Gulə Tɔnɔ 10

Wɛ joori DƖ tiŋi DƖ niə yam DƖ pa Moyisi

«Ka maŋa kam nɩ, Baŋa-Wɛ ma ta dɩ amʋ DƖ wɩ: ‹Sarɩ kandwa-pɩlɛ sɩle nɩ dayigə nyɩna yam, n daarɩ n kwe daa n ma n kɩ daka, sɩ n laan din piu kʋm yuu n ba a te. 2 Sɩ a lagɩ a joori a pʋpʋnɩ bɩtarɩ sɩlʋ a na kɩ dayigə kandwa yam nɩ yɩ n lɔ tɩn mʋ a kɩ kandwa yantʋ baŋa nɩ. Kʋ kwaga nɩ, n maŋɩ sɩ n kwe-ya mʋ n tiŋi daka kam wʋnɩ.›

3 A ma kwe akasɩa dɛ a ma a kɩ daka a daarɩ a sarɩ kandwa-pɩlɛ sɩle nɩ dayigə nyɩna yam. A ma zeeri kandwa yam a ja a din piu kʋm yuu. 4 Baŋa-Wɛ ma joori DƖ pʋpʋnɩ DƖ niə fugə kam DƖ tiŋi kandwa yam baŋa nɩ, nɩnɛɛnɩ dayigə pʋpʋnɩm dɩm doŋ. DƖ ya zɩgɩ min-vʋgʋ wʋnɩ DƖ tɔɔlɩ DƖ niə yam kʋntʋ sɩ abam ni dɛ dɩm á dɛɛn na gilimi DƖ yigə nɩ tɩn. DƖ na joori DƖ pʋpʋnɩ-ya tɩn, DƖ laan ma kwe kandwa yam DƖ pa amʋ. 5 A ma zɩgɩ piu kʋm yuu nɩ a tu tɩga, yɩ a daarɩ a kwe kandwa yam a tiŋi daka kalʋ a na kɩ tɩn wʋnɩ. A kɩ Baŋa-Wɛ na wɩ a kɩ te maama tɩn yɩ ya ta wʋra dɩ zɩm maama.

6 Yisɩrayɛlɩ tiinə bam dɛɛn ya zɩgɩ Yaakan dwi tiinə buli sɩm seeni mʋ ba vu ba yi Mosera. Ba na yi da tɩn mʋ Arɔn tɩga yɩ ba kɩ-o je sɩm kʋntʋ nɩ. O bu Eleyazaarɩ ma ləri o yuu nɩ o ji Wɛ kaanɩm nakwɩ tu. 7 Ba ma zɩgɩ dáanɩ ba vu Gudigoda. Ba daa ma zɩgɩ Gudigoda nɩ ba vu ba yi Yotibata, mɛ bu-tʋlɩ na daga da tɩn.

8 Ka maŋa kam nɩ, Baŋa-Wɛ ma pɔɔrɩ Levi dwi dɩm DƖ pa DƖ tɩtɩ, sɩ ba taa zeeri daka kam, sɩ ba kwǝri ba taa zɩgɩ DƖ yigə nɩ ba tʋŋɩ ba pa‑DƖ yɩ ba kwe Wɛ yɩrɩ ba ma kɩ Yisɩrayɛlɩ dwi tiinə bam maama yu-yoŋo. Ba ta wʋra ba kɩ kʋntʋ doŋ dɩ zɩm maama. 9 Kʋntʋ ŋwaanɩ mʋ te Levi tiinə bam ba maŋɩ sɩ ba joŋi tɩga nɩnɛɛnɩ ba cʋrrʋ tɩm na nɛ ba nyɩm tɩga kam pɔɔrɩm baŋa nɩ te tɩn. Baŋa-Wɛ tɩtɩ mʋ yɩ ba nyɩm, nɩnɛɛnɩ DƖ na pooli dɩ ba te tɩn.

10 Amʋ nan ta kɩ da fiinna mʋ piu kʋm yuu nɩ, wɩa dɩ tɩtɩɩ maama, nɩ a ya na kɩ dayigə kam nɩ te tɩn. Baŋa-Wɛ ma sɛ a wɛ-loro kʋm pa DƖ wʋ cɔgɩ abam. 11 DƖ ma ta dɩ amʋ DƖ wɩ: a zaŋɩ a da abam yigə sɩ á wanɩ á zʋ á taá te tɩga kam nɩnɛɛnɩ DƖ na goni ni dɩ á nabaara bam sɩ DƖ kɩ te tɩn.

Taá kwarɩ-na Baŋa-Wɛ

12 Kʋntʋ tɩn, Yisɩrayɛlɩ tiinə bam, kikiə dwi dɔɔ mʋ abam Tu Baŋa-Wɛ dɩm beeri á tee nɩ? Kʋ yɩ sɩ á taá kwarɩ á Tu Baŋa-Wɛ dɩm, sɩ á taá tɔgɩ DƖ cwe sɩm, sɩ á taá soe‑DƖ lanyɩranɩ, sɩ á daarɩ á taá tʋŋɩ á pa‑DƖ dɩ á bɩcarɩ dɩ á wʋbʋŋa maama mʋ, 13 yɩ á tʋŋɩ á tɔgɩ DƖ niə dɩ DƖ kwiə yalʋ maama amʋ na pɛ abam zɩm tɩn. Á na sɩɩnɩ á kɩ kʋntʋ doŋ, á ŋwɩa wʋ́ kɩ lanyɩranɩ kʋ pa abam. 14 Cɩga ŋwaanɩ tɩn, abam Tu Baŋa-Wɛ dɩm mʋ te wɛyuu baŋa kam maama, dɩdaanɩ lʋgʋ baŋa dɩ kʋlʋ maama na wʋ kʋ wʋnɩ tɩn. 15 Baŋa-Wɛ wʋbʋŋa nan dɛ á nabaara bam sɩ DƖ taa jɩgɩ ba sono. DƖ ma daarɩ DƖ kuri abam balʋ na yɩ ba biə tɩn lʋgʋ baŋa dwi maama wʋnɩ, sɩ á taá yɩ Dɩntʋ tɩtɩ nyɩm, nɩnɛɛnɩ á ta na yɩ te dɩ zɩm maama tɩn. 16 Kʋntʋ tɩn, kwɛ-na á bɩcara nɩ Wɛ na pɛ abam ni sɩ á kɩ te tɩn, sɩ á daa yɩ kɩ zwabaniə. 17 Bɛŋwaanɩ, abam Tu Baŋa-Wɛ dɩm mʋ te wa maama. DƖ maa yɩ yuutiinə maama Yuutu. DƖ yɩ Wɛ kamunu yɩ DƖ tiini DƖ jɩgɩ fʋʋnɩ. Dɩntʋ nan ba kuri nɔɔna daanɩ dɩ DƖ na bʋrɩ ba bʋra te tɩn yɩ DƖ ba joŋi dim. 18 Kʋ na yɩ bɩtara dɩ kadənə, DƖ yǝni DƖ tʋŋɩ dɩ cɩga mʋ DƖ pa-ba. DƖ ta kwǝri DƖ soe vərə balʋ na zʋʋrɩ á wʋnɩ tɩn, yɩ DƖ wǝli-ba dɩ wʋdiiru dɩ gwaarʋ. 19 Abam dɩ maŋɩ sɩ á taá soe vərə mʋ, á dɩ dɛɛn na yɩ vərə Ezipi tɩʋ kʋm nɩ tɩn ŋwaanɩ. 20 Taá kwarɩ-na á Tu Baŋa-Wɛ dɩm yɩ á tʋŋɩ á pa‑DƖ. Taá salɩ-na Dɩntʋ. Á na goni ni dɩ nɔɔnʋ, sɩ á ma Baŋa-Wɛ yɩrɩ dɩm yɩranɩ á du durə. 21 Dɩntʋ mʋ yɩ wʋlʋ á na maŋɩ sɩ á taá tee‑DƖ tɩn. DƖ tʋŋɩ wo-kɩnkagɩla na jɩgɩ fʋʋnɩ tɩn á yibiyə nɩ sɩ DƖ ma joŋi abam. 22 Á nabaara bam dɛɛn zaŋɩ ba vu Ezipi tɩʋ kʋm yɩ ba yɩ nɔɔna fusɩrpɛ yɩranɩ mʋ. Lele kʋntʋ abam Tu Baŋa-Wɛ dɩm pɛ á kɔgɔ kʋm puli kʋ daga nɩ wɛyuu calɩcwɩ sɩm na yɩ te tɩn.»