13
Sampwərə naa yi-narʋ na zaŋɩ abam wʋnɩ yɩ o wuuri o ta o brɩ abam wo-kɩnkagɩla na lagɩ ya kɩ te tɩn,2 yɩ wo-kɩnkagɩla yam na sɩɩnɩ ya kɩ nɩ o na tagɩ te tɩn, oó wanɩ o sʋgɩ abam sɩ á zuli dwi-gɛ tiinə wa-yɔɔrʋ, yɩ o ta nɩnɛɛnɩ: ‹Pa-na dɩ́ zaŋɩ dɩ́ tɔgɩ wa yadonnə sɩ dɩ́ zuli-ya.›3 Sampwərə naa yi-narʋ na tagɩ kʋntʋ doŋ, yɩ cəgi-na o taanɩ. Kʋ nan yɩ á Tu Baŋa-Wɛ dɩm mʋ maanɩ abam sɩ DƖ nii, á sɩɩnɩ á soe‑DƖ dɩ á bɩcarɩ maama dɩ á wʋbʋŋa maama naa á ba soe.4 Taá tɔgɩ-na abam Tu Baŋa-Wɛ dɩm sɩ á taá kwarɩ-DƖ. Sɛ-na DƖ niə yam yɩ á cəgi DƖ kwǝrǝ kam, sɩ á taá tʋŋɩ á pa‑DƖ yɩ á salɩ‑DƖ.
5 Kʋ nan na yɩ sampwərə naa yi-narʋ kʋntʋ doŋ, kʋ maŋɩ sɩ á gʋ-o mʋ, o na sʋgɩ abam sɩ á lɔ á Tu Baŋa-Wɛ dɩm kwaga nɩ tɩn ŋwaanɩ. Baŋa-Wɛ nan yɩ wʋlʋ na jaanɩ abam DƖ ja nuŋi Ezipi tɩʋ kʋm nɩ pa DƖ vrɩ abam á gabɛɛm dɩm nɩ DƖ yagɩ tɩn mʋ. O yɩ nɔn-balɔrɔ mʋ yɩ o lagɩ sɩ o pa á ywəri Baŋa-Wɛ na pɛ abam cwǝŋǝ kalʋ sɩ á taá tɔgɩ tɩn wʋnɩ. Kʋntʋ ŋwaanɩ, á maŋɩ sɩ á saarɩ lwarɩm dɩm kʋntʋ mʋ á tɩtarɩ nɩ.
6 Kʋ ta na yɩ n nu-pugə bu, naa n tɩtɩ biə, naa n ka-sono, naa n ciloŋ-sono, kʋ tu wʋ́ wanɩ o waasɩ o ta dɩ nmʋ o wɩ: ‹Pa dɩ́ vu dɩ́ zuli wa yayam.› Wa yam kʋntʋ mʋ abam dɩ á nabaara bam ya yǝri. 7 Ya nan yɩ wa yalʋ dwi-gɛ tiinə na zuli tɩn, ba na maŋɩ ba yɩ dwiə yalʋ na bwələ dɩ abam tɩn, naa ba na yɩ yigə yigə dɩ. 8 Yɩ zaŋɩ n sɛ kʋ tu gana yam. Brɩ n yɩ cəg‑o dɩ. Daa n yɩ duri o ŋwaŋa naa n kwaanɩ n kwǝli o kikiə yam. 9 Ja-o n gʋ! Nmʋ tɩtɩ wʋ́ da yigə n dʋl-o dɩ kandwa sɩ nɔɔna babam dɩ laan tɔgɩ ba dʋlɩ. 10 Dʋl-o-na dɩ kandwa á gʋ, o na kwaanɩ sɩ o ja abam o ywəri abam Tu Baŋa-Wɛ dɩm kwaga nɩ tɩn ŋwaanɩ. Baŋa-Wɛ nan yɩ dɩlʋ na jaanɩ abam DƖ nuŋi Ezipi tɩʋ kʋm nɩ pa DƖ vrɩ abam á gabɛɛm dɩm nɩ DƖ yagɩ tɩn mʋ. 11 Yisɩrayɛlɩ tiinə bam maama na ni kʋlʋ na kɩ tɩn, fʋʋnɩ wʋ́ ja-ba, pa abam wʋnɩ nɔɔn-nɔɔnʋ daa bá tʋŋɩ kǝm-lɔŋɔ kʋntʋ doŋ.
12 Kʋ daa ta na yɩ tɩɩnɩ dɩlʋ abam Tu Baŋa-Wɛ dɩm na lagɩ DƖ pa abam sɩ á taá zʋʋrɩ dɩ wʋnɩ tɩn, á waɩ á ni wɩ: 13 nɔn-wo-kʋrrʋ tɩdonnǝ zaŋɩ tɩʋ kʋdoŋ nɩ yɩ ba sʋgɩ ba tɩʋ kʋm nɔɔna pa ba ywəri Baŋa-Wɛ cwǝŋǝ wʋnɩ sɩ ba daarɩ ba zuli wa yayam. Abam nan ya yǝri wa yam kʋntʋ zulə. 14 Á na ni kantʋ sawɩa kam doŋ, kwaanɩ-na á tɔgɩ ka nɛ sɩ á lwarɩ cɩga kam. Kʋ na yɩ cɩga mʋ nɩ tɩtʋŋ-lɔŋɔ kʋm sɩɩnɩ kʋ kɩ abam tɩtarɩ nɩ, 15 kʋ maŋɩ sɩ á zaŋɩ á kwe á sʋ-lwaanʋ mʋ á vu á gʋ tɩʋ kʋm kʋntʋ nɔɔna bam maama wuu ka, dɩ ba vara bam dɩ, sɩ á yɔɔrɩ á cɔgɩ tɩʋ kʋm kʋntʋ fasɩ. 16 Ta daarɩ-na á la ba jɩjɩgɩrʋ tɩm maama á kɩ daanɩ tɩʋ kʋm kaporo nɩ, sɩ á laan zwɛ tɩʋ kʋm dɩ kʋ woŋo maama á ma á kɩ kaanɩm á pa Baŋa-Wɛ. Kʋ maŋɩ sɩ kʋ taa yɩ di-dwəənu yɩranɩ mʋ sɩ kʋ taa ve wuu, sɩ nɔɔn-nɔɔnʋ daa yɩ joori o lɔ tɩʋ kʋm kʋntʋ. 17 Kʋ na yɩ tɩʋ kʋm wǝǝnu tɩlʋ maama na maŋɩ dɩ cɔgɩm Wɛ ŋwaanɩ tɩn, yɩ pa á fra zʋ kʋlʋkʋlʋ sɩ á kwe. Á na sɛ Baŋa-Wɛ ni dɩm kʋntʋ, DƖ banɩ wʋ́ zuri yɩ DƖ daarɩ DƖ duri abam ŋwaŋa, pa á kɔgɔ kʋm puli zanzan, nɩ DƖ na goni ni dɩ á nabaara bam sɩ DƖ kɩ te tɩn.
18 Kʋntʋ ŋwaanɩ abam maŋɩ sɩ á cəgi abam Tu Baŋa-Wɛ kwǝrǝ kam yɩ á sɛ DƖ niə yam maama, nɩ amʋ zɩm na brɩ abam te tɩn. Taá kɩ-na kʋlʋ na jɩgɩ cɩga DƖ yigə nɩ tɩn.»