Ba yɩ swe Baŋa-Wɛ swiə
8
«Nan tʋŋɩ-na á tɔgɩ Wɛ ni dɩlʋ maama a na pɛ abam zɩm tɩntʋ tɩn dɩ cɩga, sɩ kʋ pa á taá ŋwɩ yɩ á kɔgɔ kʋm puli zanzan. Abam maa wʋ́ zʋ tɩga kalʋ Baŋa-Wɛ na goni ni dɩ á nabaara bam sɩ DƖ pa abam tɩn wʋʋ á taá te. 2 Guli-na nɩ abam Tu Baŋa-Wɛ dɩm dɛɛn tɔgɩ abam yigə kagʋa cwə-dɔrɔ kʋm nɩ bɩna fiinna mʋ. DƖ ma pa cam zanzan yi abam sɩ DƖ ma pa á yagɩ kamunni, sɩ DƖ daarɩ o lwarɩ kʋlʋ na wʋ á bɩcarɩ nɩ tɩn mʋ, sɩ DƖ nii á wʋ́ sɛ DƖ ni naa á bá sɛ. 3 DƖ na pɛ á tu á tɩtɩ te tɩn, DƖ pɛ kana mʋ ni abam, yɩ DƖ laan pa abam Maanɩ sɩ á di. Kʋntʋ nan yɩ wʋdiu kʋlʋ abam dɩ á nabaara ya na yǝri tɩn mʋ. DƖ nan kɩ kʋntʋ sɩ kʋ pa abam lwarɩ nɩ kʋ daɩ wʋdiu yɩranɩ mʋ paɩ nabiinǝ ŋwɩ: sɩ kʋ yɩ Baŋa-Wɛ ni-taanɩ dɩm maama mʋ paɩ nɔɔna ŋwɩa.a 4 Bɩna fiinna yam kʋntʋ maama wʋnɩ abam gwaarʋ tɩm wʋ zarɩmɩ, yɩ á napra dɩ wʋ fʋlɩ cwǝŋǝ kam cam ŋwaanɩ. 5 Nan maanɩ-na á bɩcarɩ nɩ sɩ á Tu Baŋa-Wɛ dɩm dɩ yɔɔrɩ DƖ kʋrɩsɩ abam mʋ, nɩ ko na kʋrɩsɩ o bu te tɩn.6 Kʋntʋ tɩn, yɔɔrɩ á sɛ á Tu Baŋa-Wɛ niə yam. Taá tɔgɩ-na DƖ cwe sɩm, sɩ á daarɩ á taá kwarɩ-DƖ. 7 Bɛŋwaanɩ, abam Baŋa-Wɛ dɩm jɩgɩ abam DƖ zʋʋrɩ tɩ-ŋʋŋa wʋnɩ mʋ. Bu-tʋlɩ, dɩ na-weerə mʋ wʋ ka wʋnɩ, yɩ buli-yiə taɩ ya nuŋi ka bwəəlu dɩ ka pweeru je sɩm nɩ. 8 Tɩga kam kʋntʋ kɩ mɩna dwi dwi,b dɩ vinyə tweeru, dɩ kapʋrrʋ, kʋ ta wǝli dɩ grɩnadɩnɩ tweeru, dɩ olivi tweeru, dɩdaanɩ tʋʋrʋ. 9 Je sɩm kʋntʋ nɩ wʋdiiru gaalɩ, yɩ kʋlʋkʋlʋ zʋrɩ bá ja abam. Tɩga kam pweeru jɩgɩ luuru tɩ wʋnɩ, yɩ canna-sɩŋa dɩ wʋ ka zwəənu tɩm wʋnɩ.
10 Abam nan na di ka wʋdiiru á su, sɩ á zuli á Tu Baŋa-Wɛ dɩm dɩ tɩ-ŋʋŋa kalʋ DƖ na pɛ abam tɩn. 11 Taá yɩrɩ-na á tɩtɩ sɩ á yɩ swe abam Tu Baŋa-Wɛ dɩm. Yɩ swe-na DƖ ni nɩ, sɩ á vɩn DƖ niə yam, dɩ DƖ kwiə yam, dɩ DƖ cullu tɩm a na pɛ abam zɩm tɩn. 12 Kʋ na daɩ kʋntʋ, abam na di tɩga kam wʋdiiru á su, yɩ á ta lɔ sɔ-laarʋ á zʋʋrɩ tɩ wʋnɩ, 13 yɩ á vara dɩ na puli zanzan, yɩ á səbu-poŋo dɩ á səbu-sɩŋa daga pa á jɩjɩgɩrʋ tɩm puli tɩ pa abam, 14 á wʋ́ brɩ á tɩtɩ, yɩ á swe á Tu Baŋa-Wɛ dɩm ni nɩ. Dɩntʋ nan mʋ yɩ dɩlʋ na jaanɩ abam DƖ ja nuŋi Ezipi tɩʋ kʋm nɩ pa sɩ DƖ vrɩ abam á gabɛɛm dɩm nɩ DƖ yagɩ tɩn. 15 DƖ ma ja abam DƖ tɔgɩ kagʋa kam wʋnɩ, ka na yalma yɩ ka tiini ka jɩgɩ fʋʋnɩ ka pa abam tɩn. Bɩsankwɩ sɩlʋ ni na camma tɩn wʋra, yɩ nwaanʋ dɩ gaalɩ. Jǝgǝ kam kʋntʋ na kʋgɩ yɩ na tǝrǝ je je tɩn, DƖ pɛ na ta ba nuŋi kandwɛ-pulɔrɔ wʋnɩ. 16 Kagʋa kam wʋnɩ mʋ Baŋa-Wɛ yɔɔrɩ DƖ kwe Maanɩ DƖ kɔnɩ abam. Kʋ nan yɩ wʋdiu kʋlʋ á nabaara na yǝri tɩn mʋ. DƖ ma pa cam zanzan yi abam sɩ DƖ ma pa á tu á tɩtɩ, sɩ DƖ daarɩ DƖ maŋɩ abam DƖ nii, sɩ kʋ kwaga seeni á ŋwɩa kɩ lanyɩranɩ ka pa abam. 17 Kʋntʋ ŋwaanɩ, abam wʋlʋwʋlʋ yɩ fɔgɩ o bʋŋɩ o tɩtɩ nɩ o wɩ: ‹Amʋ dam dɩ a jɩŋa tɩtʋŋa mʋ pɛ-nɩ a jɩjɩgɩrʋ tɩm.› 18 Nan guli-na nɩ: kʋ yɩ á Tu Baŋa-Wɛ dɩm mʋ paɩ abam dam sɩ á ma á ji nadunə. DƖ nan kɩ kʋntʋ sɩ ni-gonim dɩlʋ DƖ na kɩ dɩ á nabaara bam tɩn mʋ su lanyɩranɩ, nɩ kʋ na yɩ te dɩ zɩm maama tɩntʋ tɩn.
19 Yɩ swe-na á Tu Baŋa-Wɛ dɩm ni nɩ sɩ á pipiri á beeri wa yadonnə sɩ á zuli-ya. Amʋ zɩm lagɩ a ta abam ja ja mʋ, nɩ á lagɩ á jé mʋ. 20 Baŋa-Wɛ wʋ́ kɩ abam nɩ DƖ na lagɩ DƖ kɩ te dɩ tɩɩnɩ dɩlʋ na wʋra yɩ abam laan lagɩ á zʋ ba tɩga kam wʋnɩ tɩn mʋ. DƖ wʋ́ yɔɔrɩ DƖ cɔgɩ abam mʋ, á na wʋ sɛ á Tu Baŋa-Wɛ dɩm kwǝrǝ tɩn ŋwaanɩ.»