Gulə Tɔnɔ 9

Baŋa-Wɛ zənə yam taanɩ

«Yisɩrayɛlɩ tiinə bam, cəgi-na! Abam zɩm lagɩ á bɛ Zʋrdɛn bugə kam mʋ, sɩ á zəli dwiə yalʋ na daga yɩ ba ta dana ba dwe abam tɩn ba tɩga kam nɩ. Nɔɔna bam kʋntʋ zʋʋrɩ tʋ-kamunə wʋnɩ, tɩ kabri sɩm na diini wɛɛnɩ vili-vili sɩ yi wɛyuu tɩn mʋ. 2 Ba maa dwara yɩ ba ta dana. Ba yɩ nɔn-sawaara balʋ na nuŋi Anakɩ dwi dɩm nɩ tɩn mʋ. Abam nan ni ba na tɛ ba taanɩ ba wɩ: ‹Wɔɔ mʋ wʋ́ wanɩ o dwəni dɩ Anakɩ tiinə bam?› 3 Nan lwarɩ-na nɩ á Tu Baŋa-Wɛ dɩm lagɩ DƖ da á yigə DƖ bɛ bugə kam, sɩ DƖ cɔgɩ-ba mʋ. Kʋʋ́ taa nyɩ dɩ min-fɔrɔ na di wo-yɔɔrʋ maama kulə te tɩn mʋ. Maŋa kalʋ abam na wʋ́ vu á zʋ da tɩn mʋ DƖ lagɩ DƖ di-ba, sɩ á wanɩ-ba á zəli á daarɩ á cɔgɩ-ba lɩla nɩ Baŋa-Wɛ na goni ni dɩ abam te tɩn.

4 Baŋa-Wɛ nan na zəli-ba kʋntʋ DƖ pa abam, yɩ ta-na á tɩtɩ nɩ á wɩ: ‹Dɩbam tɩtʋŋ-ŋʋna ŋwaanɩ mʋ Baŋa-Wɛ kwe tɩga kantʋ DƖ pa dɩbam sɩ dɩ́ taa te!› Awo! Kʋ yɩ tɩga kam tiinə tɩtʋŋ-lwaannʋ ŋwaanɩ mʋ o lagɩ o zəli-ba. 5 Kʋ daɩ á na yɩ nɔn-ŋʋna, yɩ á kikiə tɔgɩ cɩga tɩn ŋwaanɩ mʋ abam lagɩ á joŋi ba tɩga kam á taá te. Kʋ yɩ bantʋ wo-zɔɔna kikiə ŋwaanɩ mʋ Baŋa-Wɛ wʋ́ zəli-ba, sɩ kʋ kɩ nɩ DƖ na goni ni dɩ á nabaara Abraham, dɩ Yizakɩ, dɩ Zakɔbɩ te tɩn. 6 Lwarɩ-na nɩ abam Tu Baŋa-Wɛ dɩm ba lagɩ DƖ pa abam tɩ-ŋʋŋa kantʋ á na yɩ nɔn-ŋʋna tɩn ŋwaanɩ, sɩ abam daɩ kɔtaa! Abam nan yɔɔrɩ á yɩ zwabani-nyɩna mʋ.

Səbu-sɩŋa nʋa jwəm dɩm gulə

7 Guli-na abam dɛɛn na wʋ kagʋa kam nɩ yɩ á tiini á pa á Tu Baŋa-Wɛ banɩ zaŋɩ te tɩn. Kʋ na zɩgɩ dɛ dɩlʋ nɩ abam na nuŋi Ezipi nɩ, sɩ kʋ yi á na zɩgɩ yo lele tɩn, abam yɔɔrɩ á lɔ DƖ kwaga nɩ mʋ maŋa maama. 8 Sinayi piu kʋm nɩ mʋ á tiini á kɩ á zaŋɩ DƖ banɩ pa DƖ lagɩ sɩ DƖ cɔgɩ abam. 9 Amʋ dɛɛn diini piu kʋm yuu nɩ mʋ, sɩ a joŋi kandwa-pɩlɛ sɩle sɩlʋ baŋa nɩ Baŋa-Wɛ ni-mɔrɔ dɩm DƖ na kɩ dɩ abam tɩn na pʋpʋnɩ dɩ kɩ da tɩn. A ma maŋɩ dáanɩ da fiinna, wɩa dɩ tɩtɩɩ maama, yɩ a ba di wʋdiu, a nan ba nyɔ na. 10 Baŋa-Wɛ ma kwe kandwa yale yam DƖ na mɛ DƖ tɩtɩ jɩŋa DƖ pʋpʋnɩ DƖ niə yam maama ya baŋa nɩ tɩn DƖ pa-nɩ. Dɛ dɩm Yisɩrayɛlɩ kɔgɔ kʋm maama na jeeri piu kʋm təŋə nɩ tɩn, mʋ Baŋa-Wɛ zɩgɩ piu kʋm yuu nɩ DƖ ŋɔɔnɩ min-vʋgʋ wʋnɩ dɩ abam.

11 Amʋ na kɩ da fiinna piu kʋm yuu nɩ wɩa dɩ tɩtɩɩ maama tɩn, mʋ Baŋa-Wɛ kwe kandwa yale yam, DƖ na pʋpʋnɩ ni-mɔrɔ dɩm ya baŋa nɩ tɩn DƖ pa-nɩ. 12 Baŋa-Wɛ dɛɛn ma ta amʋ DƖ wɩ: ‹Kɩ lɩla n tu tɩga sɩ n yi nɔɔna balʋ n na jaanɩ n nuŋi Ezipi nɩ tɩn te. Ba cɔgɩ ba tɩtɩ mʋ, yɩ ba ta kɩ lwarɩm. Ba garɩ ba yagɩ ni dɩlʋ a na pɛ-ba sɩ ba taa tɔgɩ tɩn mʋ, yɩ ba ma səbu-sɩŋa ba kɩ jwəm ba pa ba tɩtɩ.›

13 Baŋa-Wɛ ta ma ta dɩ amʋ DƖ wɩ: ‹Amʋ ye nɔɔna bantʋ na yɩ balʋ tɩn. Ba yɔɔrɩ ba yɩ zwabani-nyɩna mʋ. 14 Nan ta n zɩgɩ dáa nɩ n nii-nɩ. A lagɩ a cɔgɩ-ba mʋ sɩ ba yɩrɩ saarɩ lʋgʋ baŋa maama nɩ. Amʋ laan maa wʋ́ zɩgɩ nmʋ baŋa nɩ, a pa tʋ-fɔrɔ puli dɩ nmʋ kwaga kam. Bantʋ tɩʋ kʋm maa wʋ́ taa daga yɩ kʋ dana kʋ dwe nɔɔna bantʋ na yɩ te lele tɩn.›

15 Amʋ ma sɩɩnɩ a pipiri a zɩgɩ piu kʋm yuu nɩ a tu tɩga, yɩ a ze kandwa-pɩlɛ sɩle sɩlʋ baŋa nɩ ni-mɔrɔ dɩm na pʋpʋnɩ dɩ kɩ da tɩn. Piu kʋm nan ya ta yɔɔrɩ kʋ di dɩ min-vʋgʋ mʋ. 16 Amʋ na sɩɩnɩ a nii tɩn, a nɛ səbu-sɩŋa nʋa kalʋ abam na mɔɔnɩ sɩ ka taa yɩ á jwəm tɩn. A ta nɛ nɩ á kɩ lɩla á ywəri Baŋa-Wɛ cwǝŋǝ wʋnɩ yɩ á kɩ lwarɩm DƖ yigə nɩ. 17 A na nɛ kʋntʋ tɩn, mʋ a dɩ yɔɔrɩ a zǝŋi ni-mɔrɔ kandwa yalʋ a ya na ze tɩn wɛɛnɩ, yɩ a fəri-ya tɩga nɩ a lɔ. Abam yibiyə nɩ mʋ a kɩ kǝm dɩm kʋntʋ.

18 Amʋ daa ma vi a yigə tɩga nɩ Baŋa-Wɛ yigə nɩ pa da fiinna maama wʋnɩ a ba di kʋlʋkʋlʋ, a nan ba nyɔ na, wɩa dɩ tɩtɩɩ maama. A kɩ kʋntʋ bɛŋwaanɩ abam kɩ lwarɩm dɩlʋ Baŋa-Wɛ na yɔɔrɩ DƖ culi tɩn yɩ á pa DƖ banɩ tiini dɩ zaŋɩ. 19 Fʋʋnɩ ya tiini dɩ jɩgɩ-nɩ mʋ dɩ Baŋa-Wɛ na wʋ́ kɩ abam te tɩn ŋwaanɩ. DƖ banɩ dɛɛn tiini dɩ zaŋɩ mʋ yɩ DƖ bʋŋɩ sɩ DƖ yɔɔrɩ DƖ cɔgɩ abam. Dɩ kʋ dɩ, a na loori Wɛ tɩn, DƖ cəgi-nɩ. 20 Baŋa-Wɛ banɩ ya ta zaŋɩ dɩ Arɔn dɩ mʋ yɩ DƖ bʋŋɩ sɩ DƖ cɔgɩ wʋntʋ dɩ. A maa na loori Wɛ a pa Arɔn tɩn, Baŋa-Wɛ dɛɛn sɛ a wɛ-loro kʋm kʋntʋ dɩ. 21 A dɛɛn ma kwe woŋo kʋlʋ na pɛ á kɩ lwarɩm dɩm tɩn, səbu-sɩŋa nʋa kam mʋ kʋntʋ. A ma nyɩɩnɩ-ka, yɩ a daarɩ a nɔnɩ-ka murə-murə. A laan ma kwe-ka a dʋlɩ a yagɩ bu-tʋla nɩ pa na bam zɩŋɩ-ka ba ja ba viiri.

22 Abam dɛɛn ta na ve á yi Tabera nɩ, dɩ Masa nɩ, dɩ Kibrɔtɩ-Atava nɩ tɩn, á pɛ Baŋa-Wɛ banɩ zaŋɩ mʋ. 23 Abam nan na yi Kadese-Baranɩa nɩ tɩn mʋ Baŋa-Wɛ pɛ abam ni DƖ wɩ: ‹Zʋ-na tɩga kalʋ a na pɛ abam tɩn á kwe-ka á taá te.› Abam ma vɩn Baŋa-Wɛ ni dɩm kʋntʋ, yɩ á wʋ pɛ‑DƖ cɩga. 24 Cɩga tɩn, kʋ zɩgɩ a na lwarɩ abam maŋa kalʋ nɩ tɩn, á yɔɔrɩ á yɩ balʋ na vɩn Baŋa-Wɛ ni tɩn mʋ.

25 Kʋntʋ ŋwaanɩ nan mʋ pɛ amʋ dɩ tʋ Baŋa-Wɛ yigə nɩ, yɩ a ja DƖ təŋə da fiinna, wɩa dɩ tɩtɩɩ maama. Kʋ maa yɩ DƖ na ti yigə sɩ DƖ cɔgɩ abam dɩ á na pɛ DƖ banɩ zaŋɩ tɩn ŋwaanɩ mʋ a kɩ kʋntʋ. 26 Amʋ ma loori Baŋa-Wɛ yɩ a wɩ: ‹Yuutu Baŋa-Wɛ, a loori-m! Yɩ cɔgɩ nmʋ tɩtɩ nɔɔna bam. Ba yɩ nmʋ nyɩm nɔɔna balʋ n na kwe n dam-fɔrɔ kʋm n ma n vrɩ-ba n ja n nuŋi Ezipi tɩʋ nɩ tɩn mʋ. 27 Guli n tɩntʋŋna Abraham, dɩ Yizakɩ, dɩ Zakɔbɩ ni nɩ, sɩ n yɩ jeeli nɔɔna bantʋ wʋ-dɛɔ dɩ ba kǝm-balwaarʋ, dɩ ba lwarɩm dɩm. 28 Nmʋ nan na cɔgɩ nɔɔna bantʋ, Ezipi tiinə bam wʋ́ ta wɩ nmʋ wʋ wanɩ n nɔɔna bam sɩ n ja n zʋ tɩga kalʋ n na goni ni sɩ n pa-ba tɩn. Ba ta wʋ́ ta nɩ: «Baŋa-Wɛ na culi DƖ nɔɔna bam tɩn ŋwaanɩ mʋ DƖ jaanɩ-ba DƖ vu kagʋa kam wʋnɩ sɩ DƖ gʋ-ba!» 29 Nan nii! Nɔɔna bantʋ yɩ nmʋ tɩtɩ nɔɔna balʋ n na kuri sɩ ba taa yɩ nmʋ nyɩm tɩn. N tɔgɩ n dam baŋa nɩ n tʋŋɩ wo-kamunnu n ma n ja-ba n nuŋi Ezipi nɩ n ba yo.› »