Wɛ niə fugə kam
5
Moyisi dɛɛn ma bəŋi Yisɩrayɛlɩ tiinə bam sɩ ba jeeri daanɩ, yɩ o ta dɩ ba o wɩ:«Yisɩrayɛlɩ tiinə bam, cəgi-na sɩ Wɛ kwiə yam dɩdaanɩ Wɛ niə yam mʋ tɩntʋ a wʋra a tɛ dɩ abam zɩm. Sɩɩnɩ-na á yiǝ sɩ á taá zaasɩ-ya, sɩ á daarɩ á taá kɩ á tɔgɩ ya na brɩ te tɩn. 2 Dɩbam Tu Baŋa-Wɛ mʋ dɛɛn goni ni dɩdaanɩ dɩbam Sinayi piu kʋm yuu nɩ. 3 Kʋ daɩ dɩdaanɩ dɩ kwə bam yɩranɩ mʋ DƖ kɩ ni-gonim dɩm dɩ ba. DƖ dɛɛn kɩ-dɩ dɩdaanɩ dɩbam balʋ ta na ŋwɩ zɩm tɩntʋ tɩn mʋ. 4 Baŋa-Wɛ tɩtɩ dɛɛn ma zɩgɩ mim dɩm wʋnɩ DƖ ŋɔɔnɩ dɩ abam jaja piu kʋm yuu nɩ. 5 Maŋa kam kʋntʋ nɩ, abam dɛɛn kwarɩ fʋʋnɩ mʋ sɩ á din piu kʋm yuu, mim dɩm na wʋra tɩn ŋwaanɩ. Amʋ maa zɩgɩ abam dɩ Baŋa-Wɛ tɩtarɩ laŋa nɩ, sɩ a lwǝni Wɛ taanɩ dɩm a brɩ abam. Baŋa-Wɛ dɛɛn tagɩ DƖ wɩ:
6 Amʋ mʋ yɩ abam Tu Baŋa-Wɛ dɩm. Amʋ maa yɩ wʋlʋ na jaanɩ abam a ja nuŋi Ezipi tɩʋ kʋm nɩ yɩ a vrɩ abam á gabɛɛm dɩm nɩ a yagɩ tɩn.
7 Daa á yɩ zuli-na jwǝnǝ á wǝli amʋ wʋnɩ.
8 Yɩ zaŋɩ-na á mɔ kamɔgɔ sɩ kʋ taa yɩ jwəm kʋ pa abam. Á yɩ mɔ woŋo sɩ kʋ lwǝni wɛyuu wǝǝnu, naa tɩga baŋa wǝǝnu, naa tɩga kuri na wʋʋ wǝǝnu. 9 Abam ba maŋɩ sɩ á tiiri tɩ yigə nɩ naa á zuli-tɩ. Bɛŋwaanɩ, amʋ mʋ yɩ abam Tu Baŋa-Wɛ dɩm. Amʋ yi pagɩ abam baŋa nɩ mʋ. Kʋ na yɩ balʋ na vɩn amʋ tɩn, a yǝni a waarɩ-ba dɩ ba biə maama sɩ kʋ vu kʋ yi ba dwi dɩm kuni bɩtɔ naa bɩna laŋa nɩ. 10 Kʋ nan na yɩ balʋ na soe-nɩ yɩ ba sɛ a niə yam tɩn, a maa yǝni a jɩgɩ ba sono taan, sɩ kʋ yi ba dwi dɩm kuni mʋrʋ laŋa nɩ.
11 Á yɩ zaŋɩ á bəŋi á Tu Baŋa-Wɛ yɩrɩ kafɛ ŋwaanɩ, sɩ Baŋa-Wɛ wʋ́ waarɩ wʋlʋ maama na kɩ kʋntʋ tɩn.
12 Taá ye-na sɩ á pɔɔrɩ Wɛ siun dɛ dɩm da yam maama wʋnɩ á pa Wɛ. Baŋa-Wɛ maŋɩ DƖ pa abam DƖ ni dɩm kʋntʋ.a 13 Da yarpɛ maama wʋnɩ, abam jɩgɩ da yardʋ mʋ sɩ á ma á tʋŋɩ tɩtʋŋa dwi maama. 14 Kʋ nan na yɩ da yarpɛ dɛ dɩm, abam Tu Baŋa-Wɛ pɔɔrɩ-dɩ mʋ DƖ pa DƖ tɩtɩ, sɩ dɩ ta yɩ siun dɛ. Dɩntʋ dɛ dɩm nɩ, nɔɔn-nɔɔnʋ ba maŋɩ sɩ o tʋŋɩ tɩtʋŋɩ. Kʋ maa yɩ abam, dɩ á biə, dɩ á bukwa, dɩ á gambɛ, dɩ á tɩntʋŋ-kaana maama mʋ bá taa tʋŋa. Kʋ wǝli da, abam na-bɛ, dɩ á bɩnɛ, dɩdaanɩ á vara bam maama, dɩ vərə balʋ na zʋʋrɩ á tɩʋ wʋnɩ tɩn dɩ bá taa tʋŋɩ tɩtʋŋa dɛ dɩm kʋntʋ nɩ. Abam gambɛ sɩm dɩ maŋɩ sɩ ba tɔgɩ ba sin mʋ dɩntʋ dɛ dɩm nɩ, nɩnɛɛnɩ abam na wʋ́ sin te tɩn. 15 Guli-na nɩ abam dɩ dɛɛn yɩ gambɛ mʋ Ezipi nɩ. Abam Tu Baŋa-Wɛ ma tɔgɩ DƖ dam baŋa nɩ DƖ tʋŋɩ wo-kamunnu DƖ ma vrɩ abam á gabɛɛm dɩm nɩ DƖ ja DƖ nuŋi. Kʋntʋ ŋwaanɩ mʋ DƖ wɩ á maŋɩ sɩ á pɔɔrɩ siun dɛ dɩm sɩ dɩ taa yɩ dɩ yɩra.
16 Taá nɩgɩ-na á kwə dɩ á niinə. Abam Tu Baŋa-Wɛ pɛ abam ni dɩm kʋntʋ mʋ sɩ kʋ pa á taá jɩgɩ mʋmwɛ-dɛɛrɩ. Á ŋwɩa maa wʋ́ kɩ lanyɩranɩ maŋa kalʋ á na wʋ́ taá zʋʋrɩ tɩga kalʋ DƖ na lagɩ DƖ pa abam tɩn wʋnɩ.
17 Yɩ zaŋɩ-na á gʋ nɔɔnʋ.
18 Yɩ kɩ-na kabwəŋə dɩ nɔɔnʋ wʋdoŋ kaanɩ.
19 Yɩ ŋɔ-na kʋlʋkʋlʋ.
20 Yɩ zaŋɩ-na á bʋrɩ vwan bʋra á ma á vanɩ á donnǝ.
21 Yɩ pa-na sɩ á fra zʋ á donnǝ kaana. Nan yɩ kwe-na á wʋbʋŋa á daŋɩ ba sam baŋa nɩ, naa ba tɩga baŋa nɩ, naa ba gambɛ, naa ba tɩntʋŋ-kaana baŋa nɩ. Ta yɩ pa-na sɩ á yi su á donnǝ na-bɛ, naa ba bɩnɛ, naa woŋo kʋlʋ maama na yɩ ba nyɩm tɩn.
22 Yisɩrayɛlɩ kɔgɔ kʋm maama dɛɛn na jeeri piu kʋm təŋə nɩ tɩn, mʋ Baŋa-Wɛ ŋɔɔnɩ dɩ kwǝr-dɩa DƖ pa dɩbam DƖ niə fugə kam kʋntʋ. DƖ ma zɩgɩ mim dɩm dɩ kunkwən-luluru tɩm wʋnɩ mʋ DƖ ŋɔɔnɩ DƖ niə yam, yɩ kʋlʋkʋlʋ dɛɛn wʋ wǝli ya wʋnɩ. DƖ laan ma pʋpʋnɩ-ya DƖ daŋɩ kandwa-pɩlɛ sɩle baŋa nɩ DƖ kwe DƖ pa-nɩ.
23 Abam dɛɛn na ni nɩ kwǝrǝ mʋ nuŋi lim wʋnɩ ka yi abam, yɩ piu kʋm dɩ tarɩgɩ mim kʋntʋ tɩn, mʋ balʋ na yɩ yuutiinə dɩ nakwa abam dwi maama wʋnɩ tɩn tu amʋ te, 24 yɩ ba wɩ: ‹Dɩbam Tu Baŋa-Wɛ dɩm sɩɩnɩ DƖ brɩ dɩbam DƖ paarɩ-zulǝ yam dɩdaanɩ DƖ kamunni dɩm na tiini dɩ daga te tɩn. Zɩm dɛ dɩntʋ, dɩ́ ni DƖ kwǝrǝ kam na nuŋi mim wʋnɩ ka yi dɩbam te tɩn, yɩ dɩ́ lwarɩ nɩ nabiinu wʋ́ wanɩ o ni Baŋa-Wɛ na ŋɔɔnɩ dɩd-o yɩ kʋ tu wʋ́ ta wʋ o ŋwɩa wʋnɩ. 25 Dɩbam nan ba lagɩ sɩ dɩ́ tɩ! Dɩbam Tu Baŋa-Wɛ daa ta na ŋɔɔnɩ dɩdaanɩ dɩbam yɩ dɩ́ ni DƖ kwǝrǝ kam, min-fɔrɔ kʋm wʋ́ wanɩ kʋ gʋ dɩbam. 26 Wɔɔ mʋ wʋra nabiinǝ maama wʋnɩ o na wʋ́ wanɩ o ni Ŋwɩa Tu Baŋa-Wɛ kwǝrǝ na nuŋi mim wʋnɩ ka ŋɔɔnɩ dɩd-o nɩnɛɛnɩ dɩ́ zɩm na ni-ka tɩn, yɩ kʋ tu ta ŋwɩ? 27 Kʋntʋ tɩn, nmʋ nan titwəni n twɛ dɩbam Tu Baŋa-Wɛ, sɩ n cəgi kʋlʋ maama DƖ na jɩgɩ sɩ DƖ ta DƖ brɩ dɩbam tɩn, sɩ n laan ba n lwǝni n brɩ dɩbam, sɩ dɩ́ wʋ́ sɛ DƖ ni dɩm.›
28 Baŋa-Wɛ dɛɛn ma ni abam na tagɩ kʋlʋ tɩn, yɩ DƖ ta dɩ amʋ DƖ wɩ: ‹Amʋ ni nɔɔna bam na tagɩ kʋlʋ maama ba brɩ-m tɩn. Ba na tagɩ kʋlʋ tɩn nan lamma! 29 Amʋ ya lagɩ sɩ ba wʋbʋŋa ja sɩ ba taa kwarɩ amʋ yɩ ba sɛ a niə yam maŋa maama.b Kʋntʋ yaá pa bantʋ ŋwɩa kɩ lanyɩranɩ ka pa-ba dɩ ba kwaga kam sɩ kʋ taa ve maŋa maama. 30 Ve n ta dɩ ba sɩ ba joori ba vwə yam nɩ. 31 Sɩ kʋ na yɩ nmʋ, nmʋ wʋ́ maŋɩ yo seeni mʋ sɩ a brɩ-m a ni dɩm maama. Kʋ na yɩ a cullu tɩm dɩ a kwiə yam maama, nmʋ wʋ́ lwǝni n brɩ nɔɔna bam sɩ ba taa tɔgɩ-ya mʋ tɩga kalʋ a na lagɩ a pa-ba sɩ ba taa te tɩn wʋnɩ.›
32 Kʋntʋ tɩn, Yisɩrayɛlɩ tiinə bam, taá ye-na sɩ á kɩ á tɔgɩ Baŋa-Wɛ na pɛ abam ni sɩ á kɩ tɩn. Yɩ ywəri-na DƖ cwǝŋǝ kam wʋnɩ á vu jazɩm naa jagwiə seeni. 33 Taá tɔgɩ-na abam Tu Baŋa-Wɛ dɩm na brɩ abam cwǝŋǝ kalʋ sɩ á da tɩn. Kʋntʋ wʋ́ pa, á na zʋ tɩga kalʋ DƖ na lagɩ DƖ pa abam sɩ á taá te tɩn, á wʋ́ zʋ ka wʋnɩ á daanɩ yɩ á ŋwɩa kɩ lanyɩranɩ.»