɩ. 5 O ta ma kɩ canna kwana yana mʋ o məəli bimbim dɩm sɛn sɩna sɩm nɩ sɩ ya maŋɩ dɩ canna lɛɛna yam, sɩ dɛ wanɩ sɩ taa tʋrɩ da. 6 O ma sarɩ akasɩa dɛ sɩlʋ ba na wʋ́ taa maɩ ba zɩŋɩ bimbim dɩm tɩn, yɩ o daarɩ o taagɩ-sɩ dɩ canna. 7 O ma kwe-sɩ o tʋrɩ kwana yana yam na wʋ bimbim dɩm sɛn sɩm nɩ tɩn. O dɛɛn na kɩ kaanɩm bimbim dɩm tɩn mʋ o toŋi dɛ sɩm daanɩ sɩ ka taa yɩ wo-wʋgʋ.Canna war-zʋŋa kam
8 Kaana badonnǝ dɛɛn yǝni ba wʋ jero-vwe dɩm manco-pɩɩna yam ni nɩ ba zǝni tɩtʋŋa. Bezalɩlɩ ma joŋi canna niiru ba tee nɩ yɩ o kwe-tɩ o ma mɔ war-zʋŋa kam dɩ ka na wʋ́ taa zɩgɩ woŋo kʋlʋ baŋa nɩ tɩn.
Jero-vwe dɩm kʋnkɔlɔ kʋm
9 Bezalɩlɩ dɛɛn cɩgɩ jero-vwe dɩm kʋnkɔlɔ kʋm mʋ. O ma sɔ gar-fɩfalɩ sɩ sɩ kaagɩ-kʋ. Kʋ jagwiə seeni maŋɩm yɩ kantɩ ni maŋɩm kuni bi mʋ saŋ-dɩdɔrɔ nɩ, 10 yɩ gar-jala yam palɩ da-dɛɛrʋ fiinle baŋa nɩ mʋ, tɩ na zɩgɩ canna luuru fiinle baŋa nɩ tɩn. O dɛɛn mɛ səbu-poŋo o mɔ gwəli o məəli dɛ sɩm yɩra nɩ yɩ o kɩ sɩ lu-vɔɔrʋ tɩm. 11 Kʋnkɔlɔ kʋm jazɩm baŋa seeni saŋa kam dɛɛn yɩ bɩdwɩ dɩ jagwiə seeni saŋa kam mʋ. 12 Sɩ kʋ na yɩ saŋa kalʋ na jeeri wa-zʋʋrɩ seeni tɩn, ka maŋɩm yɩ kantɩ ni maŋɩm kuni fiinnu mʋ saŋ-dɩdɔrɔ nɩ. Ba ma daŋɩ gwaarʋ tɩm da-dɛɛrʋ fugə dɩ tɩ luuru fugə kam baŋa nɩ sɩ ba ma kwǝli saŋa kam kʋntʋ. Ba ma məəli səbu-poŋo gwəli dɛ sɩm yɩra nɩ yɩ ba kɩ sɩ lu-vɔɔrʋ tɩm. 13 Kʋnkɔlɔ kʋm wa-puli seeni saŋa kam maŋɩm dɩ dɛɛn yɩ kantɩ ni maŋɩm kuni fiinnu mʋ saŋ-dɩdɔrɔ nɩ.
14 Jero-vwe dɩm manchoŋo ni dɩm maa wʋ wa-puli seeni saŋa kam nɩ mʋ. Ni dɩm jazɩm seeni mʋ ba lǝgi gwaarʋ tɩlʋ dɩdwarɩm na yɩ kantɩ ni maŋɩm kuni fugə-bɩnu yɩ tɩ daŋɩ da-dɛɛrʋ tɩtɔ dɩ tɩ luuru tɩtɔ tɩm baŋa nɩ tɩn. 15 Ni dɩm jagwiə seeni dɩ maa yɩ kʋntʋ mʋ. 16 Ba dɛɛn kwe gar-fɩfalɩ sɩlʋ na yɩ lanyɩranɩ tɩn ba ma sɔ gwaarʋ tɩlʋ na wʋ́ cɩ jero-vwe dɩm kʋnkɔlɔ kʋm tɩn. 17 Ba dɛɛn mɛ canna mʋ ba kɩ luuru tɩlʋ na təli da-dɛɛrʋ tɩm tɩn. Sɩ kʋ na yɩ gwəli sɩm dɩ lu-vɔɔrʋ tɩm, səbu-poŋo mʋ ba mɛ ba kɩ-tɩ sɩ tɩ məəli da-dɛɛrʋ tɩm maama yɩra nɩ. Ba ma kwǝli da-dɛɛrʋ tɩtɩ yum tɩm dɩ səbu-sɩŋa.
18 Kʋ nan na yɩ manchoŋo ni dɩm gar-jalɩ dɩm tɩtɩ, ba dɛɛn mɛ gar-fɩfalɩ dɩ gar-ŋʋnɩ sɩlʋ nyɩnyʋrʋ na yɩ nazon-pupwiə, dɩ nasʋŋ-pupwiə, dɩ nasʋŋʋ cwɛ-cwɛ tɩn mʋ ba sɔ-dɩ. Ba ta ma gɔgɩrɩ-dɩ dɩ nyɩnyʋrʋ lanyɩranɩ. Gar-jalɩ dɩm kʋntʋ yɩ kantɩ ni maŋɩm kuni fiinle mʋ saŋ-dɩdɔrɔ nɩ, yɩ dɩ yɩ kantɩ ni maŋɩm kuni bɩnu wɛ-baŋa seeni, nɩnɛɛnɩ kʋnkɔlɔ kʋm gwaarʋ tɩm na maɩ te tɩn. 19 Gar-jalɩ dɩm palɩ da-dɛɛrʋ tɩna na cwi canna luuru tɩna baŋa nɩ tɩn mʋ. Ba mɛ səbu-poŋo mʋ ba kɩ sɩ gwəli sɩm dɩ sɩ lu-vɔɔrʋ tɩm yɩ ba kwǝli sɩ yum tɩm. 20 Ba ta ma kwe canna ba ma kɩ paara yalʋ na wʋ́ taa jaanɩ vwe dɩm dɩ kʋnkɔlɔ kʋm gwaarʋ tɩm dɩdaanɩ dɛ sɩm maama tɩn.
Zɩla yalʋ ba na mɛ ba kɩ jero-vwe dɩm tɩn
21 Zɩla yalʋ maama ba dɛɛn na mɛ ba kɩ jero-vwe dɩm mɛ Wɛ ni-gonim kandwa yam na tigi tɩn duuni na maɩ te tɩn mʋ tɩntʋ. Vwe dɩm dɩdaanɩ dɩ zɩla yam maama mʋ kʋntʋ. Moyisi ma pa Levi dwi tiinə bam pʋpʋnɩ-tɩ ba tiŋi. Wɛ kaanɩm tu Arɔn bu Itamarɩ dɛɛn nan mʋ nii jeelim dɩm baŋa nɩ. 22 Yuri bu Bezalɩlɩ ya nuŋi Zuda dwi dɩm wʋnɩ mʋ. O maa nii tɩtʋŋɩ dɩm maama baŋa nɩ, nɩnɛɛnɩ Baŋa-Wɛ dɛɛn na maŋɩ DƖ brɩ nɩ ba kɩ te tɩn. 23 Ayisamakɩ bu Oholɩabɩ dɩ ya nuŋi Dan dwi dɩm wʋnɩ mʋ. O maa tiini o wǝli Bezalɩlɩ pa ba kɩ woŋo maama. Oholɩabɩ dɛɛn yɩ gɔgɔ mʋ cɩga cɩga, yɩ o waɩ o maɩ gar-fɩfalɩ, dɩ gar-ŋʋnɩ sɩlʋ nyɩnyʋrʋ na yɩ nazon-pupwiə, dɩ nasʋŋ-pupwiə, dɩ nasʋŋʋ cwɛ-cwɛ tɩn o gɔgɩrɩ wo-laarʋ.
24 Kʋ na yɩ səbu-sɩŋa kalʋ nɔɔna bam na jaanɩ ba ba ba pa Baŋa-Wɛ jero-vwe dɩm tɩtʋŋa ŋwaanɩ tɩn, ka duuni maŋɩm dɩm dɛɛn maa yɩ kilo mʋrʋ dɩdʋa (1000) mʋ, sɩ kʋ tɔgɩ jero-vwe dɩm maŋɩm cɩga cɩga na yɩ te tɩn.
25 Səbu-poŋo tɩm Moyisi dɛɛn na joŋi nɔɔna bam jeelim dɩm baŋa nɩ tɩn maŋɩm dɩm dɩ maa yɩ kilo mʋrrʋ tɩtɔ dɩ biə-yana dɩ fiintɔ (3,430) mʋ. 26 Nɔɔnʋ wʋlʋ maama na yi bɩna fiinle yɩ o tɔgɩ o wʋ garɩm dɩm wʋnɩ tɩn ya ŋwɩ sɛkɛlɩ cicoro mʋ, sɩ kʋ duuni tɔgɩ jero-vwe dɩm maŋɩm cɩga cɩga.a Ba na jeeli nɔɔna bam ni tɩn, ba nɛ nɩ baara mʋrʋ kuni biə-yardʋ dɩ yatɔ, dɩdaanɩ biə-yanu dɩ fiinnu (603,550) mʋ wʋra, yɩ ba joŋi səbu-poŋo tɩm kʋntʋ ba tee nɩ ba ma tʋŋɩ. 27 Ba ma kwe səbu-poŋo kilo mʋrrʋ tɩtɔ dɩ biə-yana (3,400) ba ma kɩ luuru bi (100) sɩ tɩ təli jero-vwe dɩm dɩ dɩ gar-jalɩ dɩm. Luu maama maa yɩ səbu-poŋo kilo fiintɔ-tɩna (34) mʋ ba mɛ ba kɩ. 28 Səbu-poŋo kilo fiintɔ (30) tɩlʋ na daarɩ tɩn mʋ ba mɛ ba kɩ gwəli sɩm dɩdaanɩ lu-vɔɔrʋ tɩm, yɩ ba ta ma-tɩ ba kwǝli da-dɛɛrʋ yum tɩm.
29 Kʋ nan na yɩ canna kalʋ nɔɔna bam na kwe ba pa Baŋa-Wɛ tɩn, ka maŋɩm dɩm yɩ kilo mʋrrʋ tɩle dɩ biə-yana dɩ fiinle-tɩnu (2,425) mʋ. 30 Canna kam kʋntʋ mʋ ba mɛ ba kɩ luuru tɩlʋ na təli jero-vwe dɩm ni dɛ sɩm dɩ dɩ gwaarʋ tɩm. Ba ta ma kwe-ka ba kɩ zwɛɛm kaanɩm bimbim dɩm, dɩ ka tɩtarɩ luu kʋm, dɩ ka yɩra zɩla yam maama. 31 Ba dɛɛn ta mɛ canna kam ba kɩ luuru tɩlʋ na təli kʋnkɔlɔ kʋm dɛ sɩm dɩ kʋ gwaarʋ tɩm, dɩdaanɩ manchoŋo ni dɩm dɛ sɩm dɩ dɩ gar-jalɩ dɩm, kʋ wǝli dɩ paara yalʋ na wʋ́ taa jaanɩ jero-vwe dɩm dɩ dɩ kʋnkɔlɔ kʋm gwaarʋ tɩm dɩ tɩ dɛ sɩm maama mʋ.