Baŋa-Wɛ ni dɩlʋ na dwe maama tɩn
6
«Baŋa-Wɛ ni dɩm mʋ tɩntʋ. DƖ dɛɛn pɛ amʋ ni sɩ a pa abam mʋ lwarɩ DƖ cullu tɩm dɩ o kwiə yam maama na yɩ te tɩn sɩ á taá tɔgɩ-ya nɩnɛɛnɩ á na tu á bɛ Zʋrdɛn bugə kam, yɩ á zʋ sɩ á joŋi á tɩga kam á taá te. 2 Abam dɩ á biə dɩdaanɩ á kwaga kam maama maŋɩ sɩ á taá kwarɩ á Tu Baŋa-Wɛ dɩm mʋ maŋa maama, yɩ á kɩ á tɔgɩ DƖ niə yantʋ, dɩ DƖ cullu tɩm a na wʋra a paɩ abam tɩntʋ tɩn, sɩ á wanɩ á daanɩ tɩga kam nɩ dɩ mʋmwɛ-dɛɛrɩ. 3 Cəgi-na Yisɩrayɛlɩ tiinə bam, sɩ á taá ye sɩ á sɛ Wɛ niə yam maama. Kʋntʋ wʋ́ pa á ŋwɩa kɩ lanyɩranɩ ka pa abam, sɩ á ta puli dɩ kɔgɔ á ji tʋ-fɔrɔ. Á tɩga kam wʋ́ taa lana dɩ varɩm dɩ kɔnɔ, nɩnɛɛnɩ á nabaara Baŋa-Wɛ dɩm dɛɛn na goni ni sɩ DƖ kɩ DƖ pa abam te tɩn.4 Cəgi-na Yisɩrayɛlɩ tiinə bam, dɩbam Tu Baŋa-Wɛ dɩm yɩ DƖ yɩranɩ dɩdʋa mʋ. 5 Taá soe-na á Tu Baŋa-Wɛ dɩdaanɩ á bɩcarɩ maama, dɩ á wʋbʋŋa maama, kʋ wǝli dɩ á dam maama.a
6 Kʋ maŋɩ sɩ Wɛ niə yantʋ a na wʋra a brɩ abam zɩm tɩn taa tigi á bɩcarɩ nɩ mʋ. 7 Pa-na sɩ á biə dɩ lwarɩ-ya. Taá tɛ-na ya taanɩ maŋa maama, nɩnɛɛnɩ á na je sɔŋɔ nɩ yɩ á lara, naa á na tɔgɩ daanɩ á ve cwǝŋǝ yuu nɩ, kʋ ta wǝli dɩ á na pəni tɩtɩɩ nɩ, naa á na zaŋɩ zɩzɩŋa maama nɩ. 8 Lwəni-na-ya á tiŋi tɔnɔ nɩ sɩ á daarɩ á vɔ-ya á jɩan nɩ, dɩdaanɩ á trǝ nɩ, sɩ á taá guli ya gulə. 9 Pʋpʋnɩ-na-ya á tiŋi á di sɩm ni-bwəəru tɩm nɩ, sɩ á daarɩ á ta pʋpʋnɩ-ya á yagɩ á manco-niə dɛ sɩm nɩ.
10 Baŋa-Wɛ dɛɛn nan ya maŋɩ DƖ goni ni mʋ dɩ á nabaara Abraham, dɩ Yizakɩ, dɩdaanɩ Zakɔbɩ, sɩ DƖ kwe tɩga kam kʋntʋ DƖ pa abam. Lele kʋntʋ DƖ lagɩ DƖ pa á zʋ ka wʋnɩ. Tɩ-kamunə maa wʋra, yɩ abam wʋ lɔgɩ-dɩ. 11 Sɔ-fwaarʋ dɩ maa wʋra yɩ tɩ jɩgɩ zɩla zanzan abam na wʋ tiŋi-ya da. Abam ta maa wʋ́ nyɔ vʋla yalʋ á na wʋ kʋgɩ tɩn na bam, yɩ á daarɩ á di tweeru tɩlʋ á na wʋ jəri tɩn biə bam, vinyə tiu biə dɩ Olivi tiu biə dɩ wǝli da.b Abam nan na tu á naɩ á di á sui, 12 sɩ á yɩ swe-na Baŋa-Wɛ ni nɩ, bɛŋwaanɩ Dɩntʋ mʋ jaanɩ abam DƖ ja DƖ nuŋi Ezipi nɩ, á dɛɛn na yɩ gambɛ mɛ tɩn.
13 Taá kwarɩ-na abam Tu Baŋa-Wɛ dɩm, yɩ á tʋŋɩ á kɩ DƖ wʋbʋŋa.c Á na goni ni dɩ nɔɔnʋ, sɩ á ma Baŋa-Wɛ yɩrɩ dɩm yɩranɩ á du durə. 14 Nan yɩ zaŋɩ-na á zuli wa yadonnə á wǝli da, nɩnɛɛnɩ dwi-gɛ tiinə na gilimi abam yɩ ba zuli wa yalʋ tɩn. 15 Lwarɩ-na sɩ abam Tu Baŋa-Wɛ dɩm wʋ á tɩtarɩ nɩ, yɩ DƖ yi pagɩ abam baŋa nɩ. Á na tɔgɩ wa yadonnə, DƖ banɩ wʋ́ zaŋɩ dɩ abam, yɩ DƖ daarɩ DƖ cɔgɩ abam tɩga kam baŋa nɩ.
16 Taá ye-na sɩ á yɩ maŋɩ abam Tu Baŋa-Wɛ á nii, nɩnɛɛnɩ á dɛɛn na kɩ te Masa nɩ tɩn.d 17 Nan taá cʋ-na á tɩtɩ sɩ á sɛ Baŋa-Wɛ niə yam, dɩ DƖ cullu tɩm, kʋ wǝli dɩdaanɩ DƖ kwiə yam maama. 18 Taá kɩ-na kʋlʋ maama na lana yɩ kʋ su Wɛ yi tɩn. Kʋntʋ mʋ, á ŋwɩa wʋ́ kɩ lanyɩranɩ ka pa abam, yɩ á daarɩ á zʋ á joŋi tɩ-ŋʋŋa kantʋ kam á taá te, nɩnɛɛnɩ Baŋa-Wɛ na goni ni dɩ á nabaara bam sɩ DƖ kɩ te tɩn. 19 Abam laan wʋ́ wanɩ á dʋna maama á di, yɩ á daarɩ á zəli-ba, nɩnɛɛnɩ Baŋa-Wɛ na tagɩ te tɩn.
20 Jwa seeni maŋa dɩ maŋa, abam biə wʋ́ ba ba bwe abam nɩ: ‹Bɛŋwaanɩ mʋ dɩbam Tu Baŋa-Wɛ dɛɛn pɛ abam DƖ niə yantʋ, dɩ DƖ kwiə yam, dɩdaanɩ DƖ cullu tɩm maama, sɩ dɩ́ taa tɔga?› 21 Abam laan maa wʋ́ ta á brɩ-ba nɩ:
‹Dɩbam dɛɛn yɩ Ezipi Pa-farʋ wʋm gambɛ mʋ. Baŋa-Wɛ dɛɛn ma tɔgɩ DƖ dam-fɔrɔ kʋm baŋa nɩ DƖ joŋi dɩbam DƖ yagɩ. 22 Dɩbam yi dɛɛn mʋ nɛ DƖ na kɩ wo-kɩnkagɩla dɩdaanɩ tɩtʋŋ-kamunə yalʋ na jɩgɩ fʋʋnɩ tɩn, yɩ DƖ yagɩ-ya Ezipi tiinə bam dɩ ba Pa-farʋ wʋm baŋa nɩ dɩdaanɩ o nakwa maama yuu nɩ tɩn. 23 DƖ dɛɛn ma ja dɩbam DƖ nuŋi tɩʋ kʋm kʋntʋ nɩ, yɩ DƖ daarɩ DƖ ja dɩbam DƖ ba yo seeni, sɩ dɩ́ wanɩ dɩ́ zʋ tɩga kantʋ nɩnɛɛnɩ o dɛɛn na pooli dɩdaanɩ dɩ́ nabaara bam sɩ DƖ kɩ te tɩn. 24 Dɩbam Tu Baŋa-Wɛ laan ma pa dɩbam ni sɩ dɩ́ taa sɛ DƖ niə yantʋ maama yɩ dɩ́ kwarɩ-DƖ. Dɩ́ na sɩɩnɩ dɩ́ kɩ kʋntʋ, Dɩntʋ dɩ wʋ́ taa nii dɩbam baŋa nɩ, yɩ DƖ daarɩ DƖ pa dɩ́ woŋo maama da cwǝŋǝ kʋ pa dɩbam, nɩnɛɛnɩ kʋ na yɩ te zɩm tɩn. 25 Dɩ́ na sɩɩnɩ dɩ́ yiǝ dɩ́ tɔgɩ DƖ kwiə yam kʋntʋ maama, nɩnɛɛnɩ DƖ na pɛ dɩbam ni te tɩn, kʋʋ́ pa dɩ́ na cɩga DƖ yigə nɩ.› »