Gulə Tɔnɔ 7

Baŋa-Wɛ na te DƖ nɔɔna bam te tɩn

«Abam Tu Baŋa-Wɛ dɩm wʋ́ pa á taá te tɩga kalʋ á na lagɩ á zʋ lele tɩn. O maa wʋ́ pa á na dam sɩ á di dwi-gɛ tiinə zanzan yɩ á zəli-ba tɩga kam nɩ: Hɛtɩ tiinə bam, dɩ Girgasɩ tiinə bam, dɩ Amɔɔrɩ tiinə bam, dɩ Kaanan tiinə bam, dɩ Perezi tiinə bam, dɩ Hevi tiinə kʋ wǝli dɩ Yebusi tiinə bam. Dwiə kʋntʋ maama yarpɛ daga zanzan yɩ ya ta damma ya dwe abam. 2 Baŋa-Wɛ nan wʋ́ kɩ-ba á jɩŋa nɩ sɩ á wanɩ-ba á di. DƖ na sɩɩnɩ DƖ kɩ kʋntʋ, sɩ á yɔɔrɩ á cɔgɩ-ba. Abam nan yɩ kɩ-na ni-mɔrɔ dɩ ba, naa á duri ba ŋwaŋa dɩ fɩɩn dɩ. 3 Daa ta lwarɩ-na sɩ á yɩ kwe ba bukwa á ma á ji á kaana, naa á kwe-ba á pa á biə. Nan yɩ zaŋɩ-na á kwe á tɩtɩ bukwa á pa-ba sɩ ba di ba ma ba kɩ ba kaana. 4 Abam na sɛ sɩ kʋntʋ kɩ, baá sʋgɩ á biə mʋ pa sɩ ba tusi ba taa zuli wa-yɔɔrʋ yɩ ba daarɩ ba lɔ Baŋa-Wɛ kwaga nɩ. Kʋntʋ nan wʋ́ pa Baŋa-Wɛ banɩ mʋ zaŋɩ abam baŋa nɩ sɩ DƖ cɔgɩ abam lɩla.

5 Kʋntʋ ŋwaanɩ, abam na wanɩ dwi-gɛ tiinə bam kʋntʋ, sɩ á magɩ ba kaanɩm bimbinə yam á dɩ tɩga nɩ. Á ta maŋɩ sɩ á lɔ kandwa yalʋ ba na cwi ba jwǝnǝ ŋwaanɩ tɩn. Goni-na ba Asera nyɩnyʋgʋ dɛ sɩm á dɩ tɩga nɩ, sɩ á daarɩ á kɩ mim á zwɛ ba jwǝnǝ yam maama. 6 Bɛŋwaanɩ, abam yɩ nɔɔna balʋ na yɩ á Tu Baŋa-Wɛ dɩm nyɩm mʋ. DƖ dɛɛn kuri abam mʋ lʋgʋ baŋa dwi maama wʋnɩ sɩ á taá yɩ Dɩntʋ tɩtɩ lʋnnɩ jɩjɩgɩrʋ.

7 Nan lwarɩ-na nɩ Baŋa-Wɛ na kuri abam kʋntʋ tɩn, kʋ daɩ nɩ á kɔgɔ mʋ daga kʋ dwe dwi-gɛ tiinə maama. Cɩga ŋwaanɩ tɩn, abam dɛɛn mʋ tiini á muri nɔɔna maama wʋnɩ. 8 Kʋ nan yɩ DƖ na jɩgɩ abam sono tɩn ŋwaanɩ mʋ Baŋa-Wɛ kuri abam sɩ á taá yɩ DƖ nyɩm. Kʋ ta maa yɩ DƖ na goni ni dɩdaanɩ á nabaara bam sɩ DƖ kɩ te tɩn ŋwaanɩ mʋ. Kʋntʋ ŋwaanɩ DƖ dɛɛn tʋŋɩ dɩ dam DƖ joŋi abam Ezipi Pa-farʋ wʋm jɩŋa nɩ DƖ yagɩ pa á nuŋi tɩʋ kʋlʋ á ya na yɩ gambɛ da tɩn wʋnɩ. 9 Taá ye-na wɩ abam Tu Baŋa-Wɛ dɩm yɩranɩ mʋ yɩ Wɛ cɩga cɩga. Á waɩ á salɩ‑DƖ, yɩ o bá kwanɩ DƖ ni dɩ ni-gonim dɩlʋ DƖ na kɩ DƖ sono kʋm ŋwaanɩ tɩn. DƖ ta wʋ́ taa soe balʋ na soe‑DƖ yɩ ba tɔgɩ DƖ niə yam tɩn, yɩ DƖ bá yagɩ-ba, sɩ kʋ yi ba dwi dɩm kuni mʋrʋ laŋa nɩ. 10 Kʋ nan na yɩ balʋ na vanɩ‑DƖ tɩn, DƖ wʋ́ yɔɔrɩ DƖ waarɩ-ba. DƖ bá dáanɩ yɩ DƖ cɔgɩ-ba lɩla. 11 Kʋntʋ ŋwaanɩ, taá ye-na sɩ á taá tʋŋɩ á tɔgɩ Wɛ niə yam, dɩ DƖ kwiə yam, dɩ DƖ cullu tɩm, nɩ amʋ na pɛ abam zɩm tɩn.

Wɛ yu-yoŋo na wʋ́ ba ba baŋa te tɩn

12 Abam na cəgi Wɛ niə yantʋ yɩ á daarɩ á tʋŋɩ á tɔgɩ-ya dɩ cɩga, Baŋa-Wɛ sono kʋlʋ na ba ti tɩn dɩ wʋ́ taa wʋra dɩ abam, nɩ DƖ na goni ni te dɩ á nabaara bam tɩn. 13 DƖ wʋ́ taa soe abam, yɩ DƖ kɩ abam yu-yoŋo pa á kɔgɔ kʋm puli zanzan. Á na zʋ tɩga kalʋ Baŋa-Wɛ na goni ni dɩ á nabaara bam sɩ DƖ pa abam tɩn, DƖ zaanɩ wʋ́ taa wʋ á biə baŋa nɩ, dɩ á wʋdiiru baŋa nɩ, nɩ kʋ na yɩ mɩna, dɩ sana, dɩ nugə maama. DƖ zaanɩ ta wʋ́ taa wʋ á vara baŋa nɩ, á naanɩ, dɩ á peeni, dɩdaanɩ dɩ biə maama 14 Abam wʋ́ na Wɛ yu-yoŋo á dwǝni tɩga baŋa dwiə yam kʋntʋ maama. Wʋlʋ na ba lʋrɩ tɩn, naa varɩm wʋlʋ na ba lʋrɩ tɩn daa bá taa wʋ abam wʋnɩ. 15 Baŋa-Wɛ tɩtɩ mʋ wʋ́ cɩ abam dɩ yawɩɩrʋ dwi maama. DƖ bá pa cwǝŋǝ sɩ yawɩ-cɛɛrʋ tɩlʋ dwi na tɩn Ezipi tiinə bam yɩra nɩ tɩn ba abam baŋa. DƖ nan wʋ́ kwe-tɩ DƖ kɩ á dʋna yɩra nɩ mʋ. 16 Nan cɔgɩ-na dwi-gɛ tiinə balʋ maama Baŋa-Wɛ na wʋ́ kwe DƖ kɩ á jɩŋa nɩ sɩ á cɔgɩ tɩn. Yɩ duri-na ba yibwənə, nan yɩ zuli-na nɔɔna bam kʋntʋ jwǝnǝ. Abam na kɩ kʋntʋ, baá sʋgɩ abam sɩ á tusi amʋ yigə nɩ.

17 Abam waɩ á bʋŋɩ á tɩtɩɩ nɩ á wɩ: ‹Dɩbam bá wanɩ tɩɩnɩ dɩntʋ nɔɔna dɩ́ zəli, ba na tiini ba dana ba dwe dɩbam tɩn ŋwaanɩ.› 18 Nan yɩ taá fʋna dɩ ba. Guli-na abam Tu Baŋa-Wɛ na tʋŋɩ te DƖ cɔgɩ Ezipi Pɛ wʋm dɩ o nɔn-biə bam tɩn. 19 Abam tɩtɩ yi mʋ nɛ Baŋa-Wɛ na tɔgɩ DƖ dam baŋa nɩ DƖ tʋŋɩ wo-kamunnu dɩdaanɩ wo-kɩnkagɩla pa yawɩ-cɛɛrʋ ja Ezipi tiinə bam yɩ DƖ daarɩ DƖ vrɩ abam ba jɩŋa nɩ te tɩn. Guli-na á Tu Baŋa-Wɛ dɩm dɛɛn na kɩ te, sɩ DƖ ta wʋ́ ma dam dɩm kʋntʋ mʋ DƖ cɔgɩ nɔɔna bantʋ abam laan na kwarɩ tɩntʋ tɩn. 20 DƖ maa wʋ́ pa vuvugə tʋ á dʋna tɩtarɩ nɩ, sɩ balʋ na duri ba lu ba səgi tɩn tɩtɩ dɩ na cɔgɩm. 21 Kʋntʋ ŋwaanɩ, á ba maŋɩ sɩ á taá kwarɩ nɔɔna bam kʋntʋ. Baŋa-Wɛ wʋra dɩ abam. Wʋntʋ nan mʋ jɩgɩ dam-fɔrɔ yɩ DƖ maŋɩ sɩ nɔɔna taa kwarɩ-DƖ. 22 Abam Tu Baŋa-Wɛ dɩm tɩtɩ mʋ lagɩ DƖ taa zəli dwi-gɛ tiinə bam kʋntʋ DƖ yagɩ fɩɩn fɩɩn sɩ abam zʋ ba tɩga kam wʋnɩ. Abam bá yɔɔrɩ á zəli-ba bɩdwɩ baŋa nɩ. Kʋ na kɩ kʋntʋ, ga-vara mʋ wʋ́ puli da ba daanɩ abam. 23 Baŋa-Wɛ nan wʋ́ kwe á dʋna bam DƖ kɩ á jɩŋa nɩ. DƖ wʋ́ dɩ vuvugə ba tɩtarɩ nɩ, sɩ ba na cɔgɩm ba ti. 24 DƖ maa wʋ́ kwe ba pwa DƖ kɩ á jɩŋa nɩ, sɩ á gʋ-ba pa ba dwi saarɩ lʋgʋ baŋa nɩ. Nɔɔn-nɔɔnʋ bá wanɩ abam o cɩ dɩ á na lagɩ á kɩ kʋlʋ tɩn. Abam maa wʋ́ cɔgɩ ba maama. 25 Zwɛ-na ba jwǝnǝ yam. Yɩ pa-na sɩ á fra zʋ səbu-sɩŋa, naa səbu-poŋo tɩlʋ na wʋ jwǝnǝ yam yɩra nɩ tɩn. Nan yɩ lɔɔnɩ-na-tɩ. Abam na kɩ kʋntʋ, tɩ wʋ́ ja abam nɩ cɩkʋ te. Jwǝnǝ kaanɩm yɩ kəm-balwaarʋ mʋ á Tu Baŋa-Wɛ yigə nɩ. 26 Yɩ ja-na wo-zɔɔna yam kʋntʋ dwi á zʋ á sam wʋnɩ, sɩ kʋntʋ na kɩa abam dɩ wʋ́ na cɔgɩm mʋ nɩ wǝǝnu tɩm kʋntʋ na maŋɩ dɩ cɔgɩm te tɩn. Yɔɔrɩ á taá culi-tɩ-na, sɩ tɩ maŋɩ dɩ cɔgɩm mʋ.»