Baŋa-Wɛ zulə jǝgǝ kam
12
«Wɛ niə yam dɩ DƖ cullu tɩm mʋ tɩntʋ. Taá ye-na sɩ á taá tɔgɩ-ya maŋa kalʋ maama á na zʋʋrɩ lʋgʋ kʋlʋ Baŋa-Wɛ na pɛ abam sɩ á taá te tɩn wʋnɩ. Dɩntʋ maa yɩ á nabaara Baŋa-Wɛ dɩm mʋ.2 Abam na tu á ba á zəli lʋgʋ kʋm dwi tiinə bam, sɩ á cɔgɩ je sɩlʋ maama ba na yǝni ba kaanɩ ba jwǝnǝ da tɩn. Kʋ na yɩ pweeru yuu nɩ, naa pweeru baŋa nɩ, naa tangwana baŋa nɩ, á maŋɩ sɩ á yɔɔrɩ á cɔgɩ ba jwǝnǝ kaanɩm je sɩm maama mʋ. 3 Magɩ-na ba kaanɩm bimbinə yam á dɩ tɩga nɩ, sɩ á daarɩ á lɔ kandwa yalʋ ba na cwi ba jwǝnǝ ŋwaanɩ tɩn. Goni-na ba Asera nyɩnyʋgʋ dɛ sɩm á dɩ tɩga nɩ, sɩ á daarɩ á kɩ mim á zwɛ-sɩ, yɩ á cɔgɩ ba jwǝnǝ yam maama pa ya yɩra saarɩ je sɩm kʋntʋ nɩ.a
4 Abam nan na zuli á Tu Baŋa-Wɛ dɩm, sɩ á yɩ kɩ nɩnɛɛnɩ nɔɔna bantʋ na zuli ba jwǝnǝ yam te tɩn. 5 Baŋa-Wɛ wʋ́ kuri jǝgǝ kadoŋ Yisɩrayɛlɩ dwi tiinə bam maama tɩga kam wʋnɩ, sɩ ka taa yɩ DƖ zʋʋrɩm je nɔɔna na wʋ́ vu ba zuli DƖ yɩrɩ da tɩn.b 6 Dáanɩ mʋ á wʋ́ ja á zwɛɛm kaanɩm vara bam á ja vu á kaanɩ á pa‑DƖ. Kʋ ta na yɩ á kaanɩm dwi maama, dɩ á Wɛ-təri pɛɛra, dɩ á jɩŋa pɛɛra, dɩ á ni-gonim pɛɛra, dɩ á wʋ-yoŋo pɛɛra maama, kʋ ta wǝli dɩ á vara bam na dɛ yigə ba lʋ biə balʋ tɩn, á maŋɩ sɩ á kwe-ya á vu je sɩm kʋntʋ á pa Baŋa-Wɛ. 7 Abam dɩdaanɩ á sɔŋɔ tiinə bam wʋ́ vu á jǝni á Tu Baŋa-Wɛ yigə nɩ á di wʋdiiru tɩlʋ á na tʋŋɩ tɩ ŋwaanɩ tɩn, yɩ á kwǝri á jɩgɩ wʋpolo Baŋa-Wɛ na kɩ abam yu-yoŋo tɩn ŋwaanɩ.c
8 Maŋa kam na yiǝ, á daa ba maŋɩ sɩ á taá kɩ nɩnɛɛnɩ dɩbam zɩm na yǝni dɩ́ kɩ yɩ dɩ́ zuli Wɛ te tɩn. Lele kʋntʋ nɔɔnʋ maama yǝni o zuli Wɛ nɩ o na lagɩ te tɩn mʋ. 9 Bɛŋwaanɩ abam ta wʋ yi tɩga kalʋ á Tu Baŋa-Wɛ dɩm na lagɩ DƖ pa abam sɩ á taá te tɩn sɩ á daarɩ á na wʋ-zuru ka wʋnɩ. 10 Á nan na bɛ Zʋrdɛn bugə kam, yɩ á vu á jǝni tɩga kam kʋntʋ nɩ, Baŋa-Wɛ wʋ́ pa á dʋna daa yɩ daanɩ abam pa á sin dɩ wʋ-zuru. 11 Maŋa kam kʋntʋ nɩ Baŋa-Wɛ wʋ́ kuri jǝgǝ dɩdʋa sɩ ka taa yɩ DƖ zʋʋrɩm je nɔɔna na wʋ́ vu ba zuli DƖ yɩrɩ da tɩn. Dáanɩ mʋ á maŋɩ sɩ á ja kʋlʋ maama amʋ na brɩ abam tɩn á ja á vu á ma kɩ kaanɩm á pa‑DƖ: vara zwɛɛm kaanɩm, dɩdaanɩ á kaanɩm dwi dɩlʋ maama, dɩ á Wɛ-təri pɛɛra, dɩ á jɩŋa pɛɛra, dɩ á ni-gonim pɛ-laarʋ tɩm. 12 Dáanɩ mʋ á wʋ di ywəəni á Tu Baŋa-Wɛ dɩm yigə nɩ, abam dɩ á biə dɩ á tɩntʋŋna bam, baara dɩ kaana maama. Levi dwi tiinə balʋ na zʋʋrɩ abam tee nɩ tɩn dɩ wʋ́ tɔgɩ dɩ abam ba vu da, bantʋ na ba jɩgɩ ba tɩtɩ tɩga sɩ ba taa te tɩn ŋwaanɩ. 13 Taá ye-na sɩ kʋ daɩ nɩ á na yi mɛ maama, sɩ á zwɛ varɩm á ma á kɩ kaanɩm da. 14 Kʋ nan maŋɩ sɩ á vu jǝgǝ kalʋ yɩranɩ Baŋa-Wɛ na kuri Yisɩrayɛlɩ dwi tiinə bam maama tɩga kam wʋnɩ tɩn, sɩ á kɩ kaanɩm da á pa‑DƖ, yɩ á daarɩ á kɩ kʋlʋ maama amʋ na brɩ abam sɩ á kɩ tɩn.
15 Cwǝŋǝ nan wʋra sɩ á gʋ á sɔŋɔ vara bam á di mɛ maama á na zʋʋrɩ tɩn. Á waɩ á di á sui, nɩ á Tu Baŋa-Wɛ dɩm na wǝli abam dɩ vara balʋ tɩn. Kʋ maa nyɩ dɩ á na lagɩ á di wəŋə naa fərə yɩ nɔɔna maama jɩgɩ cwǝŋǝ sɩ ba di, ba na maŋɩ ba kwɛ ba tɩtɩ Wɛ ŋwaanɩ naa ba wʋ kwɛ ba tɩtɩ mʋ dɩ. 16 Kʋ nan culǝ sɩ á di vara bam jana mʋ.d Á pa-na sɩ jana bam lo tɩga nɩ, nɩ á na wʋ́ lo na á yagɩ te tɩn. 17 Kʋ daarɩ kʋ na yɩ wʋdiiru tɩlʋ á na maŋɩ sɩ á ma á kɩ kaanɩm tɩn, kʋ culǝ sɩ á di tɩntʋ tɩm á sam dɩm nɩ. Kʋ na yɩ á Wɛ-təri pɛɛra yalʋ na yɩ mɩna naa sana naa nugə tɩn, dɩ á vara bam na dɛ yigə ba lʋ biə balʋ tɩn, dɩ á ni-gonim pɛɛra, dɩ á wʋ-yoŋo pɛɛra dɩdaanɩ á jɩŋa pɛɛra yam maama, 18 á maŋɩ sɩ á kwe-ya á ja vu jǝgǝ kalʋ á Tu Baŋa-Wɛ dɩm na wʋ́ kuri tɩn yɩ á daarɩ á di-ya DƖ yigə nɩ. Abam dɩ á biə dɩ á tɩntʋŋna, baara dɩ kaana maama, dɩdaanɩ Levi tiinə balʋ na zʋʋrɩ abam tee nɩ tɩn mʋ wʋ́ vu á di ywəəni Baŋa-Wɛ yigə nɩ dɩ kʋlʋ maama á na tʋŋɩ kʋ ŋwaanɩ tɩn. 19 Taá ye-na sɩ á yɩ swe Levi dwi tiinə bam ni nɩ maŋa kalʋ maama á na wʋ́ taá zʋʋrɩ á tɩga kam nɩ tɩn.
20 Abam Tu Baŋa-Wɛ dɩm na tu DƖ ba DƖ pa á laŋa kam yalɩ nɩnɛɛnɩ DƖ na pooli DƖ pa abam te tɩn, pa á fra zʋ nwana dim, á waɩ á dʋnɩ á sui. 21 Jǝgǝ kalʋ Baŋa-Wɛ na wʋ́ kuri sɩ nɔɔna taa zuli DƖ yɩrɩ da tɩn na tiini ka yɩ yigə yigə dɩ abam, á waɩ á lɩ varɩm vara balʋ Baŋa-Wɛ na pɛ abam tɩn wʋnɩ á gʋɩ yɩ á daarɩ á di á sam nɩ á sui, nɩ amʋ na brɩ abam te tɩn. 22 Kʋ maa nyɩ dɩ á na lagɩ á di wəŋə naa fərə yɩ nɔɔna maama jɩgɩ cwǝŋǝ sɩ ba di, ba na maŋɩ ba kwɛ ba tɩtɩ Wɛ ŋwaanɩ naa ba wʋ kwɛ ba tɩtɩ dɩ. 23 Kʋ nan culǝ sɩ á di vara bam jana mʋ, bɛŋwaanɩ ŋwɩa kam mʋ jɩgɩ kuri jana bam ŋwaanɩ. Kʋ nan daɩ sɩ abam di ŋwɩa kam dɩdaanɩ nwana yam. 24 Yɩ kwe-na jana bam á ma á ji wʋdiu. Nan kwe-na-ba á lo tɩga nɩ, nɩ á na wʋ́ lo na á yagɩ te tɩn. 25 Á na sɩɩnɩ á vɩn jana bam dim, kʋʋ́ pa Baŋa-Wɛ wʋʋ poli lanyɩranɩ. Á ŋwɩa maa wʋ́ kɩ lanyɩranɩ ka pa abam dɩ á kwaga kam maama.
26 Kwe-na á Wɛ kaanɩm pɛɛra yam dɩ á ni-gonim pɛɛra yam á ja á vu jǝgǝ kalʋ Baŋa-Wɛ na wʋ́ kuri tɩn. 27 Kʋ na yɩ zwɛɛm kaanɩm, sɩ á zwɛ varɩm wʋm Baŋa-Wɛ kaanɩm bimbim dɩm baŋa nɩ, nwana yam dɩ jana bam maama. Kʋ nan na yɩ kaanɩm dɩlʋ á na wʋ́ di dɩ nwana yam tɩn, á maŋɩ sɩ á lo jana bam bimbim dɩm baŋa nɩ á yagɩ mʋ.
28 Taá ye-na sɩ á taá sɛ Wɛ niə yalʋ maama amʋ na brɩ abam tɩn, sɩ kʋ pa á ŋwɩa kɩ lanyɩranɩ ka pa abam dɩ á kwaga kam maama maŋa maama, á kikiə na wʋ́ taa tɔgɩ cwǝŋǝ yɩ ya poli á Tu Baŋa-Wɛ dɩm wʋʋ tɩn ŋwaanɩ.
Ba yɩ taa zuli jwǝnǝ
29 Abam na lagɩ á zʋ dwi-gɛ tiinə lʋgʋ kʋm, á Tu Baŋa-Wɛ dɩm wʋ́ zəli-ba á yigə nɩ pa ba daarɩ ba tɩga kam sɩ á joŋi-ka á taá te. 30 Baŋa-Wɛ na tu DƖ ba DƖ cɔgɩ dwi-gɛ tiinə bam kʋntʋ, yɩ pa-na sɩ ba sʋgɩ abam sɩ á tɔgɩ ba jwǝnǝ yam. Yɩ bwe-na nɩnɛɛnɩ: ‹Nɔɔna bantʋ yǝni ba tɔgɩ cwǝŋǝ kɔɔ mʋ ba zuli ba jwǝnǝ yam? Dɩbam dɩ lagɩ dɩ́ kɩ kʋntʋ doŋ mʋ.› 31 Abam ba maŋɩ sɩ á zuli á Tu Baŋa-Wɛ dɩm nɩ bantʋ na zuli ba jwǝnǝ yam te tɩn. Bɛŋwaanɩ, dwi-gɛ tiinə bam kʋntʋ yǝni ba kɩ tɩtʋŋ-zɔɔna yalʋ maama Baŋa-Wɛ na culi tɩn ba ma zuli ba jwǝnǝ yam. Ba brɩ ba zwɛ ba biə mʋ mim wʋnɩ ba ma kɩ kaanɩm ba pa ba jwǝnǝ yam.
32 Taá ye-na sɩ á taá tɔgɩ Wɛ niə yalʋ maama amʋ na brɩ abam tɩn. Yɩ zaŋɩ-na á wǝli kʋlʋkʋlʋ ya wʋnɩ, nan yɩ lɩ-na kʋlʋkʋlʋ ya wʋnɩ á yagɩ.