Baŋa-Wɛ jɩgɩ dam
11
«Kʋntʋ tɩn á maŋɩ sɩ á taá soe abam Tu Baŋa-Wɛ dɩm mʋ. Taá tʋŋɩ á tɔgɩ DƖ niə yam, dɩ DƖ cullu tɩm, dɩ DƖ kwiə yam maama. 2 Lwarɩ-na nɩ a zɩm ŋɔɔnɩ dɩ abam mʋ yɩ kʋ daɩ á biə balʋ na wʋ nɛ Baŋa-Wɛ kʋrɩsɩm tɩn. Bantʋ tɩtɩ yi wʋ nɛ Baŋa-Wɛ kamunni dɩm dɩdaanɩ DƖ dam dɩlʋ DƖ na mɛ DƖ vrɩ abam tɩn. 3 DƖ dɛɛn tʋŋɩ wo-kɩnkagɩla Ezipi tɩʋ kʋm nɩ sɩ DƖ ma waarɩ kʋ Pa-farʋ wʋm dɩ o nɔɔna bam maama. 4 DƖ ma cɔgɩ ba jar-kərə bam dɩ ba sise dɩ sɩ tərikooru tɩm. Bantʋ na kwaanɩ sɩ ba zəli abam ba ja tɩn, Baŋa-Wɛ ma pa ba miisi Nanɩ-sʋŋʋ kʋm nɩ ba tɩ.a Kʋ dɛ kʋntʋ mʋ yɩ ba na ba cɔgɩm sɩ kʋ ba kʋ yi zɩm. 5 Á biə bam wʋ nɛ Baŋa-Wɛ na tʋŋɩ te DƖ zǝni abam maŋa kalʋ á na beeri taa kagʋa kam wʋnɩ á ba á yi yo seeni tɩn. 6 Ba wʋ nɛ Baŋa-Wɛ na kɩ Ruban dwi tu Eliabɩ biə Datan dɩ Abiram te tɩn. Wɛ dɛɛn pɛ tɩga kam puri Yisɩrayɛlɩ tiinə kɔgɔ kʋm tɩtarɩ nɩ ka li-ba, dɩ ba sɔŋɔ tiinə, dɩ ba vwə yam, dɩdaanɩ ba jɩjɩgɩrʋ maama.b 7 Abam tɩtɩ yiǝ mʋ nɛ tɩtʋŋ-kamunnu tɩlʋ maama Baŋa-Wɛ na tʋŋɩ tɩn.8 Kʋntʋ ŋwaanɩ, sɛ-na Wɛ niə yalʋ amʋ na pɛ abam zɩm tɩn maama, sɩ á joŋi dam á wanɩ á bɛ á zʋ tɩga kam á taá te-ka. 9 Á laan maa wʋ́ taá zʋʋrɩ tɩga kalʋ Baŋa-Wɛ na pooli dɩ á nabaara bam sɩ DƖ pa bantʋ dɩ ba biə bam tɩn wʋnɩ á daanɩ. Tɩga kam tiini ka ywəmmə dɩ varɩm dɩ kɔnɔ. 10 Tɩga kam á na lagɩ á zʋ tɩn daɩ nɩ Ezipi lʋgʋ kʋm, á dɛɛn na zʋʋrɩ mɛ tɩn. Je sɩm kʋntʋ nɩ á yǝni á du wǝǝnu mʋ yɩ á kwǝri á yagɩ na da sɩ kʋ cɛ á yɩra nɩ, nɩnɛɛnɩ nɔɔnʋ na kɩ gaarɩ te tɩn. 11 Tɩga kalʋ á nan na lagɩ á zʋ tɩn jɩgɩ pweeru dɩ bwəəlu mʋ, yɩ dʋa nɩ da lanyɩranɩ. 12 Abam Tu Baŋa-Wɛ dɩm yi pagɩ tɩga kam kʋntʋ baŋa nɩ mʋ. DƖ maa nii-ka bɩnɩ dɩm maama wʋnɩ.
13 Kʋntʋ tɩn, á maŋɩ sɩ á sɛ Wɛ niə yalʋ amʋ na brɩ abam zɩm tɩn, sɩ á daarɩ á taá soe á Tu Baŋa-Wɛ dɩm yɩ á tʋŋɩ á pa‑DƖ dɩ á bɩcarɩ dɩdaanɩ á wʋ maama. 14 Á na kɩ kʋntʋ, Baŋa-Wɛ wɩ: DƖ laan wʋ́ tʋŋɩ dʋa pa ka nɩ ka maŋa nɩ. DƖ wʋ́ pa abam pulim dʋa dɩ kweelim dʋa. Tɩga kam wʋ́ kɩ wʋdiiru zanzan sɩ á na mɩna, dɩ sana, dɩ nugə maama. 15 Á vara dɩ wʋ́ na gaa lanyɩranɩ sɩ ba di. Wʋdiiru tɩlʋ maama á na lagɩ tɩn wʋ́ yi abam sɩ á taá di á sui.
16 Nan taá ye-na sɩ ba yɩ sʋgɩ abam sɩ á ywəri Baŋa-Wɛ kwaga nɩ á daarɩ á taá zuli wa-yɔɔrʋ yɩ á tʋŋɩ á pa-ya. 17 Á na kɩ kʋntʋ, Baŋa-Wɛ banɩ wʋ́ zaŋɩ dɩ abam. DƖ ta wʋ́ cɩ dʋa kam sɩ ka daa yɩ taa nɩ. Tɩ-ŋʋŋa kalʋ DƖ na lagɩ DƖ pa abam tɩn daa bá kɩ wʋdiiru ka pa abam, pa á dwi ti lɩla lʋgʋ baŋa nɩ.
18 Taá guli-na Wɛ niə yalʋ a na brɩ abam tɩn sɩ á kɩ-ya á bɩcarɩ nɩ. Lwəni-na-ya á tiŋi tɔnɔ nɩ sɩ á daarɩ á vɔ-ya á jɩan nɩ, dɩdaanɩ á trǝ nɩ, sɩ á taá guli ya gulə. 19 Pa-na sɩ á biə dɩ lwarɩ-ya. Taá tɛ-na ya taanɩ maŋa maama, nɩnɛɛnɩ á na je sɔŋɔ nɩ yɩ á lara, naa á na tɔgɩ daanɩ á ve cwǝŋǝ yuu nɩ, kʋ ta wǝli dɩ á na pəni tɩtɩɩ nɩ, naa á na zaŋɩ zɩzɩŋa maama nɩ. 20 Pʋpʋnɩ-na-ya á tiŋi á di sɩm ni-bwəəru tɩm nɩ, sɩ á daarɩ á ta pʋpʋnɩ-ya á yagɩ á manco-niə dɛ sɩm nɩ. 21 Kɩ-na kʋntʋ sɩ abam dɩ á kwaga kam wanɩ á zʋ tɩga kam nɩ á daanɩ. Ka maa yɩ tɩga kalʋ Baŋa-Wɛ na goni ni dɩ á nabaara bam sɩ DƖ pa-ba tɩn, yɩ á wʋ́ taá te-ka taan wuu, sɩ kʋ maŋɩ dɩ wɛyuu dɩ lʋgʋ baŋa ta na wʋra maŋa kalʋ tɩn wʋnɩ.
22 Taá ye-na sɩ á kɩ á tɔgɩ Wɛ ni dɩm maama, nɩ amʋ zɩm na brɩ abam sɩ á kɩ te tɩn: Taá soe-na á Tu Baŋa-Wɛ dɩm yɩ á tɔgɩ DƖ cwe sɩm maama. Nan salɩ-na DƖ yɩra nɩ. 23 Á na sɩɩnɩ á kɩ kʋntʋ doŋ, Baŋa-Wɛ wʋ́ zəli dwi tiinə balʋ na maŋɩ ba wʋ lʋgʋ kʋm wʋnɩ tɩn mʋ. DƖ ta wʋ́ pa abam dam sɩ á wanɩ á joŋi tɩɩnɩ dɩlʋ na dana ba dwe abam tɩn sɩ á taá te. 24 Tɩga kalʋ maama á nɛ na wʋ́ nɔ ka baŋa nɩ tɩn wʋ́ taa yɩ abam nyɩm mʋ. Abam laŋa kam wʋ́ zɩgɩ kagʋa kalʋ na wʋ kuri seeni tɩn sɩ ka vu ka yi Liban pweeru tɩm na wʋ jazɩm baŋa seeni tɩn. Ka daa ta wʋ́ zɩgɩ Efratɩ bu-fara kam na wʋ wa-puli seeni tɩn sɩ kʋ yi Mediterane nɩnɩʋ kʋm na wʋ wa-zʋʋrɩ seeni tɩn. 25 Á na ve mɛ maama lʋgʋ kʋm nɩ, á Tu Baŋa-Wɛ dɩm wʋ́ pa sɩ abam fʋʋnɩ mʋ ja je sɩm nɔɔna bam, nɩ DƖ na pooli sɩ DƖ kɩ te tɩn. Nɔɔn-nɔɔnʋ daa bá wanɩ abam o cəŋi.c
26 Nan cəgi-na, amʋ zɩm tiŋi lanyɩranɩ dɩ balɔrɔ mʋ, abam yigə nɩ sɩ á wanɩ á twəri kʋlʋ abam na lagɩ tɩn. 27 Abam na sɛ á tɔgɩ Wɛ niə yalʋ amʋ zɩm na pɛ abam tɩn, Wɛ wʋ́ kɩ abam yu-yoŋo. 28 Á nan na vɩn DƖ niə yantʋ yɩ á zuli dwi-gɛ tiinə wa-yɔɔrʋ tɩm, Wɛ wʋ́ sɔɔlɩ lwarɩm mʋ DƖ yagɩ á baŋa nɩ.
29 Nɩ abam Tu Baŋa-Wɛ dɩm na jaanɩ abam DƖ zʋ tɩga kam sɩ á taá te, á maŋɩ sɩ á zɩgɩ Gerizim piu kʋm yuu nɩ á tɔɔlɩ Wɛ yu-yoŋo kʋm, yɩ á daarɩ á zɩgɩ Ebalɩ piu kʋm yuu nɩ á tɔɔlɩ DƖ Kampwəl-balwara yam. 30 Á ye nɩ: pweeru tɩm kʋntʋ wʋ Zʋrdɛn bugə kam bubɛ dɩdoŋ nɩ sɩ kʋ taa ve wa-zʋʋrɩ seeni mɛ Kaanan tiinə bam na zʋʋrɩ bolo kʋm nɩ tɩn. Tɩ maa bwələ dɩ Giligalɩ tɩʋ kʋm. More tiu kʋm seeni mʋ kʋntʋ.