Jero-vwe dɩm cwiim
40
Baŋa-Wɛ daa ma ta dɩ Moyisi DƖ wɩ:2 «Tan ye sɩ n cwi amʋ jero-vwe dɩm bɩn-dʋʋrɩ dɩm pulim dɛ dɩm nɩ. 3 Laan kwe ni-gonim daka kam Wɛ niə fugə kam na wʋ ka wʋnɩ tɩn, n ja n zʋ n zɩgɩ jero-vwe dɩm nɩ. Nmʋ nan wʋ́ palɩ gar-jalɩ dɩm mʋ sɩ dɩ kwǝli-ka dɩ cɩ Wɛ-di-laa cɩga cɩga kam wʋnɩ. 4 Nan ta ja taabʋlʋ kʋm n zʋ n zɩgɩ vwe dɩm nɩ, sɩ n daarɩ n tigisi kʋ yɩra zɩla yam kʋ baŋa nɩ. Laan ja min-zwǝn-zɩgʋ kʋm n ja n zʋ da, sɩ n kwe min-zwǝǝnu tɩrpɛ tɩm n zɩgɩ kʋ baŋa nɩ. 5 N ma n wʋ́ kwe wǝǝnu tɩlʋ lwǝm na ywǝmmǝ tɩn bimbim dɩm mʋ n zɩgɩ sɩ ka taa wʋ ni-gonim daka kam yigə nɩ, Wɛ-di-laa cɩga cɩga kam wʋnɩ. Laan palɩ gar-jalɩ dɩlʋ na wʋ́ taa wʋ jəro-vwe ni dɩm nɩ tɩn.
6 Kʋ na yɩ zwɛɛm kaanɩm bimbim dɩm, sɩ n zɩgɩ-ka sɩ ka taa bwələ dɩ jəro-vwe ni dɩm. 7 Laan kwe canna war-zʋŋa kam n zɩgɩ jero-vwe dɩm dɩ zwɛɛm kaanɩm bimbim dɩm tɩtarɩ laŋa nɩ. Mɔ na n su-ka. 8 Nmʋ ta wʋ́ cɩ kʋnkɔlɔ n kaagɩ jero-vwe dɩm maama, sɩ n daarɩ n kwe gar-jalɩ dɩlʋ na wʋ́ cɩ manco-pɩɩna yam tɩn n palɩ da.
9 Nmʋ nan na kɩ kʋntʋ maama, kwe Wɛ swəlim nugə kam, sɩ n ma n kwɛ jero-vwe dɩm dɩ dɩ zɩla yam maama sɩ ya taa yɩ lanyɩranɩ fasɩ ya pa-nɩ. 10 Ta kwe swəlim nugə kam n ma n kwɛ zwɛɛm kaanɩm bimbim dɩm dɩdaanɩ ka yɩra zɩla yam, sɩ ya taa yɩ lanyɩranɩ fasɩ ya pa-nɩ, 11 sɩ n daarɩ n kwɛ war-zʋŋa kam dɩ ka na zɩgɩ woŋo kʋlʋ baŋa nɩ tɩn sɩ tɩ dɩ taa yɩ tɩ yɩra.
12 Nmʋ laan ma n wʋ́ pa Arɔn dɩ o bu-baara bam jeeri jero-vwe dɩm ni nɩ sɩ n pa ba swɛ ba yɩra ba kwɛ ba tɩtɩ amʋ ŋwaanɩ. 13 Kwe kaanɩm gwaarʋ tɩm n zʋ Arɔn, sɩ n daarɩ n ma nugə kam n tur‑o. Kɩ kʋntʋ n pwɛ Arɔn o kaanɩm tɩtʋŋa yam ŋwaanɩ, sɩ o taa tʋŋɩ o pa-nɩ. 14 Nan ta kwe gwar-dɩdwaarʋ tɩm n zʋ Arɔn biə bam dɩ, 15 sɩ n daarɩ n turi-ba dɩ nugə kam, nɩnɛɛnɩ n na kɩ te dɩ ba ko wʋm tɩn. Kʋntʋ mʋ wʋ́ pa ba dɩ ba dwi tiinə taa yɩ amʋ kaanɩm tiinə sɩ kʋ taa ve wuu.»
16 Moyisi dɛɛn kɩ kʋ maama sɩ kʋ tɔgɩ Baŋa-Wɛ ya na brɩ-o te tɩn. 17 Bɩna yale bɩnɩ dɩm dayigə cana kam pulim dɛ dɩm nɩ mʋ ba dɛɛn cwi jero-vwe dɩm. 18 Moyisi ma pa ba cwi vwe dɩm ywə yam ya luuru tɩm baŋa nɩ, sɩ ba daarɩ ba tʋrɩ dagarɩ sɩm da. Ba ta ma cwi da-dɛɛrʋ tɩm. 19 O ta ma kwe gwaarʋ tɩlʋ na kwǝli jero-vwe dɩm yuu kʋm tɩn o pu kʋ je nɩ, yɩ o daarɩ o kwe tankwallʋ tɩm o daŋɩ tɩ baŋa nɩ. Kʋ maama dɛɛn kɩ kʋ tɔgɩ nɩnɛɛnɩ Baŋa-Wɛ ya na brɩ-o te tɩn.
20 Moyisi ma kwe Wɛ ni-gonim kandwa-pɩlɛ sɩle sɩm o tiŋi daka kam wʋnɩ. O ta ma kwe dɛ sɩlʋ na wʋ́ taa maɩ sɩ zɩŋɩ daka kam tɩn o tʋrɩ ka kwana yam wʋnɩ. O ma daarɩ o kwe lwarɩm saarɩm nipugu kʋm o pu ka ni. 21 O laan ma ja daka kam o zʋ o zɩgɩ jero-vwe dɩm wʋnɩ, yɩ o kwe gar-jalɩ dɩm o maa cɩ Wɛ-di-laa cɩga cɩga kam sɩ daka kam taa wʋra. Kʋ dɛɛn kɩ kʋ tɔgɩ kʋlʋ maama Baŋa-Wɛ ya na brɩ Moyisi sɩ o kɩ tɩn.
22 Moyisi ta ma ja taabʋlʋ kʋm o zʋ o zɩgɩ jero-vwe dɩm jazɩm baŋa seeni, gar-jalɩ dɩm yigə nɩ. 23 O ma tiŋi dɩpwa kʋ baŋa nɩ, sɩ kʋ taa wʋ Baŋa-Wɛ yigə nɩ, nɩnɛɛnɩ Wɛ na brɩ-o sɩ o kɩ te tɩn.
24 O ta ma kwe min-zwǝn-zɩgʋ kʋm o zɩgɩ sɩ kʋ maŋɩ dɩ taabʋlʋ kʋm yɩ kʋ wʋ vwe dɩm jagwiə seeni. 25 O ma zɩgɩ min-zwǝǝnu tɩrpɛ tɩm maama tɩ zɩga je nɩ, sɩ tɩ taa wʋ Baŋa-Wɛ yigə nɩ, nɩnɛɛnɩ Wɛ na brɩ-o sɩ o kɩ te tɩn.
26 Moyisi dɛɛn ma zɩgɩ səbu-sɩŋa wo-talooru bimbim dɩm gar-jalɩ dɩm yigə nɩ. 27 O laan ma zwɛ wǝǝnu tɩlʋ lwǝm na ywǝmmǝ tɩn ka baŋa nɩ, nɩnɛɛnɩ Baŋa-Wɛ na brɩ-o sɩ o kɩ te tɩn. 28 O ta ma pa ba kwe gar-jalɩ dɩdoŋ dɩm ba cɩ jəro-vwe ni dɩm.
29 Moyisi laan ma kwe zwɛɛm kaanɩm bimbim dɩm o zɩgɩ kʋnkɔlɔ kʋm nɩ, vwe dɩm ni yigə nɩ. O ta ma kwe vara dɩ muni pɛɛra o kɩ kaanɩm dɩ baŋa nɩ. O dɛɛn kɩ kʋ maama sɩ kʋ tɔgɩ Baŋa-Wɛ ya na brɩ-o sɩ o kɩ te tɩn.
30 O ma kwe war-zʋŋa kam o zɩgɩ kaanɩm bimbim dɩm dɩ jero-vwe dɩm tɩtarɩ laŋa nɩ. O ma pa ba mɔ na ba kɩ da sɩ kaanɩm tiinə taa waɩ ba kwɛ ba tɩtɩ. 31 Moyisi dɩ Arɔn, dɩdaanɩ Arɔn biə bam maa zɩgɩ kʋ yigə nɩ ba zarɩ ba jɩa dɩdaanɩ ba nɛ sɩm. 32 Maŋa kalʋ maama ba na lagɩ ba kɩ kaanɩm bimbim dɩm baŋa nɩ, naa ba na zʋ vwe dɩm wʋnɩ, ba maŋɩ sɩ ba kwɛ ba tɩtɩ kʋntʋ mʋ, sɩ kʋ tɔgɩ Baŋa-Wɛ ya na brɩ Moyisi sɩ o kɩ tɩn.
33 Moyisi laan ma pa ba cɩ kʋnkɔlɔ ba kaagɩ jero-vwe dɩm dɩ kaanɩm bimbim dɩm maama. O ma kwe gar-jalɩ dɩlʋ na wʋ́ cɩ kʋ manchoŋo ni dɩm tɩn o palɩ da. Kʋntʋ na kɩ tɩn, Moyisi dɛɛn ma ti tɩtʋŋɩ dɩm maama.
Baŋa-Wɛ paarɩ-zulǝ yam
34 Kunkoŋo kʋm dɛɛn ma cu kʋ kwǝli jero-vwe dɩm pa jəgə kam maama su dɩ Baŋa-Wɛ paarɩ-zulǝ yam. 35 Moyisi daa warɩ sɩ o zʋ vwe dɩm wʋnɩ, kunkoŋo kʋm dɩ Wɛ paarɩ-zulǝ yam ŋwaanɩ.a
36 Yisɩrayɛlɩ tiinə bam vəŋə maama wʋnɩ, kunkoŋo kʋm na yǝni kʋ zaŋɩ jero-vwe dɩm nɩ, ba dɩ wʋ́ zaŋɩ ba tɔgɩ ba veǝ mʋ. 37 Kunkoŋo kʋm nan na maŋɩ da, ba dɩ wʋ́ maŋɩ je sɩm kʋntʋ nɩ sɩ kʋ taa nii maŋa kalʋ kʋ daa na wʋ́ zaŋɩ tɩn. 38 Ba na wʋ mɛ maama ba vəŋə wʋnɩ, Baŋa-Wɛ wʋ ba tee nɩ mʋ. Wɩa nɩ mʋ kunkoŋo kʋm yǝni kʋ dɔgɩ jero-vwe dɩm yuu nɩ. Kʋ maa na yɩ tɩtɩɩ nɩ, mim mʋ wʋ kunkoŋo kʋm yɩra nɩ dɩ paɩ pooni.