Wɛ kaanɩm tiinə gwaarʋ tɩm
39
Gwarʋ tɩm dɛɛn ma kwe gar-ŋʋnɩ sɩlʋ nyɩnyʋrʋ na yɩ nazon-pupwiə, dɩ nasʋŋ-pupwiə, dɩ nasʋŋʋ cwɛ-cwɛ tɩn ba ma sɔ nɩnwaŋa gwaarʋ sɩ Arɔn dɩ kaanɩm tiinə bam maama taa zʋʋra, kʋ maŋɩ dɩ ba na yǝni ba zʋ Wɛ jero-vwe dɩm di-laa kʋm wʋnɩ sɩ ba tʋŋɩ. Kʋ maama dɛɛn kɩ kʋ tɔgɩ nɩnɛɛnɩ Baŋa-Wɛ ya na brɩ Moyisi te tɩn mʋ.Gwar-wʋgʋ kʋm
2 Gwarʋ tɩm ma kwe gar-fɩfalɩ sɩlʋ na yɩ lanyɩranɩ tɩn, yɩ ba laan wǝli dɩ gar-ŋʋnɩ sɩlʋ nyɩnyʋrʋ na yɩ nazon-pupwiə, dɩ nasʋŋ-pupwiə, dɩ nasʋŋʋ cwɛ-cwɛ tɩn ba ma sɔ gwar-wʋgʋ kʋm. 3 Ba ma tiini ba magɩ səbu-sɩŋa pa ka caanɩ ka ji ŋʋn-mɩmɩnɩ. Ba ma kwe-sɩ ba gɔgɩrɩ nyɩnyʋrʋ ba wǝli dɩ gar-fɩfalɩ sɩm dɩ gar-ŋʋnɩ sɩlʋ nyɩnyʋrʋ na yɩ nazon-pupwiə, dɩ nasʋŋ-pupwiə, dɩ nasʋŋʋ cwɛ-cwɛ tɩn. 4 Ba dɛɛn ta kɩ vʋvwɩ sɩle mʋ ba pa tɔgɩ gwar-wʋgʋ kʋm vwana yam seeni sɩ kʋ pa gɔrɔ kʋm yigə dɩ kwaga toŋi daanɩ. 5 Ba ta ma kɩ təŋə vʋvʋa sɩ ka dɩ taa yɩ bɩdwɩ dɩ gwar-wʋgʋ kʋm. Ba dɛɛn kwe wǝǝnu tɩlʋ ba na mɛ ba sɔ gwar-wʋgʋ kʋm tɩn mʋ ba ma kɩ vʋvʋa kam. Kʋntʋ maama dɛɛn kɩ kʋ tɔgɩ dɩ Baŋa-Wɛ ya na brɩ Moyisi te tɩn mʋ.
6 Ba ma kwe Onisi kandwa-ŋʋna tɩm yɩ ba sarɩ Yisɩrayɛlɩ dwi maama yɩrɩ ba kɩ ya baŋa nɩ. Ba ta ma kwe səbu-sɩŋa ba tɔgɩ ya niə yam maama. 7 Ba laan ma məəli kandwa-ŋʋna tɩm ba lə gwar-wʋgʋ kʋm vwana vʋvwɩ sɩm yɩra nɩ. Ya yɩ kandwa-gulə mʋ sɩ ya guli Yisɩrayɛlɩ tiinə bam ba dwiə yam yɩra. Kʋntʋ dɛɛn kɩ kʋ tɔgɩ dɩ Baŋa-Wɛ ya na brɩ Moyisi te tɩn mʋ.
Nyɔɔnɩ gwar-palɩ dɩm
8 Ba ta ma kwe gar-fɩfalɩ sɩlʋ na yɩ lanyɩranɩ tɩn ba ma kɩ garyi dɩlʋ na wʋ́ palɩ Arɔn nyɔɔnɩ nɩ tɩn. Ba dɛɛn mɛ gar-ŋʋnɩ sɩlʋ nyɩnyʋrʋ na yɩ səbu-sɩŋa, dɩ nazon-pupwiə, dɩ nasʋŋ-pupwiə, dɩ nasʋŋʋ cwɛ-cwɛ tɩn ba gɔgɩrɩ-dɩ nɩnɛɛnɩ gwar-wʋgʋ kʋm dɩ na yɩ te tɩn mʋ. 9 Ba dɛɛn maŋɩ dayigǝ nʋa maŋɩm mʋ ba kɩ gwar-palɩ dɩm pa dɩ niə yana yam maama taa maɩ daanɩ, yɩ ba daarɩ ba pri-dɩ kuni bɩle. 10 Ba ma daarɩ ba tigisi kandwa-ŋʋna dwi dwi sɩ ya pəni gɩnɩ sɩna dɩ kandwa-ŋʋna tɩtɔ. Pulim gɩna kam kandwa-ŋʋna tɩm yɩ Sardʋanɩ, dɩ Topazɩ, dɩdaanɩ Bɛrili. 11 Gɩna bale tu kandwa-ŋʋna tɩm maa yɩ Dɩama, dɩ Safiiri, dɩdaanɩ Emɛrɔdɩ. 12 Gɩna batɔ tu wʋm maa jɩgɩ kandwa-ŋʋna tɩntʋ: Opalɩ, dɩ Agatɩ, dɩdaanɩ Ametisti. 13 Sɩ gɩna bana tu wʋm kandwa-ŋʋna tɩm maa yɩ Bɛrili, dɩ Onisi dɩdaanɩ Zasɩpɩ. Ba ta ma kwe səbu-sɩŋa ba tɔgɩ kandwa yam kʋntʋ maama niə yam. 14 Ba ma sarɩ Yisɩrayɛlɩ dwi maama yɩra fugə-yale yam kandwa yam baŋa nɩ. Kandwɛ maama dɛɛn brɩ yɩrɩ dɩdwɩ sɩ dɩ taa yɩ maana.
15 Ba dɛɛn ma kwe səbu-sɩŋa na yɩ lanyɩranɩ tɩn ba jujugi ba ma kɩ capʋnnʋ nɩnɛɛnɩ ŋʋna doŋ, sɩ kʋ toŋi dɩ gwar-palɩ dɩm. 16 Ba ta ma kɩ səbu-sɩŋa kunə yale dɩ səbu-sɩŋa kwana yale, yɩ ba kwe-ya ba lə gwar-palɩ dɩm baŋa seeni gugwəəru tɩle tɩm nɩ. 17 Ba laan ma kwe səbu-sɩŋa capʋnnʋ tɩm ba tʋrɩ kwana yalʋ na lǝgi gwar-palɩ dɩm yɩra nɩ tɩn wʋnɩ. 18 Ba ta ma ja capʋnnʋ tɩm niə yadonnə yam ba vu ba kuni dɩdaanɩ kunə yale yam sɩ tɩ ja gwar-wʋgʋ kʋm vwana vʋvwɩ sɩm. 19 Ba maa kɩ səbu-sɩŋa kwana yale sɩ ya məəli gwar-palɩ dɩm kuri dɩm seeni. Ya maa wʋ dɩ kwaga seeni na salɩ dɩ gwar-wʋgʋ kʋm tɩn mʋ. 20 Ba ta maa kɩ səbu-sɩŋa kwana yale yayam ba məəli-ya gwar-wʋgʋ kʋm yɩra nɩ sɩ ya taa bwələ dɩ kʋ vwana vʋvwɩ sɩm kuri seeni. Ya maa wʋ kʋ təŋə garyi kam baŋa seeni, garyiə yam na toŋi daanɩ mɛ tɩn. 21 Ba laan maa kwe gar-ŋʋna kalʋ nyɩnyʋgʋ na yɩ nazon-pupwiə tɩn, ba ma vɔ kwana yale yam na wʋ gwar-palɩ dɩm kuri nɩ tɩn dɩ yalʋ na wʋ gwar-wʋgʋ kʋm vwana yam seeni tɩn ba kɩ daanɩ. Kʋ ma pa gwar-palɩ dɩm yɩ taa bibiga. Kʋ maama dɛɛn kɩ kʋ tɔgɩ Baŋa-Wɛ ya na brɩ Moyisi sɩ o kɩ te tɩn.
Kaanɩm tiinə gwaarʋ tɩdonnǝ
22 Ba dɛɛn ma kwe gar-ŋʋnɩ sɩlʋ nyɩnyʋgʋ na yɩ nazon-pupwiə tɩn yɩranɩ mʋ ba ma sɔ gwar-bwərə kalʋ kaanɩm tu wʋm na wʋ́ zʋ yɩ o daarɩ o zʋ gwar-wʋgʋ kʋm o daŋɩ ka baŋa nɩ tɩn. 23 Ba ma bɔɔrɩ bɔɔnɩ kʋ tɩtarɩ nɩ sɩ nɔɔnʋ yuu wanɩ kʋ tɔgɩ da kʋ zʋ. Ba laan ma bɛɛrɩ ban dɩm seeni maama sɩ kʋ yɩ kaarɩ. 24 Ba ma kwe gar-ŋʋnɩ sɩlʋ nyɩnyʋrʋ na yɩ nazon-pupwiə, dɩ nasʋŋ-pupwiə, dɩ nasʋŋʋ cwɛ-cwɛ tɩn ba gɔgɩrɩ grɩnadɩnɩ tiu biə nyɩnyʋrʋ pa tɩ kaagɩ gɔrɔ kʋm kuri niə yam maama tɩ pu. 25 Ba laan ma kwe səbu-sɩŋa kalʋ na yɩ lanyɩranɩ tɩn ba ma kɩ loŋnə balwa sɩ ba məəli-ya ba kɩ da. 26 Loŋni dɩdʋa wʋra grɩnadɩnɩ tiu biə bale maama tɩtarɩ nɩ mʋ pa ba saŋɩ daanɩ. Ba ma kɩ kʋntʋ mʋ ba kaagɩ gɔrɔ kʋm kuri seeni niə yam maama. Gɔrɔ kʋm maa maŋɩ sɩ kaanɩm tiinə bam zʋ-kʋ sɩ ba taa tʋŋɩ ba pa Baŋa-Wɛ. Kʋ maama dɛɛn kɩ kʋ tɔgɩ nɩnɛɛnɩ Baŋa-Wɛ ya na brɩ Moyisi te tɩn.
27 Ba laan ma kwe gar-fɩfalɩ ba ma sɔ Arɔn gwar-dɩdwaarʋ sɩ Arɔn dɩ o biə bam taa zʋʋra. 28 Ba ta ma kɩ Arɔn yuu garyi dɩm dɩdaanɩ o biə bam yipwi sɩm. Ba ma kwe gar-fɩfalɩ ba ma kɩ gar-kuri-kukwi sɩm. 29 Ba ma kɩ Arɔn təŋə garyi kam dɩ gar-fɩfalɩ yɩ ba gɔgɩrɩ-ka dɩ gar-ŋʋnɩ sɩlʋ nyɩnyʋrʋ na yɩ nazon-pupwiə, dɩ nasʋŋ-pupwiə, dɩ nasʋŋʋ cwɛ-cwɛ tɩn. Kʋ maama dɛɛn kɩ kʋ tɔgɩ nɩnɛɛnɩ Baŋa-Wɛ na brɩ Moyisi te tɩn.
30 Ba laan ma kwe səbu-sɩŋa na yɩ lanyɩranɩ tɩn ba magɩ-ka ba kɩ wo-pɩlɔgɔ sɩ kʋ taa dɔgɩ Arɔn yuu nɩ. Ba ma sarɩ kʋ baŋa nɩ nɩ: ‹O pɔɔrɩ o yɩ o yɩra mʋ Baŋa-Wɛ ŋwaanɩ›. 31 Ba ta ma kwe gar-ŋʋna kalʋ nyɩnyʋgʋ na yɩ nazon-pupwiə tɩn ba ma vɔ-kʋ ba məəli Arɔn yuu garyi dɩm yigə seeni. Kʋ maama dɛɛn kɩ kʋ tɔgɩ nɩnɛɛnɩ Baŋa-Wɛ ya na brɩ Moyisi te tɩn.
Moyisi kaagɩ jero-vwe dɩm o nii
32 Baŋa-Wɛ jero-vwe dɩm ma kɩ dɩ ti. Yisɩrayɛlɩ tiinə bam dɛɛn kɩ kʋlʋ maama Baŋa-Wɛ na brɩ Moyisi sɩ o kɩ tɩn mʋ. 33 Ba laan ma ja vwe dɩm tɩtɩ dɩ dɩ wʋ zɩla yam maama ba vu ba brɩ Moyisi. Kʋ maa yɩ tɩntʋ:
ɡwaarʋ tɩm, dɩ səbu-sɩŋa gwəli sɩm, dɩ ywə yam, dɩ dagarɩ sɩm, dɩ da-dɛɛrʋ tɩm, dɩdaanɩ vwe dɩm kuri luuru tɩm maama,
34 dɩ wǝǝnu tɩlʋ ba na mɛ ba kwǝli jero-vwe dɩm baŋa kam: pi-bɩa twannʋ tɩlʋ ba na taŋɩ sɩna tɩn, dɩ dofɛn twaanʋ,
dɩ gar-jalɩ dɩlʋ na wʋ́ cɩ Wɛ-di-laa cɩga cɩga kam tɩn,
35 dɩ Wɛ ni-gonim daka kam, dɩ dɛ sɩlʋ na wʋ́ taa maa zɩŋɩ-ka tɩn, dɩdaanɩ ka nipugu kʋm,
36 dɩ taabʋlʋ kʋm, dɩdaanɩ kʋ yɩra zɩla yam maama,
dɩ dɩpwa yalʋ na wʋ́ taa tigi Baŋa-Wɛ yigə nɩ tɩn,
37 dɩ səbu-sɩŋa min-zwǝn-zɩgʋ kʋm, dɩ kʋ yɩra wǝǝnu tɩm maama,
kʋ wǝli dɩ min-zwǝǝnu tɩrpɛ tɩm, dɩ nugə kam na wʋ́ kɩ da tɩn,
38 dɩ wǝǝnu tɩlʋ lwǝm na ywǝmmǝ tɩn zwɛɛm bimbim dɩm səbu-sɩŋa na kwǝli ka maama tɩn,
dɩ Wɛ swəlim nugə kam, dɩ wǝǝnu tɩlʋ lwǝm na ywǝmmǝ tɩn,
dɩ gar-jalɩ dɩlʋ na wʋ jero-vwe dɩm ni dɩm nɩ tɩn,
39 dɩ canna kaanɩm bimbim dɩm, dɩ luu kʋlʋ na məəli ka yɩra nɩ tɩn, dɩ ka yɩra zɩla yam maama, kʋ ta wǝli dɩ dɛ sɩlʋ na wʋ́ taa zɩŋɩ-ka tɩn,
dɩ war-zʋŋa kam, dɩdaanɩ ka na wʋ́ taa zɩgɩ woŋo kʋlʋ baŋa nɩ tɩn,
40 dɩ kʋnkɔlɔ kʋm gar-jala yam, dɩ dɛ sɩlʋ baŋa nɩ ya na wʋ́ palɩ tɩn, dɩ sɩ luuru tɩm,
kʋ ta wǝli dɩ gar-jalɩ dɩlʋ na wʋ́ cɩ kʋnkɔlɔ kʋm manchoŋo ni dɩm tɩn,
dɩ ŋʋnɩ sɩm, dɩ paara yalʋ na wʋ́ cwi ya ja vwe dɩm tɩn,
dɩdaanɩ jero-vwe dɩm zɩla yam maama,
41 dɩdaanɩ nɩnwaŋa gwaarʋ tɩlʋ Wɛ kaanɩm tu Arɔn dɩ o biə bam na wʋ́ taa zʋʋrɩ sɩ ba yǝni ba zʋ Wɛ-digə kam wʋnɩ ba kɩ kaanɩm ba pa‑DƖ tɩn.